Ukuvavanywa Kokholo ESlovakia

NGOKUBALISWA NGUJÁN BALI

NDAZALWA ngoDisemba 24, 1910, eZáhor, idolophana ekwimpuma Slovakia ngoku. Ngelo xesha, le dolophana yethu yayiyinxalenye yoBukhosi beOstriya neHungary. Ngowe-1913, mna noMama saya eUnited States kuTata, owayehambe eZáhor ngaphambilana koko. Kwiminyaka emibini emva kokufika kwam noMama eGary, eIndiana, kwazalwa udade wethu uAnna. Emva koko uTata wagula waza wafa ngowe-1917.

Ndaba ngumfundi onenzondelelo, yaye ndandinomdla kakhulu kwimicimbi yonqulo. KwiCawa kaCalvin endandihamba isikolo seCawa kuyo, utitshala waphawula ukuba ndinomdla kwizinto zokomoya. Ukuze anelise lo mdla ndandinawo, wandinika iHolman Edition of the Bible, eyayinemibuzo engama-4 000 neempendulo zayo. Loo nto yabangela ukuba njengenkwenkwana ene-11 leminyaka ubudala ndizikise ukucinga.

‘Yinyaniso Le’

Kuloo minyaka yangaphambili, abanye babantu baseSlovakia ababefudukele kwindawo esasihlala kuyo baba ngaBafundi BeBhayibhile, ngokwendlela ayebizwa ngayo amaNgqina kaYehova ngelo xesha. Omnye wabo yayinguTatomncinci uMichal Bali, owabelana nathi ngeenyaniso zeBhayibhile. Noko ke, ngowe-1922, mna noMama nodade wethu sabuyela eZáhor, ngelo xesha eyayiyinxalenye yempuma Czechoslovakia.

Kungekudala emva koko, uTatomncinci uMichal wandithumelela yonke imiqulu yeStudies in the Scriptures, ebhalwe nguCharles Taze Russell, nemibhalo yeMboniselo eyayishicilelwe ngokutsha ukuya kutsho kwinkupho yokuqala eyashicilelwa ngoJulayi 1, 1879. Ndazifunda ndazigqiba, ezinye ndazifunda ngokuphindaphindiweyo yaye ndeyiseka ukuba ndiyifumene inyaniso yeBhayibhile endandiyifuna.

Malunga nelo xesha, abanye baBafundi beBhayibhile ababefudukele eUnited States babuyela kwilizwe labo, eSlovakia. Baba ngaBafundi beBhayibhile bokuqala abathetha iSlovak, eCzechoslovakia. Mna noMama sasisiya kwezi ntlanganiso kwidolophana esasihlala kuyo yaseZáhor nakwezinye iindawo ezikufuphi.

Ezo ntlanganiso zazifana nezo zaziqhutywa ngamaKristu ngenkulungwane yokuqala. Sasidla ngokuhlanganisana kwikhaya lomnye waBafundi beBhayibhile, apho sasihlala sirhangqe itafile ekwakubekwa isibane esisebenza ngeoli embindini wayo. Njengoko ndandingoyena umncinane, ndandidla ngokuhlala ngasemva ebumnyameni ndiphulaphule. Noko ke, ngamanye amaxesha ndandicelwa ukuba ndithabathe inxaxheba. Xa abanye bengaqinisekanga ngegama elithile lolwimi lweSlovak, babedla ngokuthi: “Sithini isiNgesi kuleyo yakho Ján?” Ndandisondela kufuphi nesibane ndize ndibatolikele ngeSlovak oko kuthethwa kwimpapasho yesiNgesi.

Omnye wabantu ababa ngaBafundi beBhayibhile eUnited States baza babuyela kummandla waseCzechoslovakia nguMichal Šalata. Wabuyela kwidolophana yaseSečovce ekufuphi nommandla esihlala kuwo, apho wayefudula ehlala khona, yaye wancedisa ekulungelelanisweni komsebenzi wokushumayela eCzechoslovakia. UMzalwan’ uŠalata wayehamba nam xa esiya kushumayela. Kwandula ke ngowe-1924, xa ndandineminyaka eli-13 ubudala, ndamcela ukuba andibhaptize. Nangona uMama wayecinga ukuba ndisemncinane ukuba ndingathabatha inyathelo elinzulu ngolo hlobo, ndamqinisekisa ukuba ndiyayazi into endiyenzayo. Ngoko, ngoJulayi, kwindibano yosuku olunye eyayiqhutyelwa kufuphi noMlambo waseOndava, ndafuzisela uzahlulelo lwam kuYehova ngokubhaptizwa kuloo mlambo.

