Ukuhlanganisana Kweecawa EAssisi Ngenjongo Yokufuna Uxolo

“Akunakuphinde kubekho gonyamelo! Akunakuphinde kubekho mfazwe! Akunakuphinde kubekho bunqolobi! Egameni likaThixo, ngamana zonke iicawa zingabangela kubekho okusesikweni noxolo, uxolelwano, ubomi nothando!”—UPopu John Paul II.

EASSISI, EITALI, ngoJanuwari 24, 2002—Abameli beecawa abavela mbombo zone zomhlaba bahlanganisana ukuze bathandazele uxolo, xolo olo lusongelwa ngabanqolobi, ukungavisisani nokungabikho kokusesikweni. Le ntlanganiso yabizwa ngupopu malunga neenyanga ezimbini emva kokuwa kweTwin Towers kwiSixeko saseNew York. Iinkokeli zonqulo ezininzi zasamkela ngezandla ezishushu eso simemo sokuya eVatican.

Kwizihlandlo ezibini ngaphambili—ngowe-1986 nangowe-1993—upopu wamisela usuku lokuthandazela uxolo kwakuloo dolophu yaseItali.a Kwintlanganiso yowama-2002 kweza iintatheli ezingaphezu kwewaka zivela mbombo zone zomhlaba. Iicawa ezininzi zazinabameli ababeze kuthandazela uxolo—abameli beNgqobhoko (amaKatolika, amaLuthere, amaTshetshi, amaOthodoki, amaWesile, amaBhaptizi, abeeCawa Zomoya, amaMennonite, amaQuaker nabezinye), abamaSilamsi, abamaHindu, abamaConfucius, abamaSikh, abamaJain, abamaTenrikyo, abamaBhuda, abamaYuda, abeecawa ezisekelwe kwizithethe zaseAfrika, abamaShinto nabamaZoroastrian. Kwakukho nabameli bezinye iicawa nommeli weBhunga Leecawa Zehlabathi.

Ukuvakalisa Umnqweno Woxolo

Iziganeko zolo suku zaqalisa nge-8:40 kusasa, ekundulukeni “kukaloliwe woxolo” kwisikhululo esincinane saseVatican. Loo loliwe wawunamakhareji asixhenxe wawulungiselelwe ukuba abo bakhweleyo bahlale tofo-tofo, yaye wawuphelekwe ziihelikopta ezimbini ukuze uhambe ngokukhuselekileyo. Emva kohambo olwathabatha iiyure ezimbini, upopu nezinye iinkokeli zonqulo bagaleleka eAssisi. Ukhuseleko lwaluluqilima—ayemalunga newaka amapolisa awayegcine ucwangco apho.

Ezi nkokeli zonqulo zazihlanganisene kwibala lamandulo elaligqunywe ngobhazabhaza wentente. Ngaphakathi, kwiqonga elikhulu elibomvu elimile njengo-V kwakuhleli abameli bezonqulo yaye isihlalo sikapopu sasisembindini. Ecaleni kwelo qonga kwakukho umthi womnquma—ofanekisela uxolo. Phambi kweqonga kwakuhleli iindwendwe ezibekekileyo ezingaphezu kwama-2 000. Kwizihlalo ezingaphambili kwakukho izikhakhamela zaseItali. Emva kwesithethi ngasinye, iikwayala ezivunyiweyo zazivuma iingoma zecawa ezithetha ngoxolo. Kweminye imimandla yaloo dolophu, amawaka abantu, ingakumbi ulutsha, ayethe qhiwu imibhalo echasene nemfazwe ebhalwe ngeelwimi ezahlukahlukeneyo yaye ayevuma iingoma ezithetha ngoxolo. Abaninzi babephethe amasebe omnquma.

