Ndandikwiphulo Lokubulala Kodwa Ngoku Ndikwiphulo Lokufuna Uxolo

KUBALISA UTOSHIAKI NIWA

Umqhubi wenqwelo-moya waseJapan owaqeqeshelwa ukuhlasela inqanawa yomkhosi yaseMerika ebudeni beMfazwe Yehlabathi II ubalisa indlela awayevakalelwa ngayo ngoxa wayelindele ukufika kwaloo mhla.

EMVA KOKOYISWA kwiDabi laseMidway ngoJuni 1942, iJapan yarhoxa kwiphulo layo lokuthimba imimandla yePacific. Ukususela ngoko, iJapan yoyiswa umhla nezolo kumadabi ayo nxamnye neUnited States namahlakani ayo yaye la mazwe aphinda ayithabathela kuwo imimandla eyayithinjwe yiJapan.

NgoSeptemba 1943 urhulumente waseJapan wathi abafundi baseyunivesithi ababengafakwa kwinkonzo yasemkhosini kufuneka bangenele inkonzo yasemkhosini. NgoDisemba, xa ndandineminyaka engama-20 ubudala ndangenela inkonzo yomkhosi waselwandle eyayilapho eyunivesithi. Emva kwenyanga ndafundela ukuqhuba iinqwelo-moya zomkhosi waselwandle. NgoDisemba 1944, ndaqeqeshelwa ukuqhuba uhlobo lwenqwelo-moya ekuthiwa yiZero.

Amajoni Awayeqeqeshwe Ngokukhethekileyo

Kwakusele kumbovu ukuba iJapan yoyiswe. NgoFebruwari 1945, zazisele zininzi iinqwelo-moya ii-B-29 ezazihlasela iJapan ngeebhombu. Kwangaxeshanye, imikhosi yaselwandle yaseUnited States yayisondela ngakumbi eJapan, nto leyo yayisenza kube lula ukuba ihlasele ngeenqwelo-moya zayo.

Kwiinyanga ezimbalwa ngaphambi koko, iinkokeli zomkhosi waseJapan zazenze isigqibo sokulwa eli dabi zisebenzisa abantu abakulungeleyo ukuncama ubomi babo. Nangona kwakusele kucaca ukuba iJapan ayinakoyisa kule mfazwe, eso sigqibo sabangela ukuba le mfazwe ithabathe ixesha elide yaye ngenxa yoko kwafa amawaka abantu.

Ngoko ke, kwasekwa iKamikaze Special Attack Force. Yathiywa ngegama lomoya wobuthixo, ikamikaze, isaqhwithi ekuthiwa satshabalalisa iinqanawa zabahlaseli baseMongolia ngenkulungwane ye-13. Kuhlaselo lokuqala lwekamikaze kwasetyenziswa iiZero ezintlanu, nganye yazo yayineebhombu ezinobunzima obuziikhilogram ezingama-250 ekwakuza kuhlaselwa ngazo inqanawa yotshaba.

Kwayalelwa ukuba iYatabe Naval Flying Corps endandisebenza kuyo ibe yiyo ehlaselayo. Sonke safumana uxwebhu ekwakufuneka siluzalise sichaze enoba sikulungele kusini na ukuba kwiqela labantu abaza kuhlasela.

Ndandivakalelwa kukuba ndifanele ndincame ubomi bam ngenxa yelizwe lam. Kodwa kwanokuba ndandinokuncama ubomi bam ndize ndiqhube inqwelo-moya yokuhlasela utshaba, ndandinokudutyulwa ngaphambi kokuba ndintlithe inqanawa yotshaba, ndize ngaloo ndlela ndifele ilize. Ngaba umama wayeza kuyithanda into yokuba ndife ndingekaziphumezi iimbopheleleko zam entsatsheni? Kwakunzima ukuyamkela into yokuba ukuba kwelo qela yeyona nto ibhetele ndinokuyenza ngobomi bam. Sekunjalo, ndalwamkela olo thumo.

