Imbono YeBhayibhile
Ukuziva Unetyala—Ngaba Kusoloko Kuphosakele?
NAMHLANJE abantu abaninzi bakugqala njengento engathandekiyo ukuziva unetyala. Bavakalelwa ngendlela esasivakalelwa ngayo isithandi sobulumko saseJamani uFriedrich Nietzsche, owathi: “Ukuziva unetyala kokona kugula kungathandekiyo okwakha kwathwaxa uluntu.”
Kodwa bambi abaphandi bafikelela kwisigqibo esahlukileyo. UGqr. Susan Forward, ugqirha nombhali owaziwayo ehlabathini lonke uthi: “Ukuziva unetyala luphawu olubalulekileyo olubonisa ukuba ungumntu oneemvakalelo nokwaziyo ukusingatha iimbopheleleko. Kusebenza njengenxalenye yesazela.” Ngoko ke, ngaba lonke uhlobo lokuziva unetyala luphosakele? Ngaba zikho iindlela ekunokuba luncedo ngazo ukuziva unetyala?
Kuyintoni Ukuziva Unetyala?
Siziva sinetyala xa sibona ukuba senze buhlungu umntu esimkhathaleleyo okanye xa singakhange siyifikelele imilinganiselo esizibekele yona. Njengoko enye incwadi isitsho, ukuziva unetyala kubhekisela “kwimvakalelo yokufuna ukulungisa umonakalo owenzileyo ngenxa yokungakwazi ukufikelela umlinganiselo othile, ukukhubekisa umntu othile, ukwaphula umthetho okanye ukwenza isono.”
KwiZibhalo zesiHebhere, ukuziva unetyala kwakunxulunyaniswa nokungakwazi kwamaSirayeli ukuphila ngoMthetho kaThixo—yaye ngaphezu kwesiqingatha sezo mbekiselo zifumaneka kwincwadi yeBhayibhile yeLevitikus neyeNumeri. Okubangel’ umdla kukuba eli binzana alifane lisetyenziswe kwiZibhalo zamaKristu zesiGrike. Kodwa liyavela izihlandlo ezimbalwa, nalapho libhekisela kwizono ezinzulu ezinxamnye noThixo.—Marko 3:29; 1 Korinte 11:27.
Okubuhlungu kukuba, sinokuziva sinetyala ngoxa eneneni singenalo. Ngokomzekelo, ukuba umntu uthanda izinto ezigqibeleleyo yaye uthanda ukuzibekela usukelo ekungekho ngqiqweni ukulufikelela, nanini na engalufikeleli olo sukelo unokuziva enetyala ngokungeyomfuneko. (INtshumayeli 7:16) Okanye sinokuvumela intlungu efanelekileyo ebangelwa yimpazamo okanye ububi esiye sabenza ikhule ize isenze sibe neentloni size ekugqibeleni sizohlwaye ngokungeyomfuneko. Ngoko ke, kunokusinceda njani ukuziva sinetyala?
Ukuziva Unetyala Kunokuba Luncedo
Ukuziva unetyala kunokuba luncedo ubuncinane ngeendlela ezintathu. Okokuqala, kubonisa ukuba siyiphaphele imilinganiselo eyamkelekileyo. Kubonisa ukuba sinesazela esisebenzayo. (Roma 2:15) Eneneni, incwadi epapashwe yiAmerican Psychiatric Association ithi ukuphela kokuziva unetyala sisisongelo kwibutho labantu. Abo banezazela ezifileyo okanye ezingasebenziyo banengxaki yokwahlula phakathi kokulungileyo nokubi, yaye oko kunokuba yingozi.—Tito 1:15, 16.
Okwesibini, ukuziva unetyala kunokusinceda siphephe ukwenza izinto ezingafanelekanga. Kanye njengoko intlungu esenyameni isenza siphaphele ukugula okuthile, intlungu engokweemvakalelo ehambisana nokuziva unetyala isenza siphaphele ingxaki efuna ingqalelo yethu kwihambo okanye kwimeko yethu yokomoya. Xa sibuqonda obo buthathaka, sishukunyiselwa ukuba sikuphephe ukuzenza buhlungu okanye ukuvisa ubuhlungu abo sibathandayo okanye ukuvisa abanye ubuhlungu kwixesha elizayo.—Mateyu 7:12.
