UYehova Akazange Asilahle
Ngokubaliswa Ngunasho Dori
IMbreshtan yidolophana esezintabeni ekumazantsi eAlbania, ekude kufuphi neGrisi. Ndazalelwa apho ngowe-1907. Xa ndandineminyaka emihlanu ubudala, ndaqalisa ukufunda kwisikolo sesiGrike, kodwa imfundo yam yaphazamiseka xa imikhosi yaseItali yahlasela iAlbania ebudeni beMfazwe Yehlabathi I. Emva kwemfazwe, ndaqalisa ukufunda kwakhona kodwa ngolwimi lwaseAlbania.
NANGONA abazali bam babengaluthandi kakhulu unqulo, babezigcina izithethe zeCawa yobuOthodoki yaseAlbania. Umalume wam omkhulu wayengumfundisi eMbreshtan, ngoko ndasebenza ecaweni yaye ndakubona kakuhle okwakusenzeka apho. Izithethe zazibonakala zililize, yaye uhanahaniso lwalundikruqula.
Belandela isiko lasekuhlaleni, abazali bam bandikhethela ibhinqa eliselula ukuze ndilitshate. UArgjiro wayesuka kwidolophana ekufutshane yaseGrabova, ibe satshata ngowe-1928, xa wayeneminyaka eli-18 ubudala.
Ukufunda Inyaniso YeBhayibhile
Malunga nelo xesha ndakhalazela iCawa yobuOthodoki kumzala wam owayetyelele evela eUnited States. Waphendula wathi: “EMerika, kufutshane nekhaya lam, kukho iqela labantu abangenacawa, kodwa bafundisisa iBhayibhile.” Ndaba nomdla kule ngcamango yokufundisisa iBhayibhile ngaphandle kokuba necawa. Ngoko ndambuza enoba wayenokundithumelela kusini na uncwadi lweBhayibhile.
Ndayilibala ngokupheleleyo incoko yethu de kwadlula ixesha elimalunga nonyaka xa ndafumana ipasile eyayivela eMilwaukee, eWisconsin. Ngaphakathi kwakukho incwadi ethi UHadi LukaThixo ngolwimi lwaseAlbania neMboniselo ngesiGrike. Ndayifunda ngokukhawuleza loo ncwadi ndaza ndaphawula ukuba kuthethwa ngecawa yokwenyaniso. Loo nto yandicaphukisa. Ndazixelela oku: ‘Andifuni nanye into enokwenza necawa.’ Ngoko andizange ndiyifunde ngokucokisekileyo loo ncwadi.
Ngowe-1929, ndangena emkhosini ndaza ndathunyelwa kwisixeko saseTiranë, esilikomkhulu laseAlbania. Apho ndadibana noStathi Muçi, owayefunda iBhayibhile yesiGrike. Ndambuza: “Ngaba uyayihamba icawa?” Waphendula wathi: “Hayi. Ndayiyeka icawa. Ndingomye waBafundi BeBhayibhile Bezizwe ngeZizwe.” NgeCawa mna nelinye ijoni sahamba noStathi ukuya entlanganisweni. Ndafunda apho ukuba icawa yokwenyaniso ayisosakhiwo okanye unqulo, kodwa ibunjwe ngabakhonzi abathanjisiweyo bakaKristu. Ngoku ndandikuqonda oko kwakuthethwa yincwadi ethi UHadi LukaThixo.
UNasho Idrizi noSpiro Vruho babebuyele eAlbania besuka eUnited States phakathi kweminyaka yee-1920 yaye babesasaza iinyaniso zeBhayibhile ababezifunde apho. Ndaqalisa ukuya ezintlanganisweni eTiranë, kunye neqela laBafundi BeBhayibhile. Kungekudala kwacaca kum ukuba ndandiyifumene intlangano kaYehova. Ngoko ngoAgasti 4, 1930, ndabhaptizwa kumlambo okufutshane.
Emva koko ndabuyela eMbreshtan ukuze ndiqhubeke nomsebenzi wam wokwenza nokuthunga izihlangu. Kodwa okubaluleke ngakumbi kukuba ndaqalisa nokwabelana nabanye ngeenyaniso zeBhayibhile endandizifundile. Ndandibaxelela oku: “UYesu Kristu akafani nala mifanekiso isecaweni. Uyaphila!”