Amalungelo Enkonzo Axabisekileyo

Xa ndandineminyaka eli-17 ubudala, ndeva ukuba kuza kubakho umngcwabo kummandla okwiikhilomitha ezimbalwa ukusuka kwidolophana endandishumayela kuyo. Kwakuza kuqala ukubakho umngcwabo waBafundi beBhayibhile kuloo mmandla. Ekufikeni kwam, ndazama ukudlula phakathi kwabemi baloo dolophana ababethe xhonkxosholo apho befuna ukubona okuza kwenzeka, ndaya kufika kwisithethi. Ekufikeni kwam kwisithethi, sathi kum: “Ndiza kuthetha kuqala, emva koko kuza kulandela wena.”

Intetho yam yayisekelwe kweyoku-1 kaPetros 4:7, ethi: “Isiphelo sezinto zonke sisondele.” Ndachaza ngokusuka eZibhalweni ukuba nkqu nokubandezeleka nokufa kuza kuphela kungekudala, emva koko ndathetha ngethemba lovuko. (Yohane 5:28, 29; IZenzo 24:15) Nangona ndandikhangeleka ndimncinane nakwiminyaka endandinayo—okanye mhlawumbi ndancedwa yiloo nto—bonke abo babekho baphulaphula ngenyameko.

IMboniselo kaSeptemba 15, 1931 yeza neendaba ezichulumancisayo, yaye yacacisa ukuba asisafuni ukubizwa njengaBafundi beBhayibhile okanye nangaliphi na elinye igama elinjalo kodwa sifuna ukwaziwa njengamaNgqina kaYehova. Emva kokuba befunde le nkcazelo, aBafundi beBhayibhile abakummandla esasihlala kuwo benza amalungiselelo okuba kubekho intlanganiso ekhethekileyo. ABafundi beBhayibhile abamalunga ne-100 bahlanganisana kwidolophana yasePozdišovce. Kuloo ntlanganiso ndaba nelungelo lokunikela intetho enomxholo othi “Igama Elitsha,” eyayisekelwe kwinqaku leMboniselo echazwe ngasentla.

Bezaliswe yimincili, bonke ababekho kuloo ntlanganiso baphakamisa izandla xa bebuzwa ukuba bayavumelana kusini na nesigqibo esamkelwe ngamanye amakholwa akwezinye iinxalenye zehlabathi. Emva koko sathumela ucingo kwikomkhulu lehlabathi lamaNgqina kaYehova eliseBrooklyn, eNew York, olwalusithi: “Thina, maNgqina kaYehova ahlanganisene ePozdišovce namhlanje, siyavumelana nenkcazelo ekwiMboniselo ephathelele igama elitsha, yaye siyalamkela eli gama litsha lithi, amaNgqina kaYehova.”

Ummandla omkhulu waseSlovakia nowaseTranscarpathia, lowo ngaphambi kweMfazwe Yehlabathi II wawuyinxalenye yaseCzechoslovakia, waba ngowona mmandla uvelisa iziqhamo kubulungiseleli bethu bobuKristu. Lo mmandla umkhulu wentsimi sawugubungela sihamba ngeenyawo, ngololiwe, ngebhasi nangebhayisikile. Ngelo xesha, kwizixeko ezininzi abantu babeboniswa i-“Photo-Drama of Creation,” intetho yemifanekiso eshukumayo nemifanekiso yeslides, eyayihambisana nomculo. Emva komboniso ngamnye, kwakuqokelelwa iidilesi zabantu abanomdla. Ndandinikwa iidilesi ezininzi, ndize ndicelwe ukuba ndenze amalungiselelo okuba kubekho amaNgqina aya kwaba bantu banomdla. Kwezinye izixeko sasiqesha iholo ndize ndinikele intetho ekhethekileyo ehambisana naloo mifanekiso ebibukelwe.

Ngeminyaka yee-1930, ndaba nelungelo lokuba lundwendwe kwiindibano ezinkulu kwisixeko esilikomkhulu, ePrague. Ngowe-1932, kwenziwa amalungiselelo okuba kubekho indibano yezizwe ngezizwe eCzechoslovakia. Sahlanganisana eVarieté Theatre. Umxholo wentetho yesidlangalala owawusithi, “IYurophu Ngaphambi Kwentshabalalo,” watsala ingqalelo yabantu yaye kweza abantu abamalunga ne-1 500. Enye indibano yezizwe ngezizwe yaqhutyelwa ePrague ngowe-1937, yaye ndaba nelungelo lokunikela enye yeentetho ezazinikelwa apho. Sonke, kuquka iindwendwe ezazivela kumazwe amaninzi aseYurophu, sakhuthazwa ukuze sikwazi ukunyamezela iimvavanyo esatyhubela kuzo ngokukhawuleza nje emva kweMfazwe Yehlabathi II.

