Ukuvavanywa Kokholo KwiYurophu YamaNazi
KUBALISA UANTON LETONJA
NgoMatshi 12, 1938, imikhosi kaHitler yanqumla kwimida yaseOstriya. Kwakudlala iingoma zokumatsha kukhwazwa namabinzana athile aphathelele ezobupolitika koonomathotholo. Kwavuka umoya wokuthand’ isizwe kwilizwe lethu laseOstriya.
EMVA kokuba uHitler ethabathe iintambo, abantu baseOstriya bazaliswa yimincili. Abaninzi babenethemba lokuba ebudeni “Bolawulo Lwakhe Lweminyaka Eliwaka” uza kuphelisa ubuhlwempu nokungaqeshwa. Kwanabefundisi bamaKatolika bangenwa ngumoya wokuthand’ isizwe owawugquba kulo lonke elo lizwe, nabo babekhahlela uHitler.
Nangona ndandiligatyana lomfana oneminyaka eli-19 kuphela ubudala, andizange ndithabatheke ngenxa yezithembiso zikaHitler. Ndandingayikholelwa into yokuba kukho urhulumente wabantu onokucombulula iingxaki zoluntu.
Ukufunda Inyaniso YeBhayibhile
Ndazalwa ngoAprili 19, 1919, eDonawitz, eOstriya, ndandingumntwana wesithathu ndikwalithunjana kwintsapho yakowethu. UTata wayesebenza nzima kumgodi wamalahle. Ngowe-1923 wathabatha intsapho yakhe wayisa eFransi, apho wafumana umsebenzi kwidolophu yaseLiévin enemigodi. Ngenxa yokuba wayethanda ezobupolitika, wayengenantembelo kunqulo, kodwa uMama wayengumKatolika ozinikeleyo. Ekukhuleni kwethu wasiqeqesha ukuba sibe nokholo kuThixo, yaye wayethandaza nathi busuku ngabunye. Ekuhambeni kwexesha, uTata waya engakholelwa ngakumbi kunqulo kangangokuba wamalela uMama ukuba aye ecaweni.
Ngasekupheleni kweminyaka yee-1920, sadibana nomfana ogama linguVinzenz Platajs, esasimbiza ngokuba nguVinko, owayeyinzalelwane yaseYugoslavia. Wayenoqhagamshelwano naBafundi beBhayibhile, ngokwendlela ayebizwa ngayo amaNgqina kaYehova ngelo xesha. Kungekudala emva koko, kukho omnye waBafundi beBhayibhile owaqalisa ukusityelela. Ekubeni uTata wayengavumi ukuba uMama aye ecaweni, wabuza kuVinko ukuba kuvumelekile na ukunqula uThixo ekhaya. Wasibonisa incwadi yeZenzo 17:24, ethi uThixo “akahlali zitempileni zenziwe ngazandla,” waza wasicacisela ukuba ikhaya yeyona ndawo ifanelekileyo yokumnqula. UMama wayivuyela le nkcazelo waza waqalisa ukuya kwiintlanganiso ezaziqhutyelwa kumakhaya aBafundi beBhayibhile.
UTata wathi makayeke ukuya kobo bubhanxa. Ukuze singanxulumani naBafundi beBhayibhile, wasinyanzela sonke ukuba siye eMthendelekweni ngeeCawa! Ekubeni uMama engazange avume ukuya apho, uTata wafikelela kwisigqibo sokuba ndincedise xa kutyiwa umthendeleko. Nangona ndandifuna ukwanelisa uTata, uMama waqhubeka ebethelela imigaqo yeBhayibhile entliziyweni nasengqondweni yam yaye wayesiya nam kwiintlanganiso zaBafundi beBhayibhile.