NgoMatshi 1945 kwasekwa iqela lokuqala leYatabe Special Attack Corps. Nangona kwakhethwa abantu endandisebenza nabo abangama-29, mna andizange ndikhethwe. Emva kokufumana uqeqesho olukhethekileyo, kwalungiselelwa ukuba ngoAprili banduluke kwiziko lomkhosi womoya laseKanoya eKagoshima baye kuhlasela. Ngaphambi kokuba bathunyelwe eKanoya, ndatyelela abahlobo bam ndinethemba lokuva oko bakucingayo njengoko babejamelene nalo msebenzi.

Ezolile omnye wabo wathi: “Thina siza kufa, kodwa wena uze ungakhawulezi ufe. Ukuba kukho osindileyo kuthi, umele axelele abanye ngendlela oluxabiseke ngayo uxolo aze azabalazele ukulufumana.”

NgoAprili 14, 1945, amaqabane am anduluka. Kwiiyure ezilandelayo emva koko, saphulaphula iindaba sifuna ukuva oko kwenzekileyo. Umsasazi wathi: “IFirst Showa Unit yeKamikaze Special Attack Force iye yaya kuntlitheka kwinqanawa yotshaba elwandle, kwimpuma yeKikai Shima. Bonke bafele apho.”

IOhka—Inqwelo-moya Yokuhlasela Ngeebhombu

Emva kweenyanga ezimbini, ndathunyelwa kwiKonoike Naval Flying Corps ukuze ndibe lilungu leQela Lomkhosi elibizwa ngokuba yiJinrai. Igama elithi Jinrai lithetha “iindudumo zobuthixo.” Kweli qela lomkhosi waselwandle kwakukho iinqwelo-moya (ezazibizwa ngokuba ziiAttackers), ezazipheleka amajoni neenqwelo-moya zokuhlasela ngeebhombu.

Kwinqwelo-moya “enkulu” nganye—iAttacker eneenjini ezimbini—kwakulayishwa iOhka, gama elo elithetha ukuthi “cherry blossom.” Yayifanekisela abaqhubi beenqwelo-moya abaselula ababezimisele ukuncama ubomi babo. IOhka yayiyinqwelo-moya engenanjini eyayikhwela umntu omnye eyayiziimitha ezintlanu ukusuka kwelinye iphiko ukuya kwelinye inobunzima obuziikhilogram ezingama-440. Ngaphambili yayifakwa iziqhushumbisi ezinobunzima obumalunga netoni.

Njengoko inqwelo-moya enkulu isondela kwinqanawa yotshaba, umqhubi wayekhwela kwiOhka, ize emva koko yothulwe kuloo nqwelo-moya inkulu. Emva kokubhabha ithutyana ngeerocket ezintathu ezazithabatha imizuzwana nje elishumi, yayisiya kuntlitheka kwinqanawa yotshaba. Kwakufanelekile ukuba kuthiwe yinqwelo-moya yokuhlasela ngebhombu. Emva kokuba indulukile, yayingenakuphinda ijike!

Xa kuqheliselwa olu hlobo lohlaselo, umqhubi weOhka wayekhwela kwiZero aze abe ngathi uyintlitha kutshaba esuka kumgama omalunga neemitha ezingama-6 000 ukuphakama. Baninzi abaqhubi abaphulukana nobomi babo besenza olu qheliselo.

Ngaphambi kokuba ndabelwe ukuba yinxalenye yeli qela lomkhosi, lalisele lihambile iqela lokuqala. Lahamba neeAttackers ezili-18 ezazilayishe iiOhkas, ziphelekwa ziinqwelo-moya ezinkulu ezili-19. Ezo Attackers zazisindwa yaye zicotha. Akukho nanye kuzo eyafikayo kwindawo yotshaba. Zonke ezo Attackers kunye neenqwelo-moya ezazizipheleka zadutyulwa ziinqwelo-moya zaseUnited States.

Ekubeni ngoku zazingekho iinqwelo-moya eziza kupheleka iQela Lomkhosi elibizwa ngokuba yiJinrai, kwafuneka liye kuhlasela ngaphandle kwazo. Akuzange kubekho namnye ubuyayo. Bonke bafela apho, banyamalala kwidabi laseOkinawa.