Umtshato, Neemvavanyo Eziqatha

Emva kokuba sibuyele eCzechoslovakia, mna noMama sasebenzisana ngokusondeleyo nabanye aBafundi beBhayibhile ekwenzeni umsebenzi wokushumayela kwidolophana yasePozdišovce eyayikufuphi nendawo esasihlala kuyo. Apho ndaphandlwa yintwazana entle egama linguAnna Rohálová. Ekukhuleni kwethu, saqonda ukuba ulwalamano esinalo asilothando nje lobuKristu phakathi komzalwana nodade. Ngowe-1937 satshata. Ukususela ngelo xesha, uAnna wandixhasa, ‘kwanangamaxesha eenkathazo’ esasiza kujamelana nawo.—2 Timoti 4:2.

Kungekudala emva kokuba sitshatile, kwacaca ukuba iYurophu ilungiselela iMfazwe Yehlabathi II. NgoNovemba 1938, imimandla ekumzantsi weTranscarpathia neSlovakia yathinjwa yiHungary, eyayiza kuncedisana neJamani yamaNazi. Amapolisa aseHungary ayengasivumeli ukuba sibe neentlanganiso, yaye kwakufuneka siye kuvela kwisikhululo samapolisa rhoqo.

Emva kokuqalisa kweMfazwe Yehlabathi II ngoSeptemba 1939, abaliqela kuthi bantu baseZáhor, amadoda namabhinqa, bathatyathwa baya kuvalelwa baza basiwa kwinqaba endala kufuphi naseMukacheve, ngoku ephantsi kweUkraine. Safika apho kukho amanye amaNgqina amaninzi avela kumabandla aseTranscarpathia. Emva kokuncinwa iinyanga ezintathu okanye ezine nokubethwa amaxesha amaninzi, ityala lethu lathethwa yinkundla ekhethekileyo yomkhosi. Sonke sasibuzwa umbuzo nje omnye: “Ngaba ukulungele ukulwela iHungary nxamnye neU.S.S.R.?” Ekubeni singazange sikuvume oko, sagwetywa yaye ekugqibeleni sathunyelwa kwintolongo yaseBudapest, eHungary, e-85 Margit, eBoulevard.

Onke amabanjwa ayelamba. Kungekudala kwasasazeka izifo yaye amabanjwa aqalisa ukufa. Hayi indlela endandiye ndivuye ngayo xa inkosikazi yam ihamba umgama omde isuka eZáhor ize kundityelela! Nangona sasivunyelwa ukuba sithethe malunga nemizuzu emihlanu nje kuphela, ndingaphaya kwemivalo yentsimbi, ndandimbulela uYehova ngelo qabane lithembekileyo.a

Saphuma Entolongweni Saya Kwinkampu Ekusetyenzwa Nzima Kuyo

Ukuphuma kwam entolongweni ndasiwa eJászberény, eHungary, kwindawo awayesiwe kuyo amanye amaNgqina amalunga ne-160. Ngoxa sasilapho, elinye igosa likarhulumente waseHungary lasixelela ngenyhweba yokugqibela esiyinikwe ngurhulumente waseHungary: “Ukuba uyafuna ukukhonza emkhosini, yiza ngaphambili.” Akukho namnye owaya ngaphambili. Eli gosa lathi: “Nangona ndingavumelani nale nto niyenzayo, ndiyayithanda indlela enibambelele ngayo kukholo lwenu.”

Kwiintsuku ezimbalwa emva koko, sakhwela inqanawa kuMlambo iDanube sisingise kwinkampu ekusetyenzwa nzima kuyo kufuphi nesixeko saseYugoslavia esibizwa ngokuba yiBor. Ngoxa sasikuloo nqanawa, amajoni kunye nomphathi wawo ayezama ngandlela zonke ukusenza silalanise elukholweni lwethu. Umphathi-mkhosi wayalela amajoni ukuba asibethe ngoombayimbayi bawo, asikhabe ngamaquza, aze asingcungcuthekise nangezinye iindlela.