Ukushumayela Phezu Kwayo Nje Inkcaso
UAhmed Bey Zogu wathabatha ulawulo ngowe-1925, wazenza uKumkani uZog I ngowe-1928, waza walawula ukuya kutsho ngowe-1939. Umphathiswa wakhe wamalungelo abantu wayekholiswa ngumsebenzi wethu wobuKristu. Sekunjalo, saba neengxaki. Oku kwakubangelwa kukuba uMusa Juka, umphathiswa wezangaphakathi, wayengumtya nethunga nepopu yaseRoma. UJuka wayalela ukuba zibe ntathu kuphela iicawa ezamkelekileyo—amaSilamsi, ubuOthodoki neRoma Katolika. Amapolisa azama ukuhlutha iincwadi zethu nokusithintela ukuba singashumayeli, kodwa akazange aphumelele.
Ebudeni beminyaka yee-1930, ndandidla ngokutyelela eBerat, isixeko esikhudlwana saseAlbania apho uMihal Sveci wayesalathisa khona umsebenzi wethu wokushumayela. Salungiselela ukhenketho lokushumayela kulo lonke ilizwe. Ndakha ndathunyelwa kwidolophu yaseShkodër kangangeeveki ezimbini, ibe ndakwazi ukushiya uncwadi oluninzi. Ngowe-1935 saqesha ibhasi njengeqela ukuze siye kushumayela kwidolophu yaseKëlcyrë. Sandula ke salungiselelwa ukhenketho olukhudlwana kunolo eAlbania kwiidolophu zasePërmet, eLeskovik, e-Ersekë, eKorçë, ePogradec neyase-Elbasan. Salugqiba ukhenketho eTiranë kanye ngexesha elifanelekileyo ukuze senze iSikhumbuzo sokufa kukaKristu.
Ukutya kokomoya esasikufumana kwasinceda sahlala somelele ngokomoya, ngoko asizange sizive silahliwe. Ukususela ngowe-1930 ukusa kowe-1939, ndandifumana IMboniselo yesiGrike rhoqo. Usukelo lwam yayikukufunda iBhayibhile ubuncinane kangangeyure suku ngalunye, nto leyo endayenza kangangeminyaka engama-60 ngaphambi kokuba amehlo am angaboni. IBhayibhile epheleleyo iqale kutshanje ukufumaneka ngolwimi lwesiAlbania, ngoko ndiyavuya kuba ndafunda isiGrike ndisengumntwana. Amanye amaNgqina aseAlbania aloo mihla afunda ukulesa ngesiGrike ukuze nawo akwazi ukuyifunda yonke iBhayibhile.
Ngowe-1938, uArgjiro wabhaptizwa. Ngowe-1939 sasesizele abantwana abasixhenxe kwabalishumi. Okubuhlungu kukuba abathathu kubantwana bokuqala abasixhenxe bafa besebancinane.
Ubunzima Ebudeni BeMfazwe Yehlabathi II
NgoAprili 1939, ngaphambi nje kokuqalisa kweMfazwe Yehlabathi II, amajoni angamaFasi aseItali ahlasela iAlbania. Kamsinya emva koko umsebenzi wamaNgqina kaYehova wavalwa, kodwa iqelana lethu elalinabavakalisi boBukumkani abangama-50 laqhubeka lishumayela. Iincwadi neencwadana zethu ezimalunga ne-15 000 zahluthwa zaza zatshatyalaliswa ebudeni beMfazwe Yehlabathi II.
UJani Komino wayenegumbi lokugcina uncwadi elalakhelwe endlwini yakhe. Xa amajoni aseItali afumanisa ukuba ezo ncwadi zazishicilelwe eUnited States, acaphuka. Athi: “Ningabasasazi bempembelelo yenkohliso! IUnited States inxamnye neItali!” Abazalwana abaselula ababenenzondelelo uThomai noVasili Cama babanjwa, yaye xa kwafunyaniswa ukuba iincwadi ababezisasaza zazivela kuKomino, naye wabanjwa. Kungekudala ndabizwa ngamapolisa ukuze ndincinwe.
“Uyawazi la madoda?” abuza.
“Ewe,” ndaphendula.
“Ngaba usebenza nawo?”
“Ewe,” ndaphendula. “SingamaNgqina kaYehova. Asilwi nxamnye noorhulumente. Singoondilele.”
