Ibali Lobomi

Salumela Ngokuqinileyo Ulawulo LukaThixo

KUBALISA UMICHAL ŽOBRÁK

Emva kokuchitha inyanga ndivalelwe ndedwa, ndasiwa kumntu owandigocagoca ngemibuzo. Kungekudala, wajwaqeka ngumsindo waza wandingxolisa: “Zintlolandini! Zintlola zaseMerika!” Yintoni eyamenza wanomsindo ngolu hlobo? Wayesandul’ ukundibuza ukuba luluphi unqulo lwam, yaye ndamphendula ndisithi: “NdiliNgqina likaYehova.”

OKU kwenzeka phantse kwiminyaka engaphezu kwama-50 eyadlulayo. Ngelo xesha, ilizwe endandihlala kulo lalilawulwa ngamaKomanisi. Noko ke, ngaphambi koko sasisele sichaswa ngeyona ndlela ngenxa yomsebenzi wethu wokufundisa wamaKristu.

Siyayiva Imiphumo Ebuhlungu Yemfazwe

Xa kwaqalisa IMfazwe Yehlabathi I ngowe-1914, ndandineminyaka esibhozo ubudala. Ngelo xesha, idolophana yasekhaya, iZálužice, yayilawulwa buBukhosi beOstriya neHungary. Le mfazwe ayizange iphazamise nje ihlabathi kuphela kodwa yabangela ukuba ndikhawuleze ndisingathe iimbopheleleko zokuba ngumntu omdala ndisengumntwana. Utata, owayelijoni, wafa kunyaka eyaqala ngayo imfazwe. Oku kwashiya mna nomama noodadewethu ababini sihlwempuzekile. Njengoko ndandingoyena umdala yaye ndingumfana ekhaya, kungekudala ndazifumanisa ndisingatha iimbopheleleko ezininzi kwifama yethu encinane nasekhaya. Ndisemncinane, ndandiluthanda unqulo. Umfundisi wethu weCawa Ehlaziyiweyo (kaCalvin) wada wandicela ukuba ndifundise abantwana endandifunda nabo xa engekho.

Ngowe-1918 yaphela IMfazwe Yehlabathi I, kwee qabu unoQolomba efile nje. UBukhosi beOstriya neHungary babubhukuqiwe, saza saba ngabemi beRiphabliki yaseCzechoslovakia. Kungekudala, abantu abaninzi apho sasihlala khona ababeye eUnited States babuyela ekhaya. Phakathi kwabo yayinguMichal Petrík, owafika kwidolophana yethu ngowe-1922. Xa watyelela intsapho kufuphi nasekhaya, mna nomama samenywa.

Ulawulo LukaThixo Luba Yinto Yokwenene Kuthi

UMichal wayenguMfundi weBhayibhile, njengoko amaNgqina kaYehova ayesaziwa njalo ngelo xesha, yaye wayethetha ngezinto ezibalulekileyo eziseBhayibhileni ezazindimangalisa. Eyokuqala kuzo yayikukufika koBukumkani bukaYehova. (Daniyeli 2:44) Xa wathi kuza kubakho iintlanganiso zamaKristu kwidolophana iZáhor ngeCawa elandelayo, ndazimisela ukuya. Ndavuka ngentsimbi ye-4 kusasa ndaza ndahamba iikhilomitha ezisi-8 ndisiya kumza ukuze ndiboleke ibhayisekile. Emva kokulungisa itayara eligqabhukileyo, ndanyawuza ezinye iikhilomitha ezingama-24 ndisiya eZáhor. Ndandingazi apho ziza kuqhutyelwa khona ezi ntlanganiso, kodwa ndaqhubeka ndihamba kancinane kwezo zitrato. Ndeva ingoma yoBukumkani iculwa kwenye yezindlu. Ndavuya gqitha. Ndangena kuloo ndlu ndaza ndachaza isizathu sokuza kwam apho. Loo ntsapho yandicela ukuba nditye nayo isidlo sasekuseni, yaza yahamba nam ukuya kwezo ntlanganiso. Nangona kwafuneka ndihambe ngebhayisekile nangeenyawo iikhilomitha ezingama-32 ukuze ndigoduke, ndandingadinwanga konke konke.—Isaya 40:31.

