Ukuqonda Ubuthathaka, Ubungendawo Nenguquko

AMAKRISTU asithiyile isono—ukusilela kwimilinganiselo kaYehova yobulungisa. (Hebhere 1:9) Okubuhlungu kukuba sonke siyona ngamathub’ athile. Sonke silwa nobuthathaka nokungafezeki esakuzuz’ ilifa. Noko ke, kwiimeko ezininzi, ukuba siyazivuma izono zethu kuYehova size ngokunyaniseka sizame ukungazenzi kwakhona, sinokusondela kuye sinesazela esicocekileyo. (Roma 7:21-24; 1 Yohane 1:8, 9; 2:1, 2) Siyambulela uYehova kuba, ngesizinzi sedini lentlawulelo, eyamkela inkonzo yethu engcwele phezu kwabo nje ubuthathaka bethu.

Ukuba uthile uwela esonweni esinzulu ngenxa yobuthathaka benyama, kufuneka alúswe ngokungxamisekileyo ngokuvisisana nomgaqo owandlalwe kuYakobi 5:14-16: “Kukho mntu na ufayo [ngokomoya] phakathi kwenu? Makabizele kuye amadoda amakhulu alo ibandla . . . Nokuba ubethe wenza izono, wozixolelwa. Xelelanani iziphoso, nithandazelane, ukuze niphiliswe.”

Ngenxa yoko, xa umKristu ozahluleleyo enze isono esinzulu, kufuneka okungakumbi kunokusivuma kuYehova isono sakhe. Abadala kufuneka bathabathe amanyathelo athile, ekubeni ukucoceka okanye uxolo lwebandla lusengozini. (Mateyu 18:15-17; 1 Korinte 5:9-11; 6:9, 10) Abadala kusenokufuneka baqonde oku: Ngaba loo mntu uguqukile? Yintoni ekhokelele kweso sono? Ngaba sibe ngumphumo wokuqutyulwa bubuthathaka? Ngaba ibisisono ebesenza rhoqo? Ukuqonda izinto ezinjalo akusoloko kulula okanye kuzicacele kwaye kufuna ingqiqo.

Noko ke, kuthekani ukuba isono sibangelwe kukuhamba ngekhondo lokwenza okuphosakeleyo nehambo engendawo? Xa kunjalo, imbopheleleko yabadala icacile. Xa wayenikela ulwalathiso ngokusingathwa kombandela onzulu kwibandla laseKorinte, umpostile uPawulos wathi: “Ize nimnyothule kuni nina lowo ungendawo.” (1 Korinte 5:13) Abantu abangendawo abanandawo ebandleni lamaKristu.

Ukuhlolisisa Ubuthathaka, Ubungendawo Nenguquko

Abadala banokukwazi njani ukuba uthile uguqukile?a Lo asingombuzo ulula. Ngokomzekelo, khawucinge ngoKumkani uDavide. Wakrexeza waza emva koko, ngokungathi kunjalo, wabulala umntu. Sekunjalo, uYehova wamvumela waqhubeka ephila. (2 Samuweli 11:2-24; 12:1-14) Ngoku ke khawucinge ngoHananiya noSafira. Ngobuqhophololo bazama ukukhohlisa abapostile, ngokuhanahanisa besenza ngathi banesisa kakhulu kunokuba babenjalo ngokwenene. Ngaba eso yayisisono esinzulu? Ewe. Ngaba sasisibi njengokubulala nokukrexeza? Akunjalo! Ukanti, uHananiya noSafira bohlwaywa ngokufa.—IZenzo 5:1-11.

Kutheni izigwebo zingafani nje? UDavide wawela esonweni esinzulu ngenxa yenyama ebuthathaka. Xa wabuzwa ngoko wayekwenzile, waguquka, yaye uYehova wamxolela—nangona wohlwaywa ngokuqatha ngeengxaki ezabakho endlwini yakhe. UHananiya noSafira bona kuba ngobuqhophololo baxoka bezama ukukhohlisa ibandla lamaKristu baza ngaloo ndlela ‘baxokisa umoya oyingcwele noThixo.’ Oko kwabonakala kungqina ukuba babeneentliziyo ezingendawo. Ngenxa yoko, bagwetywa ngokuqatha ngakumbi.

Kuzo zombini ezi meko nguYehova owawisa isigwebo, yaye wagweba ngokufanelekileyo kuba uyakwazi ukucikida iintliziyo. (IMizekeliso 17:3) Abadala abangabantu abanako ukukwenza oko. Ngoko abadala banokuqonda njani enoba isono esinzulu sibonisa ubuthathaka kungekhona ubungendawo?

