Ukuvisisana Kwenzululwazi Nonqulo

“Abantu abasawuboni umahluko phakathi kwenzululwazi nonqulo.”—IThe Daily Telegraph, yaseLondon, kaMeyi 26, 1999.

INTO edibana ngayo inzululwazi enyanisekileyo nonqulo oluchanileyo kukufuna inyaniso. Inzululwazi ithi yakujonga indalo, ifike ilungelelene ngendlela ebalaseleyo ibone ubukrelekrele kuyo yonke le nto. Ukuze lukwenze kube sengqiqweni oku, unqulo lokwenyaniso lufundisa ukuba zonke izinto ezisehlabathini zenziwe nguMdali.

Isazi ngeemolekyuli, uFrancis Collins sithi: “Unqulo lundenza ndiyixabise gqitha inzululwazi.” Uhlabela mgama esithi: “Xa ndifunda ngemizila yemfuza, ndiye ndimangaliswe yindlela umntu enziwe ngayo, ndize ndithi ngaphakathi, ‘Sii! yimisebenzi kaThixo le.’ Lo mmangaliso undichukumisa gqitha, yaye undenza ndimazi ngakumbi uThixo kwaye undenza ndibe nomdla ngakumbi kwinzululwazi.”

Yintoni enokunceda umntu abone indlela inzululwazi edibana ngayo nonqulo?

Uphando Oluqhubekayo

Qonda ukuba usikelwe umda: Akubonakali ukuba siya kuze siyeke ukuphanda ngendalo, isibhakabhaka nexesha. Isazi ngebhayoloji uLewis Thomas sathi: “Ekubeni sizizidalwa ezithanda ukwazi, ukuphonononga, ukuphanda nokuqonda izinto, sakufunda de siyofa. Soze sizazi zonke iimpendulo. Andiqondi ukuba kuya kuze kwenzeke ngenye imini ukuba abantu bathi, ‘Hayi ke ngoku akukho nto singayaziyo.’ Asisoze siqonde yonke into.”

Ngokufanayo, ininzi inyaniso ekufuneka siyazi ngonqulo. Omnye wababhali beBhayibhile, uPawulos wathi: “Kuba okwangoku sibona luzizi ngesipili . . . Okwangoku ndazi ngokuyinxenye.”—1 Korinte 13:12.

Noko ke, isibakala sokuba sisazi inzululwazi nonqulo ngokuyinxenye, asisenzi singakwazi ukwenza izigqibo ezisengqiqweni ezisekelwe kwizibakala. Akufuneki side sazi ubugocigoci ngelanga ukuze siqiniseke ukuba liya kuphuma ngomso.

Hlola izibakala: Ukuze siphenduleke, kufuneka sisebenzise imigaqo esengqiqweni. Xa singenabo ubungqina obunesihlahla, kunokuba lula ukuba silahlekiswe xa sifuna inyaniso engenzululwazi nonqulo. Enyanisweni, akakho umntu onokufunda zonke iinkcukacha ezikwiincwadi ezininzi zenzululwazi. Kwelinye icala, iBhayibhile ineemfundiso zokomoya ekulula ukuzifumana. Nezibakala ziyayixhasa iBhayibhile.a

Noko ke, xa ufuna ulwazi, ufanele uzame ukwahlula phakathi kwezibakala noqikelelo, phakathi kwenyaniso nenkohliso—kwinzululwazi nakunqulo. Njengoko umbhali weBhayibhile uPawulos wacebisayo, kufuneka sizigatye ‘iimpikiswano zoko kubizwa ngokuba “lulwazi” kuxokwa.’ (1 Timoti 6:20) Ukuze sibone indlela inzululwazi edibana ngayo neBhayibhile, simele sihlole izibakala, siphephe uqashiqashi size sizame ukufumanisa ukuthungelana kwezibakala.

Ngokomzekelo, xa siqonda ibinzana eliseBhayibhileni elithi “usuku” njengelimela izihlandlo zexesha ezahlukahlukeneyo, sifumanisa ukuba ingxelo ekwiGenesis ethetha ngeentsuku ezintandathu zokudala, ayiphikisani noko kuthethwa zizazinzulu xa zisithi umhlaba uneminyaka emalunga nezigidi zamawaka ezine ezinesiqingatha. Nakuba iBhayibhile isithi umhlaba wawukho ngaphambi kokuba kuqalise iintsuku zokudala, ayichazi ukuba wawukho ixesha elide kangakanani. (Bona ibhokisi ethi “Iintsuku Zokudala—Ngaba Ngalunye Lwaluziiyure Ezingama-24?”) Kwanokuba inzululwazi inokuphinda ibeke eminye iminyaka yesi sijikelezi-langa, iBhayibhile iya kuhlala inyanisile. Kunokuba iphikisane neBhayibhile, xa ithetha ngalo mba nangeminye, inzululwazi isinika inkcazelo eninzi ngokuphathelele eli hlabathi nelo langaphambili.

