Ukuba Namandla Nakuba Unobuthathaka

UBUTHATHAKA bunokumongamela umntu. Bunokumthi nca okokhwekhwe lwexhwili. Angade acinge ukuba akanakuboyisa, okanye azive engafaneleki, azithelekise nabanye, ecinga ukuba iimeko zabo zibhetele kunezakhe. Kwelinye icala, usenokuba unesifo esinganyangekiyo esimthez’ amandla atsho angabunandiphi ubomi. Enoba sisiphi na eso sifo, sinokumenza azive ebambisekile. Unokuvakalelwa njengoYobhi, owathi kuThixo: “Owu akwaba ubungandifihla eShiyol, undigcine ndifihlakele de ubuye umsindo wakho, undibekele umda wexesha uze undikhumbule!”—Yobhi 14:13.

Unokuphuncula njani kuloo meko inganiki themba? Kunzima kunjalo, kufuneka ukhe ulibale kancinane ngeengxaki zakho. Ngokomzekelo, usenokucinga ngale mibuzo iphefumlelweyo uYehova awayibuza umkhonzi wakhe othembekileyo uYobhi: “Wawuphi na ekusekeni kwam umhlaba? Ndixelele, ukuba uyakwazi ukuqonda. Ngubani owamisa imilinganiselo yawo, ukuba uyazi, okanye ngubani na owawulula ulutya lokulinganisa phezu kwawo?” (Yobhi 38:4, 5) Ukucingisisa ngentsingiselo yaloo mibuzo, kunokusenza sibuqonde ubulumko namandla kaYehova agqwesileyo. UYehova unezizathu ezivakalayo zokuvumela izinto ezenzeka ehlabathini ngoku.

“Iliva Enyameni”

Omnye umkhonzi othembekileyo kaYehova wamcela ukuba asuse “iliva enyameni,” ingxaki engapheliyo. Umpostile uPawulos wabongoza uThixo izihlandlo ezithathu ukuba amkhulule kule ngxaki. Enoba yayiyintoni na, kanye njengeliva eliphazamisayo, kusenokwenzeka ukuba yamenza akonwaba uPawulos kwinkonzo kaYehova. Wayifanisa nokusoloko empakazwa. UYehova wamphendula wathi: “Ububele bam obunganifanelanga bukulingene; kuba amandla am enziwa agqibelele kubuthathaka.” UYehova akazange alisuse elo liva enyameni. UPawulos kwafuneka awe evuka esilwa nalo, kodwa wongezelela ngelithi: “Xa ndibuthathaka, kuxa kanye ndinamandla.” (2 Kor. 12:7-10) Wayethetha ukuthini?

Ingxaki kaPawulos zange isuke ithi shwaka. Sekunjalo ayizange imthintele ekwenzeni izinto zamehlo enkonzweni kaYehova. UPawulos wathembela kwinkxaso kaYehova waza waqhubeka ecela uncedo lwakhe. (Fil. 4:6, 7) Xa wayesele eza kufa, uPawulos wathi: “Ndiwulwile umlo omhle, ugqatso ndilubaleke kwada kwesa ekugqibeleni, ukholo ndilugcinile.”—2 Tim. 4:7.

Nakuba abantu benobuthathaka neengxaki ngenxa yokungafezeki kwabo, uYehova uyabasebenzisa ukuze afeze ukuthanda kwakhe, ibe oko kuyamzukisa. Unokubalathisa aze abanike ubulumko bokujamelana neengxaki zabo baze bahlale bevuya kwinkonzo yakhe. Enyanisweni, unokusebenzisa abantu abangafezekanga ukuze benze imisebenzi emikhulu nakuba benobuthathaka.

UPawulos wathi xa echaza isizathu sokuba uThixo engazange alisuse iliva enyameni yakhe: “Ukuze ndingaphakami ngokugqithiseleyo.” (2 Kor. 12:7) “Iliva” likaPawulos lalimkhumbuza ngokusikelwa kwakhe umda ibe lalimnceda ukuba ahlale ethobekile. Oko kuvisisana namazwi kaYesu athi: “Nabani na oziphakamisayo uya kuthotywa, yaye nabani na ozithobayo uya kuphakanyiswa.” (Mat. 23:12) Iimvavanyo zinokubafundisa ukuthobeka abakhonzi bakaThixo zize zibancede baqonde ukuba, ukuze banyamezele ngokuthembeka kufuneka bathembele kuYehova. Njengompostile uPawulos, nabo ‘banokuqhayisa ngoYehova.’—1 Kor. 1:31.

Ubuthathaka Obufihlakeleyo

Abanye basenokuba banobuthathaka nakuba bona bengayiqondi loo nto okanye bemathidala ukuyamkela. Ngokomzekelo, umntu usenokuzithemba ngokugqithiseleyo, athembele kwizinto anazo. (1 Kor. 10:12) Obunye ubuthathaka obuqhelekileyo kubantu abangafezekanga kukuzifunela udumo.

