Asizange Siyixhase Imfazwe KaHitler
NGOKUBALISWA NGUFRANZ WOHLFAHRT
UBAWO, uGregor Wohlfahrt, wayesemkhosini waseOstriya ebudeni beMfazwe Yehlabathi I (ngowe-1914 ukusa kowe-1918) yaye babesilwa neItali. Bebonke, abantu baseOstriya nabaseItali ababulawayo bangamakhulu amawaka. Loo mava ayemabi gqitha kangangokuba ayiguqula ngokupheleleyo imbono kaBawo ngonqulo nangemfazwe.
UBawo wabona abefundisi baseOstriya besikelela imikhosi, yaye weva ukuba abefundisi baseItali kwelinye icala babesenza okufanayo. Ngenxa yoko wabuza: “Kutheni amajoni amaKatolika ekhuthazelwa ukubulala amanye amaKatolika? Ngaba amaKristu afanele aye emfazweni ukuya kulwa namanye?” Abefundisi babengenazo iimpendulo ezanelisayo.
Iimpendulo Kwimibuzo KaBawo
Emva kwemfazwe uBawo watshata waza wahlala kwiintaba zaseOstriya kufuphi nemida yeItali neYugoslavia. Ndazalelwa apho ngowe-1920, ndingowokuqala kubantwana abathandathu. Xa ndandineminyaka emithandathu, safuduka kangangeekhilomitha ezimbalwa saya empuma eSt. Martin kufuphi nedolophu yabakhenkethi yasePörtschach.
Ngoxa sasihlala apho, abalungiseleli bamaNgqina kaYehova (ababebizwa ngokuba ngaBafundi beBhayibhile ngoko) batyelela abazali bam. Ngowe-1929 bashiya incwadana ethi Prosperity Sure, eyaphendula imibuzo emininzi kaBawo. Yabonisa ngokuphuma eBhayibhileni ukuba ihlabathi lalilawulwa ngumlawuli ongabonakaliyo obizwa ngokuba nguMtyholi nangokuba nguSathana. (Yohane 12:31; 2 Korinte 4:4; ISityhilelo 12:9) Impembelelo yakhe kunqulo, ezopolitiko, nakwezorhwebo zeli hlabathi yabangela amasikizi uBawo awawabona kwiMfazwe Yehlabathi I. Ekugqibeleni uBawo wayezifumene iimpendulo awayezifuna.
Inzondelelo Kubulungiseleli
UBawo waodola uncwadi kwiWatch Tower Bible and Tract Society waza waqalisa ukulusasaza kwizizalwana zakhe nakwizindlu ngezindlu. UHans Stossier, umfana owayeneminyaka engama-20 kuphela nowayengummelwane, kungekudala wamthelela kubulungiseleli bendlu ngendlu. Kungentsuku zatywala, abahlanu kwizizalwana zethu nabo baba ngamaNgqina—uBawokazi uFranz, umfazi wakhe uAnna, kamva unyana wabo uAnton, udadoBawo uMaria, nomyeni wakhe, uHermann.
Oku kwayigungqisa kanobom idolophana yethu yaseSt. Martin. Esikolweni omnye umfundi wabuza umfundisi-ntsapho wethu owayengumKatolika, “Mfundisi uLoigge, ngubani lo thixo mtsha unguYehova unqulwa nguWohlfahrt?”
“Hayini, bantwana bam,” waphendula umfundisi. “Asingothixo omtsha lo. UYehova nguYise kaYesu Kristu. Ukuba basasaza isigidimi ngenxa yokushukunyiswa luthando ngalo Thixo, kuhle kakhulu oko.” Ndikhumbula ubawo kangangezihlandlo ezininzi esimka ekhaya ngentsimbi yoku-1:00 ngonyezi ephethe uncwadi lweBhayibhile nento etyiwayo. Kwiiyure ezintandathu okanye ezisixhenxe kamva, wayefikelela kweyona ndawo ikude kumhlaba awayeshumayela kuwo, kufuphi nomda weItali. Ndandimpheleka xa wayesiya kufutshane.
