Kutheni Besiba Ngabafundisi-ntsapho?
“Abafundisi-ntsapho abaninzi bakhetha loo msebenzi kuba ingowokunceda. [Ukufundisa] yimbopheleleko yokuphucula ubomi babantwana.”—Teachers, Schools, and Society.
NANGONA abanye abafundisi-ntsapho bekwenza kubonakale kulula, ukufundisa kunokuba lucelomngeni—ukuhlangabezana neeklasi eziphuphumayo ngabafundi, ukusebenza ngamaphepha amaninzi, umsebenzi onzima gqitha, abafundi abangenantsebenziswano nokungahlawulwa kakuhle. UPedro, ongumfundisi-ntsapho waseMadrid eSpeyin, ukubeka ngolu hlobo oku: “Akulula kwaphela ukuba ngumfundisi-ntsapho. Kufuna ukuzincama ngokupheleleyo. Noko ke, phezu kwabo nje ubunzima, ndisakugqala ukufundisa kunomvuzo kakhulu kunokusebenza kwezoshishino.”
Ucelomngeni lunokude lube ngakumbi kwizikolo ezikwizixeko ezikhulu kumazwe amaninzi. Iziyobisi, ulwaphulo-mthetho, ukuziphatha vakalala yaye maxa wambi ukungakhathali kwabazali kuyichaphazela kakhulu imeko-bume nembeko esikolweni. Imvukelo yakhele. Ngoko kutheni abantu abaninzi abafundileyo bekhetha ukuba ngabafundisi-ntsapho?
ULeemarys noDiana bangabafundisi-ntsapho kwisiXeko saseNew York. Bakwisikolo sabantwana abancinane ukuya kutsho kwabaneminyaka elishumi ubudala. Bobabini bathetha iilwimi ezimbini (isiNgesi nesiSpanish) yaye ubukhulu becala bakunye nabantwana abangamaHispanic. Sababuza oku . . .
Yintoni Ekhuthaza Umfundisi-ntsapho?
ULeemarys wathi: “Yintoni endikhuthazayo mna? Ndiyabathanda abantwana. Ndiyazi ukuba abanye abantwana ndim kuphela obaxhasayo kwimigudu yabo.”
UDiana wathi: “Ndandifundisa umtshana wam oneminyaka esibhozo ubudala, owayeneengxaki esikolweni—ingakumbi ekufundeni. Ndaziva ndanelisekile kukubona yena nabanye befunda! Ngoko ndagqiba kwelokuba ndifuna ukufundisa yaye ndawulahla umsebenzi endandiwenza ebhankini.”
UVukani! wabuza umbuzo ofanayo kubafundisi-ntsapho abakumazwe awahlukeneyo, yaye nazi ezinye iimpendulo eziye zafunyanwa kubo.
UGiuliano, iTaliyane elikwiminyaka engama-40 ubudala, wathi: “Ndawukhetha lo msebenzi kuba ndawuthanda ndisafunda (ngasekunene). Ndawugqala njengowobuchule yaye unceda abanye. Ukuzimisela kwam ekuqaleni kwandinceda ndahlangabezana nobunzima endabufumanayo ndisaqala kulo msebenzi.”
UNick, waseNew South Wales, eOstreliya, wathi: “Kwakungekho themba lokuba ndakufumana umsebenzi endandiwufundele wokuphanda ngemichiza, kodwa ayemaninzi amathuba kwezemfundo. Ukususela ngoko ndiye ndafumanisa ukuba ndiyakuthanda ukufundisa, yaye nabafundi babonakala beyinandipha indlela endifundisa ngayo.”
Ngokufuthi ubukhulu becala abo bakhetha ukuba ngabafundisi-ntsapho baye babonela umzekelo wabazali babo. UWilliam, waseKenya, wasiphendula wathi: “Umnqweno wam ubukhulu becala waphenjelelwa ngutata, owayengumfundisi-ntsapho emva phayaa ngowe-1952. Ukwazi ukuba ndiqoqosha iingqondo zabantu abaselula kuyeyona nto ibangela ukuba ndingawuyeki lo msebenzi.”
URosemary, naye ongowaseKenya, wasixelela oku: “Ndandisoloko ndinomnqweno wokunceda abantu abahlwempuzekileyo. Ngoko kwafuneka ndikhethe phakathi kokuba ngumongikazi okanye umfundisi-ntsapho. Kwaqala kwafika isithuba sokufundisa. Kwakhona isibakala sokuba nam ndinabantwana siye salwenza banzi uthando lwam ngalo msebenzi.”
