Abantu Abaselula Bayabuza . . .

Kutheni Ndifanele Ndibuphephe Ubugqwirha Bomlingo?

ENYE intwazana yathi, “ndandisondelelene gqitha notatomkhulu wam, ibe xa wafayo oko kwandenzakalisa ngokugqithiseleyo. Ndandifuna ukwazi ukuba kwakunokwenzeka kusini na ukuba ndinxulumane naye kwakhona.” Ngaloo ndlela le ntwazana yaqalisa ukwenza ngokungenabuchule ngokuthi isebenzise ubugqwirha bomlingo.

Ingxelo yakutshanje yathi “ubuncinane abantwana nabantu abasebatsha abangama-200 000 abakwiNtshona Jamani baye baba namava okusebenzisa iintlobo ezahlukahlukeneyo zobugqwirha bomlingo.” IJapan inabakhafuli abayinkungu nelanga abasaqalayo abasesesikolweni, bambi beziincutshe kumandla okugqithisela iingcinga komnye umntu ngaphandle kokusebenzisa nayiphi na imiqondiso, abanye beziincutshe ekulaliseni ngomlingo, abanye beziincutshe ekukhupheni imimoya emibi. ENigeria akunto ingaqhelekanga kule mihla ukuva ngabantwana abafunda kwisikolo semfundo yabasaqalayo beqhelisela ubugqwirha. Ibe, kulusizi ukuthi, kwanolunye ulutsha olukhuliswe ngabazali abangamaKristu luye, mhlawumbi lungazi, lwadlala ngamandla angaphezu kwawemvelo.

Kutheni le nto ubugqwirha bomlingo bunomtsalane ngolo hlobo kulutsha? Ibe kutheni le nto ukubandakanyeka kubo kuyingozi kangaka nje?

Isizathu Sokuba Lubandakanyeke

Ubugqwirha bomlingo bubandakanya ukwenziwa kwezinto ngamandla angaphezu kwemvelo, ukuhlolisiswa kwelemimoya ngokujonga iinkwenkwezi, ukuvumisa, ubugqwirha, umlingo nokufanayo. Ibe siyintoni isizathu sokuba ulutsha oluninzi kangaka luzimisele ukubandakanyeka kwizinto ezinjalo? UDirk wayenomnqweno onzulu wokunxibelelana noyise owafayo. Eyisekile kukuba wayenokukwenza oku ukuba wayenokuba namandla angokwasengqondweni, wasebenzisa indlela yokucamngca awathi kuyo wazama ukwenza izinto zishukume ngaphandle kokuba azichukumise. UDirk wathi, ukucamngca okunjalo, kwambeka kwimida yemimoya!

Olunye ulutsha loyikela ikamva lalo. Lufuna icebiso elimalunga nomgangatho walo wezifundo okanye imibono ngomtshato ibe lucinga ukuba ukusebenzisana nemimoya kunokulunceda. Into ephazamisa ngokukodwa kukunqulwa kukaSathana! Yintoni etsalela kolu nqulo lubulalayo? Omnye osemtsha waseKhanada oqhelisela ubuSathana wacacisa, “Ndikolu nqulo kuba ndifuna amandla. Lundinika amandla okwenzakalisa abantu.”

Noko ke, inkoliso yabaphengululi ikholelwa ekubeni, isizathu esiyintloko sokuba ulutsha lubandakanyeke kubugqwirha bomlingo sikukufuna ukwazi nje. Enye intombazana eyabandakanyeka kubugqwirha bomlingo yavuma isithi, “Ndandifuna ukwazi gqitha.” Enye intombazana yakubeka oku ngale ndlela: “Okokuqala ndandiziva ndingaqinisekanga mpela ngabo, kodwa ndacinga, ‘Ubuncinane uya kukwazi oko ngokwenene bukuko.’” Ngoko yasamkela isimemo esasivela kumhlobo wayo sokumthelela ukuya kwintlanganiso yobugqwirha bomlingo.

