Imbono YeBhayibhile

Ngaba UThixo Ububetha Ngoyaba Ubuthathaka Esinabo?

‘Andingomntu ongendawo! Kudala ndizama ukwahlukana neendlela zam ezimbi, kodwa ndibuthathaka gqitha!’

NGABA nawe okanye omnye umntu omaziyo uvakalelwa ngale ndlela? Abanye bathi ubuthathaka obendeleyo abunakoyiswa. Bambi ngamakhoboka otywala, ecuba okanye iziyobisi. Ukanti abantu abaninzi ngamabawa. Kukwakho nabo bazinikele ekuziphatheni okubi ngokwesini, bezithethelela ngelithi abanakuphila ngaphandle kwesini.

Njengoko amazwi afumaneka kuMateyu 26:41 ebonisa, uYesu wabonisa ukuba uyabuqonda ubuthathaka babantu.a Eneneni, xa iyonke ingxelo yeBhayibhile ibonisa ngokucacileyo ukuba uYehova uThixo noYesu banenceba ngokwenene ebantwini. (INdumiso 103:8, 9) Kodwa ngaba sifanele silindele ukuba uThixo azibethe ngoyaba zonke iziphoso zethu?

UMoses NoDavide

Khawuqwalasele ingxelo ethetha ngoMoses. Wayesaziwa ‘njengeyona ndoda ilulamileyo kunabo bonke abantu ababephezu komhlaba,’ yaye wayesenza konke okusemandleni ukulondoloza olo phawu luhle. (Numeri 12:3) Njengoko amaSirayeli ayehamba entlango, ayedla ngokwenza izinto ezingafanelekanga yaye ayengamhloneli uThixo nabameli bakhe. Kuyo yonke loo meko, ngokuthobeka uMoses wayesoloko efuna ulwalathiso lukaThixo.—Numeri 16:12-14, 28-30.

Noko ke, xa kanye lwalusele luza kuphela olo hambo lude, akazange akwazi ukuwubamba umsindo wakhe phambi kwalo lonke olo hlanga yaye akazange ayithobele imiyalelo kaThixo. UThixo wamxolela, kodwa ngaba wasibetha ngoyaba eso senzo? Akunjalo. Wathi kuMoses: ‘Ngenxa yokuba ungabonisanga lukholo kum, akuyi kulingenisa eli bandla ezweni endibanika lona.’ UMoses wayengazukungena kwiLizwe Lesithembiso. Emva kweminyaka engama-40 ezabalazela ukufumana elo lungelo limangalisayo, eso siphoso sambangela ukuba angalifumani.—Numeri 20:7-12.

UKumkani uDavide yenye indoda eyayihlonela uThixo kodwa wenza isiphoso. Ngesinye isihlandlo akazange akwazi ukuzibamba yaye waba neentlobano zesini nomfazi wenye indoda. Emva koko, wazama ukusifihla eso sono ngokuyalela ukuba umyeni waloo mfazi abulawe. (2 Samuweli 11:2-27) Emva koko, wazisola ngokunzulu ngoko wakwenzayo, yaye uThixo wamxolela. Kodwa uDavide wayichitha loo ntsapho, yaye uYehova akazange amkhusele kwimiphumo yoko ebuhlungu. Unyana kaDavide wagula kakhulu, yaye nakuba uDavide wayethandazela ukuba umntwana wakhe aphile, uYehova akazange amncede. Loo nyana kaDavide wafa yaye emva koko intsapho yakhe yehlelwa yintlekele emva kwenye. (2 Samuweli 12:13-18; 18:33) UDavide wavuna imiphumo ebuhlungu kakhulu ngenxa yokoyiswa kukuziphatha.

Le mizekelo ibonisa ukuba uThixo uyabaphendulisa abantu ngehambo yabo. Abo bafuna ukumkhonza bamele balwe nobuthathaka babo ukuze babe ngamaKristu afanelekileyo. Abaninzi bakwenza oko kwinkulungwane yokuqala.

