Abantu Abaselula Bayabuza . . .

Ngaba Ndenze Isono Esingaxolelekiyo?

“ANDIZANGE ndidakumbe ngolo hlobo. Ndandingasazihloneli, yaye ndandicinga ukuba uThixo akanakuze andixolele.”—UMarco.a

“Ndandidimazeke gqitha. Ukuziva ndinetyala kwakuyikhathaza intliziyo yam. Ndandicinga ukuba ndenze iimpazamo ezingaxolelekiyo.”—UAlberto.

IBhayibhile ithi: “Akukho mntu ungoniyo.” (1 Kumkani 8:46) Kodwa maxa wambi oselula usenokuvakalelwa kukuba uye wenza into engaphezulu kunempazamo nje eqhelekileyo. NjengoMarco noAlberto, usenokucinezelwa kukuziva enetyala ngokuzingisileyo. Usenokuvakalelwa kukuba oko akwenzileyo kungcole kakhulu, yaye kubi gqitha, kangangokuba uThixo akanakuze amxolele.

Kuthekani ukuba ukhathazwa ziimvakalelo ezinjengezi? Khalipha. Imeko yakho asiyiyo enganik’ ithemba.

Isizathu Sokuba Isazela Sethu Sisithuthumbise

Kuyinto yokwemvelo ukuziva unetyala xa wenze impazamo yobudenge. Sonke sizalwa sinamandla iBhayibhile ewabiza ngokuba ‘sisazela.’ Siyingqiqo yangaphakathi yokucalula okulungileyo nokubi, isilumkiso sangaphakathi esidla ngokusithunuka xa sisenza into ephosakeleyo. (Roma 2:14, 15) Ngokomzekelo, khawuqwalasele imeko kaKumkani uDavide. Wakrexeza nomfazi wenye indoda. Kamva, wabulalisa indoda yakhe, u-Uriya. (2 Samuweli 11:2-17) Saba yintoni isiphumo kuDavide?

UDavide wavuma: “Imini nobusuku, besinzima phezu kwam isandla [sikaThixo].” Ewe, wayesiva ubunzima bokungakholiswa kukaThixo nguye. Kwakhona uDavide wathi: “Akukho kuphila emathanjeni am, ngenxa yezono zam. Ngokuba ubugwenxa bam bugqithile entlokweni yam, bundisinda njengomthwalo onzima. . . . Yonke imini ndihambahamba ngezimnyama zokuzila.” (INdumiso 32:4; 38:3-6) Isazela sikaDavide saqhubeka simkhathaza de washukunyiselwa ukuthabatha isenzo esifanelekileyo waza waguquka kwimpazamo yakhe.

Ngendlela efanayo, ukuba ufundiswe ngabazali abangamaKristu waza waphambuka kwimilinganiselo yeBhayibhile, uya kuziva unetyala. Le mvakalelo yokuzisola iqhelekile, iphilile. Inokubangela umntu azilungise okanye afune uncedo ngaphambi kokuba ububi bube ngumkhwa owendeleyo. Kwelinye icala, umntu ozingisayo ekoneni uyasonakalisa isazela sakhe. Ekuhambeni kwexesha siyafa, njengolusu olutshileyo. (1 Timoti 4:2) Ngokuqinisekileyo kulandela ukonakala ngokokuziphatha.—Galati 6:7, 8.

Ubuhlungu Bokuhlonela UThixo

Ngoko, akumangalisi ukuba iBhayibhile ithethe ‘ngesono esisingisa ekufeni.’ (1 Yohane 5:16; thelekisa uMateyu 12:31.) Isono esinjalo asibobuthathaka nje benyama. Senziwa ngabom, ngenkani nangobuntamo lukhuni. Ubukhulu becala ayisosono ngokwaso kodwa yimeko yentliziyo yomoni eyenza isono singaxoleleki.

Phofu ke, isibakala sokuba uziva ubuhlungu yaye ubandezelekile ngenxa yehambo yakho ephosakeleyo, sibonisa ukuba awenzanga sono singaxolelekiyo. IBhayibhile ithi “ubuhlungu obungokukaThixo busebenza inguquko esingisa elusindisweni.” (2 Korinte 7:10) Eneneni, phawula isiluleko esinikelwa kuYakobi 4:8-10: “Hlambululani izandla, boni, nenze nyulu intliziyo, nina bamphefumlo umbaxa. Yibani ziindwayi, nikhedame, nilile; ukuhleka kwenu makujike kube kukukhedama, nalo uvuyo lwenu lube kukuthi dakumba. Zithobeni emehlweni eNkosi, yoniphakamisa.”