Enyanisweni, sonke isono sibubungendawo, kodwa asingabo bonke aboni abangendawo. Izono ezifanayo zisenokuba bubungqina bobuthathaka komnye umntu zize zingqine ubungendawo komnye. Eneneni, ngokuqhelekileyo ukona kubandakanya umlinganiselo othile wobuthathaka nobungendawo kulowo wonileyo. Okunye okusincedayo sikuqonde oku yindlela umoni akujonga ngayo oko akwenzileyo noko aceba ukukwenza ngako. Ngaba ubonakalisa umoya wenguquko? Abadala kufuneka babe ngabaqondayo ukuze bakubone oku. Banokukufumana njani ukuqonda okunjalo? Umpostile uPawulos wamthembisa oku uTimoti: “Ziqiqe izinto endizithethayo; iNkosi yokupha ke ingqondo ezintweni zonke.” (2 Timoti 2:7) Ukuba ngokuthobeka abadala ‘bayawaqiqa’ amazwi aphefumlelweyo kaPawulos nawabanye ababhali beBhayibhile, baya kuyiqonda indlela efanelekileyo yokujonga abo bonayo ebandleni. Ngoko, izigqibo zabo ziya kubonisa indlela acinga ngayo uYehova, kungekhona eyabo.—IMizekeliso 11:2; Mateyu 18:18.

Kwenziwa njani oku? Enye indlela kukuhlolisisa indlela iBhayibhile ebachaza ngayo abantu abangendawo nokukhangela enoba inkcazelo iyasebenza kulowo wonileyo kusini na.

Ukuvuma Ityala Nokuguquka

Abantu bokuqala abakhetha ikhondo lobungendawo yayinguAdam noEva. Phezu kwako nje ukuba babefezekile yaye bewazi ngokupheleleyo umthetho kaYehova, bakuvukela ukongama kwakhe njengoThixo. Xa uYehova wababuza ngoko babekwenzile, sinokuphawula nto ithile kwindlela abasabela ngayo—uAdam watyhola uEva, waza uEva watyhola inyoka! (Genesis 3:12, 13) Thelekisa oku nentobeko enzulu kaDavide. Xa wabuzwa ngesono sakhe esinzulu, walivuma ityala waza wacela ukuxolelwa, esithi: “Ndonile kuYehova.”—2 Samuweli 12:13; INdumiso 51:4, 9, 10.

Abadala benza kakuhle ukucinga ngale mizekelo mibini xa besingatha amatyala ezono ezinzulu, ngokukodwa kwimeko yomntu omkhulu. Ngaba umoni—njengoDavide xa waboniswayo ngesono sakhe—ulivuma kwangoko ityala lakhe aze ebonisa inguquko afune uncedo nokuxolelwa nguYehova, okanye ngaba ufuna ukukwenza kubonakale kungenamsebenzi oko akwenzileyo, mhlawumbi etyhola omnye umntu? Liyinyaniso elokuba umntu owonayo usenokufuna ukuchaza oko kukhokelele kwizenzo zakhe, yaye kusenokubakho iimeko, enoba zezexa elidlulileyo okanye zezangoku, ekusenokufuneka abadala baziqwalasele xa besenza isigqibo ngendlela abaza kumnceda ngayo. (Thelekisa uHoseya 4:14.) Kodwa kufuneka ayamkele into yokuba nguye owonileyo kwanokuba nguye obekek’ ityala phambi koYehova. Khumbula: “Usondele uYehova kwabantliziyo zaphukileyo, abasindise abamoya utyumkileyo.”—INdumiso 34:18.

Ukuqhelisela Ububi

Kwincwadi yeeNdumiso, kubhekiselwa kubantu abangendawo izihlandlo ezininzi. Izibhalo ezinjalo zinokubanceda kakhulu abadala baqonde enoba eneneni umntu ungendawo okanye ubuthathaka kusini na. Ngokomzekelo, khawucinge ngomthandazo ophefumlelweyo kaKumkani uDavide: “Musa ukundiqweqwedisa nabangendawo, nabaqhelisela ubutshinga; abathetha uxolo kummelwane wabo, benobubi ezintliziyweni zabo.” (INdumiso 28:3, NW) Phawula ukuba abantu abangendawo bafaniswa ‘nabaqhelisela ubutshinga.’ Umntu owona ngenxa yenyama ebuthathaka kusenokwenzeka ayeke akuba nje ebuyiselwe ezingqondweni. Noko ke, ukuba uthile ‘uqhelisela’ ububi kangangokuba bube yinxalenye yobomi bakhe, oku kunokuba bubungqina bentliziyo engendawo.