“Ngaba ubulusasaza olu ncwadi?”
Xa ndavumayo, andibopha, ndaza ndavalelwa entolongweni ngoJulayi 6, 1940. Apho ndafikela kwabanye abahlanu ababesuka kwidolophana yakowethu—uJosef Kaci, uLlukan Barko, uJani Komino noonyana bakwaCama. Ngoxa sisentolongweni sadibana namanye amaNgqina amathathu—uGori Naçi, uNikodhim Shyti noLeonidas Pope. Sasixinaniswe silithoba kwisisele esiziimitha ezisisi-1,8 ububanzi nezisisi-3,7 ubude!
Emva kweentsuku ezimbalwa, sadityaniswa ngamatyathanga saza sasiwa kwisixeko sasePërmet. Kwiinyanga ezintathu kamva satshintshelwa kwintolongo yaseTiranë saza sagcinwa iinyanga ezongezelelekileyo ezisibhozo engaxoxwa amatyala ethu.
Ekugqibeleni, savela kwinkundla yasemkhosini. Mna noMzalwan’ uShyti sagwetywa iinyanga ezingama-27, uMzalwan’ uKomino wagwetywa iinyanga ezingama-24, yaye abanye bakhululwa emva kweenyanga ezili-10. Satshintshelwa kwintolongo yaseGjirokastër, apho sancedwa nguMzalwan’ uGole Flloko ukuze sikhululwe ngowe-1943. Emva koko intsapho yethu yahlala kwisixeko sasePërmet, apho ndaba ngumveleli kwibandla elincinane lalapho.
Ekubeni umsebenzi wethu wawuvaliwe yaye iMfazwe Yehlabathi II igquba kumazwe asijikelezileyo, saqhubeka sisenza esasinokukwenza ukuze sizalisekise uthumo lwethu lokushumayela isigidimi soBukumkani. (Mateyu 24:14) Ngowe-1944 ayeli-15 amaNgqina awayesentolongweni. Sekunjalo, ebudeni bala maxesha anzima, asizange sizive silahliwe nguYehova.
Ukuvavanywa Kwimbambano Yobundilele
Nangona imfazwe yaphelayo ngowe-1945, iingxaki zethu zaqhubeka zikho yaye zade zaba mbi nangakumbi. Ebudeni bonyulo lukaDisemba 2, 1946, kwakuvotiswa ngenkani. Nabani na owayezikhwebula kulo wayegqalwa njengotshaba lukaRhulumente. Abo babesebandleni lethu ePërmet baqalisa ukubuza, “Sifanele senze ntoni?”
Ndaphendula ndathi: “Ukuba nikholose ngoYehova, anifanelanga nibuze mna ukuba nenze ntoni na. Sele nisazi ukuba abantu bakaYehova bangoondilele. Abangabo abehlabathi.”—Yohane 17:16.
Umhla wonyulo wafika, yaye abathunywa bakarhulumente beza endlwini yethu. Baqalisa ukuthetha bezolile, “Kwowu, makhe sifumane ikomityi yekofu ngoxa sincokola. Uyazi ukuba kwenzeka ntoni namhlanje?”
“Ewe, namhlanje ngumhla wonyulo,” ndaphendula ndatsho.
“Kubhetele ukhawulezise, okanye uza kushiywa lixesha,” latsho elinye igosa.
“Hayi, andizimiselanga kuya. Thina sivotela uYehova,” ndaphendula.
“Kulungile ke, yiza uzokuvotela iqela elichasene nathi.”
Ndacacisa ukuba amaNgqina kaYehova angoondilele ngokupheleleyo. Xa ukuma kwethu kwathi kwaziwa, sacinezelwa nangakumbi. Sayalelwa ukuba siyeke ukuqhuba iintlanganiso zethu, ngoko saqalisa ukuhlanganisana ngokufihlakeleyo.
Ukubuyela Kwidolophana Yakokwethu
Ngowe-1947 mna nentsapho yam sabuyela eMbreshtan. Kamsinya emva koko, ngenye imva kwemini kaDisemba eyayibanda kakhulu, ndabizwa kwiofisi yeSigurimi (abecuphi). “Uyazi ukuba ndikubizele ntoni?” labuza latsho elinye igosa.