Yiba nokholo, ungabi nguvuma-zonke: EBhayibhileni sifumana inkcazelo ngoThixo nangeenjongo zakhe, esingenakuyifumana nakweyiphi na indawo. Kutheni sifanele siyithembe? Kaloku yiBhayibhile ngokwayo esikhuthaza ukuba siphonononge ukuchana kwayo. Cinga nje ngokuchana kwayo ngokwembali, ukuba yingenelo kwayo, ukuthetha phandle kwababhali bayo nokunyaniseka kwayo. Xa ehlolisisa ukuchana kweBhayibhile, kuquka iingxelo ezinokuthanani nenzululwazi, neyona nto isenza seyiseke ngakumbi, ukuzaliseka ngokupheleleyo kwamakhulukhulu eziprofeto ukutyhubela iminyaka ukuza kuthi ga kumhla wethu, umntu unokuba nokholo olomeleleyo lokuba iliLizwi likaThixo. Ukuba nokholo eBhayibhileni asikokuba nguvuma-zonke kodwa kukuba nentembelo efanelekileyo yokuba iZibhalo zichanile.

Yihlonele inzululwazi; uluxabise ukholo: AmaNgqina kaYehova abongoza abantu abathanda ukwazi ngenzululwazi nangonqulo, ukuba baphonononge inyaniso kuzo zombini. Kumabandla awo, amaNgqina akhuthaza ukuba ihlonelwe inzululwazi ngenxa yezinto eye yazifumanisa, kwangaxeshanye afundisa ukuba inyaniso yonqulo inokufumaneka eBhayibhileni kuphela, leyo iye, ngeendlela ezininzi, yazingqina iliLizwi likaThixo. Umpostile uPawulos wathi: “Xa nalamkelayo ilizwi likaThixo, enaliva kuthi, nalamkela, kungekhona njengelizwi labantu, kodwa, kanye njengokuba kunjalo enyanisweni, njengelizwi likaThixo.”—1 Tesalonika 2:13.

Kakade ke, njengenzululwazi, unqulo luye lwagxojwa bubuxoki naluqheliselo olonakalisayo. Ngenxa yoko, kukho unqulo lokwenyaniso nolobuxoki. Yiyo loo nto abantu abaninzi beye bazishiya iicawa zamandulo baba ngamalungu ebandla lobuKristu lamaNgqina kaYehova. Baye badana xa bebona ukuba iicawa zabo zangaphambili azivumi kwahlukana neemfundiso neentsomi zabantu zize zamkele inyaniso.

Ngaphezu koko, amaKristu okwenyaniso afumana eyona ntsingiselo nenjongo yobomi esekelwe kulwazi oluchanileyo ngoMdali, njengoko lwandlalwe eBhayibhileni, nangeenjongo zakhe ngoluntu nesijikelezi-langa esihlala kuso. AmaNgqina kaYehova aye afumana iimpendulo ezanelisayo, ezisekelwe eBhayibhileni kwimibuzo efana nale, Kutheni silapha? Sisinge phi? Aya kukuvuyela gqitha ukwabelana nawe ngale nkcazelo.

[Umbhalo osemazantsi]

[Ibhokisi ekwiphepha 10]

Iintsuku Zokudala—Ngaba Ngalunye Lwaluziiyure Ezingama-24?

Abanye abantu abafuna ukuba iBhayibhile icaciswe njengokuba injalo bathi yindalo echaza ngembali yomntu kungekhona indaleko. Bathi yonke indalo ebonakalayo yenziwa ngeentsuku ezintandathu nje kuphela, ngalunye kuzo luziiyure ezingama-24, malunga neminyaka engama-6 000 ukusa kwengama-10 000 eyadlulayo. Kodwa le mfundiso yabo ayivisisani neZibhalo yaye iye yabangela ukuba iBhayibhile igculelwe.

