Imbono Elungeleleneyo Ngomsebenzi
IJONI lasemkhosini elizinikeleyo lasebenza ngethuba lekhefu lasemini ukuze ligqibezele umsebenzi owawufunwa ngokungxamisekileyo ligosa lasemkhosini elikwisikhundla esiphezulu. Xa amanye amajoni asebenza nalo abuyela emsebenzini emva kwesidlo sasemini, alifumana lithe natya phezu kwento elaliyenza kwidesika yalo—lifile.
Kwisithuba nje esingaphantsi kweeyure ezimbini kamva, abo lalisebenza nabo bathi khamnqa xa umphathi wabo wabatsalela umnxeba waza wathi: “Ndilusizi ngo ———, kodwa ndifuna umntu oza kungena endaweni yakhe ngomso kusasa!” Oku kwabangela ukuba abo babesiva oku bazibuze, Ngaba ngumsebenzi obusenziwa leli gosa kuphela obulenza lixabiseke kumphathi walo?
La mava abonisa into eyenzeka ngokoqobo—ukuba ukuxabiseka komntu kudla ngokusekelwa kuphela kwindlela amsebenzela ngayo umqeshi wakhe. Oku kunokubangela ukuba ubani azibuze: Ngaba ndiphilela ukusebenza, okanye ndisebenzela ukuphila? Ziziphi izinto endizincamayo ebomini bam ngenxa yomsebenzi?
Ukwenza Ukhetho Lobulumko
Izigqibo ezibini uninzi olucinga ukuba zezona zibalulekileyo ebomini ngokufuthi zenziwa ngokungxama—ukukhetha iqabane lomtshato nokukhetha umsebenzi. Umsebenzi nomtshato wawukade ugqalwa njengento esisigxina. Ngoko ke nganye yazo yayikhethwa ngocoselelo. Ngokufuthi, kwakufunwa amacebiso kubahlobo abakhulileyo nabazali.
Noko ke, kule mihla siphila kuyo kubonakala ngathi uninzi lukhetha amaqabane omtshato lujonge imbonakalo yangaphandle kuphela, lucinga ukuba xa izinto zingahambi kakuhle, luya kufuna elinye iqabane. Ngokufanayo, uninzi lukhetha umsebenzi kuphela nje ngenxa yezithembiso namalungelo ahambisana nawo, lungakhange lunikele ngqalelo kwizinto ezingathandekiyo ngawo. Okanye izinto ezingathandekiyo ngawo luzibetha ngoyaba ngelithi, ‘ndiza kukwazi ukujamelana nazo.’
Okubuhlungu kukuba, kumazwe ahlelelekileyo amabhinqa adla ngokuthabatheka zizibhengezo ezinomtsalane ezithembisa imisebenzi enokuwenza aphile tofotofo kwenye indawo. Noko ke, xa efika kwelinye ilizwe ngokufuthi athunyelwa kwimizi yoonongogo apho aphila ubomi obunzima ngaphezu kobo bangaphambili. Ngokutsho kweWorld Press Review, olu hlobo lobukhoboka banamhlanje buhlasimlis’ umzimba “sisibetho esingayi kuze siphele.”
Ngaba abantu bangangena kumgibe wokwamkela umsebenzi obonakala ungenasikhwasilima kodwa bagqibele ngokuba kwimeko apho baziva bengamakhoboka? Oku kuye kwenzeka! Ngokomzekelo, ezinye iinkampani zithembisa abasebenzi bazo ubunewunewu obungathethekiyo. Ngokufuthi buquka amagumbi okutyela anokusetyenziswa yintsapho nabahlobo, ukulungiswa kwenqwelo-mafutha simahla, ukuhlanjelwa impahla simahla, ukuba nogqirha wamazinyo kwisakhiwo sokusebenza, ukusetyenziswa kwendawo yokwenza umthambo simahla kunye noncedo lokuhlawula iindleko zokutya kwiindawo zokutyela ezinamaxabiso aphakamileyo.
Omnye umcholacholi weendaba uRichard Reeves uthi: “Enye inkampani ide yahlawula iziko loonozakuzaku bokulungiselela amadinga okuthandana isenzela abasebenzi bayo abasebenza nzima.” Kodwa lumka! Ezi nkampani zikwenzela ubomi bube lula, phantsi kwesivumelwano esinye—ukuba uncame ubomi bakho; usebenze iiyure ezili-18 phakathi evekini nangeempela-veki, utye, wenze umthambo, uzihlaziye uze ulale eofisini usebenzela inzuzo yazo.”
