Ukudityaniswa Kwehlabathi Okuya Kuba Yingenelo Kuwe

“Ukuze ukudityaniswa kwehlabathi kube yimpumelelo, kumele kwanelise iimfuno zamahlwempu nezityebi ngokulinganayo. Amalungelo abantu afanele afane, nobutyebi bulingane. Bonke abantu bafanele baphathwe ngokusesikweni nangokulinganayo, bangenelwe ngokulinganayo kwezoqoqosho nakwezonxibelelwano kwangaxeshanye.”—UKOFI ANNAN, USOSIBA-JIKELELE WEZIZWE EZIMANYENEYO.

NJENGOKO uKofi Annan watshoyo, ukuze ukudityaniswa kwehlabathi kube yimpumelelo, kumele kwanelise iimfuno zomntu wonke osehlabathini. Kodwa indlela izinto ebezisenzeka ngayo kutshanje ibonisa ukuba kusekude engqinibeni. Amalungelo nokulingana kwabantu kurhuq’ emva xa kuthelekiswa nenkqubela yezobugcisa nezinto eziphathekayo.

Eyona ngxaki kukuba, isizathu sokudityaniswa kwezoqoqosho kukwenza imali. Abantu abanomdla ekwenzeni ingeniso abazikhathazi ngamahlwempu nendlela esiya kuchaphazeleka ngayo isijikelezi-langa. UGqr. David C. Korten uthi: “Ukungalawulwa kakuhle kwezoqoqosho ehlabathini ngoongxowa-nkulu, abaphezu kokwenza imali nje kuphela . . . kushiya abantu bengamahlwempu.”

Ngaba oorhulumente behlabathi baya kuze bakwazi ukulawula uqoqosho lwehlabathi ngendlela eya kwenza bonke abantu balingane? Kubonakala kungenakwenzeka oko. Ukuza kuthi ga ngoku, oorhulumente boyisakele ukucombulula naziphi na iingxaki zehlabathi—njengolwaphulo-mthetho olugqugqise ihlabathi, ukungalawuleki kwamaqondo obushushu okanye ubuhlwempu obuthwaxa ihlabathi. Lo ka-Annan uthi: “Ukuze kukhuselwe eli hlabathi kufuneka sonke sisebenzisane kodwa iindlela ezisetyenziswayo ngoku zibonakala zingayi ndawo.”

Ewe, intsebenziswano iyafuneka ukuze kuconjululwe iingxaki zehlabathi, kodwa akuphelelanga apho. IThe Commission on Global Governancea ithi enye into efunekayo kukuba abantu bafunde imilinganiselo yokuziphatha. Kwingxelo yayo yathi: “Ingekabikho imilinganiselo yokuziphatha, ziya kuqhubeka zikho iingxwabangxwaba nokruthakruthwano phakathi kwabantu beli hlabathi; lungekabikho ukhokelo olufanelekileyo, neyona mizamo okanye iintshukumisa ezintle azisayi kuze ziphumelele.”

Yacebisa ukuba ihlabathi lisebenzise wuphi umgaqo? Le ngxelo yacebisa ngelithi: “Mntu ngamnye ufanele aphathe abanye ngendlela ebeya kuthanda ukuphathwa ngayo.” Lo ngumgaqo owafundiswa nguYesu Kristu, eyona nkokeli ibalaseleyo kwezakha zanyathela kulo mhlaba, kwiminyaka emalunga namawaka amabini eyadlulayo. (Mateyu 7:12) Kodwa lo mgaqo usasebenza nanamhlanje. Ngokungathandabuzekiyo, ukudityaniswa kwehlabathi okusekelwe kulo mgaqo, bekuya kuzisa iingenelo kubantu bonke. Ngaba iya kuze yenzeke into enjalo?

Indlela Eyahlukileyo Yokucombulula Iingxaki Zehlabathi

IBhayibhile ithi kungekudala abantu baya kumanyana phantsi korhulumente oya kulawula ihlabathi lonke, kungekhona ngeenjongo zokwenza imali okanye ukuhambisela phambili ezobugcisa. Oku kudityaniswa kwehlabathi kuya kuphumelela ngenxa yamandla neendlela eziya kusetyenziswa ukuze kungenelwe umntu wonke. KwanoYesu Kristu wayebhekisela kurhulumente oya kulawula ihlabathi lonke xa wafundisa abalandeli bakhe ukuba bathandazele ‘ukufika koBukumkani bukaThixo kuze kwenziwe ukuthanda kukaThixo emhlabeni.’—Mateyu 6:10.

UBukumkani bukaThixo, urhulumente osezulwini phantsi kolawulo lukaYesu Kristu, buya kumisela imilinganiselo emitsha yokuziphatha, leyo uYesu wafundisa ngayo ngoxa wayesemhlabeni. Owona mgaqo uphambili uya kuba kukuthanda uThixo nommelwane. (Mateyu 22:37-39) Iziprofeto ezininzi eBhayibhileni zichaza oko kuya kwenziwa ngulo rhulumente mtsha. Ibhekisela kuMlawuli wabo onguYesu Kristu, iBhayibhile iyathembisa: “Uya kuzigweba izisweli ngobulungisa, abohlwaye ngokuthe tye abo balulamileyo bomhlaba.” (Isaya 11:4) Izityebi nabanegunya abayi kubaxhaphaza abantu abasweleyo. UYesu “uya kuba nosizi ngesisweli nangehlwempu . . . Uya kuwukhulula umphefumlo wabo kwingcinezelo nakugonyamelo.”—INdumiso 72:13, 14.

