Abadanisi Abampiko Zifana Nomlilo

NGUMBHALI KAVUKANI! EKENYA

KUVAKALA ukuntyiloza kweentaka ezingamawaka. Kwichibi elikwanti, kuvakala intsholo yokuntyiloza kweentaka. Kukho iintaka ezimbala upinki ezingamawaka ezihamba kumanzi anombala oluhlaza okhazimlayo. Esibhakabhakeni, kuzele iintaka ezindanda kuhle. Xa zindanda phezu kwamanzi, ngaloo maphiko azo made nabhityileyo kuvela imibala ebomvu. Ukudada kwamawaka eentaka ezimbala uqaqambileyo kuhlab’ umxhelo! Kusenokwenzeka ukuba le yeyona nto intle inokwenziwa ziintaka emhlabeni—amakholwase (flamingos) apinki akwiGreat Rift Valley yaseAfrika.

Imilenze Emihle Emide

Ukususela mandulo, ikholwase belithandwa ngenxa yobuceke-ceke balo obuhle. Kukho umfanekiso oqingqiweyo wentamo yalo ende eyenziwe ngelitye, oseYiputa. Le ntaka ingaqhelekanga yayithandwa kakhulu ngabantu baseYiputa, beyihlonela njengemela isithixo esinguRa. Kwimizobo yamandulo, ibonakala kakuhle intamo ebhityileyo negobileyo yekholwase nemilenze yalo ebhityileyo nemihle.

Namhlanje, kukho iintlobo ezine zamakholwase ezifumaneka kwiCaribbean, eSouth America, eYurophu naseAsia, eAfrika, naseIndiya. Ikholwase elincinane lolona hlobo luncinane kwezi ntlobo. Linombala omhle, iintsiba ezipinki nemilenze ebomvu krwe. Ikholwase elikhulu liliphinda kubini eli lincinane ngobukhulu yaye ubude balo ziisentimitha ezili-140. Kukho into enye afana ngayo amakholwase—umlomo wawo omile okwegophe, obangela ukuba abukeleke.

Xa iza kubhabha, le ntaka iqale iphaphazelise amaphiko ayo ize igxanye emanzini ngaloo milenze yayo ukuze ifumane amandla okunyukela esibhakabhakeni. Yolula loo ntamo yayo inde ize ithi qhiwu intloko, imilenze ithe tswii ngasemva, ize yenjenjeya ukunqumla isibhakabhaka. Kuthelekelelwa ukuba amakholwase ahlala kwiGreat Rift Valley yaseAfrika, amalunga nezigidi ezine.

Intaka Ecekeceke Ehlala Kwindawo Etshisayo

Uninzi lwamakholwase ahlala kwiRift Valley ayakuthanda ukuhlala kumachibi anesoda amahle ngokwenene. La manzi anemichiza yesodium carbonate emininzi kangangokuba xa ufaka isandla kuwo avakala eneoli yaye ayalutshisa kancinane ulusu. Iqondo lobushushu kula machibi aseRift, anesoda linyuka liye kutsho kuma-65 ngokukaCelsius. Umoya walapho oshushu uzaliswa livumba eliphuma kula machibi, lesalfure netyuwa. Ininzi kakhulu i-alkaline netyuwa kula machibi kangangokuba yenze uqweqwe olumhlophe elunxwemeni.

Zimbalwa izidalwa ezinokuhlala emanzini atshisa ngolu hlobo. Ukanti, kukho izidalwa ezincinane ezihlala apho—i-blue-green algae encinane kakhulu. Ilanga elitshisayo kweleenjiko liyawafudumeza la manzi ane-alkaline, yaye ngenxa yoko ii-algae ziyachuma zibe ninzi. Ezi algae ziba ninzi kakhulu kangangokuba amanzi echibi ayajika abe luhlaza. Njengamatye e-emeraldi afakwe kwintsimbi yomqala, la machibi anesoda ahombisa iintlambo neentaba ezijikeleze iGreat Rift Valley.

Ubukho besidalwa esicekeceke njengekholwase kwindawo etshisa ngolu hlobo, buhlab’ umxhelo. Ukanti, amakholwase ayayithanda kakhulu le ndawo. Ancedwa yiloo milenze yawo mide kula manzi atshisayo, yaye amanqina awo, ayawanceda ukuba angatshoni kudaka lwalapho. Indlela elenziwe ngayo ikholwase elincinane iyalinceda ukuze likwazi ukuphila kule ndawo itshisayo. Umlomo walo unamaqoqo alinceda likwazi ukuchola-chola izinambuzane ezifumaneka kumgama oziisentimitha ezi-5 ukusa kwezi-7 emanzini. Xa lisitya, ikholwase lijongisa umlomo walo ezantsi lize liwutshonise ngaphantsi kwamanzi. Ikholwase lifunxa izinambuzane ezisemanzini ngolwimi lize likhuphe amanzi ngamaqoqo amancinane asemlonyeni walo.