Ukukhetha Umsebenzi Obhetele
Kukho isaci samandulo esithi: “Inja ephilayo ilunge ngakumbi kunengonyama efileyo.” (INtshumayeli 9:4) Esi saci sibangela ubani azibuze lo mbuzo, Ngaba umsebenzi wam ubaluleke gqitha kangangokuba ndingade ndincame ubomi nempilo yam? Ukuze ikwazi ukuphendula lo mbuzo, inkoliso yabantu iye yahlola iimeko zayo yaye iye yafumana indlela yokunyamekela iintswelo zayo ngendlela efanelekileyo—kuquka nezo zentsapho xa inayo—yaza yaphila ubomi obonwabisayo nobunenjongo.
Liyinyaniso elokuba, ukwenjenjalo kufuna ukuthobeka yaye kunokufuna ukuba ubani enze isigqibo ngezinto eziyimfuneko kuye, kunokuba acinge ngezinto anqwenela ukuba nazo. Abo bafuna intlonelo nodumo banokungafuni ukwenza umsebenzi obonakala uphantsi bade babajongele phantsi abo bawenzayo. Kodwa yintoni ngokwenene ebalulekileyo ebomini? Ngaba kutshanje ukhe wahlala phantsi waza wacingisisa nzulu ngoku?
UKumkani uSolomon osisilumko, owabhala isaci esicatshulwe ngasentla, wayenobutyebi bezinto eziphathekayo obuninzi phantse kunaye nabani na owakha waphila. Kodwa xa wayebhala ngeyona nto ibalulekileyo, esalathiswa ngumoya oyingcwele wabhala wathi: “Ukuqosheliswa kombandela, emva kokuba yonk’ into iviwe, naku: Yoyika uThixo oyinyaniso uze ugcine imiyalelo yakhe. Kuba oku kuyimbopheleleko yomntu.”—INtshumayeli 12:13.
Kwangaxeshanye, uSolomon wayekuxabisile ukusebenza. Wabhala wathi: “Akukho nto elunge ngakumbi emntwini kunokuba adle, asele aze enze umphefumlo wakhe ubone okulungileyo ngenxa yokusebenza kwakhe nzima.” (INtshumayeli 2:24) Ngokufanayo, uYesu Kristu, uSolomon Omkhulu, ukuxabisile ukusebenza, njengoko enjalo noYise osezulwini. UYesu wathi: “UBawo uyasebenza kude kube ngoku, nam ke ndiyasebenza.”—Yohane 5:17; Mateyu 12:42.
Ukanti okwakalokunje, ubomi bomntu bufutshane. (INdumiso 90:10) Kodwa uKristu wayesazi ukuba kuza kunanditshwa ubomi obungenasiphelo emhlabeni phantsi kolawulo loBukumkani, awafundisa abalandeli bakhe ukuba babuthandazele. Kungenxa yeso sizathu lento kwiNtshumayelo yakhe yaseNtabeni edumileyo wabongoza ngelithi: “Qhubekani, ke ngoko, nifuna kuqala ubukumkani nobulungisa [bukaThixo], yaye zonke ezinye izinto ziya kongezelelwa kuni.”—Mateyu 6:9, 10, 33.
Ngokuphathelele ubomi phantsi kolawulo lobo Bukumkani, iBhayibhile ithembisa ngelithi: “Ngokuqinisekileyo baya kwakha izindlu baze bahlale; batyale izidiliya baze badle isiqhamo sazo. Abayi kwakha kuhlale abanye; . . . nomsebenzi wezandla zabanyuliweyo bam baya kuwusebenzisa ngokupheleleyo.”—Isaya 65:21, 22.
Elinjani ithemba—ukunandipha ubomi obungenasiphelo obuquka umsebenzi owanelisayo! Ukujonga iimeko zethu ngenyameko kunokusenza sibone ukuba sifanele sihlolisise ngokutsha iinkalo ezithile zomsebenzi esiwenzayo namhlanje ukuze siphephe iingozi ezinokubakho ezinokusenza siphulukane nelungelo lokunandipha ‘ubomi benene’—ubomi obuzayo phantsi koBukumkani bukaThixo. (1 Timoti 6:19) Ngoko kwanga emsebenzini wethu, okanye kuyo nayiphi na into esiyenzayo, singabonisa ukuba siyamhlonela Lowo usinike ubomi.—Kolose 3:23.
[Imifanekiso ekwiphepha 28, 29]
Phantsi koBukumkani bukaThixo, abantu baya kunandipha ukwenza umsebenzi okhuselekileyo nonomvuzo