Liyinyaniso elokuba isenzo esiphosakeleyo sisenokuba sesibi gqitha. Ngokomzekelo, uJulie oselula wabandakanyeka ekwanganeni nasekuphathaphathaneni nenkwenkwe awayethandana nayo. Uyavuma: “Ndaziva ndinetyala gqitha ekuqaleni, kodwa njengokuba ixesha lalihamba ndakuqhela. Kwakungasikhathazi kangako isazela sam.” Ekuhambeni kwexesha, izenzo ezingcolileyo zakhula ukusa kwinqanaba lokuba neentlobano zesini. UJulie uthi: “Ndaziva ndibuhlungu. Isazela sam saba buthathaka ukusa kwinqanaba lokuba oku kwenzeke izihlandlo eziliqela.”

Ngaba imeko enjalo ayinik’ ithemba? Akunjalo. Kuthekani ngoManase, omnye wookumkani bakwaYuda? Wenza izono ezinzulu gqitha, kuquka ukusebenzelana nemimoya nokubingelela ngabantwana. Ukanti, uThixo wamxolela ngenxa yokuguquka kwakhe ngokunyanisekileyo. (2 Kronike 33:10-13) Kuthekani ngoKumkani uDavide? Ekubeni waguqukayo kwizenzo zakhe ezingendawo, wamfumanisa uYehova enguThixo ‘olungileyo noxolelayo.’—INdumiso 86:5.

Namhlanje amaKristu anesi siqinisekiso: “Ukuba sithi sizivume izono zethu, uthembekile, ulilungisa, ukuba asixolele izono zethu, asihlambulule kuko konke ukungalungisi.” (1 Yohane 1:9) Ubani ufanele avume kubani? Ngokuyintloko, kuYehova uThixo. “Phalazani intliziyo yenu phambi kwakhe.” (INdumiso 32:5; 62:8) Usenokukufumanisa kuluncedo ukufunda indlela uDavide azivuma ngokulusizi ngayo izono kwiNdumiso 51.

Ukongezelela, iBhayibhile ibongoza amaKristu aye awela kwisono esinzulu ukuba athethe nabadala bebandla. (Yakobi 5:14, 15) Isiluleko nomthandazo wabo onyanisekileyo unokukunceda uhlaziye ulwalamano lwakho noThixo uze uzuze isazela esicocekileyo kwakhona. Banokuwuqonda umahluko phakathi kobuthathaka nobungendawo. Kwakhona baya kuqinisekisa ukuba ufumana uncedo oluyimfuneko ukuze uphephe ukuphinda impazamo yakho. UJulie, ekubeni wathabatha eli nyathelo lenkalipho ngokwakhe, uncomela oku: “Ndazama ‘ukuzikhalimela’ yaye ndandicinga ukuba kuyasebenza ukusa kumlinganiselo othile. Kodwa emva konyaka ndandiyazi indlela endandiphosise ngayo. Akunakuzicombululela iingxaki ezinzulu ngaphandle koncedo lwabadala.”

Ukuziva Unetyala Ngenxa Yezono Ezincinane

Noko ke, maxa wambi oselula ‘uqutyulwa sisiphoso esithile.’ (Galati 6:1) Okanye uvumela ukulawulwa yinyama. Oselula okule meko usenokuba neemvakalelo ezinzulu zokuziva enetyala—mhlawumbi zokuziva enetyala kakhulu ngokungeyomfuneko. Oku kuphumela kwintlungu engeyomfuneko. Iimvakalelo ezinzulu zokuziva unetyala ngolo hlobo zinokubangelwa sisazela esiphilileyo kodwa esibukhali ngokugqithisileyo. (Roma 14:1, 2) Khumbula, xa sithe sona “sinoMthetheleli kuye uYise, uYesu Kristu.”—1 Yohane 2:1, 2.

Kwakhona, khawuqwalasele imeko kaMarco oselula, ocatshulwe kwintshayelelo yethu. Lo mKristu uselula wayeqinisekile ukuba wayenze isono esingaxolelekiyo. Wayedla ngokuzixelela oku: ‘Ndiyazi kakuhle imigaqo yeBhayibhile, ukanti andiyeki ukona!’ Sasiyintoni isono sakhe? Sasiyingxaki yokuphulula amaphambili. UMarco wayeqiqa ngolu hlobo, ‘UThixo unokundixolela njani ukuba andahlukani nalo mkhwa?’ UAlberto, naye owayelwisana nokuziphatha okubi, wathi: “Ndandiziva ndinetyala kanye ngaphakathi ngenxa yokuba andizange ndizahlukanise nesono.”

