Abafundisi-ntsapho—Kutheni Beyimfuneko Nje Kuthi?
“Ungafunda iwaka leentsuku uzimisele kodwa imini nje enye udibane nomfundisi-ntsapho ophum’ izandla ubone umahluko omkhulu.”—Iqhalo laseJapan.
NGABA uyamkhumbula umfundisi-ntsapho owawumthanda gqitha usesesikolweni? Okanye ukuba usafunda, ngaba kukho umfundisi-ntsapho othe ngco kuwe entliziyweni? Ukuba kunjalo, kutheni?
Umfundisi-ntsapho ophum’ izandla uzenza athenjwe yaye wenza ukufunda kube lucelomngeni olumnandi. Enye ingwevu yaseNgilani eneminyaka engama-70 ubudala iziva kamnandi xa ikhumbula umfundisi-ntsapho wayo wesiNgesi kwisikolo saseBirmingham. “UMnu. Clewley wandibonisa ubuchule endandingazi ukuba ndinabo. Ndandineentloni kwaye ndisisiqhuza kodwa wandikhuthaza ukuba ndingenele ukhuphiswano lomdlalo weqonga esikolweni. Kunyaka wam wokugqibela, ndaphumelela ibhaso lomdlalo weqonga. Ndandingenakuyenza loo nto ukuba wayengandikhuthazanga. Ngelishwa kwiminyaka esemva koko andizange ndimbone ukuze ndimbulele ngokuzinikela kwakhe kubafundi awayebafundisa.”
UMargit, ibhinqa elinobuhlobo elikwiminyaka engama-50 ubudala, laseMunich, eJamani, lithi: “Kukho umfundisi-ntsapho endandimthanda ngokukhethekileyo. Wayekwazi kakuhle ukuchaza izinto ezintsonkothileyo ngendlela elula. Wayesikhuthaza ukuba sibuze imibuzo xa singaqondi. Wayengazibambi kodwa wayenobuhlobo. Loo nto yayisenza izifundo zinandipheke.”
UPeter, waseOstreliya, ukhumbula umfundisi-ntsapho owayemfundisa izibalo, athi “wayesinceda sibone ukubaluleka kwento esiyifundayo ngokunikela imizekelo esebenzisekayo. Xa sifunda ngetrigonometri, wasibonisa indlela yokulinganisa isakhiwo singasondelanga kwaukusondela kuso, ngokusebenzisa imigaqo yetrigonometri. Ndikhumbula ndizixelela ukuba, ‘Ndiyithanda nyhani ke le into!’”
UPauline, wasemantla eNgilani, wathi xa wayezityand’ igila kumfundisi-ntsapho wakhe: “Ayandoyisa amanani.” Wambuza oku: “Ubungathanda ukwenza bhetele kuwo? Ndingakunceda.” Uqhubeka athi: “Kwiinyanga ezimbalwa ezalandelayo, wanikela ingqalelo ekhethekileyo kum, endinceda naxa sele kuphume isikolo. Ndandisazi ukuba ufuna ndiphumelele—nokuba wayendikhathalele. Ukwazi loo nto kwandinceda ndazimisela ndaza ndaphucula.”
UAngie, waseSkotlani, ngoku okwiminyaka engama-30 ubudala, ukhumbula uMnu Graham, owayemfundisa ezembali. “Wazenza ezembali zabangela umdla gqitha! Wayebalisa iziganeko ngathi ubalisa ibali yaye wayeba nomdla wesifundo ngasinye. Wayesenza sibe yinto yokwenene.” Kwakhona uneenkumbulo ezintle ngoNkosk. Hewitt, umfundisi-ntsapho osele ekhulile wamabanga abasaqalayo. “Wayenobubele nenkathalo. Ngenye imini eklasini, ndaya kumbuza umbuzo. Wandiwola. Ngokwenene wandenza ndavakalelwa kukuba uyandikhathalela.”