Xa sadluliselwa kuAndrás Balogh, owayenguMphathi-mkhosi kwinkampu yaseBor, wathi kuthi: “Ukuba le nto ndiyivileyo ngani yinyani, niza kufa kungekudala.” Kodwa emva kokuba efunde umyalezo ovela kumagosa karhulumente, wasiphatha ngesidima. Lo kaBalogh wayesinika inkululeko ukusa kumlinganiselo othile wada wasivumela nokuba sizakhele indlu esasiza kuhlala kuyo. Nangona ukutya kwakunqongophele, sasinekhitshi lethu, ngoko ukutya kwakusabiwa ngokulinganayo.

NgoMatshi 1944, iJamani yaqalisa ukuthimba iHungary. Ngelo xesha, umphathi owayexhasa inkqubo yamaNazi ogama linguEde Marányi wangena ezihlangwini zikaBalogh. Wayesebenzisa indlela engqongqo yokohlwaya, efana naleyo yayisetyenziswa kwiinkampu zoxinaniso. Noko ke, kungekudala, yagaleleka imikhosi yaseRashiya, yaye sakhutshwa kwinkampu yaseBor. Kamva, kolo hambo lwethu, sazibonela ngawethu amehlo indyikitya yokubulawa kwamaYuda ngenkohlakalo eCservenka. Yaba ngummangaliso into yokusinda kwethu kuloo ndyikitya.

Ekufikeni kwethu kumda weHungary neOstriya, sanikwa umyalelo wokuba simbe imigodi ekwakuza kufakwa kuyo oombayimbayi. Sachaza ukuba, isizathu sokuba sibanjwe kwakungenxa yokungavumi ukubandakanyeka emfazweni. Ekubeni ndandimi phambili, ijoni laseHungary landithi xhakamfu laza laqalisa ukundibetha. Lakhwaza: “Ndiza kukubulala! Xa ungavumi ukusebenza nabanye baza kulandela lo mzekelo wakho mbi!” Ndasindiswa ekufeni nguAndrás Bartha, iNgqina eliliqina, elalikhokela kumsebenzi esasiwenza wokushumayela.b

Kwiiveki ezimbalwa ezilandelayo, yaphela imfazwe, emva koko sanduluka sabuyela emakhaya. Abanye esasivalelwe nabo, ababekhululwe ngaphambilana eBor, banikela ingxelo yokuba sonke thina babesiwe eCservenka sibulewe. Ngoko, malunga neenyanga ezintandathu, inkosikazi yam yayizigqala njengomhlolokazi. Yothuka yabanda mhla yandibona ndingena emnyango! Zehla iinyembezi zovuyo njengoko sasisangana emva kokwahlukana iminyaka emininzi.

Ukulungelelaniswa Komsebenzi Kwakhona

Emva kweMfazwe Yehlabathi II, iSlovakia yaphinda yadityaniswa neCzechia yaba yiCzechoslovakia. Noko ke, iTranscarpathia, inxalenye enkulu eyayifudula iphantsi kweCzechoslovakia ngaphambi kwemfazwe, yaba yinxalenye yeUkraine eseSoviet Union. Ngowe-1945, ndahamba noMichal Moskal saya eBratislava, ngoku esisixeko esilikomkhulu saseSlovakia, yaye apho sadibana nabazalwana ababesingatha iimbopheleleko ukuze kulungelelaniswe umsebenzi wokushumayela. Nangona imizimba yethu yayiqobekile yaye sidandathekile, sasizimisele ukuqhubeka sizalisekisa uthumo lwethu lokushumayela iindaba ezilungileyo zoBukumkani bukaThixo.—Mateyu 24:14; 28:18-20.

Emva kwemfazwe, iindibano zasihlaziya kakhulu ukuze siqhubeke nomsebenzi wethu. NgoSeptemba 1946, indibano yokuqala kwelo lizwe yaqhutyelwa kwisixeko saseBrno. Ndaba nelungelo lokunikela intetho enomxholo othi “Isivuno, Isiphelo Sehlabathi.”

Ngowe-1947 kwaphinda kwabakho indibano eBrno. Kwakutyelele uNathan H. Knorr, uMilton G. Henschel, noHayden C. Covington, bevela kwikomkhulu lamaNgqina kaYehova eBrooklyn, eNew York, yaye banikela iintetho ezikhuthazayo. Ndaba nelungelo lokutolika ezo ntetho zabo. Nangona ngelo xesha, sasinabavakalisi boBukumkani abamalunga ne-1 400 eCzechoslovakia, abantu ababeze kuphulaphula intetho yesidlangalala babemalunga nama-2 300.