Iintsuku Zokugqibela Zemfazwe

NgoAgasti 1945, ndathunyelwa kwiOtsu Naval Flying Corps. Eli ziko lalimi phantsi kwentaba iHiei-zan kufuphi nesixeko saseKyoto. Ekubeni kwakulindelwe ukuba imikhosi yaseUnited States ingene kumhlaba waseJapan, kwenziwa amacebo okuhlasela iinqanawa zomkhosi zaseUnited States ngeeOhka zisuka entabeni. Ukulungiselela olo hlaselo, kwenziwa iindlela phezu kwentaba.

Sahlala silindele umyalelo othi masiye kuhlasela. Noko ke awuzange ufike loo myalelo. Emva kokuba iHiroshima neNagasaki zitshatyalaliswe ngebhombu yeathom ngomhla we-6 nowe-9 kuAgasti, iJapan yanikezela ngokupheleleyo kwiUnited States namahlakani ayo ngoAgasti 15. Yaphela loo mfazwe. Ndaza ke ngaloo ndlela ndaba ndisinde cebetshu.

Ngasekupheleni kuka-Agasti, ndabuyela ekhaya eYokohama, kodwa ndafika indlu yakuthi iluthuthu emva kokuhlaselwa ngeebhombu zii-B-29. Intsapho yakuthi yayiphelelwe lithemba. Udadewethu nomtshana wam batshela kuloo ndlu. Sekunjalo, sathuthuzelwa kukubuya komninawa wam esindile emfazweni.

Sikobo bugxwayiba yaye sithwaxwa nayindlala, ndabuyela eyunivesithi ukuze ndigqibezele imfundo yam. Emva kokufunda unyaka wonke, ndafumana isidanga ndaza ndaya kusebenza. Ngowe-1953 ndatshata noMichiko yaye ekuhambeni kwexesha safumana oonyana ababini.

Iphulo Lokufuna Uxolo

Ngowe-1974, uMichiko waqalisa ukufundisisa iBhayibhile nelinye iNgqina likaYehova. Kungekudala emva koko waqalisa ukuya kwiintlanganiso nakumsebenzi wawo wokushumayela. Ndandingayithandi into yokuba esoloko ehamba. Wandicacisela ukuba umsebenzi wokushumayela wamaKristu ubangela kubekho uxolo nolonwabo lokwenene. Ngoko ndaqiqa ngelithi ukuba kunjalo ngokwenene, andimele ndimthintele ekwenzeni loo msebenzi. Kunoko ndifanele ndisebenzisane naye.

Malunga nelo xesha, ndaqesha ibathwana lamaNgqina aselula ukuba asebenze njengoonogada basebusuku. Ekufikeni kwaloo maNgqina aselula, ndawabuza ngentlangano nomsebenzi wawo. Ndamangaliswa kukufumanisa ukuba ngokwahlukileyo kolunye ulutsha, alungelelene yaye anomoya wokuzincama. Ayencedwe yiBhayibhile ukuze abe nezo mpawu. Andicacisela ukuba ehlabathini lonke, amaNgqina akanalucalucalulo lobuhlanga yaye aphila ngokuvisisana nomyalelo weBhayibhile ukuba athande uThixo nabamelwane bawo. (Mateyu 22:36-40) Abanye abantu ayebagqala njengabazalwana noodade enoba ngabaluphi na uhlanga.—Yohane 13:35; 1 Petros 2:17.

Ndandiqiqa ngelithi ‘Leyo yinto engenakwenzeka.’ Ekubeni iicawa ezininzi zeNgqobhoko zazisilwa zodwa, ndandingayikholelwa into yokuba amaNgqina kaYehova ahlukile.

Ndawaxelela ukuba andiyikholelwa loo nto. Esebenzisa iNcwadi Yonyaka YamaNgqina KaYehova, la maNgqina aselula andibonisa ukuba amaNgqina aseJamani avalelwa aza atshutshiswa ngenxa yokuba engathabathi cala phantsi kolawulo lukaHitler. Ndeyiseka ukuba amaNgqina kaYehova ngamaKristu okwenyaniso.

