Ndingambuyekeza Ngantoni Na UYehova?
Kubalisa uRuth Danner
UMama wayedla ngokuqhula athi, zininzi iintlekele ezenzeka ngowe-1933: UHitler wathabath’ iintambo zolawulo, upopu wabiza loo nyaka ngokuthi nguNyaka Ongcwele, nam ndazalwa ngaloo nyaka.
ABAZALI bam babehlala kwidolophu yaseYutz, eLorraine, ummandla odumileyo waseFransi okufuphi nomda waseJamani. Ngowe-1921, uMama owayengumKatolika ozinikeleyo, watshata noTata owayengumProtestanti. Udadewethu omdala kunam, uHelen, wazalwa ngowe-1922, yaye abazali bam baya kumphehlelela kwiCawa yamaKatolika.
Ngowe-1925, uTata wafumana incwadi yesiJamani ethi, UHadi LukaThixo. Emva kokufunda le ncwadi, waqonda ukuba uyifumene inyaniso. Wabhalela abapapashi bale ncwadi yaye bona bamdibanisa neBibelforscher, njengoko amaNgqina kaYehova ayebizwa njalo eJamani ngelo xesha. Ngokukhawuleza emva koko, uTata waqalisa ukushumayela ngezinto azifundileyo. UMama akazange ayithande le nto. Wayedla ngokuthi, “Kuyo yonk’ into oyenzayo, ungazidibanisi nezaa Bibelforscher!” Noko ke, uTata wayesele esenzile isigqibo yaye ngowe-1927, wabhaptizwa.
Emva koko, uMakhulu wakhuthaza intombi yakhe, uMama ukuba aqhawul’ umtshato noTata. Ngenye imini yoMthendeleko, umfundisi walumkisa amarhamente akhe “ngoDanner ongumprofeti wobuxoki.” Xa ebuya kuloo Mthendeleko, uMakhulu wagibisela uTata ngengqayi yeentyatyambo emi kumgangatho ophezulu wendlu esasihlala kuyo. Yambetha egxeni yaye yamphosa kancinci ukuba ingambethi entloko. Emva kwesi siganeko, zabuy’ iingqondo kuMama, waza wacingisisa, ‘Ayilunganga le cawa kuba iphembelela abantu ukuba babe ngababulali.’ Waqalisa ukufunda iincwadi zamaNgqina kaYehova. Kungekudala emva koko, waqonda ukuba uyifumene inyaniso yaye wabhaptizwa ngowe-1929.
Abazali bam benza konke okusemandleni abo befundisa mna nodadewethu ngoYehova. Babesifundela amabali eBhayibhile baze basibuze isizathu sokuba umntu othile ekuthethwa ngaye eBhayibhileni athabathe ikhondo elithile. Ngelo xesha, xa uTata ecelwa emsebenzini ukuba aphangele ebusuku okanye ngokuhlwa wayengavumi, nangona loo nto yayibangela ukuba afumane umvuzo ophantsi kakhulu. Wayefuna ukufumana ithuba lokuya kwiintlanganiso zamaKristu, entsimini okanye ixesha lokufunda nabantwana bakhe.
Sasiseza Kujamelana Nobunzima
Abazali bam babedla ngokwamkela abaveleli abahambahambayo namalungu entsapho yaseBheteli avela eSwitzerland naseFransi, yaye aba bazalwana babedla ngokusibalisela ngobunzima abatyhubela kubo abanye abazalwana ababehlala kummandla waseJamani owawukude kufuphi nasekhaya. Urhulumente wamaNazi wayewafak’ uphum’ aphele amaNgqina kaYehova aze awathumele kwiinkampu zoxinaniso, ewahlutha nabantwana bawo.
Mna noHelen sasixhotyisiwe ukuze sikwazi ukuhlangabezana namaxesh’ anzima. Abazali bethu basifundisa ukucengceleza iindinyana zeBhayibhile ezaziza kusinceda xa kukho ingxaki. Babedla ngokuthi: “Xa ningayazi into emaniyenze, cingani ngeMizekeliso 3:5, 6. Xa nisoyika izilingo eniza kujamelana nazo esikolweni, cingani ngeyoku-1 yabaseKorinte 10:13. Ukuba niye nahlukaniswa nathi, cengcelezani iMizekeliso 18:10.” Ndacengceleza iNdumiso yama-23 neyama-91 yaye ndandiqinisekile ukuba uYehova uya kundikhusela ngalo lonke ixesha.
