“Ingxaki Engaqondakaliyo Efuna Ingqalelo Ngokukhawuleza” Iza Kuphela Kungekudala!

“XA SITHELEKISA indlela ebezikade ziyiyo izinto, sinokubona ukuba namhlanje siphila kwihlabathi elinentabalala yokutya. . . . Ngandlel’ ithile . . . wonke umntu unokutya okwaneleyo.” Itsho njalo ingxelo yeWorld Health Organization (WHO). Kodwa ukuba kunjalo, yintoni kanye ebangela ukungondleki?

IWHO ithi: “Ingxaki kukuba akuveliswa ukutya okwaneleyo yaye ukutya okukhoyo akwabiwa ngokulinganayo. Okubuhlungu kukuba, kumazwe asakhasayo anomhlaba ochumileyo, amahlwempu—athwaxwa yindlala—ahlala abukele ngoxa ukutya okuninzi kuthunyelwa kwamanye amazwe ukuze kufunyanwe izityhwentywe zemali. Kuxhamla igcuntswana okwexeshana kuze kulahlekelwe abantu abaninzi.” Uphando lwakutshanje olwenziwe yiFood and Agriculture Organization of the United Nations (FAO) lubonisa ukuba emhlabeni wonke ‘inyama nentlanzi engama-45 ekhulwini ifunyanwa zizinhanha ezingama-20 ekhulwini; ngoxa esisi-5 kuphela ekhulwini ifunyanwa ngamahlwempu angama-20 ekhulwini.’

Kwelinye icala, “ukungabi namfundo nolwazi oluchanileyo kwabantu ngomnye unobangela wokungondleki,” itsho njalo iUnited Nations Children’s Fund, yaye yalek’ umsundulo ngelithi: “Lo gama nje ingekabikho indlela yokufundisa abantu enokufikelelwa ngumntu wonke, abantu abanakuze babe nabo ubuchule bokoyisa ukungondleki.” Kodwa kwelinye icala, xa umntu ethwaxwa liphango akabi nampilo intle yaye loo nto ibangela ukuba angakwazi ukufumana imfundo ebhetele—zezi zinto kanye ezikhokelela kule ngxaki yokungondleki.

Ukwenza Okusesikweni Nokuba Nenyameko Enzulu Ngabanye

Phezu kwayo nje le miqobo, ezinye iingcali kulo mbandela zithi likho ithemba. Ngokomzekelo, evakalisa ithemba lakhe, umalathisi jikelele weFAO uJacques Diouf wathi: “Ndinombono wehlabathi apho onke amadoda, amabhinqa nabantwana beya kuba nesixa sokutya okunezondlo esaneleyo yonke imihla. Akuyi kubakho mntu usisityebi ngokugqithiseleyo okanye ulihlwempu ngokugqithiseleyo. Abantu baya kuhlalisana ngoxolo kungekho lucalucalulo; kungekho kubambana ngezixhanti; baya kuyinyamekela indalo kunokuba bayitshabalalise; bonke abantu baya kuba nentabalala yokutya yaye akuyi kubakho mntu uphelelwe lithemba.”

Noko ke njengoko sele sibonile, imveliso yokutya ethe chatha nokwabiwa kwako ngendlela efanelekileyo nje kukodwa akwanele. Kufuneka kubekho okusesikweni nenyameko enzulu ngabanye abantu. Kodwa ezi mpawu zintle ngolu hlobo akunakufane uzifumane kubantu banamhlanje abasoloko bejonge inzuzo.

Ngaba kunokupheliswa ukubawa, indlala, ukruthakruthwano nokuzingca kuze ngaloo ndlela kuphele ingxaki yokungondleki emhlabeni? Okanye ngaba mhlawumbi le yinto engenakwenzeka kwaphela?

Ekuphela Kwesona Sicombululo

Ngokutsho kweBhayibhile, asifanele simangaliswe kukubona zonke ezi ngxaki zibangela ukungondleki. ILizwi likaThixo lithi: “Ngemihla yokugqibela kuya kufika amaxesha amanqam ekunzima ukujamelana nawo. Kuba abantu baya kuba ngabazithandayo, abathandi bemali, . . . abangenawo umsa wemvelo, abangayifuni kwaphela imvisiswano, . . . abangathandi kulunga, . . . benembonakalo yozinikelo lobuthixo kodwa bengaphili ngokuvisisana nalo.”—2 Timoti 3:1-5.