Luqhutywa kukufuna ukwazi, lumbi ulutsha lwenza ilinge ekusebenziseni ibhodi yeOuija okanye luye lwenza amalinge athile ngokuhlolisisa ukushukuma kweglasi equtyudiweyo. Ukusuka apho luhamba umgama omncinane lusiya ekubandakanyekeni ngokunzulu ngakumbi ekukhafuleni ngokusebenzisa iibhola zekristale, iitarot cards, izambalo ezijingayo, amagqabi eti neencwadi ezinengxelo efundwa kwiinkwenkwezi ngobomi bomntu. Bambi bade baqalisa ukuya kubaxel’ ithamsanqa okanye amagqirha angoomakhwekhwetha. Noko ke, iingcali ezininzi, zingqineka zingabakhohlisi. Ngokomzekelo, ukuze aphucule umgangatho wakhe wezifundo, uAlexander wanxibelelana negqirha. Asikuko nokuba akazange aphucule umgangatho wakhe nje kuphela kodwa walahlekelwa yimali yakhe. Inxalenye yemali yakhe yatyiwa ligqirha elinobuqhetseba nangulowo wayefane abizwe ngokuba ngumhlobo owamncomela ukuya kulo.

Noko ke, kulutsha oluninzi, ilinge eliyingozi lokukhafula liphumela kwinto ethile ebuhlungu ngakumbi kunokulahlekelwa yimali.

‘Intuthumbo Engakholelekiyo’

Ibinzana elithi “Ukuba nje ndandazile” ngokuqhelekileyo liviwa phakathi kwabo bazisolayo ngenxa yokudlala ngamandla angaphezu kwawemvelo. Yaphawula njalo iPersonality, iphephancwadi laseMzantsi Afrika. Nanku umzekelo wentetho elusizi: “Ukuba nje ndandingazange ndibe ngongenabuchule kangako. . . . Ndiye ndeva intlungu ngenxa yentuthumbo engakholelekiyo, amazwi, amaphupha amabi awoyikekayo, izisongelo, ibe ndiye ndathuthunjiswa ngokwasengqondweni nangokwasemzimbeni ngabanye abaqhelisela ubusathana xa ndandizama ukwahlukana nabo.”

Ubuncinane ama-24 ekhulwini abafundisi-ntsapho ekwenziwa nabo uhlolisiso eJamani aphawula impembelelo ephazamisayo yobugqwirha bomlingo ebantwaneni. Bambi abafundi babesiba ngoonkom’ idla yodwa, besiba neengxaki ekufundeni, bambi babehlala besoyika, besiva intlungu yodandatheko, ibe bambi babesiba notyekelo lokuzenzakalisa okanye lokwenzakalisa abanye. Ngokufuthi uDirk wayengakwazi ukulala ebusuku. Ukhumbula oku: “Ndiphethwe luloyiko lokuba needemon, ndandingabi nabo ubuganga bokuwavala amehlo am. Ndandihlasimliswa yiyo yonke ingxolo.” Osemtsha ogama linguMichael ngokufanayo wayesiva ubuhlungu “bokungalali ebusuku ngenxa yokuhlaselwa ziidemon” emva kokuthabatha amathamo eyeza awayeyalelwe ukuba alisele. Ezinye iingxelo zichaza iinguqulelo zobuntu ezoyikekayo ezenzeka kubantu ababa nenxaxheba kuqheliselo lobugqwirha bomlingo. Enye intombazana yothusa unina ngokumxelela ukuba kwithuba elizayo yayiza kunxiba impahla emnyama (bala elo eyayikwafuna ukuba ipeyinte ngalo igumbi layo) ize ilale kwibhokisi yabafi evulekileyo!

Abemi Bokwenene Belizwe Lemimoya

Izibhalo zikwenza kucace ukuba “abafileyo abazi lutho.” (INtshumayeli 9:⁠5) Ngoko ke elemimoya alihlalwa yimiphefumlo yabo bahlukene nabathandekayo babo. Ngoko siyintoni isizathu sokuba kubekho amava awoyikisa ngolo hlobo? Ziidemon ezingendawo! Ngokutsho kweBhayibhile, ezi zizithunywa zezulu ezavukelayo, abalandeli bakaSathana uMtyholi. (1 Petros 3:​19, 20; ISityhilelo 12:⁠9) Zinembali yokwenza intlondi nokungxwelerha abantu.

Ngokomzekelo, uLuka 9:​42, usixelela ngendoda eyayineedemon leyo ‘zathi iidemon zayintlala zaza zayibetha yathi xhwenene kunene.’ Hayi indlela ezikhohlakele ngayo! Ngokufanayo IZenzo 19:​16 zichaza indlela indoda eyayineedemon eyabahlasela ngokunogonyamelo ngayo abo basixhenxe babeza kuba ngabakhuphi beedemon. Amava emihla yanamhla ngokucacileyo aqinisekisa ukuba iidemon aziziguqulanga nakancinane iindlela zazo zenkohlakalo.