Ngowe-1940, iJamani yathabathela phantsi kwayo umhlaba waseAlsace-Lorraine yaye lo rhulumente mtsha wamaNazi wanyanzela bonke abantu abadala ukuba babe phantsi kombutho wamaNazi. UTata akazange avume, yaye amaGestapo amtyityimbisel’ umnwe esithi aza kumbamba. NoMama akazange avume ukuthunga iyunifom yamajoni yaye amaGestapo athi naye aza kumbamba.
Nam ndandihlangabezana nobunzima esikolweni. Yonk’ imihla eklasini kwakuqale kunqulwe uHitler, kwakuculwa umhobe wesizwe, kuphakanyiswe ingalo yasekunene, kuze kukhahlelwe kuthiwe, “Heil Hitler”. Kunokuba bandixelele ukuba ndingamkhahleli uHitler, abazali bam bandinceda ukuba ndiqeqeshe isazela sam. Ngoko, ndazenzela isigqibo sokungayikhahleli le nkokeli yamaNazi. Ootitshala babendibetha bendixelela nokuba baza kundigxotha esikolweni. Xa ndandineminyaka esixhenxe ubudala, ngenye imini ndamiswa phambi kootitshala besikolo abali-12. Bazama ukundinyanzela ukuba ndikhahlele uHitler. Noko ke, uYehova wandomeleza yaye andizange ndinikezele.
Omnye utitshalakazi wazama ukundikhohlisa. Wandixelela ukuba ndingumfundi oqhuba kakuhle, uyandithanda kakhulu yaye akangethandi ukundibona ndigxothwa esikolweni. Wathi: “Akukho mfuneko yokuba uyiphakamise kakhulu ingalo yakho. Yinyuse nje kancinci. Akukho namfuneko yokuba uthi, ‘Heil Hitler!’ Shukumisa nje imilebe wenze ngathi uyathetha.”
Ndathi ndakuxelela uMama ngale nto yenziwe ngulo titshalakazi, wandikhumbuza ngabafana bamaHebhere abathathu ekuthethwe ngabo eBhayibhileni, ukumkani waseBhabhiloni owayefuna banqule umfanekiso oqingqiweyo. Wabuza, “Kwakufunwa benze ntoni?” Ndaphendula ndathi, “Baqubude kuwo.” “Ngaba babenokugoba ngelo xesha babophe iimbadada zabo? Zenzele isigqibo; yenza into ocinga ukuba ifanelekile.” Njengoko uShadraki, uMeshaki noAbhednego benzayo, ndagqiba kwelokuba nam ndinyaniseke kuYehova.—Dan. 3:1, 13-18.
Ootitshala bandigxotha izihlandlo ezininzi esikolweni yaye babendigrogrisa nangokundahlukanisa nabazali bam. Yandixhalabisa kakhulu le nto kodwa abazali bam babendikhuthaza. Phambi kokuba ndiye esikolweni, uMama wayethandaza nam acele uYehova ukuba andikhusele. Ndandisazi ukuba uya kundinika amandla okumela inyaniso. (2 Kor. 4:7) UTata wathi xa ndibona ukuba kunzima kakhulu, ndingoyiki ukubuya ndize ekhaya. Wathi: “Siyakuthanda. Uya kuhlala uyintwazana yethu esiyithandayo. Into omele uyixhalabele lulwalamano lwakho noYehova.” Loo mazwi andenza ndazimisela ukugcina ingqibelelo.—Yobhi 27:5.
AmaGestapo ayethanda ukuya kugqogqa iincwadi zamaNgqina ekhaya aze ancine nabazali bam. Ayedla ngokuthabatha uMama ahambe naye kangangeeyure eziliqela, aze ahambe aye kuthabath’ uTata nodadewethu kwiindawo ababesebenza kuzo. Ndandingakhe ndiqiniseke ukuba ndiza kufika uMama ekho ekhaya xa ndivela esikolweni. Ngamanye amaxesha ummelwane wasekhaya wayedla ngokuthi: “Bemke naye unyoko.” Emva koko ndandingena endlwini ndizimele, ndize ndizibuze: ‘Ngaba bethu bayamthuthumbisa? Ngaba ndiza kuphinde ndimbone?’