Phezu kwabo nje ubulungiseleli bakhe basesidlangalaleni, uBawo akazange azityeshele iintswelo zokomoya zentsapho yakhe. Xa ndandimalunga neminyaka elishumi, waqalisa isifundo seBhayibhile esithe rhoqo seeveki ngeeveki kunye nathi sobathandathu, esebenzisa incwadi ethi uHadi lukaThixo. Maxa wambi indlu yasekhaya yayizala ime ngeembambo ngabamelwane abanomdla nezizalwana. Kungekudala kwabakho ibandla labavakalisi boBukumkani abangama-26 kwidolophana yethu.
UHitler Uqalisa Ukulawula
UHitler waqalisa ukulawula eJamani ngowe-1933, ibe ukutshutshiswa kwamaNgqina kaYehova kwathabatha unyawo kungekudala emva koko. Ngowe-1937, uBawo waya kwindibano eyayisePrague, eCzechoslovakia. Abo babeze endibanweni balunyukiswa ngeemvavanyo ezazingaphambili, ngoko ekubuyeni kwakhe uBawo wasikhuthaza sonke ukuba silungiselele intshutshiso.
Ngelo xesha, ndineminyaka eli-16 ubudala, ndaqalisa ukufunda umsebenzi wokupeyinta izindlu. Ndandihlala nengcali yokupeyinta yaye ndandifunda kwisikolo sobugcisa. Umfundisi okhulileyo owasaba eJamani ebaleka ulawulo lwamaNazi wayefundisa kwiklasi yezifundo zonqulo esikolweni. Xa abafundi babembulisa ngokuthi “Heil Hitler!” wayebonisa ukungayithandi loo nto aze abuze: “Konakele phi kukholo lwethu?”
Ndalisebenzisa elo thuba ndaza ndabuza isizathu sokuba amaKatolika esebenzisa izibizo ezinjengesithi “Obekekileyo” nesithi “Bawo Oyingcwele,” ekubeni uYesu wathi bonke abalandeli bakhe ngabazalwana. (Mateyu 23:8-10) Lo mfundisi wavuma ukuba ukwenza oku kwakuphosakele yaye yena ngokwakhe wayesenkathazweni ngenxa yokwala ukuqubuda phambi kobhishophu aze ancamise isandla sakhe. Ndandula ke ndabuza: “Kwenzeka njani ukuba amaKatolika abulalane ngokusikelelwa yiCawa?”
Lo mfundisi wadanduluka: “Lihlazo elikhulu elo! Alifanele lenzeke kwakhona. SingamaKristu ibe iCawa ayifanele ibandakanyeke emfazweni.”
NgoMatshi 12, 1938, uHitler waya eOstriya engathintelwa ibe kungekudala wayenza inxalenye yeJamani. Ngokukhawuleza iicawa zazimanyanisa naye. Eneneni, kungaphelanga neveki kamva, bonke oobhishophu abathandathu baseOstriya kuquka ukhadinali uTheodore Innitzer batyikitya “isivumo esibaluleke kakhulu” esasithandwa gqitha abathi kuso kunyulo oluzayo “kunyanzelekile yaye kungumsebenzi wesizwe njengamaJamani, ukuba thina booBhishophu sivotele uLawulo lweJamani.” Kwakukho ulwamkelo olukhulu eVienna apho uKhadinali Innitzer wayephakathi kwabokuqala ekubuliseni uHitler ngendlela amaNazi abulisa ngayo. Le khadinali yayalela zonke iicawa zaseOstriya ukuba zinyuse indwe yeswastika, zikhalise iintsimbi zazo, zize zithandazele uzwilakhe wamaNazi.
Kubonakala ngathi imeko yezobupolitika yaguquka ngephanyazo eOstriya. Umkhosi unxibe iyunifomu emdaka ngebala enophawu lweswastika ezingalweni wanda ngokukhawuleza. Umfundisi owayethe ngaphambilana iCawa ayimele ibandakanyeke emfazweni yayingomnye weqaqobana labefundisi abangazange bavume ukuthi, “Heil Hitler!” Kwiveki elandelayo wathatyathelwa indawo ngomnye umfundisi omtsha. Into yokuqala awayeyenza xa engena eklasini yayikukungqubanisa izithende zakhe, aphakamise ingalo yakhe ukuze akhahlele, aze athi: “Heil Hitler!”