Ngowe-1928, uVinko nodadewethu uJosephine—okanye uPepi, ngokwendlela esasimbiza ngayo—bafuzisela uzahlulelo lwabo kuYehova ngokubhaptizwa emanzini. Emva koko batshata. Kunyaka olandelayo, bafumana umntwana oyintombazana, ogama linguFini, owazalelwa eLiévin. Emva kweminyaka emithathu bamenyelwa ukungenela ubulungiseleli bexesha elizeleyo eYugoslavia, apho amaNgqina ayesebenza phantsi kwemiqathango ethile. Nangona batyhubela kwiimeko ezininzi ezinzima, uvuyo lwabo nenzondelelo yabo enkonzweni kaYehova ayizange inciphe. Umzekelo wabo omhle wandenza ndanomnqweno wokuba ngumlungiseleli wexesha elizeleyo.
Ukukhula Ngokomoya
Okulusizi kukuba, ukungavisisani kwabazali bethu kwabangela ukuba baqhawule umtshato ngowe-1932. Mna noMama sabuyela eOstriya, ngoxa umkhuluwa wam uWilhelm (uWilli), wasala eFransi. Emva koko, andizange ndibe nalunxibelelwano kangako noTata. Wasichasa de waya kulala kobandayo.
Mna noMama sahlala eGamlitz, idolophana yaseOstriya. Wayexubusha rhoqo nam ngeempapasho ezisekelwe eBhayibhileni, ekubeni kwakungekho mabandla akufuphi. Okuvuyisayo kukuba, uEduard Wohinz wayesityelela ekhaya kabini ngenyanga ukuze asikhuthaze ngokomoya esuka eGraz ngebhayisikile, yaye wayehamba malunga neekhilomitha ezili-100 ukuza kufika apho ekhaya!
Ekuqaliseni kolawulo lukaHitler owayelawula ngegqudu ngowe-1938, uMzalwan’ uWohinz wabanjwa. Saba buhlungu kakhulu sakuva ukuba warhaxwa ngegesi kwiziko laseLinz. Ukholo olubalaseleyo awayenalo lwasomeleza ukuba siqhubeke sikhonza uYehova ngokuthembeka.
Owe-1938—Unyaka Oweza Neenkathazo
Umsebenzi wamaNgqina wawuvaliwe eOstriya ngowe-1935. Ekungeneni kwemikhosi kaHitler eOstriya ngowe-1938, ukubandakanyeka kumsebenzi wobulungiseleli kwaba yingozi kakhulu. Abamelwane bethu babesazi ukuba mna noMama singamaNgqina kaYehova, ngoko sagqiba ekubeni singatsali ingqalelo yabantu. Ndada ndaqalisa ukulala eshedini ukuze amaNazi angandibambi lula.
Ekuqaleni kowe-1938, ndandisele ndiyigqibile imfundo yam esisiseko yaye ndaqalisa ukusebenza kwiziko lokubhaka izonka. Ekubeni ndandingavumi ukuthi “Heil Hitler” okanye ukuba lilungu lombutho woLutsha lukaHitler, ndagxothwa emsebenzini. Kodwa ndazimisela nangakumbi ukufuzisela uzahlulelo lwam kuYehova uThixo ngokubhaptizwa emanzini.
Mna noMama sabhaptizwa ngoAprili 8, 1938. Ngobunye ubusuku, sahlanganisana nabanye abasixhenxe, kwindlu eyayisehlathini. Emva kwentetho yobhaptizo, sasishiyana ngemizuzu elishumi, sihamba ngabanye ngabanye kwindledlana emxinwa eya kwindawo yokuhlamba impahla. Sabhaptizelwa apho kwiqula elenziwe ngekonkile.
NgoAprili 10, 1938, kwenziwa usinga-nyulo ngokuphathelele umbandela wokudityaniswa kweOstriya neJamani. Kulo lonke elo, iibhodi zezaziso zazinombhalo othi “Nyula uHitler!” Mna noMama akuzange kufuneke sivote, kuba kwakungekho lizwe sigqalwa njengabemi balo emva kokuhlala eFransi ixesha elide—yaye kamva, oko kwabusindisa ubomi bam. UFranz Ganster, waseKlagenfurt kumzantsi Ostriya, wayesiphathela imibhalo yeMboniselo rhoqo. Ngaloo ndlela, iLizwi likaThixo lasomeleza ngokomoya ngaphambi kokuqalisa kweMfazwe Yehlabathi II.