Kuloo ndinyana uDavide wakhankanya olunye uphawu lobungendawo. NjengoHananiya noSafira, umntu ongendawo uthetha izinto ezilungileyo ngomlomo wakhe kodwa enobubi entliziyweni yakhe. Usenokuba ngumhanahanisi—njengabaFarisi bomhla kaYesu ‘ababebonakala okunene bengamalungisa kubantu kanti ngaphakathi bazele luhanahaniso nokuchasene nomthetho.’ (Mateyu 23:28; Luka 11:39) UYehova ukuthiyile ukuhanahanisa. (IMizekeliso 6:16-19) Ukuba uthile ngokuhanahanisa uzama ukuzikhanyela izono zakhe ezinzulu naxa ethetha nekomiti egwebayo, okanye uzimisele ukuvuma kuphela oko sele kusaziwa ngabanye, engafuni kusivuma ngokupheleleyo isono sakhe, oku kunokuba bubungqina obucacileyo bentliziyo engendawo.

Ukubonakalisa Ikratshi Lokungamkhathaleli UYehova

Ezinye izinto abonakala ngazo umntu ongendawo zandlalwe kwiNdumiso 10. Apho sifunda oku: ‘Ngokukratsha kongendawo uyatsha olusizana; uyamgiba [akamhloneli, NW] uYehova.’ (INdumiso 10:2, 3) Sifanele simjonge njani umKristu ozahluleleyo onekratshi nongamhloneliyo uYehova? Ngokuqinisekileyo, ezi zizimo zengqondo zobungendawo. Umntu owona ngenxa yobuthathaka uya kuthi, akusiqonda isono sakhe okanye sakuziswa engqalelweni yakhe, aguquke aze enze umgudu wokuguqula ubomi bakhe. (2 Korinte 7:10, 11) Ngokwahlukileyo koko, ukuba umntu wona ngenxa yokungamhloneli ngabom uYehova, yintoni eya kumthintela ekusiphindaphindeni isono sakhe? Ukuba usenekratshi phezu kwako nje ukululekwa ngomoya wobulali, unokuba nako njani ukuthobeka okufunekayo ukuze aguquke ngokunyanisekileyo nangokwenene?

Ngoku khawucinge ngamazwi kaDavide awawavakalisa kamva kwakule ndumiso: “Kungenxa yani na ukuba ongendawo amgibe [angamhloneli, NW] uThixo, athi entliziyweni yakhe, Akuyi kubuza?” (INdumiso 10:13) Kwibandla lamaKristu, umntu ongendawo uyawazi umahluko phakathi kokulungileyo nokubi, kodwa akathandabuzi ukwenza ububi xa ecinga ukuba akayi kohlwaywa. Ukuba nje kubonakala ngathi akayi kubhencwa, uzinikela ngokupheleleyo kutyekelo lwakhe lwesono. Ngokungafaniyo noDavide, ukuba izono zakhe ziziswa elubala, uya kwenza amaqhinga ukuze aphephe isohlwayo. Umntu onjalo akanantlonelo ngokunzulu ngoYehova. “Akukho koyika Thixo emehlweni akhe, . . . Akabucekisi ububi.”—INdumiso 36:1, 4.

Ukwenzakalisa Abanye

Ngokuqhelekileyo, isono asichaphazeli umntu omnye kuphela. Ngokomzekelo, umkrexezi wona uThixo; wenzakalisa inkosikazi nabantwana bakhe; ukuba umntu akrexeza naye utshatile, wenzakalisa intsapho yakhe; yaye ungcolisa igama elihle lebandla. Ukujonga njani konke oko? Ngaba ubonakalisa ukuba buhlungu ngokusuk’ entliziyweni kunye nenguquko yokwenene? Okanye ngaba ubonakalisa umoya ochazwa kwiNdumiso 94: “Bayandolosa bonke abasebenzi bobutshinga. Batyumza abantu bakho, Yehova, bacinezela ilifa lakho. Babulala umhlolokazi nowasemzini, bancinitha inkedama. Bathi ke, Akaboni uYehova, akagqali uThixo kaYakobi”?—INdumiso 94:4-7.