Ingcinezelo Yokulandela Abanye
Wonke umntu wayechatshazelwa yingcinezelo yamaNazi. Xa ndandibulisa abantu ngokuthi “Guten Tag” (Bhotani) kunokuba ndithi “Heil Hitler,” babesiba nomsindo. Kangangezihlandlo ezili-12 ndaxelwa kumaGestapo. Ngenye imini iqela lomkhosi wohlaselo lasongela ingcali yokupeyinta endandihlala nayo, lisithi ukuba andikhahleli ndize ndithelele iqela loLutsha lukaHitler, ndandiza kuthunyelwa kwinkampu yoxinaniso. Le ngcali yokupeyinta, eyayihambisana neembono zamaNazi, yalicela ukuba libe nomonde kum ekubeni yayiqinisekile ukuba ekuhambeni kwexesha ndandiza kuguquka. Yacacisa ukuba yayingafuni kuphulukana nam kuba ndandingumsebenzi olungileyo.
Ekubeni amaNazi ayezithabathele kuwo iintambo, kwakukho imingcelele emikhulu eyayiqhubeka kude kube sebusuku, ibe abantu babekhwaza ngokunempambano. Mihla le oonomathotholo babekhalisa iintetho zikaHitler, uGoebbels, nezabanye. Ukuzithoba kweCawa yamaKatolika kuHitler kwathabatha unyawo, njengokuba abefundisi babesoloko bethandazela yaye besikelela uHitler.
UBawo wandikhumbuza ngemfuneko yokuthabatha ukuma okuqinileyo nokwahlulela ubomi bam kuYehova ndize ndibhaptizwe. Kwakhona wandixelela ngoMaria Stossier, udadeboHans omncinane owayengummelwane wethu, owayeyimele ngokuqinileyo inyaniso yeBhayibhile. Mna noMaria savumelana ngomtshato, yaye uBawo wandibongoza ukuba ndibe lukhuthazo kuye ngokomoya. Mna noMaria sabhaptizwa ngoAgasti 1939 ngumnakwabo uHans.
Umzekelo KaBawo Wokugcina Ingqibelelo
Ngosuku olulandelayo uBawo wabizelwa emkhosini. Nangona impilo yakhe enkenenkene, eyabangelwa ziinzima awathubeleza kuzo ebudeni beMfazwe Yehlabathi I, yayinokumthintela ekuyeni emkhosini, uBawo wathi kwabo babedlan’ indlebe naye ekubeni engumKristu akanakuze abandakanyeke emfazweni kwakhona njengokuba wenzayo ngoxa wayengumKatolika. Ngenxa yoko wakuthethayo wabanjwa ukuze angcanjaziswe ngokubhekele phaya.
Emva kweveki xa iJamani yahlasela iPoland, nto leyo eyaqalisa iMfazwe Yehlabathi II, wasiwa eVienna. Ngoxa wayegcinwe apho, usibonda wesithili sethu wabhala esithi yayinguBawo owayebangela amanye amaNgqina angavumi ukuxhasa uHitler yaye ke ngoko uBawo ufanele abulawe. Ngenxa yoko, uBawo wathunyelwa eBerlin kungekudala emva koko wagwetyelwa ukunqunyulwa intloko. Wayebotshelelwe ngamatyathanga imini nobusuku kwintolongo yaseMoabit.
Ngelo xesha ndabhalela uBawo egameni lentsapho simxelela ukuba sasizimisele ukulandela umzekelo wakhe wokuthembeka. Ngokuqhelekileyo uBawo wayengengomntu uzibonakalisayo iimvakalelo zakhe, kodwa sayibona indlela awayevakalelwa ngayo xa ileta yakhe yokugqibela awayesibhalele yona yayinamabala eenyembezi. Yamvuyisa gqitha into yokuba sikuqonda ukuma kwakhe. Wathumela amazwi okhuthazo, ekhankanya ngamnye kuthi ngegama waza wasibongoza ukuba sihlale sithembekile. Ithemba lakhe lovuko laliqinile.