Ngaba abantu banako ukusitshintsha ngokupheleleyo isimo sabo sengqondo ngaphandle koncedo lukaThixo? Kubonakala kungenakwenzeka oko, akunjalo? Mhlawumbi ukhe waphawula ukuba abasemagunyeni bakhe bazame ukuphelisa iingxaki ezithwaxa uluntu, kodwa ngenxa yokuzingca, ukuthanda imali nokungafezeki kwabanye iye ingaphumeleli loo mizamo.—Yeremiya 10:23.

Kodwa sikho isicombululo sale meko. IBhayibhile ithembisa ukuba uBukumkani bukaThixo buya kuziphelisa iingxaki ezibangelwa kukungabikho kokusesikweni kuquka zonke iingxaki ezithwaxa uluntu namhlanje.

UIsaya 9:6-7 unikela eli themba limangalisayo: “Sizalelwe umntwana, sinikwe unyana; yaye ukuphatha njengenkosana kuya kuba segxalabeni lakhe. Igama lakhe liya kubizwa ngokuba nguMcebisi Omangalisayo, uThixo Onamandla, uBawo ongunaPhakade, iNkosana yoXolo. Akayi kuyeka ukuphatha njengenkosana, noxolo aluyi kuphela etroneni kaDavide nasebukumkanini bakhe ukuze bumiselwe ngokuqinileyo nokuze buxhaswe ngokusesikweni nangobulungisa, ukususela ngoku kuse kwixesha elingenammiselo. Yona kanye inzondelelo kaYehova wemikhosi iya kukwenza oku.”

Abantu bathandazela obu Bukumkani xa becengceleza uMthandazo weNkosi, besithi kuThixo, “Mabufike ubukumkani bakho.” (Mateyu 6:9, 10) Phawula ukuba uIsaya uthi “yona kanye inzondelelo kaYehova wemikhosi iya kukwenza oku.” Ewe, uYehova uThixo ubesoloko ezimisele ukunyamekela iimfuno zoluntu. Wenze ukuba lo mhlaba ukwazi ukuvelisa intabalala yokutya okuya kwanela bonke abantu.

INdumiso 65:9-13 ithi: “Uyiphethulele emhlabeni ingqalelo yakho, ukuze uwunike intabalala; uwutyebisa kakhulu. Umsinga ovela kuThixo uzele ngamanzi. Ulungisa ukudla kwabo okuziinkozo, kuba leyo yindlela owulungisa ngayo umhlaba. Kukho ukuzaliswa ngamanzi kwemijelo yawo, ukulungelelaniswa kwamafu awo; uwuthambisa ngomvumbi; uyawasikelela amahlumelo awo. . . . Amadlelo ambeswe imihlambi, iintili zigutyungelwe kukudla okuziinkozo.”

Ewe, uMdali uYehova ngoyena ulunyamekelayo uluntu. ‘Ngulowo unika inyama yonke ukutya: kuba ububele bakhe bothando bukho ukusa kwixesha elingenammiselo.’—INdumiso 136:25.

Sinokuqiniseka ukuba uBukumkani bukaThixo, phantsi kolawulo lukaKristu buya kuqinisekisa ukuba wonke umntu unako ukutya. IBhayibhile ithi: “Kuya kubakho ukudla okuziinkozo okuninzi emhlabeni; encotsheni yeentaba kuya kubakho ukuphuphuma.” Yaye ngaphezu koko, bonke abantu baya kufumana ukutya ngokulinganayo kuba “[UYesu Kristu] uya kumhlangula lowo ulihlwempu ukhalela uncedo, kwanalowo uxhwalekileyo nabani na ongenamncedi. . . . Nemiphefumlo yabangamahlwempu uya kuyisindisa.” (INdumiso 72:12, 13, 16) Ngoko ungapheli mandla! Le ‘ngxaki ingaqondakaliyo ifuna ingqalelo ngokukhawuleza’ sele iza kuconjululwa ngokusisigxina.

[Amagama acatshulweyo akwiphepha 11]

“Ngandlel’ ithile inokupheliswa indlala nokungondleki. Zikho iindlela zokwenza oko. Eyona nto ifunekayo . . . kukuba kwilizwe ngalinye nasemhlabeni ngokubanzi abantu bathabathe amanyathelo angqalileyo.”—IWorld Health Organization

[Umfanekiso okwiphepha 10]