Ngaba ngalo lonke ixesha xa kuthethwa ngosuku eBhayibhileni kubhekiselwa kolo luziiyure ezingama-24? IGenesis 2:4 ithetha “ngosuku uYehova uThixo awenza ngalo umhlaba nezulu.” Olu suku lunye luquka zonke iintsuku ezintandathu zokudala ezikwiGenesis isahluko 1. Ngokutsho kweBhayibhile, usuku lubhekisela kwisihlandlo sexesha elisenokuba yiminyaka eliwaka okanye engamawaka. Kwakhona iBhayibhile ithi, usuku lokudala lwalungamawaka eminyaka lulunye. Ngapha koko, umhlaba wawusele ukho ngaphambi kokuba kuqalise iintsuku zokudala. (Genesis 1:1) Ngoko ke, xa kuthethwa ngalo mbandela, ingxelo yeBhayibhile iyavisisana nenzululwazi echanileyo.—2 Petros 3:8.

Sithetha ngento yokuba kuthiwe ngalunye kwiintsuku zokudala lwaluziiyure ezingama-24 ubude, isazi ngeemolekyuli uFrancis Collins sithi: “Imfundiso yokuba izinto zadalwa yeyona iye yabangela ukuba abantu abasebenzisa ingqondo bangabi nakholo.”

[Ibhokisi ekwiphepha 11]

Ngaba Inzululwazi Inemilinganiselo Ephakamileyo?

Kuyaqondakala ukuba, unqulo luye lwagatywa zizazinzulu ezininzi ngenxa yokungayifuni kwalo inkqubela engokwenzululwazi, izinto ezimanyumnyezi oluye lwazenza kwakunye nohanahaniso nenkohlakalo yalo. Unjingalwazi osisazi ngezidalwa ezingenakubonwa ngeliso lenyama, uJohn Postgate uthi: “Iinkonzo zehlabathi . . . ziye zaphambili ekubulaweni kwabantu ngokumanyumnyezi, zaxhasa iimfazwe zomnqamlezo, ukutshayelwa nokungcungcuthekiswa kwabo zaza zaseka iinkundla zokuncina amakholwa. Namhlanje le nkohlakalo yenziwa lunqulo ithe chatha. Ngokungafaniyo nenzululwazi, unqulo alungondilele.”

Xa ethelekisa loo nkohlakalo yonqulo noko kucingwa ukuba kukuba sengqiqweni, ukuba nenjongo ezintle nokuchubeka kwenzululwazi, lo kaPostgate uthi “inzululwazi inemilinganiselo ephakamileyo.”

Ngaba ngokwenene inzululwazi inemilinganiselo ephakamileyo? Ngokuqinisekileyo akunjalo. Kwalo kaPostgate uyavuma ukuba “kwanezazinzulu ziyamonelana, ziyabawa, zikwanalo nocalucalulo.” Walek’ umsundulo ngelithi, “izazinzulu ezimbalwa ziye zabonakala zizizigwinta, zisithi zona zenza uphengululo, njengoko kwenzeka kwiJamani yamaNazi nakwiinkampu zamabanjwa zaseJapan.” Yaye xa iNational Geographic yathumela intatheli ukuba iphande ngokubhalwa kwengcamango engenasihlahla yefosili kulo lindixesha, le ntatheli yathetha “ngeyelenqe elenziwe ngabantu abathenjiweyo, ukungqubana kwezimvo, ukuzicingela ngokugqithiseleyo, ukukholelwa iingcamango zobuyatha, iimpazamo zabantu, ubuntamo-lukhuni, ukuqhatha, ukudlan’ izithende, ukuxoka, nobuqhetseba.”

Ukanti, ikwayinzululwazi eyenze abantu banezixhobo zemfazwe ezoyikekayo, njengeentsholongwane ezisetyenziselwa ukulwa, igesi enetyhefu, imijukujelwa, iibhombu “ezilawulwa ngobuchule be-elektroniki” kwaneebhombu zenyukliya.

[Umfanekiso okwiphepha 8, 9]

Indlela ebonakala ngayo iAnt Nebula (iMenzel 3) kwiHubble Space Telescope

[Inkcazelo]

NASA, ESA and The Hubble Heritage Team (STScI/AURA)

[Imifanekiso ekwiphepha 9]

Inzululwazi ifumanise ukuba izinto ezikhoyo ehlabathini zenziwe ngumntu okrelekrele

[Umfanekiso okwiphepha 10]

AmaNgqina kaYehova akhuthaza ukuba inzululwazi ihlonelwe xa ichanile yaye akwakhuthaza ukuba abantu bakholelwe eBhayibhileni