Ngaphandle koBawo, amalunga nama-24 amanye amaNgqina awayevalelwe kwintolongo yaseMoabit. Iingqonyela zikaHitler zazama ukuwacenga ukuba alahle ukholo lwawo kodwa zatsho phantsi. NgoDisemba 1939, amaNgqina angama-25 abulawa. Xa weva ngokubulawa kukaBawo, uMama wavakalisa indlela awayenombulelo ngayo kuYehova ngokunika uBawo amandla okuhlala ethembekile kwada kwasekufeni.
Ukuqalisa Kovavanyo Lwam
Kwiiveki ezimbalwa kamva, ndabizelwa emsebenzini kodwa kungekudala ndeva ukuba owona msebenzi uphambili luqeqesho lwasemkhosini. Ndacacisa ukuba andinakusebenza emkhosini kodwa ndingawenza omnye umsebenzi. Noko ke, xa ndalayo ukuvuma iingoma zokulwa zamaNazi, amagosa aba lugcwabevu ngumsindo.
Ngentsasa elandelayo ndandinxibe iimpahla ezingezizo ezomkhosi kunokuba ndinxibe iyunifomu yasemkhosini esasiyinikiwe. Igosa elalisiphethe lathi alinandlela-mbini ngaphandle kokuba lindivalele kwintolongo engaphantsi komhlaba. Apho ndandiphila ngesonka namanzi. Kamva ndaxelelwa ukuba kwakuza kubakho umbhiyozo wokukhahlela indwe, yaye ndalunyukiswa ngelithi ukungathabathi nxaxheba kwakuya kuphumela ekubeni ndidutyulwe.
Kumabala oqeqesho kwakukho amajoni afikayo angama-300 ndawonye namagosa omkhosi. Ndayalelwa ukuba ndihambe kufutshane namagosa nendwe yeswastika ndize ndikhahlele ngendlela kaHitler. Ekubeni ndafumana amandla okomoya kwingxelo yeBhayibhile engamaHebhere amathathu, ndathi “Guten Tag” (Bhotani), njengokuba ndandidlula. (Daniyeli 3:1-30) Ndayalelwa ukuba ndiphinde ndidlule kwakhona. Ngesi sihlandlo andizange ndikhuphe nelimdaka, ndancuma nje kuphela.
Xa amagosa amane andibuyisela entolongweni, andixelela ukuba ayengcangcazela kuba ayecinga ukuba ndiza kudutyulwa. Abuza athi: “Kwenzeka njani ukuba uncume ngoxa thina besisoyika kangaka?” Athi ayenqwenela ukuba nale nkalipho ndinayo.
Kwiintsuku ezimbalwa kamva, uGqr. Almendinger, ingqonyela eyayisuka kwikomkhulu likaHitler eBerlin, wafika enkampini. Ndabizwa ukuba ndivele phambi kwakhe. Wandicacisela ukuba imithetho yayiqatha ngakumbi. Wathi: “Akubuqondi ubunzima oza kujamelana nabo.”
Ndaphendula ndathi: “Ndibuqonda kakuhle. Kwiiveki ezimbalwa ezidluleyo ubawo unqunyulwe intloko kwangesizathu esifanayo.” Wakhwankqiswa waza wee cwaka.
Kamva kwafika enye ingqonyela ivela eBerlin, ibe kwenziwa imigudu ebhekele phaya yokuguqula ingqondo yam. Emva kokuva isizathu sokuba ndingenakuyaphula imithetho kaThixo, yandibamba ngesandla, isihla iinyembezi, yathi: “Ndifuna ukusindisa ubomi bakho!” Onke amagosa awayebukele ayechukumiseke gqitha. Emva koko ndathunyelwa entolongweni kwakhona apho ndachitha iintsuku ezingama-33 zizonke.
Ukuxoxwa Kwetyala Nokuvalelwa Entolongweni
NgoAprili 1940, ndathunyelwa kwintolongo yaseFürstenfeld. Kwiintsuku ezimbalwa kamva intombi endandiza kutshata nayo, uMaria, nomntakwethu uGregor bandityelela. UGregor wayemncinane ngonyaka onesiqingatha kum, yaye wayimela ngokuqinileyo inyaniso yeBhayibhile esikolweni. Ndikhumbula ekhuthaza abaninawa bethu ukuba balungiselele intshutshiso, esithi akukho ndlela-mbini, ngaphandle kokukhonza uYehova! Iyure exabisekileyo esayichitha sikhuthazana yayisisihlandlo sokugqibela ndimbona esidla amazimba. Kamva, eGraz, ndagwetywa iminyaka emihlanu ndisebenza nzima.