Kwakundichulumancisa ukuva indlela amaNgqina kaYehova azicacisa ngokucacileyo ngayo izinto yaye ezisekela eBhayibhileni. Landichukumisa gqitha ithemba lokufumana ubomi obanelisayo phantsi kolawulo lukaThixo. (INdumiso 104:28) Mna nomama sagqiba kwelokuba sibhale ileta sirhoxa ecaweni. Oku kwabothusa gqitha abantu kwidolophana yethu. Abanye abantu babengafuni nokuthetha nathi kangangethuba elithile, sekunjalo kwakumnandi ukunxulumana namaNgqina amaninzi kwingingqi yethu. (Mateyu 5:11, 12) Kungekudala ndabhaptizwa kuMlambo iUh.

Ubulungiseleli Buba Yinxalenye Yobomi Bethu

Sasebenzisa onke amathuba okushumayela ngoBukumkani bukaYehova. (Mateyu 24:14) Sasinikela ingqalelo kakhulu ekushumayeleni ngeeCawa. Ngokuqhelekileyo, abantu belo xesha babevuka kwakusasa, ngoko ke sasidla ngokuqalisa ukushumayela kwasekuseni. Ebudeni bosuku, kwakulungiselelwa intlanganiso yasesidlangalaleni. Abafundisi beBhayibhile babedla ngokunikela iintetho ngaphandle kolwandlalo. Babecinga ngabantu ababenomdla, ukuba basuka kwiziphi iicawa nemibandela ebakhathazayo.

Iinyaniso zeBhayibhile esasizishumayela zavula amehlo abantu abaninzi abanyanisekileyo. Kungekudala emva koko ndabhaptizwa, ndandisebenza kwidolophana iTrhovište. Kwenye indlu, ndandithetha nebhinqa elinobubele nelinobuhlobo, uNkskz. Zuzana Moskal. Yena nentsapho yakhe babengabalandeli bakaCalvin, njengokuba nam ndandinguye ngaphambili. Nangona wayeqhelene neBhayibhile, wayenemibuzo yeBhayibhile engafumani zimpendulo. Saba nengxoxo kangangeyure, yaye ndamhambisela incwadi ethi The Harp of God.a

AbakwaMoskal ngokukhawuleza baquka nokufundwa kwencwadi ethi Harp kufundo lwabo lweBhayibhile oluthe rhoqo. Iintsapho ezingakumbi kuloo dolophana zabonakalisa umdla zaza zaqalisa ukuya kwiintlanganiso zethu. Abefundisi babo abangabalandeli bakaCalvin babalumkisa abantu ngathi nangeencwadi zethu. Abanye ababenomdla bacela umfundisi ukuba aye kwiintlanganiso zethu aze azigxeke iimfundiso zethu kwingxoxo eza kubakho esidlangalaleni.

Lo mfundiso weza, kodwa akazange akwazi ukuphikisa esebenzisa iBhayibhile ukuze axhase iimfundiso zakhe. Ukuze azikhusele, wathi: “Asinakukholelwa kuyo yonke into eseBhayibhileni. Yayibhalwe ngabantu, yaye imibuzo yonqulo inokuphendulwa ngeendlela ezahlukahlukeneyo.” Oko kwabuguqula ubomi babantu abaninzi. Abanye bathi kumfundisi ukuba akakholelwa kwiBhayibhile, abasayi kuze baziphulaphule iintshumayelo zakhe kwakhona. Ngaloo ndlela, barhoxa kwiCawa kaCalvin, yaye abantu abangama-30 kuloo dolophana bayimela inyaniso yeBhayibhile.

Ukushumayela iindaba ezilungileyo zoBukumkani kwaba yindlela yethu yokuphila, ngoko ke ngokuzenzekelayo ndandifuna iqabane elililungu lentsapho eyomeleleyo ngokomoya. Omnye wabantu endandisebenza nabo entsimini yayinguJán Petruška, owayefunde inyaniso eUnited States. Intombi yakhe uMária yandichukumisa gqitha ngokuhlala ikulungele ukunikela ubungqina kuye wonke umntu njengoyise. Ngowe-1936 satshata, yaye uMária wayeza kuba liqabane lam elithembekileyo kangangeminyaka engama-50, de wafa ngowe-1986. Ngowe-1938 kwazalwa uEduard, ekuphela konyana wethu. Kodwa ngelo xesha, kwakubonakala ngathi kuza kuqalisa enye imfazwe eYurophu. Yayiza kuwuchaphazela njani umsebenzi wethu?