“Ndicinga ukuba kungenxa yokuba uye weva izityholo endibekwa zona,” ndaphendula. “Kodwa iBhayibhile ithi ihlabathi liya kusithiya, ngoko akundimangalisi ukutyholwa.”—Yohane 15:18, 19.
“Ungandixeleli ngeBhayibhile,” latsho ngomsindo. “Ndakukuqhekez’ ubuchopho.”
Eli gosa lemka namadoda alo kodwa landiyalela ukuba ndime ngaphandle engqeleni. Emva kwexesha elithile landibizela kwiofisi yalo laza landixelela ukuba ndiyeke ukuqhuba iintlanganiso ekhayeni lethu. Labuza: “Bangaphi abantu abahlala kwidolophana yakho?”
“Balikhulu elinamashumi amabini,” ndatsho.
“Bahamba kweyiphi icawa?”
“KwiOthodoki yaseAlbania.”
“Wena?”
“Ndingomnye wamaNgqina kaYehova.”
“Abantu abalikhulu elinamashumi amabini baye calanye uze wena uye kwelinye icala?” Landula ke landiyalela ukuba ndikhanyise amakhandlela ecaweni. Xa ndathi ndandingenakukwenza oko, laqalisa ukundibetha ngentonga. Kwakumalunga nentsimbi yokuqala kusasa xa ndathi ekugqibeleni ndakhululwa.
Ukupheliswa Kokuthunyelelwa Uncwadi
Emva kokuphela kweMfazwe Yehlabathi II, kwakhona saqalisa ukufumana IMboniselo ngeposi, kodwa ekugqibeleni loo maphephancwadi ayengasathunyelwa. Kwandula ke, ngobunye ubusuku ngentsimbi yeshumi, ndabizwa ngabecuphi. Ndaxelelwa oku: “Kukho iphephancwadi lesiGrike elifikileyo, kwaye sifuna ukuba usicacisele ngoko likuquletheyo.”
Ndathi: “Andisazi kakuhle isiGrike. Ngummelwane wam osazi bhetele. Mhlawumbi anganinceda.”
“Hayi, sifuna wena ukuba usicacisele oku,” latsho njalo elinye igosa njengoko lalikhupha ezinye zeeMboniselo zesiGrike.
“Tyhini, ngawam!” ndadanduluka ndatsho. “Akukho ngxaki, ndinganicacisela ngawo. Niyabona, la maphephancwadi avela eBrooklyn, eNew York. Kulapho likhoyo ikomkhulu lamaNgqina kaYehova. Ndingomye wamaNgqina kaYehova. Kodwa kubonakala ngathi benze impazamo ngekhelingi. La maphephancwadi ebemele athunyelwe kum, kungekhona kuni.”
Abazange bavume ukundinika loo maphephancwadi, yaye ukususela ngelo xesha ukuza kuthi ga ngowe-1991, iminyaka engaphezulu kuhle kwengama-40 kamva, asizange sifumane naluphi na uncwadi lweBhayibhile eAlbania. Ebudeni bayo yonke loo minyaka, saqhubeka sishumayela, sisebenzisa iiBhayibhile zethu kuphela. AmaNgqina amalunga nama-20 ayesentolongweni ngowe-1949; amanye ayegwetywe iminyaka emihlanu.
Ukwanda Kweengxaki
Ngeminyaka yee-1950, abantu bayalelwa ukuba baphathe iincwadana ezibonakalisa ukuba babewuxhasa umkhosi. Kodwa amaNgqina kaYehova akazange avume ukuphatha ezo ncwadana. Ngenxa yoku, mna noMzalwan’ uKomino sachitha ezinye iinyanga ezimbini entolongweni.
Ebudeni bexesha uRhulumente awayevumele iinkonzo ezithile ukuba zibekho, sasikhululekile ukusa kumlinganiselo othile. Noko ke, ngowe-1967 yonke into elunqulo yavalwa, nto leyo eyenza ukuba iAlbania ibe lilizwe elingakholelwayo ngokupheleleyo kubukho bukaThixo. AmaNgqina aqhubeka ezama ukuqhuba iintlanganiso, kodwa kwaba nzima gqitha. Abanye bethu babethunga ipokotho ekhethekileyo ngaphakathi kweebhatyi ukuze sifihle iBhayibhile encinane. Sasisandula ke siphume siye endle ukuze siyifunde.