UYowabhi, owaba yinjengele yomkhosi kaKumkani uDavide, wayekhaliphile, engacingi kabini, yaye ekwazi ukucombulula iingxaki. Ukanti wagabadela esaphul’ umthetho, nto leyo eyayityhila ikratshi nokuzingca. Ngenkohlakalo wabulala iinjengele ezimbini zomkhosi. Waqala ngokubulala uAbhinere eziphindezela. Kamva, ezenza ngathi ufuna ukubulisa umza wakhe uAmasa, uYowabhi wamthi nqaku ngentshebe ngokungathi uza kumanga kodwa wamfak’ ikrele elalikwisandla sakhe sasekhohlo. (2 Sam. 17:25; 20:8-10) UYowabhi wayesusiwe kwisikhundla sakhe sokuba yinjengele yomkhosi kwaza kwafakwa uAmasa, ngoko wasebenzisa elo thuba ukuze alususe endleleni utshaba lwakhe, mhlawumbi enethemba lokuba angabuyiselwa esihlalweni sakhe. Izicacele into yokuba uYowabhi wayengakwazi ukuzibamba, esoyiswa nangamabhongo akhe okuzingca. Wayengenalusini yaye engazisoli. Xa uKumkani uDavide wayesele eza kufa, wayalela unyana wakhe uSolomon ukuba aqinisekise ukuba uYowabhi uyahlawula ngabo bonke ububi abenzileyo.—1 Kum. 2:5, 6, 29-35.

Asimele nakanjani na sinikezele kwiminqweno yethu ephosakeleyo; sinokuboyisa ubuthathaka bethu. Simele siqale sibuqonde size sibuvume. Emva koko simele senze okuthile ukuze siboyise. Sinokuthandaza rhoqo kuYehova, simcele ukuba asincede siboyise, size sifunde iLizwi lakhe ngokuzimisela, sikhangela iindlela zokulwa nolo tyekelo. (Heb. 4:12) Kusenokufuneka siqhubeke sisilwa nobuthathaka bethu singaphelelwa ngamandla. Loo mlo usenokuqhubeka kangangexesha elide logama nje singafezekanga. UPawulos wakubona kuye oku, ibe wathi: “Oko ndikunqwenelayo, andikuqheliseli; kodwa oko ndikuthiyileyo koko ndikwenzayo.” Noko ke, njengoko usazi uPawulos akazange ayekele kuloo nto ngokungathi wayengenakukulawula oko akwenzayo. Waqhubeka esilwa nobuthathaka bakhe, ethembele ngoncedo lukaThixo olufumaneka ngoYesu Kristu. (Roma 7:15-25) UPawulos wakha wathi: “Ndiyawuqoba umzimba wam ndize ndiwuphathe njengekhoboka, ukuze, emva kokuba ndishumayele kwabanye, mna ngokwam ndingabi ngongakholekanga ngandlel’ ithile.”—1 Kor. 9:27.

Abantu bayathanda ukuzithethelela. Sinokulwisana nolo tyekelo ngokuzama ukuba nembono kaYehova ngezinto, sisenza oko uPawulos wabongoza amaKristu ukuba akwenze: “Kwenyanyeni oko kungendawo, namathelani koko kulungileyo.” (Roma 12:9) Xa sisilwa nobuthathaka bethu kufuneka sinyaniseke, sinyamezele yaye sikwazi ukuzeyisa. UDavide wacela oku kuYehova: “Sulungekisa izintso zam nentliziyo yam.” (INdu. 26:2) Wayesazi ukuba uThixo unokuluhlolisisa ngokuchanileyo olona tyekelo lwethu aze asincede xa kuyimfuneko. Ukuba siyaluthobela ulwalathiso lukaYehova aludlulisela ngeLizwi lakhe nomoya wakhe oyingcwele, sinokwenza inkqubela eya kusinceda soyise ubuthathaka bethu.

Bambi basenokuba bakhathazwa ziingxaki abavakalelwa kukuba zingaphaya kwamandla abo. Ngokuqinisekileyo abadala bebandla banokusinceda baze basikhuthaze ngothando. (Isa. 32:1, 2) Kodwa bekuya kuba bubulumko ukungalindeli ukuba zonke izinto ziya kulunga. Ezinye iingxaki azinakuphela kule nkqubo ikhoyo yezinto. Sekunjalo, abaninzi baye bafunda ukuhlangabezana nazo ezo ngxaki, nto leyo ebancede baphila ubomi obanelisayo.