Emva kokuba upopu ehleli phantsi, wamkela amalungu awayemele iinkonzo ezahlukahlukeneyo. Emva kokuvuma ingoma yecawa ngesiLatini esekelwe kuIsaya 2:4—isiprofeto esithetha ngexesha apho ‘uhlanga lungayi kuphakamisela uhlanga ikrele’—abo bameli beecawa bavethe ezimbejembeje bavakalisa iminqweno yoxolo. Nantsi eminye imizekelo yayo.

“Kweli xesha libalulekileyo embalini, abantu kufuneka babone izenzo zoxolo beve namazwi anika ithemba.”—UKhadinali François Xavier Nguyên Van Thuân.

UThixo “akangoThixo wemfazwe nokruthakruthwano kodwa nguThixo woxolo.”—UBhishophu oMkhulu uBartholomeus I.

“Ukwahlukahlukana kweembono zonqulo akufanele kubangele [abantu] batyeshele okanye bade babathiye abo baneembono ezahlukileyo kwezabo.”—UGqr. Setri Nyomi, weWorld Alliance of Reformed Churches.

“Okusesikweni nothando lobuzalwana ziintsika zoxolo lokwenene.”—UMphathi uAmadou Gasseto, ongummeli weecawa ezisekelwe kwizithethe zaseAfrika.

“Luxolo kuphela olungcwele, imfazwe ayizange yaba ngcwele!”—UAndrea Riccardi, weCawa yamaKatolika.

Abanye kwabo bameli bavuma ukuba iicawa zinetyala elikhulu lokuphembelela ukungavisisani nemfazwe. Ummeli weLutheran World Federation wathi ihlabathi “liye lothuswa kakhulu yinkohlakalo ephenjelelwa lunqulo.” Ummeli wamaYuda wathi: “Iicawa ziye zaphembelela ukuliwa kweemfazwe ezininzi ezimanyumnyezi nekuye kwaphalala igazi kuzo.” Ummeli wamaHindu wathi: “Iziganeko ezininzi ezenzeke kwixa elidluleyo zibonisa ukuba iinkokeli zeecawa ezizibanga zisindisa abantu zizo kanye eziye zabangela iiyantlukwano phakathi kwabantu.”

Emva kokugxeka kwabo abanqolobi nemfazwe, aba bameli baya kwiindawo ababeza kuthandaza kuzo baza bathandazela uxolo ngamnye kuthixo wakhe.

Ukuthandazela Uxolo

Abameli beecawa zeNgqobhoko bathandaza kunye kwiCawa esezantsi yaseSt. Francis, kufuphi nengcwaba lomntu ethiywe ngegama lakhe le cawa. Lo msitho wavulwa “ngomthandazo obhekiswa kuBathathu Emnye” owenziwa ngupopu nabanye abameli abathathu. Kwakuthandazwa, kuvunywa iingoma zecawa ezikhuthaza uxolo kufundwa neendinyana zeBhayibhile ezithetha ngoxolo. Komnye waloo mithandazo kwathandazelwa ukuba abantu “bamanyane elukholweni.” Ekuqukunjelweni kwaloo nkonzo, abo bantu babelapho bacula uBawo Wethu Osezulwini ngesiLatin, osekelwe kuMateyu isahluko 6, indinyana 9 ukusa kweye-13.

Kwangaxeshanye, abameli bezinye iicawa babethandaza kwezinye iindawo. Kwiholo ekufuphi naseMecca, amaSilamsi ayeguqe ezikhaphethini ethandaza kuAllah. AmaZoroastrian ayebase umlilo ongcwele, yaye ayethandaza kufuphi namaJain namaConfucius. Abameli beecawa ezisekelwe kwizithethe zaseAfrika babethandaza kwizinyanya zabo. AmaHindu ayethandazela uxolo koothixo bawo. Bonke aba bameli babebongoza oothixo babo ngokwezithethe zabo.