Umkhuluwa Wam UWilli
UWilli, omdala kunam ngeminyaka emine, wayengazange wanxibelelana nam noMama ukususela ekumkeni kwethu eFransi kwiminyaka engaphezu kwesithoba. Nangona uMama wayemfundise iBhayibhile ekukhuleni kwakhe, walukuhlelwa ukuba akholelwe ukuba inkqubo kaHitler yezobupolitika yayiza kubangela ukuba abantu bafumane ikamva elizukileyo. NgoMeyi 1940, uWilli wagwetywa iminyaka emibini entolongweni yinkundla yaseFransi ngenxa yokuba ngumququzeleli wemicimbi yamaNazi engekho mthethweni. Kodwa wakhululwa ngokukhawuleza, emva kokuba imikhosi yaseJamani ihlasele elaseFransi. Ngelo xesha wasithumelela ikhadi eseParis. Savuyiswa kukuva ukuba usaphila, ukanti sothuka kakhulu kukuva into awayeyenza!
Ebudeni bemfazwe uWilli wayesityelela rhoqo ngenxa yokuba wayethandwa kakhulu yiSS (Schutzstaffel, ijoni eliphambili likaHitler). Wayechukumiseka kukubona impumelelo yomkhosi kaHitler. Phantse ngalo lonke ixesha xa ndizama ukutsalel’ ingqalelo yakhe kwithemba esinalo elisekelwe eBhayibhileni wayedla ngokuthi: “Sukundixelel’ inkunkuma! Jonga nje indlela otshabalalisa ngayo umkhosi kaHitler. Kungekudala, amaJamani aza kulawula ihlabathi liphela!”
NgoFebruwari 1942, ngoxa uWilli wayesekhaya ngenye yeeholide zakhe, ndamnika isipho sencwadi ethi Enemies, epapashwe ngamaNgqina kaYehova. Into eyandothusa kakhulu kukuba, wayithabatha wayifunda wayigqiba ngelo xesha. Kwaqala kwasa kuye, wabona ukuba ulawulo lukaHitler luza kubhanga. Ngaphambili, wayexhasa inkqubo yolawulo esebenzisa inkohlakalo yaye wazimisela ukulungisa ihambo yakhe ngokukhawuleza.
UWilli Umela Inyaniso YeBhayibhile
Xa uWilli ephinda esityelela kwinyanga elandelayo, wafika etshintshe ngokupheleleyo. Wathi: “Anton, bendilahlekile!”
Ndathi: “Willi, uqabuke sekophulwe.”
Waphendula wathi: “Akunjalo, andikashiywa lixesha! IBhayibhile ithi ‘yenza konke omele ukwenze ngoxa usaphila,’ ndiyambulela uThixo kuba ndisaphila!”—INtshumayeli 9:10.
Ndambuza ndathi: “Uzimisele ukwenza ntoni kanye kanye?”
Waphendula wathi: “Andizimiselanga kuqhubeka ndilijoni. Ndifuna ukwahlukana namaNazi ndize ndibone ukuba kuza kwenzeka ntoni.”
Wanduluka ngoko nangoko esingise eZagreb, eYugoslavia, eye kutyelela udadewethu, uPepi kwakhona. Emva kwethutyana esiya kwiintlanganiso zamaNgqina ezazingavumelekanga ngokusemthethweni, wabhaptizwa ngokufihlakeleyo. Ekugqibeleni, unyana wolahleko wabuya!—Luka 15:11-24.