Ekupheleni kowe-1940, ndakhweliswa kuloliwe owawusiya kwinkampu yamabanjwa asebenza nzima eCzechoslovakia, kodwa ndavalelwa eVienna ndaza ndaphoswa kwintolongo yalapho. Iimeko zazimbi. Ndandingathwaxwa linxele likaKhetsekile nje kuphela, kodwa ebusuku ndandityiwa zizinambuzane ezinkulu ezaziyishiya inyama yam isopha yaye iqaqamba. Ngezizathu endandingazazi mna, ndabuyiselwa kwintolongo eseGraz.
Ityala lam lalibangela umdla kuba amaGestapo ayewachaza amaNgqina kaYehova njengabafeli-nkolo abanempambano abafuna ukugwetyelwa ukufa ukuze bafumane umvuzo wasezulwini. Ngenxa yoko, kangangeentsuku ezimbini ndaba nethuba elihle lokuthetha, phambi konjingalwazi nabafundi abasibhozo ababevela kwiYunivesithi yaseGraz, ndicacisa ukuba ngabantu abali-144 000 kuphela abaya kuthatyathelwa ezulwini ukuze balawule noKristu. (ISityhilelo 14:1-3) Ndathi, ithemba lam kukunandipha ubomi obungunaphakade kwiimeko zeparadisi emhlabeni.—INdumiso 37:29; ISityhilelo 21:3, 4.
Emva kweentsuku ezimbini zokuncinwa, unjingalwazi wathi: “Ndifikelele kwisigqibo sokuba ayikho enye indawo ofuna ukuphila kuyo ngaphandle kwalapha emhlabeni. Asingomnqweno wakho ukufa uze uye ezulwini.” Wavakalisa intlungu ngokutshutshiswa kwamaNgqina kaYehova waza wandinqwenelela okuhle.
Ebutsheni bowe-1941, ndandikuloliwe oya eRollwald inkampu yaseJamani ekusetyenzwa nzima kuyo.
Ubomi Obunzima Basenkampini
IRollwald yayimi phakathi kwesixeko saseFrankfurt nesaseDarmstadt yaye inamabanjwa amalunga nama-5 000. Usuku ngalunye lwaluqalisa ngentsimbi yesi-5:00 kusasa ngokubizwa kwamagama ukuze kubonwe abakhoyo, okwakuthabatha iiyure ezimbini njengokuba amagosa ayesenza kade ehlaziya uludwe lwamabanjwa. Kwakufuneka sime bhuxe singashukumi, ibe amabanjwa amaninzi ayebethwa kanobom ngenxa yokungemi azinze.
Isidlo sakusasa yayisisonka esenziwe ngomgubo, umququ wamaplanga, neetapile ezazisoloko zibolile. Sasisandula ke siye kusebenza emgxobhozweni, sisemba imijelo ukuze umhlaba wome kuze kulinywe. Emva kokusebenza emgxobhozweni imini yonke singenazihlangu zifanelekileyo, iinyawo zethu zazidumba oku kweziponji. Ngenye imini iinyawo zam zabonakala ngathi zinesilonda esiqhenkqethayo, yaye ndandinoloyiko lokuba kwakuya kufuneka zinqunyulwe.
Emin’ emaqanda kwindawo esisebenzela kuyo, sasinikwa umxube wolingelo loko kufane kubizwe ngokuba yisuphu. Yayinongwa ngeteniphu okanye ikhaphetshu yaye maxa wambi yayiba nenyama yezilwanyana ezinezifo. Imilomo nemiqala yethu yayitshotshozela, ibe uninzi lwethu lwaphuma amathumba amakhulu. Ngokuhlwa sasifumana “isuphu” engakumbi. Uninzi lwamabanjwa lwaphulukana namazinyo alo, kodwa mna ndandixelelwe ngembaluleka yokugcina amazinyo esebenza. Ndandihlafuna ukhuni lomthi wompayini okanye amasetyana omthi ihazel, ibe andizange ndiphulukane nawam.