UYehova Uqinisekisa Ngokusixhasa

Enoba ziziphi na iingxaki esijamelana nazo kula maxesha anzima, sinokuqiniseka ukuba uYehova uya kusikhokela aze asilondoloze. IBhayibhile ibongoza ngelithi: “Zithobeni, ke ngoko, phantsi kwesandla esinamandla sikaThixo, ukuze aniphakamise ngexesha elililo; liphoseni kuye lonke ixhala lenu, kuba unikhathalele.”—1 Pet. 5:6, 7.

Xa uKathy, osele ekhonze eBheteli kangangeminyaka emininzi waphawula ukuba umyeni wakhe unesifo sika-Alzheimer wavakalelwa kukuba le meko ingaphaya kwamandla akhe. Kwafuneka athandaze kuYehova imihla ngemihla ecela ubulumko nokomelezwa ngokweemvakalelo. Njengoko imeko yomyeni wakhe yayisiba mandundu, abazalwana abanothando bazipha ithuba lokufunda ngendlela yokuhlangabezana nesi sifo yaye oodade abanenkathalo bamomeleza. La maKristu aba lilungiselelo likaYehova lokumomeleza yaye uKathy wakwazi ukunyamekela umyeni wakhe de wafa kwiminyaka emalunga ne-11 eyalandelayo. Uthi: “Ndisezinyembezini ndinombulelo ongazenzisiyo kuYehova ngalo lonke uncedo awandinika lona; lwandomeleza. Ndandingazi ukuba ndingakwazi ukuqhubeka nomsebenzi wam ixesha elide kangako ngoxa ndandiphelile kukutyhafa.”

Okuya Kusinceda Soyise Ubuthathaka Obufihlakeleyo

Xa abantu beziva bengafaneleki, banokuvakalelwa kukuba uYehova akayi kusabela xa bethandazela uncedo ngelo xesha lokubandezeleka. Kufaneleke gqitha ke ukucingisisa ngoko kwathethwa nguDavide xa wayezisola ngesono esinzulu awasenza noBhatshebha: “Intliziyo eyaphukileyo netyumkileyo, Thixo, akuyi kuyidela.” (INdu. 51:17) UDavide wayeguquke ngokunyanisekileyo, ibe wathandaza kuThixo eqinisekile ngenceba yakhe. NoYesu wabonakalisa loo moya kaYehova wokukhathalela abanye. Umbhali weVangeli uMateyu wawabhekisa kuYesu la mazwi kaIsaya: “Akukho ngcongolo yaphukileyo aya kuyityumza, yaye akukho msonto weflekisi aya kuwucima.” (Mat. 12:20; Isa. 42:3) Ngoxa wayelapha emhlabeni, uYesu wabonisa uvelwano kwabo baphantsi nabacinezelekileyo. Ngokungathi kunjalo, akazange acime nentlantsi yokugqibela ebagcina bephila abo bafana nomsonto wesibane seoli esisele siza kucima. Kunoko, ngobubele wabathantamisa abo babandezelekileyo batsho baziva bephilile kwakhona. Wabaphatha ngolo hlobo ke abantu xa wayelapha emhlabeni. Ngaba akukholelwa ukuba uYesu usenjalo nangoku yaye uyavelana nawe kubuthathaka bakho? Phawula ukuba amaHebhere 4:15 abonisa ukuba “uyavelana nobuthathaka bethu.”

Xa wayebhala ‘ngeliva lakhe elisenyameni,’ uPawulos wabonisa ukuba amandla kaKristu ahleli “njengentente” phezu kwakhe. (2 Kor. 12:7-9) Waziva ekhuselwe nguThixo ngoKristu kanye njengokuba umntu ekhuselwa yintente kwimozulu. Kanye njengoPawulos, akuyomfuneko ukuba sinikezele kubuthathaka neengxaki zethu. Ukuze sihlale somelele ngokomoya sinokusebenzisa onke amalungiselelo uYehova awenzileyo ngebandla lakhe elisemhlabeni. Sinokwenza nantoni na esemandleni ethu size ke silindele kuYehova siqinisekile ukuba uya kusalathisa. Xa sibona indlela asinceda ngayo amandla kaThixo xa sinobuthathaka, siya kuthetha la mazwi kaPawulos: “Xa ndibuthathaka, kuxa kanye ndinamandla.”—2 Kor. 12:10.

[Umfanekiso okwiphepha 3]

UPawulos waqhubeka ethandaza kuYehova ecela ukuba amkhokele njengoko eshumayela

[Umfanekiso okwiphepha 5]

UKumkani uDavide wabeka uYowabhi njengenjengele yomkhosi

[Umfanekiso okwiphepha 5]

UYowabhi walubulala utshaba lwakhe, uAmasa

[Umfanekiso okwiphepha 6]

Abadala basalathisa ngeZibhalo nto leyo esinceda sihlangabezane neengxaki esinazo