Umbhiyozo Obukekayo Wokuthandana

Xa kuphuma ilanga kuze kuvele loo manzi aluhlaza amachibi, kuye kubonakale ngathi kuvulwa umkhusane omkhulu. Kobo buhle bokuphuma kwelanga kubonakala loo mawaka amakholwase afana namadangatye omlilo endanda phezu kwelo chibi. Ezi ntaka ziyanyakazela. Zithe qhiwu ezo ntamo zazo, iintaka eziqanduselayo zihamba ngokwamaqela zidlisela ngaloo milomo yazo.

Njengoko la maqela eentaka ephambana namanye endleleni, ukukhanya kwelanga kubonisa ezo mpiko zicekeceke, kuze kubonakale imibala emihle ebomvu nepinki. Ezi ntaka ziyaxhuma-xhuma zingqungqa, zivule amaphiko azo ukuze kuvele iintsiba zazo ezibomvu. Loo mibala yazo mihle ibonakala kakuhle xa zinqumla phezu kwamanzi, ziphaphazele zize ziphinde zihlale phantsi, emva koko ziqala ekuqaleni umngqungqo wazo. La makholwase ayanyakazela kangangokuba ezinye iintaka zimele ziwalinde ade abhabhe onke. Zizele yimincili zitsho ngesankxwe esitsho kuvaleke iindlebe.

Emva koko, ngequbuliso xa sele kuthe rhwelele bubumnyama, ezi ntaka ziyaphaphazela zimke. Zenza imigca emide okanye emile njengo-V, zize zibhabhe umgama ongamakhulu eekhilomitha de ziye kufika kwindawo eziya kuyo—kwichibi elinesoda, eyona ndawo ifanelekileyo yokwakha iindlwane neyokukhulisela amantshontsho azo. Eyona nto imangalisayo kukuba, la makholwase afuduka ngaxeshanye nalawo akumachibi akwelinye icala, laseRift Valley, anesoda.

Asuka Kwiimeko Ezimaxongo Aye Kwindawo Entle

Amakholwase akhetha ukwakha iindlwane zawo emachibini asemagqagaleni nakwanti. Kubalulekile ukuba aye kule ndawo ikwanti, ekubeni amakholwase aqanduselayo kungafuneki aphazanyiswe kwiindlwane zawo. Xa kukho into eziphazamisileyo ezi ntaka, zishiya loo maqanda zingaphindi zibuye.

Ezi ntaka zize kwakha iindlwane nezize kuqandusela, ziyaxakeka kakhulu. Zizele yimincili, ezi ntaka ziqalisa ukwakha. Zigoba loo miqala yazo mide zikhe udaka, itela yentaka neentsiba ezimbalwa ukuze zenze indulana eziisentimitha ezingama-40 ukuphakama. Phezulu ivula umngxuma oza kuhlala iqanda elinye ukuze lingadibani namanzi anealkaline. Kungekudala, kuqanduselwa amantshontsho angamakhulu amawaka. Iintaka ezigqiba ukuqandusela zingena ziphuma, zisondla yaye zinyamekela amantshontsho azo alambileyo.

Emva koko, xa amantshontsho sele ekwazi ukuhamba, oonina bayawashiya baze baye kwelinye icala lechibi, apho kukho ii-algae ezininzi. Xa befika kule ndawo, bayaphumla kumsebenzi onzima wokunyamekela amantshontsho, baze bazondle ukuze bahlaziyeke. Ezinye iintaka ezimbalwa eziseleyo ziqokelela loo mantshontsho ziwabeke ndawonye. Ezi ntaka ziyawalondoloza la mantshontsho antyilozayo ahleli kumhlaba onetyuwa de kubuye abazali bawo. Into emangalisayo kukuba, kuso sonke esi siphithiphithi, xa oonina bebuya, yileyo naleyo intaka iyalazi intshontsho layo yaye iqala apho ibiyeke khona ukulinyamekela.

La mantshontsho akafani noonina ngobuhle. Imilenzana yawo neentanyana zawo zimfutshane, imilomo yawo ayigobanga yaye iimpiko zawo zimhlophe qhwa. Emva kwethutyana loo milenzana iqalisa ukukhula, iintamo ziba nde zize zigobe, nemilomo yenza igophe elihle ifane neyawo onke amanye amakholwase. Kuthabatha iminyaka emalunga nemibini ukusa kwemithathu ngaphambi kokuba intshontsho libe neempiko ezintle nezibubomvurha. Emva koko lizifumanela iqabane lize liye kwamanye amakholwase apinki abangela ubuhle kuloo machibi akwiRift Valley.

Ubuhle bekholwase ngumzekelo wendalo eyenziwe ngumdali okrelekrele. Ukubukela esi sidalwa sasendle kubangela sikunandiphe ukusebenzisa iziva-mvo zethu zokubona nokuva. Kodwa ngaphezu koko, kukhulisa uxabiso lwethu nothando lwethu ngoMdali walo omangalisayo, uYehova uThixo.

[Umfanekiso okwiphepha 25]

Amakholwase amakhulu

[Umfanekiso okwiphepha 25]

Amakholwase amancinane

[Imifanekiso ekwiphepha 26]

Amantshontsho akafani noonina ngobuhle