Ukuhlala Ndomelele Ngokomoya
Kwilinge lokwaphula ukholo lwam, abalindi bandahlula kwamanye amaNgqina. Ekubeni ndandingenalo uncwadi lweBhayibhile, ndandicinga izibhalo endandizicengcelezile, njengeMizekeliso 3:5, 6, esibongoza ukuba ‘sikholose ngoYehova ngentliziyo yethu yonke,’ neyoku-1 kwabaseKorinte 10:13, ethembisa ukuba uYehova ‘akayi kuvumela ukuba silingwe ngaphezu kwesinako.’ Ngokucamngca ngezibhalo ezinjalo nangokwayama ngoYehova emthandazweni, ndomelela.
Maxa wambi ndandikwazi ukubona iNgqina elalithunyelwe livela kwenye inkampu. Ukuba sasingenalo ithuba lokuncokola, sasikhuthazana ukuba sime ngokuqinileyo ngokunqwala intloko okanye ngokuphakamisa inqindi. Maxa wambi ndandifumana iileta ezivela kuMaria nakuMama. Kwenye yazo ndeva ngokufa komninawa wam othandekayo uGregor, yaye kwenye, ngasekupheleni kwemfazwe, ndeva ngokubulawa kukaHans Stossier, umnakwaboMaria.
Kamva, kwathunyelwa ibanjwa kwinkampu yethu elalimazi uGregor ngoxa babekunye kwintolongo yaseMoabit eBerlin. Ndeva ngalo iinkcukacha zoko kwenzekayo. UGregor wagwetyelwa ukufa ngokunqunyulwa intloko, kodwa kwilinge lokwaphula ingqibelelo yakhe, ixesha eliqhelekileyo lokulinda ngaphambi kokubulawa landiswa ukuya kwiinyanga ezine. Ebudeni belo xesha kwasetyenziswa zonke iintlobo zengcinezelo ukumenza alalanise—ebotshelelwe izandla neenyawo ngamatyathanga anzima, ibe wayenikwa ukutya manqaphanqapha. Ukanti, akazange axengaxenge. Wathembeka kwada kwasekupheleni—ngoMatshi 14, 1942. Nangona zandikhathaza ezi ndaba, zandomeleza ukuba ndihlale ndithembekile kuYehova, nokuba sekumnyam’ entla.
Kwakhona ekuhambeni kwexesha ndeva ukuba abaninawa bam uKristian noWillibald noodadewethu abancinane uIda noAnni basiwe kumzi woonongendi owawusetyenziswa njengekhaya lokulungisa izimilo eLandau, eJamani. La makhwenkwe abethwa kanobom ngenxa yokungavumi ukukhahlela uHitler.
Amathuba Okunikela Ubungqina
Inkoliso yabo babehlala kwizindlu zamajoni apho ndandihlala khona yayingamabanjwa ezobupolitika nezaphuli-mthetho. Ndandisoloko ndichitha amarhatya ndinikela ubungqina kuwo. Elinye yayingumfundisi wamaKatolika owayesuka eKapfenberg ogama linguJohann List. Wayevalelwe entolongweni ngenxa yokuba wathetha nebandla lakhe ngezinto awayezive kwiZiko Losasazo LaseBritani.
Izinto zazingamhambeli kakuhle uJohann ngenxa yokuba wayengaqhelananga nomsebenzi onzima ofuna amandla. Wayengumntu olungileyo, yaye ndandidla ngokumnceda aphumeze isabelo somsebenzi wakhe ukuze angangeni enkathazweni. Wathi wayeneentloni kukuvalelwa entolongweni ngenxa yezizathu zobupolitika kungekhona ngenxa yokubambelela kwimigaqo yobuKristu. Wathi: “Wena ubandezeleka ngenxa yokuba ungumKristu.” Xa wakhululwayo malunga nonyaka kamva, wathembisa ukutyelela umama nentombi endandiza kutshata nayo, dinga elo awalizalisekisayo.