Ukungathabath’ Icala Kwethu NjengamaKristu Kuyavavanywa

Xa kwaqala IMfazwe Yehlabathi II, iSlovakia, eyaba lilizwe elizimeleyo, yayiphantsi kwempembelelo yamaNazi. Sekunjalo, urhulumente akazange awenze nto amaNgqina kaYehova njengentlangano. Kakade, kwafuneka sisebenze ngokufihlakeleyo, yaye iincwadi zethu zazihlolisiswa. Sekunjalo, saqhubeka nomsebenzi wethu ngobulumko.—Mateyu 10:16.

Njengoko imfazwe yayiqinisa, ndayalelwa ukuba ndiye emkhosini, nangona ndandingaphezu kweminyaka engama-35 ubudala. Ngenxa yokungathabath’ icala kwam njengomKristu, andizange ndivume ukuya emfazweni. (Isaya 2:2-4) Okuvuyisayo kukuba, ngaphambi kokuba abasemagunyeni bacinge ngoko baza kukwenza ngam, bonke abo babelingana nam ngeminyaka bakhululwa.

Saqonda ukuba kunzima kakhulu ngabazalwana bethu abasedolophini ukuzinyamekela kunathi esasihlala emaphandleni. Sasifuna ukwabelana nabo ngoko sinako. (2 Korinte 8:14) Ngaloo ndlela, sasidla ngokuthabatha ukutya okuninzi njengoko sasiza kuhamba nako iikhilomitha ezingama-500 ukuya eBratislava. Ulwalamano nothando lwamaKristu olwaluphakathi kwethu ebudeni beminyaka yemfazwe lwasiqinisela iminyaka elandelayo.

Ukufumana Ukhuthazo Olufunekayo

Emva kweMfazwe Yehlabathi II, kwakhona iSlovakia yaba yinxalenye yeCzechoslovakia. Ukususela ngowe-1946 ukusa ngowe-1948, iindibano zamaNgqina kaYehova zelizwe lonke zaziqhutyelwa eBrno okanye ePrague. Thina esivela eSlovakia sasihamba ngoololiwe abakhethekileyo ababelungiselelwe iindwendwe zendibano. Abo loliwe wawunokubabiza ngokuthi ngoololiwe abaculayo, njengoko sasicula kuyo yonke loo ndlela.—IZenzo 16:25.

Ndisayikhumbula kakuhle indibano yowe-1947 eBrno, kwakukho nabaveleli abangamaKristu abathathu abavela kwikomkhulu lehlabathi, kuquka noMzalwan’ uNathan H. Knorr. Ukuze sibhengeze intetho yesidlangalala, uninzi lwethu lwahamba phakathi kwesixeko lunxibe iiplacards ezibhengeza umxholo. Unyana wethu, uEduard, owayeneminyaka esithoba kuphela ubudala, wayengakuvuyeli ukungabi nayo eyakhe. Ngoko abazalwana benza izibhengezo ezincinane bengenzeli kuphela yena kodwa nabanye abantwana. Eli qela liselula lenza umsebenzi omhle wokubhengeza le ntetho!

NgoFebruwari 1948 kwaqalisa ukulawula amaKomanisi. Sasisazi ukuba kungekudala urhulumente uza kuthabath’ amanyathelo okuthintela umsebenzi wethu. Kwabakho indibano ePrague ngoSeptemba 1948, yaye kwasivisa ubuhlungu gqitha njengoko sasilindele ukuba iintlanganiso zethu zasesidlangalaleni zipheliswe, kanye emva kweminyaka emithathu sikhululekile. Ngaphambi kokuhamba kwindibano, senza isigqibo inxalenye yaso eyayisithi: “Thina, maNgqina kaYehova, esiye sahlanganisana apha . . . , sizimisele ukuyandisa nangakumbi le nkonzo, yaye ngenceba yeNkosi, size sinyamezele ngamaxesha amnandi nangamaxesha ezilingo, size sivakalise ivangeli yobukumkani bukaThixo ngenzondelelo nangakumbi.”