Bavakalisa Umnqweno Ofanayo Wokufuna Uxolo

Bonke aba bameli babuyela ententeni ukuze kuqukunjelwe loo nkonzo. Iimonki zanika abo bameli izibane ezingumfuziselo woxolo. Lowo yayingumbono obukelekayo. Emva koko, abameli abahlukahlukeneyo bafunda imiyalezo ephathalele uxolo, ngamnye ethetha into eyahlukileyo komnye.

“Ukuze kubekho uxolo, mntu ngamnye ufanele athande ummelwane wakhe.”—UBhishophu oMkhulu uBartholomeus I.

“Ugonyamelo nobunqolobi buchasene nentsingiselo yokwenene yegama elithi unqulo.”—UGqr. Konrad Raiser, ummeli weBhunga Leecawa Zehlabathi.

“Sizinikele ekufundiseni abantu ukuba bahlonelane.”—UBhai Sahibji Mohinder Singh, ongummeli wecawa yamaSikh.

“Xa kungekho okusesikweni akubikho xolo lokwenene.”—UBhishophu wamaOthodoki uVasilios.

Ekugqibeleni upopu wafunda amazwi esiqale ngawo kweli nqaku. Ekuqukunjelweni kwale nkonzo kazwelonke, abameli beenkonzo ezahlukahlukeneyo bangana yaye oko kwakuyimbonakaliso yoxolo. Kuloo nkonzo, abameli ababevethe ezimbejembeje bathetha bophela. Noko ke, abantu basabela njani ngokuphathelele le nkonzo yayizaliswe bubuqheleqhele?

‘Ukuba Bebenokukwenza Oko Bakuthethayo’

Inyathelo likapopu laqhwatyelw’ izandla kumaphephandaba nakumabonwakude. Bambi bade bathi upopu “sisithethi esimela zonke iicawa zeNgqobhoko.” Iphephandaba laseVatican iL’Osservatore Romano lathi olo suku lomthandazo waseAssisi “lwaluhlahl’ indlela esa eluxolweni.” Umxholo wephephandaba iCorriere dell’Umbria wawusithi “Oko Kwenzeke EAssisi Sisiqalo Soxolo.”

Asingabo bonke abantu abasiqhwabel’ izandla eso siganeko. Bambi babenamathandabuzo kuba nangona uxolo lwalukhe lwathandazelwa ngaphambili ngowe-1986 nangowe-1993, akuzange kuyekwe ukuliwa iimfazwe ezixhaswa ziicawa. Intiyo ephenjelelwa lunqulo ngunozala wokubulalana kwabantu eUganda, kwilizwe elalisakuba yiYugoslavia, eIndonesia, ePakistan, kuMbindi Mpuma nakuMntla Ireland.

Iphephandaba laseItali iLa Repubblica lathi abanye abagxeki babesithi loo ntlanganiso “yayenzelwe nje ukuqhayisa.” Elinye ilungu lePalamente yaseYurophu lathi ukuze kubekho uxolo, kufuneka abantu beecawa “benze oko kuthethwa yiVangeli”—oko kukuthi, bathobele amazwi athi “thanda iintshaba zakho, umntu okubetha esidleleni mnike nesinye.” Yaye ngokutsho kwalo, “akukho mntu ukwenzayo oko.”

Umongameli weItalian Jewish Communities wathi “kuya kubangela umdla ukubona oko kuza kwenzeka, ukubona enoba abantu baza kukwenza kusini na oko bakuthethayo.” Ummeli weItalian Buddhists wathetha okufanayo, esithi abantu “bamele baqonde ukuba iinzame zoxolo asiyonto nje ithethwa ngomlomo.” Kwiphephancwadi laseItali iL’Espresso, enye intatheli yathi abameli beecawa zeNgqobhoko ababekho kuloo ntlanganiso yayiqhutyelwa eAssisi babeyele enye injongo apho. Yathi “kubonakala ngathi bebefuna nje ukuvakalisa izikhalazo zabo ngokuphathelele ukungathandwa konqulo, ukungabikho kwengqeqesho nokungabi nalukholo kwabantu,” yaye bebefuna nokuphelisa “umoya wokungakhathalelwa konqulo” okhoyo eYurophu nangona elo “lalifudula ligqalwa njengelizwe lamaKristu.”

