Umzali Ongenaqabane Akayedwa
“Xa abantwana bam befika baze bandange bandixelele ukuba bayandithanda, leyo yeyona nto indenza ndizive ndingumama.”—UDORIS, UMAMA ONGENAQABANE ONABANTWANA ABABINI.
ABAZALI abangenamaqabane banokukhuthazwa ngamazwi eBhayibhile athi: “Abantwana bayintsikelelo nesipho esivela eNKOSINI.” (INdumiso 127:3, iContemporary English Version) Into yokuba abantwana bakhulele kwintsapho enomzali omnye ayibenzi bangaxabiseki kuThixo. UMdali wethu unomdla wokuba iintsapho ezinomzali omnye ziphumelele. IBhayibhile ithi: “Ukhulula inkwenkwe engenayise nomhlolokazi.” (INdumiso 146:9) Abazali abangenamaqabane banokuqiniseka ukuba uThixo ukulungele ukubaxhasa.
Mntwana ngamnye ufanele akhulele kwikhaya elinothando, elikhuselekileyo nelinqabisekileyo apho aza kukhula kakuhle emzimbeni, engqondweni nangokomoya. UThixo unike mzali ngamnye imbopheleleko nelungelo lokuqeqesha umntwana.
Abazali abangenamaqabane abaninzi bafumanise ukuba ukuze baphumelele kufuneka bathandaze rhoqo, basebenzise imigaqo yeBhayibhile baze bathembele kuYehova ngokupheleleyo. Benza ngokuvumelana nesibongozo esifumaneka kwiNdumiso 55:22 esithi: “Umthwalo wakho wulahlele kuYehova, yaye yena wokuxhasa.”
Ngamathub’ athile, oomakhulu nootatomkhulu, abadala bebandla nabazali abanamava abasebandleni lamaKristu banokuba luncedo kwiintsapho ezinomzali omnye ukuze zikwazi ukuhlangabezana neemeko ezinzima. Liyinyaniso elokuba, amalungu entsapho kunye nabo sinqula nabo banokubaxhasa abazali abangenamaqabane kwimigudu yabo, kodwa imbopheleleko yokukhulisa umntwana, uThixo uyinike abazali.a
Okuvuyisayo kukuba, abazali abangenamaqabane abaninzi baye bakwazi ukumelana nocelomngeni lokuba ngumzali ongenaqabane baza bakhulisa abantwana abakwaziyo ukusingatha iimbopheleleko, abanesimilo naboyika uThixo. UVukani! ukhe wadlan’ indlebe nabanye babo. Nazi iingongoma ezifanayo kwizinto eziye zathethwa ngaba bazali.
• Ukunyamekela ikhaya kakuhle. Abazali abangenamaqabane abaye baphumelela bazabalazela ukucwangcisa izinto kakuhle yaye basebenza nzima benikela ulwalathiso kwiintsapho zabo. Ukuceba izinto nokulungiselela kakuhle kusengaphambili kubalulekile. IBhayibhile ithi: “Amacebo okhutheleyo ngokuqinisekileyo ayingenelo.”—IMizekeliso 21:5.
• Ukuzinikela. Abazali abangenamaqabane abaye baphumelela babeka izilangazelelo zeentsapho zabo kwindawo yokuqala. Bafuna ukwanelisa izilangazelelo zabantwana babo kunezabo.—1 Timoti 5:8.
• Ukuba ngolungeleleneyo. Abazali abangenamaqabane abaye baphumelela abazibethi ngoyaba okanye bazibaxe iingxaki; kunoko bazama ukuzicombulula. Bayaqonda ukuba bajamelene nocelomngeni yaye kunokuba bazisizele okanye babe buhlungu ngokugqithiseleyo bazama ukuhlangabezana nalo.
• Unxibelelwano lubalulekile. Abazali abangenamaqabane abaye baphumelela bakhuthaza ukuba kubekho unxibelelwano phakathi kwentsapho. Bakhuthaza amalungu entsapho ukuba athethe ngokukhululekileyo ngezinto azicingayo nangendlela avakalelwa ngayo. Omnye utata ongenaqabane uthi xa ethetha ngabantwana bakhe: “Ndincokola nabo nanini na kuvela ithuba. Siba ‘namathub’ amnandi’ xa silungiselela isidlo sangokuhlwa. Badla ngokusebenzisa elo xesha baphalaz’ imbilini yabo.”
• Ukuziphumza. Nangona besoloko bexakekile, abazali abangenamaqabane abaye baphumelela bayaqonda ukuba kubalulekile ukuzinyamekela ngokomoya nokunikel’ ingqalelo kwiintswelo zabo zobuqu. UEthel, umama oqhawule umtshato onabantwana ababini, uthi: “Ndiye ndizame ukufumana ithuba lokwenza izinto zobuqu. Ngokomzekelo, xa umhlobo wam efundisa abantwana umculo ndiba neyure yonke ndihleli ndedwa. Ndiye ndiphumle, ndingamvuli nomabonwakude.”