Mhlawumbi, izono ezisingathwa ebandleni azisayi kuquka ukubulala. Sekunjalo umoya obonakaliswa apha—umoya wokukulungela ukwenzakalisa abanye ngenxa yengenelo yobuqu—usenokubonakala njengoko abadala bephanda ngesenzo sobubi. Nako oku likratshi, uphawu lomntu ongendawo. (IMizekeliso 21:4) Kwahluke ngokupheleleyo kumoya womKristu wokwenyaniso, okulungeleyo ukuzincama ngenxa yomzalwana wakhe.—Yohane 15:12, 13.

Ukusebenzisa Imigaqo Yobuthixo

Le migaqo imbalwa ayenzelwanga ukumisela imithetho. Noko ke, yenza kuqondwe izinto ezithile uYehova azijonga njengezingendawo ngokwenene. Ngaba alivunywa ityala ngobubi obenziweyo? Ngaba lowo wonileyo ngekratshi usigatyile isiluleko abesinikiwe ngaphambili kwangalo mbandela mnye? Ngaba wendele kuqheliselo lwesono esinzulu? Ngaba umenzi-bubi ubonakalisa ukungayikhathaleli ngokuphandle imithetho kaYehova? Ngaba wenze umgudu wokuceba ukubufihla obo bubi, mhlawumbi edyobha nabanye kwangaxeshanye? (Yuda 4) Ngaba imigudu enjalo iyaqinisela xa isono siselubala? Ngaba umenzi-bubi ubonakalisa ukungakukhathaleli ngokupheleleyo ukwenzakala akuzise kwabanye nakwigama likaYehova? Kuthekani ngesimo sakhe sengqondo? Emva kokunikelwa kwesiluleko seZibhalo ngobubele, ngaba uyazingca okanye unekratshi? Ngaba akanamnqweno usuk’ entliziyweni wokukuphepha ukusiphinda isono sakhe? Ukuba abadala babona izinto ezinjalo, ezibonisa ukuswel’ inguquko ngamandla, basenokugqiba kwelokuba izono ezenziweyo zinikela ubungqina bobungendawo kunobuthathaka nje bokwenyama.

Kwanaxa bechophele ityala lomntu obonakala enotyekelo lobungendawo, abadala abayeki ukumkhuthazela ukuba enze okulungileyo. (Hebhere 3:12) Abantu abangendawo basenokuguquka baze batshintshe. Ukuba bekungenjalo, kwakutheni ukuze uYehova awabongoze amaSirayeli esithi: “Ongendawo makashiye indlela yakhe, indoda enobutshinga mayishiye iingcinga zayo, ibuyele kuYehova: woba nemfesane kuyo; ibuyele kuThixo wethu ngokuba woxolela ngokukhulu”? (Isaya 55:7) Mhlawumbi, ebudeni bokuchotshelwa kwetyala, abadala banokubona utshintsho oluphawulekayo kwisimo sentliziyo yakhe njengoko lusenokubonakala kwimbonakalo nakwisimo sengqondo esibonisa inguquko.

Kwanangexesha lokususwa komntu kubudlelane, abadala, njengabalusi, baya kumbongoza ukuba aguquke aze azame ukufumana inkoloseko kaYehova kwakhona. Khumbula ‘indoda engendawo’ yaseKorinte. Kuyabonakala ukuba yayiguqula indlela yayo, yaye uPawulos kamva wancomela ukuba iphinde ibuyiselwe. (2 Korinte 2:7, 8) Kwakhona cinga ngoKumkani uManase. Wayengongendawo ngokwenene, kodwa xa waguqukayo ekugqibeleni, uYehova wayamkela inguquko yakhe.—2 Kumkani 21:10-16; 2 Kronike 33:9, 13, 19.

Liyinyaniso elokuba kukho isono esingasayi kuxolelwa—ukona umoya oyingcwele. (Hebhere 10:26, 27) NguYehova kuphela ogqibayo enokuba ngubani owenze isono esinjalo. Abantu abanagunya lakwenjenjalo. Imbopheleleko yabadala kukugcina ibandla licocekile nokunceda ukubuyisela aboni abaguqukileyo. Ukuba benjenjalo benokuqonda nokuthobeka, bevumela izigqibo zabo zibonakalise ubulumko bukaYehova, ngoko uYehova uya kuyisikelela le nkalo yomsebenzi wabo wokwalusa.

[Umbhalo osemazantsi]

[Umfanekiso okwiphepha 29]

UHananiya noSafira ngobuqhophololo baxokisa umoya oyingcwele, bebonisa ukuba babeneentliziyo ezingendawo