Ubusi—Iyeza Elinencasa
KUYE kwabavuyisa kakhulu abanye abaphandi bezonyango ukufumanisa ukuba ubusi buyakwazi ukubulala iintsholongwane buze budambise ukudumba. Iphephandaba laseKhanada iThe Globe and Mail lithi: “Ngokungafaniyo nemichiza yokubulala iintsholongwane exhaphakileyo engenawo amandla okubulala iintsholongwane, ubusi buyakwazi ukulwa nezinye zezi ntsholongwane xa zisemanxebeni.”
Yintoni le ibangela ukuba ubusi bukwazi ukunyanga? Impendulo ibandakanya iinyosi eziqokelela incindi kwiintyatyambo. Amathe eenyosi aneglucose-oxidase, idlala eliphambili elahlula iglucose kwincindi. Ngoxa kusahlulwa le glucose kwincindi kuphuma ihydrogen peroxide, ngokuqhelekileyo esetyenziselwa ukucoca nokubulala iintsholongwane emanxebeni. Ngokuqhelekileyo, xa le hydrogen peroxide igalelwe enxebeni isebenza ithuba elincinane; kodwa ubusi busebenza ngendlela eyahlukileyo. Ingxelo yeGlobe ithi: “Xa bugalelwe enxebeni, ubusi budibana nolwelo lomzimba, yaye oku kunciphisa iasidi yemvelo yobusi.” Eli dlala litsho likwazi ukusebenza kule ndawo ineasidi encinane. Iswekile yobusi ithabatha ixesha ukunyibilika yaye oko kwenzeka ngesantya esingaguqukiyo. Le nkqubo ibangela kubekho ihydrogen peroxide eyaneleyo yokubulala iintsholongwane ezikhoyo ngoxa ingenzi monakalo kwizicwili eziphilileyo ezikufuphi nenxeba.
Ngokutsho kweGlobe, zininzi iimpawu zobusi ezinegalelo ekuphileni kwenxeba. Ithi: “Ubusi nje obuncinane obuqatywe enxebeni benza ukuba lihlale lifumile nto leyo ekhusela ulusu ize ibangele ukuba uqweqwe oluqinileyo lungabikho. Ubusi bubangela ukuba kukhule kuze kubekho imithanjana yegazi emitsha yaye bubangela ukuba kukhule iiseli ezenza kukhule ulusu olutsha.” Ngaphezu koko, ubusi “budambisa ukudumba, buphucule ukuhamba kwegazi buze buthintele ‘ukuchiza’ kwenxeba.”
Noko ke, le ngxelo ilumkisa ngelithi: “Asinguye wonk’ ubani oya kuncedwa bubusi.” Kuqikelelwa ukuba ubusi bunemichiza ebangela isifo sebotulin emalunga nesihlanu ekhulwini. Amaziko afana neHealth Canada’s Botulism Reference Service kunye namanye amaziko ezonyango acebisa ukuba abantwana abangaphantsi konyaka omnye banganikwa ubusi ngenxa yokuba “amathumbu eentsana akanayo imichiza eyaneleyo ewakhusela kwezi ntsholongwane.”