Ukuphulula amaphambili ngumkhwa ongcolileyo. (2 Korinte 7:1) Noko ke, iBhayibhile ayikunxulumanisi nezono ezinzulu ezinjengohenyuzo. Eneneni, ayikukhankanyi konke konke. Ngoko ke, ukuwela kumkhwa wokuphulula amaphambili akunakwenzeka ukuba kungaxoleleki. Ukukujonga njengomkhwa ongaxolelekiyo kunokuba yingozi ngenene; oselula usenokuqiqa ngelithi akuncedi nto ukuzama ukoyisa le ngxaki. Kodwa imigaqo yeBhayibhile ibonisa ukuba umKristu umele enze imigudu yokulwa nalo mkhwa.b (Kolose 3:5) UYehova uyazi ukuba “sonke ngabanye siyayenza impazamo amaxesha ngamaxesha.” (Yakobi 3:2, TE) Ukuba kuvuka ikakade, oselula akafanele azive elahliwe.

Oku kukwayinyaniso nangezinye izenzo eziphosakeleyo neempazamo. UYehova akafuni sizohlwaye ngokuziva sinetyala ngokugqithisileyo. Kunoko, uyavuya xa sithabatha amanyathelo okulungisa ingxaki.—2 Korinte 7:11; 1 Yohane 3:19, 20.

Imithombo Yoncedo Nentuthuzelo

Phofu ke, usenokuba ufuna uncedo lobuqu ekwenzeni oko. Ngokufuthi abazali aboyika uThixo banokwenza lukhulu ukunceda nokuxhasa abantwana babo. Yaye ibandla lamaKristu linikela ezinye iindlela zenkxaso. UMarco ukhumbula oku: “Eyona nto yandinceda ngokwenene kukuncokola nomdala. Ndandimele ndibe nenkalipho yokuncokola ngokukhululekileyo ndize ndimphalazele imbilini yam. Kodwa wandenza ndanentembelo kuye, ngoko ndacela icebiso lakhe.” NoAlberto wafuna icebiso kumdala. UAlberto uthi: “Andinakuze ndisilibale isiluleko sakhe esikhuthazayo. Wandixelela ukuba xa wayeselula, naye wayenengxaki efanayo. Kwakungakholeleki oko. Ndamphulaphula ngoxabiso olukhulu ngenxa yokunyaniseka kwakhe.” Ngoncedo nenkxaso enjalo, uMarco noAlberto bazoyisa iingxaki zabo. Sithetha nje bobabini bakhonza kwizigxina zembopheleleko kumabandla abakuwo.

Umthandazo onyanisekileyo lolunye uncedo. NjengoDavide, unokuthandazela “intliziyo ehlambulukileyo” kunye ‘nomoya ohlaziyekileyo oqinisekileyo.’ (INdumiso 51:10) Ukufunda iLizwi likaThixo ngomnye umthombo wentuthuzelo. Ngokomzekelo, usenokukufumanisa kukhuthaza ukufunda ukuba nompostile uPawulos wayenomlo wangaphakathi. Wavuma: “Kuthi, ndifuna ukukwenza okuhle, kusuke kubekho okubi kum.” (Roma 7:21) UPawulos waphumelela ukulawula utyekelo lwakhe oluphosakeleyo. Nawe unokwenjenjalo. Usenokukufumanisa kuthuthuzela ngokukhethekileyo ukufunda iindumiso, ngokukodwa ezo zithetha ngokuxolela kukaThixo, njengeNdumiso 25, 86, neye-103.

Enoba kwenzeka ntoni na, kuphephe ukuzenza inkom’ edla yodwa nokuzivumela ulawulwe kukudakumba. (IMizekeliso 18:1) Fumana iingenelo ngokuzeleyo kwinceba kaYehova. Khumbula, ‘uxolela ngokukhulu’ ngesizinzi sedini lentlawulelo likaYesu. (Isaya 55:7; Mateyu 20:28) Musa ukuzenza ncinane iimpazamo zakho, kodwa kwangaxeshanye musa ukugqiba kwelokuba uThixo akanakukuxolela. Lomeleze ukholo nozimiselo lwakho lokumkhonza. (Filipi 4:13) Ekuhambeni kwexesha uya kuba noxolo lwengqondo novuyo lwangaphakathi olunzulu ngokwazi ukuba uxolelwe.—Thelekisa INdumiso 32:1.

[Imibhalo esemazantsi]

[Umfanekiso okwiphepha 19]

Ukuncokola ngezinto kunye nomKristu ofanelekileyo kunokukunika imbono entsha ngemicimbi