Umfazi wam wafuzisela uzahlulelo lwakhe kuThixo ngokubhaptizwa emanzini ngoDisemba 1975. Kanye ngelo xesha mntu uthile wacela ukundifundela iBhayibhile. Noko ke, emva kokucinga ngeembopheleleko endandinazo, njengokuhlawulela oonyana bam esikolweni nokuhlawula ityala lendlu, ndaba madolw’ anzima. Amadoda atshatileyo ebandleni ayehlengahlengisa ixesha alichitha empangelweni ukuze abe nexesha elaneleyo lokunyamekela iintsapho zawo. Ndaqonda ukuba nam kuza kufuneka ndenze okufanayo. Kodwa emva kokuboniswa indlela yokulungelelanisa imicimbi yobuKristu nomsebenzi wengqesho, ndagqiba kwelokuba ndifunde iBhayibhile namaNgqina kaYehova.

Isigqibo Sokukhonza UThixo Woxolo

Emva kweminyaka emibini ndifundisisa iBhayibhile, umntu endandifunda naye wandibuza enoba ndikhe ndacinga na ngokuzahlulela kuThixo. Noko ke, ndandingekayicingi nokuyicinga loo nto yaye oko kwakundikhathaza.

Ngenye imini ndandisihla kwizinyuko ndingxamile kwindawo endisebenza kuyo. Ndakhubeka, ndawa ndabetheka ngenqentsu ndaza ndafa isiqaqa. Emva kokuba ndibuyele ezingqondweni, intloko yam yaba buhlungu gqitha yaye ndasiwa esibhedlele ngenqwelo yezigulana. Nangona inqentsu lam lalidumbe kakhulu, amathambo alo ayengaphukanga yaye lalingenachaphaza lagazi.

Hayi indlela endandimbulela ngayo uYehova ngobomi bam! Ukususela ngelo xesha, ndazimisela ukwenza ukuthanda kukaYehova ndaza ndazahlulela kuye. Ndabhaptizwa ngoJulayi 1977 ndineminyaka engama-53 ubudala. UYasuyuki inkulu yam, wafundisisa iBhayibhile waza wabhaptizwa emva kweminyaka emibini.

Malunga neminyaka elishumi emva kokuba ndibhaptiziwe, ndayeka ukusebenza. Kuloo minyaka ilishumi, ndazama ukulungelelanisa ubomi bokuba ngumKristu nomsebenzi wengqesho. Ngoku ndinelungelo lokukhonza njengomdala eYokohama yaye ndichitha ixesha elininzi kubulungiseleli bobuKristu. Inkulu yam ikhonza njengomdala nomlungiseleli wexesha elizeleyo kwibandla elikufuphi.

Emva kokusinda emkhosini nakumsebenzi oyingozi endandiwenza, ndinombulelo kuba ndisaphila yaye ndikugqala njengelungelo ukuba nesabelo kumsebenzi wokushumayela ‘iindaba ezilungileyo zobukumkani.’ (Mateyu 24:14) Ndeyisekile ukuba eyona ndlela ilungileyo yokuphila kukuba ngomnye wabantu bakaThixo. (INdumiso 144:15) Kwihlabathi elitsha eliza kufika kungekudala, abantu abayi kuphinda babone iimfazwe ekubeni ‘kungekho hlanga luya kuphakamisela olunye uhlanga ikrele, yaye aziyi kuphinda zifunde imfazwe.’—Isaya 2:4.

Ukuba uThixo uyathanda, ndingakuvuyela ukubona abantu endibaziyo abafela emfazweni abaya kuvuswa. Kuya kundivuyisa gqitha ukuthetha nabo ngoxolo abanokulunandipha kwiparadesi esemhlabeni ngaphantsi kolawulo lobulungisa loBukumkani bukaThixo basezulwini!—Mateyu 6:9, 10; IZenzo 24:15; 1 Timoti 6:19.

[Umfanekiso okwiphepha 25]

Xa ndandikumkhosi weenqwelo-moya zaselwandle

[Umfanekiso okwiphepha 24, 25]

I-“Ohka”—Inqwelo-moya yokuhlasela ngeebhombu

[Inkcazelo]

© CORBIS

[Umfanekiso okwiphepha 26]

Ndikunye namaqabane am ngaphambi kokuya kuphumeza umsebenzi oyingozi. Ndingowesibini ukusuka ngasekhohlo, yaye ndim kuphela owasindayo

[Umfanekiso okwiphepha 27]

Ndikunye nomfazi wam uMichiko nenkulu yam uYasuyuki

[Inkcazelo Ngomfanekiso okwiphepha 24]

U.S. National Archives photo