Okokugqibela, ukuvuma ukuba sinetyala kunokunceda lowo uziva enetyala kunye nalowo woniweyo. Ngokomzekelo, ukuziva kukaKumkani uDavide enetyala kwakuhambisana nokungcungcutheka okunzulu. Wabhala wathi: “Ndithi ndakuthi cwaka aphele amathambo am kukugcuma kwam imini yonke.” Kodwa xa ekugqibeleni wavuma isono sakhe kuThixo, ngovuyo uDavide wavuma ngokuvakalayo wathi: “Uya kundingqonga ngentswahla yemivuyo yokusindiswa.” (INdumiso 32:3, 7) Ukuvuma isono kunokwenza nalowo woniweyo azive bhetele ngenxa yokuba ukuvuma ukuba uziva unetyala kunokwenza loo mntu woniweyo aqiniseke ukuba loo mntu uyamthanda ngokwaneleyo ukusa kwinqanaba lokuzisola ngokumenza buhlungu kangako.—2 Samuweli 11:2-15.
Imbono Elungeleleneyo Ngokuziva Unetyala
Ukuze ube nembono elungeleleneyo ngokuziva unetyala, phawula umahluko omkhulu phakathi kwendlela uYesu nabaFarisi ababebajonga ngayo aboni nesono. KuLuka 7:36-50, sifunda ngebhinqa elaliziphethe kakubi elangena endlwini yomFarisi apho uYesu wayesidla khona. Langena laya kuYesu, lahlamba iinyawo zakhe ngeenyembezi zalo, laza laziqhola ngeoli yexabiso eliphezulu.
Omnye umFarisi ozinikeleyo walijongela phantsi eli bhinqa njengelingafanelwanga yingqalelo yakhe. Wazixelela oku: “Lo mntu [uYesu], ukuba ebengumprofeti, ngesazi ukuba ngubani yaye luhlobo luni lomfazi alulo lo umchukumisayo, ukuba ungumoni.” (Luka 7:39) Ngokukhawuleza uYesu wayilungisa indlela awayecinga ngayo. UYesu wathi: “Akuyithambisanga intloko yam ngeoli; kodwa lo mfazi uthambise iinyawo zam ngeoli yobulawu. Ngenxa yoko, ndiyakuxelela, izono zakhe, nakuba zizininzi, zixolelwe, ngenxa yokuba uthande kakhulu.” Ngokungathandabuzekiyo la mazwi obubele alikhuthaza eli bhinqa aza avuyisa intliziyo yalo.—Luka 7:46, 47.
UYesu wayengakuqhwabel’ izandla ukuziphatha okubi. Kunoko, wayefundisa umFarisi onekratshi ukuba uthando yeyona nto ifanele ishukumise abantu ukuba bakhonze uThixo. (Mateyu 22:36-40) Noko ke, yayiyinto efanelekileyo ukuba eli bhinqa lizive linetyala ngehambo yalo yangaphambili yokuziphatha okubi. Ngokucacileyo, laliguqukile, kuba lalila, alizange lizame ukuyithethelela ihambo yalo yangaphambili, yaye lathabatha amanyathelo afanelekileyo okubonisa intlonelo ngoYesu esidlangalaleni. Ebona oku, uYesu wathi kulo: “Ukholo lwakho lukusindisile; hamba ngoxolo.”—Luka 7:50.
Kwelinye icala, lo mFarisi waqhubeka elijongela phantsi njengomoni. Mhlawumbi wayefuna ‘ukulenza loyike uThixo’ nokulenza lidane. Kodwa ukusoloko usenza abanye bazive benetyala xa bengenzi izinto ngendlela esicinga ukuba bafanele bazenze ngayo asikokubonisa uthando yaye, ekugqibeleni, akunangenelo. (2 Korinte 9:7) Kubakho imiphumo emihle xa uxelisa uYesu—ngokubeka umzekelo ofanelekileyo, ngokuncoma abanye ngokunyanisekileyo, nangokubenza bazi ukuba ubathembile nangona maxa wambi kunokufuneka ukuba ubakhalimele uze ubaluleke.—Mateyu 11:28-30; Roma 12:10; Efese 4:29.
Ngoko ke, ukuziva unetyala kunokuba yinto entle, maxa wambi kube yimfuneko xa senze into ephosakeleyo. IMizekeliso 14:9 (Knox) ithi: “Izidenge zilenza libonakale lilincinane ityala elifuna ukucanyagushelwa.” Ukuziva sinetyala kunokusenza yaye kufanele kusenze sivume ityala lethu size sithabathe amanyathelo afanelekileyo. Noko ke, esona sizathu singundoqo sokuba sikhonze uYehova ngamaxesha onke ifanele ibe luthando, kungekhona ukuziva sinetyala. (Yobhi 1:9-11; 2:4, 5) IBhayibhile iyasiqinisekisa ukuba xa abantu abalungileyo bekhuthazwa yaye bekhumbula oku, baya kukwenza konke okusemandleni abo. Okona kubaluleke nangakumbi kukuba, baya kukuvuyela ukwenjenjalo.