Phakathi kwabantu ababeyigxeka ngamandla loo ntlanganiso kwakukho namaKatolika asadla ngendeb’ endala, lawo anoloyiko lokusingelwa phantsi kweemfundiso zecawa yawo. Kudliwano-ndlebe olwalukumabonwakude, uVittorio Messori, umbhali owaziwayo ongumKatolika, wathi loo ntlanganiso yayiqhutyelwa eAssisi yayinokwenza abantu bangayiboni kakuhle into yokuba iicawa aziboni ngasonye. Kakade ke, iinkokeli zeecawa zaqinisekisa ukuba akukho nto iya kwenza kubonakale ngathi kuxutywa unqulo. Kwintetho yakhe, nopopu waziphikisa izityholo zokuba injongo yaloo ntlanganiso ibikukuxuba unqulo. Sekunjalo, kwabaninzi eso siganeko senza kwabonakala ngathi zonke ezo nkonzo zahlukahlukeneyo zisengela thungeni linye.

Unqulo Noxolo

Noko ke, yintoni enokwenziwa ziicawa ukuze kubekho uxolo? Kwabaninzi loo mbuzo uyahlekisa, kuba endaweni yokuba iicawa zithintele imfazwe, zizo kanye ezibekek’ ityala. Ingxelo yababhali-mbali ibonisa ukuba oorhulumente baye basebenzisa iicawa ukuze ziphembelele imfazwe. Noko ke, umbuzo ngulo: Kutheni iicawa ziye zavuma ukusetyenziswa ngale ndlela?

Eneneni, kukho umgaqo ongcwele obunokunceda iicawa zeNgqobhoko ziphephe ityala lokubandakanyeka emfazweni. UYesu wathi abalandeli bakhe abafanele babe ‘yinxalenye yehlabathi.’ (Yohane 15:19; 17:16) Ukuba iicawa zeNgqobhoko beziwathobela loo mazwi, bezingayi kwakha ubuhlobo namagunya ezobupolitika, zivume ukuba kuliwe imfazwe zize zisikelele imikhosi yayo.

Enyanisweni, ukuze zenze ngokuvisisana noko kwathethwa eAssisi, iinkokeli zonqulo bekuya kufuneka zingabi nabuhlobo namagunya ehlabathi. Ukongezelela koko, bekuya kufuneka zifundise amarhamente azo indlela yokuphila ngoxolo. Noko ke, ababhali-mbali bathi phakathi kwabantu abanogonyamelo ehlabathini, kukho abantu abaninzi abakholelwa kuThixo—okanye abazibanga bekholelwa kuye. Elinye inqaku lomhleli kwiphephandaba lakutshanje lathi: “Kungekudala emva koSeptemba 11, kukho mntu uthile owabhala la mazwi achukumisayo kolunye udonga lwaseWashington, D.C.: ‘Thixo, nceda usihlangule kubantu abakholelwa kuwe.’”

Loo nkonzo inobuqheleqhele yayiqhutyelwa eAssisi yashiya abantu benemibuzo engaphendulekiyo. Kodwa kusenokwenzeka ukuba owona mbuzo ubalulekileyo—okanye uxhalabisayo—kubantu abaninzi bonqulo ngulo: Kutheni uThixo engade ayiphendule imithandazo yoxolo eyenziwa ngabantu beecawa?

[Umbhalo osemazantsi]

[Umfanekiso okwiphepha 23]

Abameli beecawa abaphethe izibane—ezingumfuziselo woxolo

[Inkcazelo]

AP Photo/Pier Paolo Cito

[Inkcazelo Ngomfanekiso okwiphepha 21]

AP Photo/Pier Paolo Cito