Iimbovane Zobusi—Ukutya Okuluncuthu Kwasentlango — IWatchtower LAYBRARI EKWI-INTANETHI

Iimbovane Zobusi—Ukutya Okuluncuthu Kwasentlango

UYUMINIYA, umhlobo wethu ongumntu womthonyama waseOstreliya ufuna ukusibonisa enye yeemfihlelo zasentlango. Usisa kwinkqantosi ekumntla weAlice Springs, idolophu ekumbindi weOstreliya aze akhangele ngocoselelo kuloo mhlaba uyisanti. Phantsi kwemithi yomnga ubona izinambuzane ezincinane eziza kusikhokelela kuncuthu lokutya. Ezo zinambuzane ziimbovane zobusi.

Wemba umngxuma esantini elandela iindlela ezihamba kuzo iimbovane. Kungekudala umngxuma wakhe uba ngaphezu kwemitha ubunzulu yaye uba mkhulu ngokwaneleyo ukuba akwazi ukungena kuwo. Njengoko ekulo mngxuma uthi: “Iimbovane zobusi uzifumana nangaliphi na ixesha lonyaka kodwa elona xesha lihle lokuzikhangela kusebusika kuba ehlotyeni kutshisa kakhulu.” Siyabukela njengoko esondela ngocoselelo kulo mngxuma kubonakala ukuba uyayazi into ayenzayo. Uthi: “Kufuneka uzazi omele uzilandele.”

Kungekudala uYuminiya ufumana eyona ndawo zikuyo ezi mbovane. Ngaphakathi kukho malunga nama-20 eembovane zobusi yaye izisu zazo ezilingana neediliya zizaliswe yincindi eorenji. Zijinga kule mingxuma yaye azikwazi kuhamba ngenxa yokusindwa yile ncindi. Ngemizuzu nje embalwa, uYuminiya uqokelela iimbovane ezingaphezu kwekhulu kwimingxuma eyahlukeneyo. Uthi: “Incindi yezi mbovane yenye yezona zinto zimnandi ezifumaneka kumahlathi ethu.”

Iimbovane Ezigcina Ubusi

Phakathi kweentlobo zeembovane ezingaphezu kwama-10 000, iimbovane zobusi lolunye lwezona ntlobo zingaqhelekanga. Ngokungafaniyo neenyosi ezigcina ubusi bazo kumakhaphela, iimbovane zobusi zona zigcina incindi yazo kwezinye iimbovane ekuthiwa ziirepletes. Ngamaxesha kaxakeka, xa iimbovane zingakwazi ukufumana ukutya ngaphandle kwemingxuma yazo, zibhenela kwezi zigcina incindi.

Iimbovane zinendlela ezinxibelelana ngayo nezi zigcina incindi xa zifuna ukufaka okanye ukukhupha incidi kuzo. Emva koko, ezi zigcina incindi zivula imilomo yazo ukuze ziyikhuphe. Izisu zazo zenziwe ngendlela yokuba zikwazi ukuvula nokuvala ukuze kungene okanye kuphume incindi. Kubomi bazo obuba ziinyanga eziliqela, kwiimbovane ezigcina incindi kuthiwa kunokumane kukhutshwa incindi ize iphinde izaliswe kangangezihlandlo eziliqela.

Iimbovane ezigcina incindi zihlala phantsi komhlaba apho zikhuselwa kwimbalela, ubushushu nasekuhlaselweni zezinye izinambuzane. Kwiindawo zazo zokuhlala eziphantsi komhlaba nekumnyama kuzo, ezi mbovane zizikhusela kwiintsholongwane nakwezinye izifo ngokuqaba imizimba yazo ngencindi ethintela izifo nefumaneka kwelinye lamadlala azo.

Ivela phi le ncindi? Indlela efumaneka ngayo iqala ngokuthi izinambuzane ezincinane ekuthiwa ziiaphids zidle incindi yemithi yomnga yalapho. Emva koko iimbovane zifunxa inxalenye yencindi egcinwe zezi aphids. Iimbovane ziphinda zizifunxele enye incindi kwimithi yomnga. Ekugqibeleni, iimbovane zikhuphela le ncindi kwezi kuthiwa ziirepletes nezigcina incindi ngezisu zazo. Ekubeni iimbovane ezigcina incindi zingasebenzi kangako azityi kakhulu, ngenxa yoko incindi eninzi ziyayigcina.

Kuthekani ngeeaphids? Ngaba ziyaqhathwa? Akunjalo. Iimbovane zizishiya nencindi eyaneleyo. Okwesibini, iimbovane ziyazikhusela kwezinye izinambuzane eziyingozi. Iimbovane neeaphids zifumana umvuzo ngokusebenzisana kwazo.

IBhayibhile ithi: “Yiya embovaneni . . . ubone iindlela zayo uze ulumke. Nangona ingenamphathi, igosa okanye umlawuli, ilungisa ukutya kwayo ehlotyeni; ibuthe ukutya kwayo ngexesha lokuvuna.” (IMizekeliso 6:6-8) La mazwi achan’ ucwethe kuba iimbovane zisebenzisana ngokwenene, zilungelelene ngeyona ndlela yaye zisebenza nzima. Kwakhona, iyasimangalisa indlela emnandi ngayo incindi eveliswa zezi zinambuzane zasendle phantsi kweemeko ezinzima ngolu hlobo.

[Umfanekiso okwiphepha 11]

Isisu esikhukhumeleyo sembovane yobusi sizaliswe yincindi emnandi

[Inkcazelo Ngemifanekiso ekwiphepha 11]