Ukuze abaleke amaNazi eFransi, uWilli wazama ukuwela umda aye eSwitzerland. Noko ke, amapolisa aseJamani ambamba. Ityala lakhe lathethwa kwinkundla yomkhosi yaseBerlin, yaye ngoJulayi 27, 1942, wagwetyelwa ukufa ngenxa yokuyeka ukuba lijoni ngaphandle kwemvume. Ndavunyelwa ukuba ndimtyelele kwiNtolongo Yomkhosi yaseBerlin-Tegel. Ndasiwa kwigumbi elincinane, yaye kungekudala emva koko uWilli wangena, ebotshelelwe ngetyathanga kumgcini-mabanjwa. Zehla iinyembezi kum ndakumbona ekule meko. Kwakungavumelekanga ukuba sangane yaye sanikwa imizuzu engama-20 kuphela ukuba sibonane okokugqibela.
UWilli waphawula ukuba ndiyalila waza wathi: “Anton, ulilela ntoni? Ubufanele ukuba uyavuya! Ndimbulela kakhulu uYehova ngokundinceda ndifumane inyaniso kwakhona! Ukuba bendiza kufela emkhosini kaHitler, bendingayi kuba nathemba. Kodwa ngenxa yokuba ndifela kuYehova ndiza kuvuswa nakanjani yaye siza kuphinda sibonane!”
Kwileta yokugqibela awasibhalela yona, uWilli wabhala wenjenje: “UThixo wethu endimthandayo, nendimkhonzayo, undinika yonk’ into endiyisweleyo yaye ngokuqinisekileyo uya kundixhasa de kuse ekupheleni, ukuze ndikwazi ukunyamezela ndoyise. Ndiyaphinda ndithi, qinisekani ukuba andizisoli nganto, ndibambelele ngokuqinileyo eNkosini!”
UWilli wabulawa ngemini elandelayo ngoSeptemba 2, 1942, kwiNtolongo yaseBrandenburg kufuphi naseBerlin. Wayeneminyaka engama-27 ubudala. Umzekelo wakhe ububungqina boko kuthethwa kwincwadi yabaseFilipi 4:13, ethi: “Ezintweni zonke ndinamandla ngenxa yalowo undomelezayo.”
Ukuthembeka KukaVinko De Kuse Ekufeni
Ngowe-1941, umkhosi waseJamani wagaleleka eYugoslavia, yaye kwanyanzeleka ukuba uPepi nomyeni wakhe uVinko nentwazana yabo ene-12 leminyaka, uFini, bagoduke baye eOstriya. Ngelo xesha inkoliso yamaNgqina eOstriya yayivalelwe ezintolongweni okanye kwiinkampu zoxinaniso. Ekubeni kwakungekho lizwe bangabemi kulo—ngamany’ amazwi, bengengobemi baseJamani—bayalelwa ukuba benze umsebenzi wesinyanzelo kwifama ekumzantsi Ostriya, kufuphi nasekhaya.
Kamva, ngoAgasti 26, 1943, uVinko wabanjwa ngamaGestapo (amapolisa amaNazi awayesebenza ngokufihlakeleyo). Xa uFini wayezama ukuthi ndlela-ntle kuyise, ipolisa eliyintloko lambetha waya kuwa kwelinye icala lendlu. UVinko wayesoloko encinwa yaye ebethwa ngenkohlakalo ngamaGestapo emva koko wathunyelwa kwiNtolongo yaseStadelheim eMunich.
Ngo-Oktobha 6, 1943, ndabanjwa ngamapolisa kwindawo endandisebenza kuyo, yaye nam ndathunyelwa kwiNtolongo yaseStadelheim, kwindawo uVinko awayekuyo. Ekubeni ndandikwazi ukuthetha isiFrentshi ngokutyibilikayo, ndandisetyenziswa ukutolikela amabanjwa emfazwe angamaFrentshi. Xa ndihambahamba apho entolongweni, ndandifumana ithuba lokuthetha noVinko.
Ekugqibeleni uVinko wagwetyelwa ukufa. Watyholwa ngokunika amaNgqina uncwadi lweBhayibhile nokunika amabhinqa angamaNgqina imali, lawo abayeni bawo babekwiinkampu zoxinaniso. Wathunyelwa kwintolongo ekufuphi naseBerlin leyo uWilli wabulawelwa kuyo. Wanqunyulwa intloko ngo-Oktobha 9, 1944.