• Isimo sengqondo esifanelekileyo. Abazali abangenamaqabane abaye baphumelela baba nesimo sengqondo esifanelekileyo ngokuphathelele ukuba ngumzali nangokuphathelele ezinye iinkalo zobomi. Bayakwazi ukubona izinto ezintle nakuba bejamelene neengxaki. Omnye umama ongenaqabane uthi: “Ndifumanise into yokuba ukuba ngumzali ongenaqabane akuthethi kuthi konakele yonke into.”
Amava Abo Baye Baphumelela
Ngaba le migaqo iyasebenza? Ewe iyasebenza, njengoko kunokubonwa kumava abazali abaninzi abangenamaqabane abaye baphumelela. UGloria, umama ongenaqabane, osebenzayo waseNgilani owaqhawula umtshato, okhankanywe kwinqaku lokuqala, wakhulisa oonyana ababini nentombi. Bobathathu baye bangabalungiseleli abangamaKristu bexesha elizeleyo baza bazinikela ekufundiseni abantu iBhayibhile. Xa ebuzwa indlela aphumelele ngayo, uGloria uthi: “Eyona nto yayilucelomngeni yayikukuqhuba isifundo seBhayibhile sentsapho esibangela umdla ngokuthe rhoqo. Ndandifuna abantwana bam bonwabe, babe noxolo lwengqondo, baneliseke yaye ndandifuna ukubakhusela bangeyeli kwimigibe. Ndandiphangela ebusuku. Eyona nto ndandiyifuna kukusoloko ndikunye nabantwana bam. Ngaphambi kokuba ndiye emsebenzini, sasithandaza njengentsapho ndize ndibalalise. Babehlala nomakazi xa ndisemsebenzini.”
UGloria wabanceda njani abantwana bakhe ukuze bazibekele usukelo olufanelekileyo? Uhlabela mgama esithi: “Ndandiqinisekisa ukuba ndibeka izinto zokomoya kwindawo yokuqala. Sasingenamali ingako, yaye abantwana bam ndandingabafihleli loo nto. Wonk’ umsebenzi ndandiwenza kunye nabo, yaye babebonakalisa intsebenziswano.” Echaza indlela awayigcina imanyene ngayo intsapho yakhe, uGloria uthi: “Sasisenza izinto kunye. Akukho mntu wayengunkom’ idla yodwa. Sasipheka, sicoce size silungise ikhaya lethu kunye. Sasingabantu abalungeleleneyo. Ndandidla ngokuqinisekisa ukuba siba nalo nexesha lokuzihlaziya.”
UCarolyn, umama ongenaqabane onenkwenkwana egama linguJoseph, wanelisekile yindlela ekhula ngayo. Yintoni emncedayo? Uthi: “Sifunda iBhayibhile kunye ngaphambi kokuba silale, ndize emva koko ndimbuze oko akufundileyo. Ukongezelela koko, siye sifunde iziqendu ezithile kwiimpapasho ezisekelwe eBhayibhileni size sibone indlela esinokuzisebenzisa ngayo kubomi bethu. Oku kumnceda gqitha uJoseph xa ejamelene neengxaki, njengokuntlontwa esikolweni.” UCarolyn uyavuma ukuba ubomi abukho lula, kodwa akaziva elahliwe. Uthi: “Zisoloko zikho iingxaki, kodwa uYehova uyandixhasa. Ndifumana ukhuthazo nakubazalwana abakwibandla lamaKristu.”
La mava abazali abangenamaqabane abangamawakawaka abaye baphumelela, njengoGloria noCarolyn, abubungqina bokuba namhlanje abazali banokuthembela kwimigaqo yeBhayibhile ekukudala isebenza baze bakhulise abantwana abaneempawu ezintle nabomeleleyo ngokomoya. (IMizekeliso 22:6) Abazali banako ukuphumelela! Ukuba ngumzali ongenaqabane kulucelomngeni kodwa kubangela umntu abe namava aze afunde ukwabelana nabanye. Ukwayama ngokupheleleyo ngoThixo nokuba nentembelo kwinkxaso yakhe yeyona ndlela iluncedo yokuhlangabezana nocelomngeni lokuba ngumzali ongenaqabane.—INdumiso 121:1-3.
[Umbhalo osemazantsi]
a Ukuze ufumane inkcazelo eyongezelelekileyo ngokuphathelele indlela ezinokuphumelela ngayo iintsapho ezinomzali omnye, bona isahluko 9 sencwadi ethi Imfihlelo Yolonwabo Lwentsapho epapashwe ngamaNgqina kaYehova.
[Imifanekiso ekwiphepha 11]
Abantwana abathathu bakaGloria bancedwe sisifundo seBhayibhile sekhaya ukuba babe ngabalungiseleli bexesha elizeleyo abangamaKristu. Apha bafunda ileta yaye babuka nefoto evela kunyana omdala, ngoku okhonza njengomvangeli wasemazweni
[Imifanekiso ekwiphepha 12]
UCarolyn nonyana wakhe uJoseph