Ukulwa Nesono

Ngokufanelekileyo, umpostile uPawulos ugqalwa njengomzekelo wendlela amaKristu afanele aphile ngayo. Kodwa ngaba ubusazi ukuba kwafuneka aqhubeke esilwa nobuthathaka bakhe? AmaRoma 7:18-25 aluchaza ngokucacileyo olu sukuzwano, okanye, ngokutsho kwendinyana 23, lo ‘mlo.’ UPawulos wayeqhubeka esilwa kuba wayesazi ukuba umnqweno wokwenza isono uhlala ukho.—1 Korinte 9:26, 27.

Amanye amalungu ebandla lobuKristu kwiKorinte yamandulo ayefudula engabenzi bobubi. IBhayibhile ithi ayefudula ‘engabahenyuzi, abakrexezi, amadoda alala namadoda, amasela, abantu ababawayo namanxila.’ Kodwa iphinda ithi ‘ahlanjwa ahlambuluka.’ (1 Korinte 6:9-11) Kwenzeka njani oko? Ukuze ayeke loo mikhwa ingendawo, omelezwa kukufumana ulwazi oluchanileyo, ukunxulumana namaKristu yaye ancedwa nangumoya kaThixo. Ekugqibeleni, uThixo wawavakalisa njengamalungisa egameni likaKristu. Ewe, uThixo wawaxolela, ngaloo ndlela ewanika isazela esicocekileyo.—IZenzo 2:38; 3:19.

UPawulos namaKristu aseKorinte abazange balugqale njengento engenamsebenzi utyekelo lwabo lwesono. Kunoko, balwa nalo yaye uThixo wabanceda bakwazi ukuloyisa. Abo banquli benkulungwane yokuqala baziphatha ngendlela efanelekileyo nakuba babenotyekelo lokungafezeki. Kuthekani ngathi?

UThixo Ulindele Ukuba Silwe Nobuthathaka Esinabo

Sisenokulwa nobuthathaka esinabo, kodwa asinakubuphelisa. Nangona simele siqhubeke sisilwa nokungafezeki kwethu, asinakukuphelisa. Ukungafezeki kubangela sibe nobuthathaka ekunzima ukuboyisa. Sekunjalo, asifanele sinikezele kubuthathaka esinabo. (INdumiso 119:11) Kutheni kubaluleke kangaka nje oku?

Kungenxa yokuba uThixo akasivumeli siqhubeke sisenza ubungendawo kuba sisithi asifezekanga. (Yude 4) UYehova ufuna ukuba abantu balungise ihambo yabo, baze baziphathe kakuhle. IBhayibhile ithi: “Kwenyanyeni oko kungendawo.” (Roma 12:9) Yintoni ebangela ukuba uThixo abe ngqongqo ngale ndlela?

Esinye isizathu kukuba ukunikezela kubuthathaka kuyingozi. KumaGalati 6:7, iBhayibhile ithi: “Loo nto ayihlwayelayo umntu, uya kuvuna kwayona.” Abo banikezela kutyekelo oluthile, ukubawa nokuziphatha okubi badla ngokuvuna imiphumo ebuhlungu. Kodwa kukho nesinye isizathu esibaluleke ngakumbi.

UThixo akasifuni isono. Isono ‘sisahlukanisa’ noYehova. (Isaya 59:2) Ekubeni engakholiswa ngabo baqhelisela isono, uyababongoza: “Zihlambeni; zihlambululeni; . . . yekani ukwenza okubi.”—Isaya 1:16.

UMdali wethu unothando nenceba. “Akanqweneli ukuba kutshabalale nabani na kodwa unqwenela ukuba bonke bafikelele enguqukweni.” (2 Petros 3:9) Ukusoloko sinikezela kubuthathaka kubangela ukuba uThixo angakholiswa sithi. Ekubeni uThixo engabubethi ngoyaba ubuthathaka esinabo, nathi asifanele sibubethe ngoyaba.

[Umbhalo osemazantsi]