Isihlandlo sokugqibela sokubonana kukaVinko nentsapho yakhe sasibuhlungu ngeyona ndlela. Bafika ekhonkxwe ngamatyathanga, ebethwe waboko-boko, yaye kwakunzima nokuba bamange ngenxa yaloo matyathanga. UFini wayeneminyaka eli-14 ukugqibela kwakhe ukubona uyise. Usawukhumbula nangoku umyolelo wakhe: “Uz’ umgcin’ unyoko, Fini!”
Emva kokufa kukayise, uFini wohluthwa kunina waza waya kuhlaliswa nentsapho yamaNazi eyayifuna “ukumguqula.” Wayedla ngokubethwa abe boko-boko. Xa imikhosi yaseRashiya yangena eOstriya, yayidubula loo ntsapho yamaJamani yayimphethe kakubi. Ayegqala loo ntsapho njengamaNazi akhohlakeleyo.
Emva kwemfazwe, udadewethu waqhubeka nobulungiseleli bexesha elizeleyo. Wakhonza nomyeni wakhe wesibini, uHans Förster, kwisebe lamaNgqina kaYehova laseSwitzerland, de waya kulala kobandayo ngowe-1998. UFini uye walandela emanyathelweni abazali bakhe yaye ngoku ukhonza uThixo oyinyaniso, uYehova, eSwitzerland.
Inkululeko Ekugqibeleni!
Ebutsheni bowe-1945 intolongo esasikuyo yaseMunich yaba phakathi kwezakhiwo ezatshatyalaliswa ngeziqhushumbisi. Eso sixeko saba ngamabhodlo. Ndandisele ndichithe iinyanga ezili-18 entolongweni xa ekugqibeleni kwafika imini yokuthethwa kwetyala lam phambi kwejaji. Kwakusele iiveki ezimbini kuphela ngaphambi kokuba imfazwe iphele ngokusemthethweni ngoMeyi 8, 1945. Ebudeni belo tyala, ndabuzwa: “Ngaba uyafuna ukungenelela inkonzo yasemkhosini?”
Ndaphendula ndathi: “Ibanjwa alivumelekanga ukunxiba iyunifom okanye ukuthi ‘Heil Hitler.’” Xa ndabuzwa ukuba ndiyafuna na ukungenela inkonzo yasemkhosini eJamani, ndathi: “Ncedani nindinike amaphepha okungenela inkonzo yasemkhosini, emva koko ndiza kunazisa ngesigqibo endifikelele kuso!”
Kwiintsuku ezimbalwa emva koko, imfazwe yaphela, yaye ndaxelelwa ukuba ndikhululekile, ndingahamba. Kungekudala emva koko, ndafudukela eGraz, apho kwasekwa ibandla elincinane elinamaNgqina angama-35. Ngoku kukho amabandla asibhozo kummandla waseGraz.
Umncedi Onothando
Kungekudala emva kokuba imfazwe iphelile, ndadibana noHelene Dunst, utitshalakazi owayefudula elilungu lombutho wamaNazi. Yamdanisa kakhulu inkqubo yamaNazi. Ekuqaleni kwam ukuncokola naye, wabuza: “Kutheni inini kuphela abantu abazi ukuba igama likaThixo nguYehova abanye bengakwazi oko?”
Ndaphendula ndathi: “Kungenxa yokuba abantu abaninzi abayiphengululi iBhayibhile.” Emva koko, ndambonisa igama likaThixo eBhayibhileni.
Wathi: “Ukuba iBhayibhile ithi igama likaThixo nguYehova, ngoko sifanele sazise bonke abantu ngale nyaniso!” UHelene waqalisa ukushumayela inyaniso yeBhayibhile yaye emva konyaka wafuzisela uzahlulelo lwakhe kuYehova ngokubhaptizwa emanzini. NgoJuni 5, 1948 satshata.