“Siziintshaba Zikarhulumente”

Emva kweenyanga ezimbini idlulile indibano yasePrague, abecuphi bagqogqa ikhaya laseBheteli kufuphi nePrague. Bazihlutha ezo zakhiwo, bathimba zonke iincwadi abazifumanayo, baza bawabamba onke amalungu aseBheteli nabanye abazalwana. Kodwa kwakukuninzi okwakuza kulandela.

Ebudeni bobusuku bukaFebruwari 3-4, 1952, amapolisa aligqogqa lonke elo lizwe aza abamba amaNgqina angaphezu kwe-100. Ndandingomnye wawo. Malunga nentsimbi yesithathu ekuseni, amapolisa ayivusa yonke intsapho yam. Ngaphandle kokucacisa, athi mandihambe nawo. Ndafakwa amakhamandela ndaza ndavalwa amehlo kwakunye nabanye saza safakwa emva kwilori. Ndavalelwa ndedwa.

Kwadlula inyanga yonke kungekho mntu uthetha nam. Kuphela komntu endandimbona yayilipolisa elalindifakela nje ukutya okuncinane kumngxuma osemnyango. Ndandula ndabizwa ngumntu owayendigocagoca ngemibuzo okhankanywe ngasentla. Emva kokuba ethe ndiyintlola, waqhubeka esithi: “Ukuba ubani ukunqulo wenziwa kukungazi. Akakho uThixo! Asinakunivumela ukuba nibhanxe abemi balapha. Uza kuxhonywa okanye ufele entolongweni. Yaye nokuba uThixo wakho ebengeza apha, besiya kumbulala naye!”

Ekubeni abasemagunyeni babesazi ukuba akukho mthetho ungqalileyo owalela umsebenzi wethu wamaKristu, babefuna ukuchaza umsebenzi wethu ngendlela ethile ukuze ivumelane nemithetho ekhoyo kuze kuthiwe “siziintshaba zikaRhulumente” neentlola zamanye amazwe. Ukuze benjenjalo, kwakufuneka baphule ingqibelelo yethu size “sivume” ukuba sinetyala. Emva kokundigocagoca ngemibuzo ngobo busuku, andizange ndivunyelwe ukuba ndilale. Kwiiyure ezimbalwa, ndaphinda ndaxinxwa ngemibuzo. Ngeli thuba lo mntu wayefuna ndityobele iphepha elalifundeka ngale ndlela: “Mna njengotshaba lwePeople’s Democratic Czechoslovakia andizange ndibe yinxalenye [yeqela lefama] kuba ndilindele amaMerika.” Xa ndakwala kutyobela ubuxoki obunjalo, ndathunyelwa kwisisele sokuqeqesha abantu.

Ndandingavunyelwa ukuba ndilale, ndinabe, okanye ndihlale phantsi. Ndandinokuma okanye ndihambahambe. Xa ndandidinwa, ndalala phantsi kwikonkile. Andula ke amapolisa andibuyisela kwiofisi yalaa mntu owayendigocagoca ngemibuzo. Lo mntu wabuza: “Ngaba uza kutyobela ngoku?” Xa ndala kwakhona, wandibetha ebusweni. Ndaqalisa ukopha. Wandula ke wakhwaza amanye amapolisa esithi: “Ufuna ukuzibulala. Mjongeni angazibulali!” Ndaphinda ndavalelwa ndedwa. Kangangeenyanga ezintandathu baqhubeka bendigocagoca ngokuphindaphindiweyo ngamaxesha ahlukahlukeneyo. Abazange balifumane icebo lokundinyanzela ekubeni ndivume ukuba ndilutshaba lukaRhulumente nokuzimisela kwam ukuba ndigcine ingqibelelo yam kuYehova.