UTimothy, osuka emazantsi eGrisi, wavakalisa uxabiso analo. “Ndisamkhumbula nangoku umfundisi-ntsapho owayendifundisa ezenzululwazi. Wayitshintsha ngendlela engacimiyo indlela endilijonga ngayo ihlabathi elindingqongileyo nobomi ngokubanzi. Wayelenza libe nesithinzi igumbi lokufundela, asishiye simangalisiwe. Wabethelela kuthi ukuthanda ulwazi nokuthanda ukuqonda.”
Omnye umzekelo ngokaRamona, waseKhalifoniya, eUnited States. Ubhala athi: “Umfundisi-ntsapho owayendifundisa kwisikolo samabanga aphakamileyo wayesithanda isiNgesi. Wasifaka umoya wokuzimisela! Wenza nezona zinto zazibonakala zinzima zalula.”
UJane waseKhanada, wathetha esemdleni ngomfundisi-ntsapho wezifundo zomthambo “owayesazi gqitha ngokuzihlaziya nokufunda. Wayedla ngokusikhupha sihambe emkhenkceni sinqumla amazwe nokuloba emkhenkceni. Sasidla ngokubhaka ibannock, uhlobo lwesonka saseIndiya, kwimililo esasiyibasa ezintenteni. Konke oku kwakungamava amangalisayo kwintombazana ehleli nje isendlwini iqolozele encwadini!”
UHelen linenekazi elineentloni elazalelwa eShanghai laza lahamba isikolo eHong Kong. Ukhumbula oku: “Xa ndandikwibakala lesihlanu, ndafundiswa nguMnu. Chan, izifundo zomthambo nokuzoba. Ndandicekecekana ndingakwazi ukudlala ivolleyball nebhola yomnyazi. Akazange aphoxise ngam. Wayendivumela ndidlale intenetya neminye imidlalo endandiyidlala kakuhle. Wayenolwazelelelo nobubele.
“Nasekuzobeni—ndandingelochule ekuzobeni izinto okanye abantu. Ngoko wandivumela ukuba ndingenza iipateni kuba ke ndandinobuchule ekuzenzeni. Kuba ndandimncinane kunabanye abafundi, wandicela ukuba ndihlale omnye unyaka kwelo bakala. Yatshintsha indlela endisijonga ngayo isikolo. Ndazithemba ndaza ndenza inkqubela. Ndakuhlala ndimbulela.”
Ngabaphi abafundisi-ntsapho ababonakala benegalelo kakhulu? UWilliam Ayers uphendula athi kwincwadi yakhe ethi To Teach—The Journey of a Teacher: “Ukuze umfundisi-ntsapho abe ufundisa kakuhle, kufuneka acingisise, abe nenkathalo ngabafundi abafundisayo. . . . Ukufundisa kakuhle akufuni buchule buthile okanye isimbo, ucwangciso okanye izenzo. . . . Eyona nto ibalulekileyo ekufundiseni luthando.” Ngoko ngubani ongumfundisi-ntsapho ophumelelayo? Uthi: “Ngumfundisi-ntsapho owachukumisa intliziyo yakho, umfundisi-ntsapho owayekuqonda okanye owayekukhathalela, umfundisi-ntsapho owayethanda into ethile—umculo, izibalo, isiLatini, okanye iikayiti—ngendlela echukumisayo nekhuthazayo.”
Ngaphandle kwamathandabuzo, abafundisi-ntsapho abaninzi baye babulelwa ngabafundi kwanangabazali yaye ngenxa yoko baye bakhuthazeka ukuba baqhubeke befundisa phezu kwazo nje ezinye iinkathazo. Eyona nto ibangela ukuba kuvele la magqabaza ngumdla onyanisekileyo nobubele obuye baboniswa ngaba bafundisi-ntsapho kubafundi.
Kambe ke, asingabo bonke abafundisi-ntsapho ababonisa isimo sengqondo esihle ngolo hlobo. Enye into, abafundisi-ntsapho basoloko bezizisulu zoxinezeleko oluninzi olubandeza oko banokukwenzela abafundi ababafundisayo. Oku kusenza sibuze lo mbuzo, Kutheni abantu bekhetha umsebenzi onzima ngolo hlobo?
[Umfanekiso okwiphepha 4]
“Eyona nto ibalulekileyo ekufundiseni luthando”