Intshutshiso YamaKomanisi

Ngowe-1948, eli lizwe laba phantsi kwamaKomanisi, yaye kungekudala umsebenzi wethu wavalwa kangangeminyaka engama-40. Ngowe-1952, abaninzi kuthi ababegqalwa ngabasemagunyeni njengeenkokeli bavalelwa entolongweni. Uninzi lwatyholwa ngelithi ngababhukuqi, kodwa abambalwa kuthi batyholwa njengabangcatshi. Ndavalelwa entolongweni ndaza ndancinwa kangangeenyanga ezili-18. Xa ndabuza isizathu sokuba kuthiwe ndingumngcatshi, ijaji yathi: “Ubuthetha ngoBukumkani bukaThixo. Yaye uthi buza kuthabath’ iintambo, bulawule ihlabathi. Oku kuquka iCzechoslovakia.”

Ndaphendula ndathi: “Xa kunjalo ke kuza kufuneka nibagwebe bonke abantu abathandaza uMthandazo weNkosi becela ukuba ‘uBukumkani bukaThixo mabufike.’” Sekunjalo, ndagwetywa iminyaka emihlanu enesiqingatha ndaza ndasiwa kwintolongo yamaKomanisi ekwakungekho mntu uyithandayo, eJáchymov, eCzechoslovakia.

Emva kokuthothoza ixesha elide entolongweni, ndakhululwa. UAnna, inkosikazi yam, wandixhasa ngokuthembeka endibhalela iileta yaye endityelela, enyamekela nentombi yethu uMária. Ekugqibeleni, samanyana kwakhona njengentsapho yaye saqalisa ukwenza imisebenzi yobuKristu, esasiyenza ngokufihlakeleyo.

Ubomi Obanelisayo Bokukhonza UYehova

Ebudeni beminyaka engaphezu kwama-70 edluleyo, amaNgqina kaYehova ahlala kummandla wethu aye akhonza phantsi kweemeko ezahlukahlukeneyo, ixesha elininzi ebekhonza phantsi kolawulo lwamaKomanisi. Liyinyaniso elokuba, sele ndikhulile ngoku yaye andisenamandla kangako, ukanti ndisakhonza njengomdala ongumKristu eZáhor, ndikhonza nabanye abathembekileyo njengoJán Korpa-Ondo, oneminyaka engama-98 esidl’ amazimba.c Inkosikazi yam endiyithandayo, eyayisisipho esivela kuYehova, yafa ngowe-1996.

Ndisenawo umfanekiso-ngqondweni ocacileyo woko kuchazwe kwiphepha 228 ukusa kwelama-231 kwincwadi ethi The Way to Paradise, eyapapashwa ngowe-1924. Kule ncwadi kuthiwa umfundi makabe nomfanekiso-ngqondweni wakhe eseParadesi ephulaphule abantu ababini abavusiweyo. Aba bantu bazibuza ngendawo abakuyo. Yaye omnye umntu osinde kwiArmagedon uyabachazela ukuba bavuselwe eParadesi. (Luka 23:43) Ukuba ndiza kusinda eArmagedon, ndingathanda ukunikela inkcazelo enjalo kwinkosikazi yam, kumama nakwabanye abantu endibathandayo. Kodwa ukuba ndiyafa ngaphambi kweArmagedon, ndikhangele phambili kwixesha laxa uthile eya kundichazela ngeziganeko ezenzeke emva kokufa kwam.

Ngoku ndiqhubeka ndilixabisa ilungelo elingenakuthelekiswa nanto lokuthetha neNkosi enguMongami wendalo iphela nelokukwazi ukusondela kuye. Ndenze isigqibo sokuqhubeka ndiphila ngokuvisisana namazwi ompostile uPawulos akumaRoma 14:8, athi: “Ukuba siyaphila, siphilela uYehova, yaye ukuba siyafa, sifela uYehova. Ngoko ke ukuba siyaphila nokuba siyafa, singabakaYehova.”

Ukuba ungayivuyela inkcazelo engakumbi okanye ungathanda ukuba uthile eze ekhayeni lakho ukuze akuqhubele isifundo seBhayibhile sesisa, nceda ubhale, uthumele igama nedilesi ohlala kuyo kule dilesi, AmaNgqina KaYehova, Private Bag X2067, Krugersdorp, 1740, South Africa, okanye kwidilesi efanelekileyo kwezidweliswe kwiphepha 5.

[Imibhalo esemazantsi]

[Umfanekiso okwiphepha 30]

Ndikunye noAnna, emva konyaka sitshatile

[Imifanekiso ekwiphepha 31]

Ndikunye noNathan H. Knorr kwindibano yaseBrno eyayingowe-1947