Ubomi Buyaphucuka Kum
Ngasekupheleni kowe-1943, safumana omnye umphathi omtsha wenkampu ogama linguKarl Stumpf, indoda ethe ncothu, eneenwele ezimhlophe eyaqalisa ukuphucula iimeko kwinkampu yethu. Ipomakazi lakhe lendlu laliza kupeyintwa, yaye xa wevayo ukuba ndandinobugcisa bokupeyinta, ndanikwa loo msebenzi. Yayisisihlandlo sokuqala ukuba ndisuswe ekusebenzeni emgxobhozweni.
Umfazi walo mphathi kwakunzima ukusiqonda isizathu sokuvalelwa kwam, nangona indoda yakhe yacacisa ukuba ndandilapho ngenxa yokholo lwam njengomnye wamaNgqina kaYehova. Wandisizela kuba ndandinqine gqitha waza wandondla. Wandilungiselela imisebenzi engakumbi ukuze ndomelele ngokomzimba.
Xa amabanjwa ale nkampu ayebizelwa ukulwa kummandla kafayayo ngasekupheleni kowe-1943, ulwalamano lwam oluhle noMphathi uStumpf lwandisindisa. Ndamcacisela ukuba ndikhetha ukufa kunokuba netyala legazi ngokuthabatha inxaxheba emfazweni. Nangona ubundilele bam bambeka kwimeko enzima, wakwazi ukulicima igama lam kuluhlu lwabo babebizwa.
Imihla Yokugqibela Yemfazwe
Ebudeni bukaJanuwari noFebruwari ngowe-1945, iinqwelo-moya zaseMerika ezazindandela phantsi zasikhuthaza ngokuphosa amaphetshana awayesithi imfazwe yayisondela kwisiphelo sayo. UMphathi uStumpf, owasindisa ubomi bam, wandinika impahla engeyoyamajoni waza wanikela ngepomakazi lakhe lendlu njengendawo yokuzimela. Ekumkeni kwam enkampini, ndabona isiphithiphithi esikhulu. Ngokomzekelo, abantwana befake ezasemkhosini babelila bebaleka amaMerika. Ekubeni ndandisoyika ukubalekela kumagosa amaSS awayeyakubuza isizathu sokuba ndingaphathanga mpu, ndagqiba kwelokuba ndibuyele enkampini.
Kungekudala inkampu yethu yangqingwa yimikhosi yamaMerika ngokupheleleyo. NgoMatshi 24, 1945, inkampu yanikezela, yaphakamisa iindwe ezimhlophe. Hayi indlela endamangaliswa ngayo xa ndeva ukuba kwakukho namanye amaNgqina awasindiswa ekubulaweni nguMphathi uStumpf! Hayi indlela esavuya ngayo xa sadibanayo! Xa uMphathi uStumpf wavalelwayo, uninzi lwethu lwaya kumagosa amaMerika saza samthethelela ngokobuqu nangeleta. Ngenxa yoko, wakhululwa kwiintsuku ezintathu kamva.
Okwandimangalisayo kukuba ndandingowokuqala ukukhululwa kumabanjwa angama-5 000. Emva kweminyaka emihlanu ndithothoza ngaphaya kwezitshixo, ndandivakalelwa kukuba ndiyaphupha. Ndineenyembezi zovuyo, ndambulela uYehova ngomthandazo ngokundigcina ndiphilile. IJamani ayizange inikezele de kwangoMeyi 7, 1945, malunga neeveki ezintandathu kamva.
Ekukhululweni kwam, ngoko nangoko ndaqalisa ukuqhagamshelana namaNgqina aloo mmandla. Kwalungiselelwa isifundo seBhayibhile seqela, yaye ebudeni beeveki ezalandelayo, ndachitha iiyure ezininzi ndinikela ubungqina kubantu baloo mmandla ukufutshane nenkampu. Kwangaxeshanye, ndafumana umsebenzi wokupeyinta.