UBerthold, waseDüren, eJamani, washukunyiswa yinto eyahlukileyo ukuba afundise: “Umfazi wam wandiqinisekisa ukuba ndinokuba ngumfundisi-ntsapho olungileyo.” Yaye kwathi kanti unyanisile. Wongezelela ngelithi; “Ngoku undivuyisa gqitha umsebenzi wam. Ukuba umfundisi-ntsapho akakuboni ukubaluleka kwemfundo yaye akabathandi abantu abaselula, akanakuba ngumfundisi-ntsapho olungileyo, ophumelelayo, ozimiseleyo nowanelisekileyo.”
Umfundisi-ntsapho waseJapan, uMasahiro, wesiXeko saseNakatsu, wathi: “Ndakhetha ukuba ngumfundisi-ntsapho ngenxa yomfundisi-ntsapho onobuchule owayendifundisa kunyaka wokuqala kwisikolo samabanga aphakamileyo. Wayezinikela kakhulu xa esifundisa. Kwaye esona sizathu siphambili sokuqhubeka kwam nalo msebenzi kukuthanda abantwana.”
UYoshiya, ngoku oneminyaka engama-54 ubudala nosuka eJapan, wayesebenza kumzi-mveliso owawumhlawula kakuhle kodwa eziva elikhoboka kuwo nasekuhleni enyuka. “Ngenye imini ndazibuza, ‘Kuya kude kube nini ndiphila ngolu hlobo?’ Ndakhetha umsebenzi ondidibanisa kakhulu nabantu kunezinto. Ukufundisa kukhethekile. Usebenza nabantu abaselula. Kukunceda usebenzisane kakuhle nabantu.”
UValentina, waseSt. Petersburg, eRashiya naye uyakuxabisa ukuba ngumfundisi-ntsapho. Wathi: “Ndakhetha ukufundisa. Bendifundisa kwisikolo samabanga aphantsi kangangeminyaka engama-37. Ndiyathanda ukusebenza nabantwana, ingakumbi abaselula. Ndiyawuthanda umsebenzi wam, yiyo naloo nto ndingekawuthabathi umhlala-phantsi.”
UWilliam Ayers, ongumfundisi-ntsapho wabhala wathi: “Abantu babizelwa ukuza kufundisa kuba bethanda abantwana nolutsha, okanye ngenxa yokuba bethanda ukuba kunye nabo, ukubabukela bekhula bakwazi ukwenza izinto, babe lulutho, babe ziintsika zehlabathi. . . . Abantu bayafundisa . . . njengezipho kwabanye. Ndiyafundisa ngethemba lokwenza ihlabathi libe yindawo ebhetele.”
Ewe, phezu kwazo nje iinzima namanzithinzithi, amawaka amadoda namabhinqa azinikeleyo ayatsaleleka kubizo lokufundisa. Ziziphi ezinye iingxaki ezinkulu abajamelana nazo? Inqaku elilandelayo liza kuwuxubusha lo mbuzo.
[Ibhokisi ekwiphepha 6]
Amacebiso Ngendlela Yokunxibelelana Komfundisi-ntsapho Nomzali
✔ Bazi abazali. Asikokuchitha ixesha. Kukulisebenzisa ngokuyingenelo ixesha. Lithuba lakho lokwakha ulwalamano nabo banokusebenzisana nawe bhetele.
✔ Yiba kumgangatho omnye nomzali—musa ukumphakamela. Phepha ukusebenzisa isigama esisetyenziswa ngabafundisi-ntsapho.
✔ Xa uthetha ngabantwana, balaselisa izinto ezintle abazenzayo. Ukuncoma kuluncedo gqitha kunokugxeka. Chaza oko kunokwenziwa ngabazali ukuze bancede umntwana aphumelele.
✔ Banike ithuba lokuthetha abazali, uze uphulaphule ngenyameko.
✔ Qonda imeko-bume yekhaya lomntwana. Ukuba kunokwenzeka, tyelela ikhaya lakhe.
✔ Beka umhla wokudibana kwakhona. Kubalulekile ukulondoloza unxibelelwano. Kubonisa ukuba unomdla onyanisekileyo.—Asekelwe kwiTeaching in America.
[Umfanekiso okwiphepha 6]
‘Notata wayengumfundisi-ntsapho.’—UWILLIAM, WASEKENYA
[Umfanekiso okwiphepha 7]
“Ndiyathanda ukusebenza nabantwana.”—UVALENTINA, WASERASHIYA
[Imifanekiso ekwiphepha 7]
“Ukufundisa kukhethekile. Usebenza nabantu abaselula.”—UYOSHIYA, WASEJAPAN