Kwinyanga ngaphambi kokuba ndiye ematyaleni, umtshutshisi weza evela ePrague waza wasixinxa ngemibuzo ngamnye kuthi kwiqela lethu labazalwana abali-12. Wandibuza: “Uza kwenza ntoni xa iintlanga zaseNtshona zinokuhlasela ilizwe lethu?” “Oko ndakwenzayo xa eli lizwe kwakunye noHitler bahlasela iUSSR. Andizange ndilwe ngelo xesha, yaye andisayi kulwa nangoku kuba ndingumKristu kwaye andithabath’ icala.” Wandula wathi kum: “Asinakuwanyamezela amaNgqina kaYehova. Sifuna amajoni xa iintlanga zaseNtshona zisihlasela, yaye kufuneka amajoni ukuze sikhulule abantu bethu eNtshona.”

NgoJulayi 24, 1953, sasiwa enkundleni. Omnye emva komnye, sili-12 sasiwa ngaphambi kweqela leejaji. Sasebenzisa elo thuba ukuze sinikele ubungqina ngokholo lwethu. Emva kokuziphendulela kwizityholo ababesibeka zona, kwaphakama igqwetha laza lathi: “Ndiqhelile ukuba kule nkundla. Ngokuqhelekileyo, abantu abaninzi bayawavuma amatyala abo, baguquke bade balile. Kodwa la madoda aza kuphuma apha omelele kunaxa angenayo.” Emva koko, sonke esili-12 kwathiwa sinetyala lokufun’ ukubhukuqa uRhulumente. Ndagwetywa iminyaka emithathu yaye uRhulumente wathimba yonke into endandinayo.

Ukwaluphala Akundithintelanga

Emva kokukhululwa, abacuphi babesandibeke esweni. Ngaphandle koko, ndaqhubeka nemisebenzi yam yobuthixo ndaza ndabelwa ukuba ndongamele ibandla lethu. Nangona sasivumelekile ukuba sihlale kwizindlu zethu ezithinjiweyo, zabuyiselwa kuthi kuphela emva kweminyaka engama-40, emva kokuwa kobuKomanisi.

Asindim ndedwa owabanjwayo entsatsheni yam. Kwakusemva kweminyaka emithathu kuphela ndikhululekile xa uEduard wayalelw’ ukuba aye emkhosini. Ngenxa yesazela sakhe esiqeqeshwe ngeBhayibhile, wala waza wabanjwa. Kwiminyaka eliqela kamva, kwenzeka into efanayo nakumzukulwana wam, uPeter, , nangona impilo yakhe yayinkenenkene.

Ngowe-1989 urhulumente wamaKomanisi eCzechoslovakia wawa. Hayi indlela endavuya ngayo emva kweminyaka engamashumi amane umsebenzi wethu uvaliwe, ndandinokushumayela ngokukhululekileyo kwindlu ngendlu! (IZenzo 20:20) Lo gama impilo yam isavuma, ndiyakuthanda ukwenza le nkonzo. Ngoku kuba ndineminyaka engama-98 ubudala, impilo yam ayisafani nakuqala, kodwa ndiyavuya kuba ndisakwazi ukunikela ubungqina kubantu ngezithembiso zikaYehova ezizukileyo ngekamva.

Ndinokubala abantu abali-12 abaziintloko zamazwe amahlanu abalawula kwidolophu endazalelwa kuyo. Babequka oozwilakhe, abongameli nookumkani. Akakho kubo oweza nesicombululo esihlala sihleli kwiingxaki ezazikhathaza abantu phantsi lolawulo lwabo. (INdumiso 146:3, 4) Ndinombulelo kuYehova ekubeni endivumele ukuba ndimazi ndisemncinane. Ngaloo ndlela, ndakwazi ukuyiqonda indlela aza kuzilungisa ngayo izinto esebenzisa uBukumkani bukaMesiya ndize ndikuphephe ukuphila ubomi obungenanjongo bokungamhloneli uThixo. Ndiye ndashumayela ezona ndaba zilungileyo ngaphezu kweminyaka engama-75, yaye oko kuye kwandenza ndaba nenjongo ebomini, ndaneliseka ndaza ndaba nethemba eliqaqambileyo lobomi obungunaphakade emhlabeni. Yintoni enye endinokuyifuna?b

[Imibhalo esemazantsi]

[Umfanekiso okwiphepha 26]

Kungekudala emva komtshato wethu

[Umfanekiso okwiphepha 26]

Ndikunye noEduard ekuqaleni kweminyaka yee-1940

[Umfanekiso okwiphepha 27]

Ndibhengeza indibano eBrno, ngowe-1947