Iingxaki ezichaphazela isijikelezi-langa ziya kuconjululwa ngoko nangoko. Kunokuba ihlabathi libe ngumqwebedu, ‘iya kuba nemihlali intlango, nethafa eliyinkqantosi liya kutyatyamba.’ (Isaya 35:1) Ukutya akusayi kunqongophala, kunoko “kuya kubakho ukudla okuziinkozo okuninzi emhlabeni.”—INdumiso 72:16.

UBukumkani bukaThixo bumanyanisa bonke abantu. UThixo uthembisa ukuba uya “kubabeka bemanyene, njengomhlambi ebuhlanti.” ‘Ndiya kuzinika ukuba zitshintshele kulwimi olusulungekileyo, ukuze zonke zindikhonze ngaxhatha linye.’ (Mika 2:12; Zefaniya 3:9) Olu ‘lwimi lusulungekileyo,’ oluquka imilinganiselo efanayo yokuziphatha neyonqulo sele lubamanyanisa abantu.

Ngenxa yokuba kulula ukundwendwela kwamanye amazwe, amaNgqina kaYehova aqhuba iindibano ezinkulu zezizwe ngezizwe, ezimanyanisa abantu abasuka kumazwe nakumaqela eentlanga awahlukahlukeneyo. Ezi ndibano zibubungqina bokuba umanyano luxhomekeke kwiintliziyo neengqondo zabantu kungekhona kwezobugcisa nezoqoqosho. (Bona ibhokisi ekweli nqaku) Omnye umfundi wezakwalizwi waseSpeyin owakha waya kwenye yezi ndibano wabhala wathi: ‘Ndabuya apho ndakhekile, kungekuphela nje ziintetho ezisekelwe eZibhalweni kuphela kodwa nakukubona indlela abamanyene ngayo aba bantu, indlela abaziphethe kakuhle ngayo nesimilo sabo.’

Kwakhona amaNgqina kaYehova akwasebenzisa iingenelo zokudityaniswa kwehlabathi ukuze ahambisele phambili umsebenzi wawo wokushumayela iindaba ezilungileyo zoBukumkani bukaThixo. Ngokomzekelo, ehlabathini lonke abaguquleli abaninzi basebenzisa iikhompyutha nobugcisa be-elektroniki ukuguqulela uVukani! kwiilwimi ezingaphezu kwama-80. Ezo zixhobo zinceda amaNgqina kaYehova ukuba akwazi ukufundisa abantu iBhayibhile ehlabathini lonke. Ngokucacileyo, izixhobo zobugcisa ezisetyenziswa ehlabathini lonke zinokuba yingenelo ukanti kwangaxeshanye zinokuba yingozi.

Ngokwahlukileyo kwimizamo yabantu yokudibanisa ihlabathi, urhulumente omiselwe nguThixo oya kulawula ihlabathi lonke uya kuzicombulula iingxaki kunokuba abe ngunobangela wazo. Siyaluthemba ngokupheleleyo olu lawulo lwasezulwini. UThixo usithembisa oku: ‘Ndidala amazulu amatsha nomhlaba omtsha. Kwaye izinto zangaphambili aziyi kukhunjulwa. Gcobani nize nivuye ngonaphakade koko ndikudalayo.’ (Isaya 65:17, 18) Ngokwenene, ‘kumhlaba omtsha’ kaThixo kuya kungenelwa wonke umntu.

[Umbhalo osemazantsi]

[Ibhokisi ekwiphepha 28]

NAKUBA LIDITYANISIWE LIZIINTLABA-ZAHLUKANE

Nangona ezobugcisa ziye zenza kwalula ukunxibelelana ehlabathini, abantu baseziintlaba-zahlukane. Umabonwakude, iminxeba ephathwayo neInternet zenze kwalula ukunxibelelana kwabantu, kodwa azikhange zibamanyanise. Ukudityaniswa kwezoqoqosho nokuphela kosukuzwano phakathi kwamagunya aphambili kulawulo lwehlabathi kuye kwakunciphisa ukungquzulana kwaMazwe, kodwa iimfazwe zamakhaya ezimanyumnyezi zithe gqolo zibulala zize zenzakalise amakhulu amawaka abantu nyaka ngamnye.

Yintoni ebangela oko? Kungenxa yokuba ukujongana ngezikhondo zamehlo kwamaqela eentlanga, awezizwe nawonqulo—nto leyo engunobangela weemfazwe zamakhaya—akubonakali kuza kuphela. Ukuze abasele umlo phakathi kwamaqela alwayo, amashishini ehlabathi namaqela ezikrelemnqa ayaqinisekisa ukuba izixhobo zokulwa ezingabizi kangako zifumaneka ngobuninzi. Izixhobo ze-elektroniki azinakuze zimanyanise ihlabathi ngokwenene. Yaye nokuncumisa kwemeko yezoqoqosho akunakwenza abantu balingane.

Eneneni, ukudityaniswa kwezoqoqosho kunokuba negalelo ekwenzeni abantu babe ziintlaba-zahlukane. Xa imeko yezoqoqosho isiba mandundu emva kokuba ibikhe yancumisa, abezobupolitika abathatha yonk’ into ngeenyaw’ ezinkulu basenokusebenzisa elo thuba ukuxhaphaza amahlwempu ukuze baphumeze iinjongo zabo. Inokuconjululwa njani le meko? IHuman Development Report 1999 ithi: “Oorhulumente namagunya ehlabathini bafanele bafune indlela entsha yokulawula—eyona njongo yabo iphambili ibe kukuphucula imeko yabantu nokubenza balingane.” UBukumkani bukaThixo buya kwenza loo nto kanye.

[Imifanekiso ekwiphepha 29]

Umsebenzi wamaNgqina kaYehova wokufundisa abantu iBhayibhile ehlabathini lonke uye wamanyanisa bonke abantu