Ngaloo ndlela, osemtsha oqalisa ukudlala nge-ESP, ngokujong’ iinkwenkwezi, ngeetarot cards, okanye naluphi na uhlobo lobugqwirha bomlingo ngaloo ndlela usenokuba uvulela indlela yokuba namava awothusayo. Iphephancwadi iPersonality lathi: “Ingcamango efanayo eyatyhilwa ngamava abo sathethayo nabo [ababebandakanyeke kubugqwirha bomlingo] yayikukuba batsalelwa ngokunzulu ngakumbi nangakumbi kumandla anomtsalane obusathana ngemijelo eyambathiswe ubuhle bangaphandle bokundileka.” Ewe, ubugqwirha bomlingo bungumchankcatho wokunxibelelana noSathana needemon!

‘Ubusi Obukwisitshetshe Esibukhali’

Ngoko ke uMthetho kaThixo owawubhekiswe kumaSirayeli wawuwalela ukuba enze naluphi na uhlobo lokukhafula, usithi: “Maze kungafunyanwa namnye kuwe . . . , novumisayo, nolitola, nohlaba izihlabo, nokhafulayo, nobopha ngomabophe, nobuza koneshologu, nosiyazi, noquqela kwabafileyo.”​—⁠Duteronomi 18:​10, 11.

AmaKristu enkulungwane yokuqala azihlambulula kulo naluphi na unxibelelwano nokukhafula, azitshabalalisa zonke iimpahla zobudemon. (IZenzo 19:​19) Namhlanje ulutsha olunqwenela ubuhlobo noYehova ngokufanayo luya kuyiphepha ngokucokisekileyo nayiphi na into enxulumene nobugqwirha bomlingo. Oku bekuya kuquka zonke iifilimu, iincwadi, iincwadi ezihlekisayo nezibhengezo ezibhaliweyo ezinengcamango yokukhafula. Kwanohlobo lukabani lomculo awukhethayo lufanele lube loluphicothiweyo. Ngokomzekelo, umculo onamandla, ngokuphindaphindiweyo uye wanxityelelaniswa nobuSathana.

Abantu baseTibet banentetho ethi: ‘Cinga kabini ngaphambi kokwamkela ubusi obunikwa ngesitshetshe esibukhali.’ Uzama ukulenca ubusi obukweso sitshetshe, usenokuphulukana nolwimi lwakho! Ngokufanayo, enoba amandla angaphezu kwemvelo asenokukuxhokonxa kangakanani ukufuna kwakho ukwazi, ayabulala. Ngoko sale nasiphi na isimemo sokuba nenxaxheba okanye kwanokubukela inkqubo yobugqwirha bomlingo. Into ethile ebonakala ingeyongozi njengomdlalo weglasi eshukumayo isenokukhokelela ekubandakanyekeni okuyingozi kubudemon. Kuyinyaniso ukuba, usenokufuna ukwazi. Kodwa ngaba ubuya kutya inyama ebolileyo ukuze nje ufumanise ukuba kunjani na ukutya ukudla okunetyhefu?

UDirk (okhankanywe ngaphambilana) wakwazi ukuzikhulula kubugqwirha bomlingo. Ngokufundisisa iBhayibhile ngoncedo lweempapasho zeWatch Tower Society, wayiqonda inyaniso engoyise owafayo, ibe wafunda ngethemba lovuko. (INdumiso 146:⁠4; Yohane 5:​28, 29) Le nyaniso yamkhulula kuwo nawuphi na umnqweno wokunxibelelana nelemimoya. (Thelekisa uYohane 8:​32.) Uphi uDirk ngoku? Uye wathelela izintlu zamaNgqina kaYehova ibe usebenza kwelinye lamaziko okushicilela eWatch Tower Society njengomlungiseleli wexesha elizeleyo.

Ewe, iBhayibhile iyazanelisa ‘iintswelo zethu zokomoya.’ (Mateyu 5:⁠3) Ibe ekuhambeni kwexesha, oku kwanelisa ngakumbi gqitha kunokukwanelisa ukufuna kukabani ukwazi okubulalayo ngokusebenzisa ubugqwirha bomlingo obuyingozi nobubulalayo.

[Umfanekiso okwiphepha 18]

Ukubandakanyeka kubugqwirha bomlingo kusenokuqalisa ngomdlalo obonakala ungenabungozi, njengale bhodi yeOuija okanye ukusetyenziswa kweglasi equtyudiweyo