Sagxothwa
NgoJanuwari 28, 1943, savuswa ngamaGestapo ngecala emva kwentsimbi yesithathu kusasa. Athi ukuba mna nabazali bam nodadewethu sinokuba phantsi kombutho wamaNazi, asiyi kugxothwa kwelo. Asinika iiyure ezintathu ukuba sizilungiselele. Kwakukudala uMama eyixhobele le meko, iimpahla zethu neeBhayibhile zethu zazisele zipakishwe ezibhegini, ngoko elo xesha salisebenzisela ukuthandaza nokukhuthazana. UTata wasikhumbuza ukuba ‘ayikho into enokusahlula eluthandweni lukaThixo.’—Roma 8:35-39.
AmaGestapo abuya. Ingathi ndiyambona nangoku uDade Anglade owayesele ekhulile ephakamis’ isandla esithi ndlela-ntle ethe gwantyi iinyembezi. AmaGestapo asisa kwisikhululo sikaloliwe saseMetz. Emva kweentsuku ezintathu sikuloliwe, saya kufika eKochlowice, kwinkampu yaseAuschwitz ePoland. Emva kweenyanga ezimbini, satshintshelwa eGliwice, kwinkampu eyayifudula ilikhaya loonongendi. AmaNazi athi ukuba sinokutyobela uxwebhu lokulahl’ ukholo, aya kusikhulula aze asibuyisele nempahla yethu. UTata noMama abazange bavume ukwenza loo nto yaye la majoni athi, “Sokuze nigoduke.”
NgoJuni satshintshelwa eSwietochlowice, apho ndaqalisa khona ukukhathazwa yintloko esathanda ukundiphatha nanamhla oku. Ndaba neinfection eminweni, yaye ugqirha wakhupha iinzipho kweminye yeminwe yam engakhange andifake sitofu sokuyenza ndindisholo (anesthetic) ukuze ndingaqaqanjelwa. Kwakuba mnandi xa amajoni endithume kwivenkile yokubhaka kuba inenekazi elalisebenza apho lalidla ngokundipha ukutya.
Ngalo lonke elo xesha intsapho yasekhaya yayihlala yodwa ingadityaniswanga namanye amabanjwa. Ngo-Oktobha 1943, sathunyelwa kwinkampu yaseZąbkowice. Sasilala kwiibhedi ezazibekwe kwigumbi elingaphantsi kophahla, kukho nabanye abantu abangama-60, amadoda, amabhinqa nabantwana. Amajoni eSS ayesinika ukutya okwenyanyekayo nokungatyekiyo.
Nangona kwakunzima ngaloo ndlela, asizange siphelelwe lithemba. Sasifundile kwiMboniselo ukuba kukho umsebenzi omninzi wokushumayela ofanele wenziwe emva kwemfazwe. Ngoko sasisazi isizathu sokuba siphathwe kakubi yaye sasisazi nokuba siza kukhululeka kungekudala.
Sathi sakuva ukuba imikhosi eManyeneyo sele ikude kufuphi, saqonda ukuba amaNazi oyisiwe. Ekuqaleni kowe-1945, amajoni eSS ayishiya enyanyeni inkampu yethu. NgoFebruwari 19, sanyanzelwa ukuba sithabathe uhambo lweekhilomitha ezimalunga nama-240. Emva kweeveki ezine, saya kufika eSteinfels, eJamani yaye sathi sakufika apho amajoni aya kusifaka emgodini. Abaninzi babecinga ukuba siza kubulawa. Kwathi kusenjalo yagaleleka imikhosi eManyeneyo aza amajoni eSS ababelek’ abasicatyana, saba siyakhululeka ke ngaloo ndlela.
Ndalufikelela Usukelo Lwam
NgoMeyi 5, 1945, emva kweminyaka emibini enesiqingatha semkayo, saya kufika ekhaya eYutz, simdaka yaye sineentwala. Sasigqibele ukutshintsha impahla ngoFebruwari, ngoko sagqiba ekubeni sizitshise ezo mpahla zindala. UMama wathi: “Ningaze nilulibale olu suku. Siziimpula zikaLujaca. Nezi mpahla sizinxibileyo sizambulelwe. Kodwa sobane sibuye sisathembekile. Asikhange silalanise.”