Ukubuyela Ekhaya Kwakhona
NgoJulayi, ndakwazi ukuthenga isithuthuthu, ndaza ndaqalisa uhambo olude olubuyela ekhaya. Olu hambo lwathabatha iintsuku eziliqela, ekubeni iibhulorho ezininzi zazitshatyalalisiwe. Xa ekugqibeleni ndafikayo ekhaya eSt. Martin, ndanyuka ngendlela yaye ndabona uMaria evuna ingqolowa. Xa wada wandiqonda ekugqibeleni, weza ebaleka. Unokuyithelekelela indlela ekwakuluvuyo ngayo ukumanyana kwakhona. UMama walilahla phantsi irhengqa lakhe naye weza ebaleka. Ngoku, kwiminyaka engama-49 kamva, uMama uneminyaka engama-96 ubudala yaye akaboni. Ingqondo yakhe isaphilile, yaye useliNgqina likaYehova elithembekileyo.
Mna noMaria satshata ngo-Oktobha 1945, yaye kwiminyaka ukususela ngoko, siye sanandipha ukukhonza uYehova kunye. Siye sasikelelwa ngamantombazana amathathu, unyana, kunye nabazukulwana abathandathu, bonke bakhonza uYehova ngenzondelelo. Ukutyhubela iminyaka ndiye ndavuyiswa kukunceda inkitha yabantu ukuba imele inyaniso yeBhayibhile.
Inkalipho Yokunyamezela
Izihlandlo ezininzi ndiye ndabuzwa indlela endakwazi ngayo ukujamelana nokufa ngaphandle koloyiko, nakubeni ndandiselula. Qiniseka ukuba—uYehova uThixo ukunika amandla okunyamezela ukuba uzimisele ukuhlala unyanisekile. Ngokukhawuleza ubani ufunda ukukholosa ngaye ngokupheleleyo ngomthandazo. Kwaye ukwazi ukuba abanye, kuquka ubawo nomntakwethu, banyamezela ngokuthembeka de kwasekufeni kwandinceda nam ndahlala ndinyanisekile.
Kwakungekho eYurophu kuphela apho abantu bakaYehova bangazange bathabathe cala emfazweni. Ndikhumbula ukuba ebudeni bokuxoxwa kwamatyala aseNuremberg ngowe-1946, enye yeengqonyela zikaHitler yabuzwa ngokutshutshiswa kwamaNgqina kaYehova kwiinkampu zoxinaniso. Epokothweni yayo yakhupha iphetshana leendaba elisikiweyo elanikela ingxelo yokuba amawaka amaNgqina kaYehova aseUnited States ayevalelwe kwiintolongo zaseMerika ngenxa yobundilele bawo ebudeni beMfazwe Yehlabathi II.
Ngokwenene, amaKristu okwenyaniso ngenkalipho alandela umzekelo kaYesu Kristu, owagcina ingqibelelo kuThixo de kwasekufeni kwakhe. Nanamhlanje ndisoloko ndicinga ngamalungu ali-14 ebandla lethu elincinane eSt. Martin ebudeni beminyaka yee-1930 neyee-1940, awathi ngenxa yokuthanda uThixo nabanye abantu, akavuma ukuxhasa imfazwe kaHitler aza ngenxa yeso sizathu abulawa. Hayi indlela ekuya kuba mnandi ngayo ukumanyana kwakhona xa bebuyiswa ukuze banandiphe ubomi ngonaphakade kwihlabathi elitsha likaThixo!
Ukuba, emva kokufunda eli phephancwadi, unayo nayiphi na imibuzo ngeBhayibhile, zive ukhululekile ukuqhagamshelana namaNgqina kaYehova kwiHolo yoBukumkani ekummandla okuwo, okanye ubhalele abapapashi beli phephancwadi. (Bona iphepha 5.)
[Umfanekiso okwiphepha 26]
Ubawo
[Umfanekiso okwiphepha 28]
Ngowe-1939, mna noMaria sagana
[Umfanekiso okwiphepha 31]
Intsapho yakowethu. Ukusuka ngasekhohlo ukuya ngasekunene: uGregor (wanqunyulwa intloko), uAnni, uFranz, uWillibald, uIda, uGregor (ubawo, wanqunyulwa intloko), uBarbara (umama), noKristian
[Umfanekiso okwiphepha 32]
Ndikunye noMaria namhlanje