NgoAprili 1, 1953, saba ngabalungiseleli bamaNgqina kaYehova bexesha elizeleyo. Ekugqibeleni, samenyelwa ukuya kwiklasi yama-31 yeSikolo seBhayibhile seWatchtower saseGiliyadi, esikufuphi noMzantsi Lansing, eNew York. Sanandipha unxulumano olusenyongweni nabanye abafundi abavela kumazwe awahlukahlukeneyo angama-64.
Emva komsitho wokuphumelela kwethu saphinda sathunyelwa eOstriya. Kangangeminyaka eliqela, sasityelela amabandla ukuze siwakhuthaze ngokomoya. Emva koko samenyelwa ukuba siye kukhonza kwiofisi yesebe lamaNgqina kaYehova eLuxembourg. Kamva sacelwa ukuba siye kwiofisi yesebe yaseOstriya, eseVienna. Ngowe-1972, ngoxa sasikhonza apho, saqalisa ukufunda ulwimi lweSerbo-Croatian ukuze sinikele ubungqina kubantu abaninzi abavela eYugoslavia, abeze kusebenza eVienna. Ngoku, kukho amabandla asibhozo apha eVienna, anabantu abathetha isiSerbo-Croatian, abavela kulo lonke elaseYurophu!
NgoAgasti 27, 2001, uHelene walala kobandayo. Uye wazingqina ethembekile yaye engumncedi neqabane elixabisekileyo kwiminyaka yolonwabo, engama-53 sitshatile. Ithemba lovuko lixabiseke ngokwenene kum ngoku.
Ukwaneliseka Ngenxa Yothando LukaThixo
Nakuba ndiye ndehlelwa ziintlekele ezibuhlungu, ndanelisekile ngumsebenzi endiwenzayo kwiofisi yesebe yaseOstriya. Kutshanje, ndiye ndanelungelo lokubalisa amava kumboniso owawusithi “Amaxhoba Alityelweyo Exesha Lokulawula KwamaNazi.” Ukususela ngowe-1997, abaququzeleli balo mboniso baye baya kwizixeko needolophu zaseOstriya ezingama-70 ukuze abantu abasaphilayo ababa ngamangqina okuzibonela oko kwakusenziwa kwiintolongo zamaNazi nakwiinkampu zoxinaniso babalise ngokholo nenkalipho eyabonakaliswa ngamaKristu enyaniso awayetshutshiswa ngamaNazi.
Ndikugqala njengelungelo ukwazi abo bantu bathembekileyo. Banikela ubungqina obubalaseleyo bobunyaniso bamazwi afumaneka kumaRoma 8:38, 39, athi: “Ndeyisekile kukuba nakufa nabomi nazingelosi narhulumente nazinto zilapha ngoku nazinto zizayo namandla nakuphakama nabunzulu naso nasiphi na esinye isidalwa aziyi kuba nako ukusahlula eluthandweni lukaThixo olukuye uKristu Yesu iNkosi yethu.”
[Umfanekiso okwiphepha 13]
Intsapho yasekhaya ngowe-1930 (ukusuka ekhohlo ukuya ekunene): ndim, nguPepi, nguTata, nguWilli, nguMama noVinko
[Umfanekiso okwiphepha 14]
Umkhuluwa wam uWilli, ngaphambi nje kokuba abulawe
[Umfanekiso okwiphepha 15]
Mna noVinko sahlala ithuba elithile kwiNtolongo yaseStadelheim eMunich
[Imifanekiso ekwiphepha 15]
UFini, intombi kaVinko, owahlaliswa nentsapho ekhohlakeleyo yamaNazi; usathembekile nanamhla
[Umfanekiso okwiphepha 16]
UHelene wayeliqabane elixabisekileyo kum kwiminyaka engama-53 sitshatile
[Umfanekiso okwiphepha 16]
Ndinikela intetho kumboniso othi “Amaxhoba Awalityalwayo Exesha Lokulawula KwamaNazi”