Ndahlala eSwitzerland kangangeenyanga ezintathu ukuze ndichache, emva koko ndaphindela esikolweni ndingasenaloyiko lokugxothwa. Sasihlanganisana nabazalwana bethu ngokukhululekileyo size sishumayele. NgoAgasti 28, 1947, xa ndandineminyaka eli-13 ubudala ndasibonakalisa ekuhleni isibhambathiso endandisenze kuYehova kwiminyaka engaphambili. UTata wandibhaptiza kuMlambo waseMoselle. Ndandifuna ukuba nguvulindlela ngokukhawuleza emva koko, kodwa uTata wathi mandiqale ndifunde umsebenzi wezandla. Ngoko ndafunda ukuthunga. Ngowe-1951 xa ndandineminyaka eli-17 ubudala, ndamiselwa njengovulindlela kummandla waseThionville owawukufuphi.
Ngaloo nyaka, ndaya kwindibano eyayiseParis ndaza ndafaka isicelo sobuvangeli basemazweni. Ndandisemncinane ngeminyaka, kodwa uMzalwana uNathan Knorr wathi uza kusigcina eso sicelo sam ukuze sihlolwe “kwixa elizayo.” NgoJuni 1952, ndamenyelwa kwiklasi yama-21 yeSikolo seWatchtower seBhayibhile saseGiliyadi, kuMzantsi Lansing, eNew York, eUnited States.
Izinto Ezenzeka EGiliyadi Nasemva Koko
Ndaba nawona mava achulumancisayo apho! Ndandikoyika ukuthetha esidlangalaleni, nditsho nangolwimi lwam. Ngoku kwakufuneka ndithethe ngesiNgesi. Sekunjalo, abahlohli bandixhasa ngokunothando. Omnye umzalwana wade wandithiya igama lokuba ndinguKingdom Smile kuba xa ndineentloni ndandisuka ndincume.
NgoJulayi 19, 1953, sahlanganisana eYankee Stadium, eNew York, yaye ndathunyelwa eParis kunye noIda Candusso (owatshatela kwaSeignobos kamva). Kwakungelula ukushumayela kwizinhanha zaseParis, kodwa ndaqhuba izifundo zeBhayibhile nabantu abaninzi abathobekileyo. UIda watshata waza wafudukela eAfrika ngowe-1956, mna ndasala eParis.
Ngowe-1960, ndatshata nomzalwana owayekhonza eBheteli yaye saya kuba ngoovulindlela abakhethekileyo eChaumont naseVichy. Emva kweminyaka emihlanu, kwafuneka siyeke ukuba ngoovulindlela kuba ndaba nesifo sephepha. Ndaba buhlungu kakhulu kuba kususela ndisemncinane kakhulu ndandinosukelo lokuba kwinkonzo yexesha elizeleyo ndize ndihlale kuyo. Kamva, umyeni wam wathandana nelinye ibhinqa waza wandishiya. Abazalwana noodade bandixhasa kakhulu ngaloo minyaka yobunzima, yaye uYehova wandomeleza.—INdu. 68:19.
Ngoku ndihlala eLouviers, eNormandy, kufuphi neofisi yesebe yaseFransi. Nangona ndikhathazwa yimpilo, kuye kwandivuyisa ukubona ukuba uYehova uyandixhasa. Indlela abandiqeqesha ngayo abazali bam isandinceda nanamhlanje ukuba ndiqhubeke ndinesimo sengqondo esifanelekileyo. Abazali bam bandifundisa ukuba uYehova nguMntu wokwenene, ndinokumthanda, ndithethe naye yaye uya kuyiphendula imithandazo yam. Ngokwenene, “ndiya kumbuyekeza ngantoni na uYehova ngalo lonke uncedo lwakhe kum?”—INdu. 116:12.
[Amagama acatshulweyo akwiphepha 6]
“Kuye kwandivuyisa ukubona ukuba uYehova uyandixhasa”
[Umfanekiso okwiphepha 5]
Xa ndandineminyaka emithandathu ubudala, ndiphethe into yokuzikhusela kwiigesi eziyityhefu
[Umfanekiso okwiphepha 5]
Ndandineminyaka eli-16 ubudala sikwiphulo lokushumayela kunye nabathunywa bevangeli noovulindlela eLuxembourg
[Umfanekiso okwiphepha 5]
Ndim noTata noMama endibanweni ngowe-1953