AmaNgqina aseTiranë abanjwa, aza amathathu agwetywa iminyaka emihlanu kwiinkampu ezikude ekusetyenzwa nzima kuzo. Ngenxa yoko, iintsapho zawo zatsala nzima. Abanye bethu ababesuka kwiidolophana ezincinane, ezikwanti abazange basiwe kude kuba babengagqalwa njengesisongelo esikhulu. Kodwa ubundilele bethu bakhokelela ekubeni amagama ethu acinywe kuludwe lwabafanele bafumane ukutya. Ngenxa yoko, ubomi babunzima gqitha. Kwakhona, ababini kubantwana bethu bafa. Sekunjalo asizange sizive silahliwe nguYehova.
Kwakugquba uloyiko eAlbania. Wonke umntu wayejongiwe, kwaye abecuphi babebhala ingxelo ngaye nabani na owayevakalisa iimbono ezazahlukile kwezeqela elalilawula. Ngoko sasilumka gqitha xa sibhala iingxelo ngomsebenzi wethu. Sasingakwazi ukuhlanganisana ukuze sikhuthazane ngokomoya siliqela elingaphezu kwabantu ababini okanye abathathu. Sekunjalo, asizange siyeke ukushumayela.
Kwimigudu yabo yokubangela ukudideka phakathi kwabazalwana, abecuphi basasaza amarhe okuba iNgqina elithile eliphambili laseTiranë lalinguntamnani. Oku kwabangela ukuba abanye baphelelwe yintembelo yaye ngandlel’ ithile kwaphazamisa umanyano lwethu. Ngenxa yokungabi nalo naluphi na uncwadi lweBhayibhile olusexesheni nokunganxibelelani nentlangano kaYehova ebonakalayo, abambalwa banikezela ngenxa yoloyiko.
Ukongezelela koko, abasemagunyeni basasaza amarhe okuba uSpiro Vruho, umdala ongumKristu owayehlonelwa kakhulu eAlbania, wayezibulele. Bathi: “Niyabona, noVruho ngokwakhe unikezele.” Kamva kwaqondakala ukuba enyanisweni uMzalwan’ uVruho wayebulewe.
Ngowe-1975, mna noArgjiro sahlala nonyana wethu eTiranë kangangeenyanga ezimbalwa. Ebudeni bexesha lonyulo, abasemagunyeni kweso sixeko basicinezela ngokusisongela besithi: “Ukuba anivoti, unyana wenu siza kumhlutha umsebenzi.”
Ndaphendula: “Unyana wam ebesenza umsebenzi wakhe kangangeminyaka engama-25. Ninazo iingxelo ezingeenkcukacha zakhe nentsapho yakhe. Andizange ndivote kwiminyaka engaphezu kwama-40. Le nkcazelo ngokuqhelekileyo iba kwiingxelo zabasebenzi. Ukuba akunjalo, ngoko iingxelo zenu azilungelelananga. Ukuba ikho kwiingxelo zenu, ngoko beninganyanisekanga kulo mbutho ngokumvumela ukuba asebenze iminyaka emininzi kangaka.” Bakukuva oku, abasemagunyeni bathi ukuba sasinokubuyela eMbreshtan, babengabek’ ingca kulo mbandela.
Iinguqulelo Eziphawulekayo
Ngowe-1983 safuduka eMbreshtan saya kwisixeko saseLaç. Kamsinya emva koko, ngowe-1985, uzwilakhe wafa. Wayelawule ukususela ngoluya nyulo lokuqala lwesinyanzelo lowe-1946. Ethubeni, umfanekiso oqingqiweyo wakhe nokaStalin, eyayibalasele kwibala elikhulu lentengiso laseTiranë, yashenxiswa.
Ebudeni bamashumi eminyaka umsebenzi wethu uvaliwe, amaNgqina amaninzi aphathwa ngenkohlakalo, yaye amanye abulawa. Enye indoda yawaxelela oku amaNgqina esitratweni: “Ebudeni bexesha lamaKomanisi, sonke sasimlahlile uThixo. NgamaNgqina kaYehova kuphela awahlala ethembekile kuye phezu kwazo nje izilingo nobunzima.”
Njengoko sasinikwa inkululeko engakumbi, abalithoba banikela ingxelo yomsebenzi wobulungiseleli bamaKristu ngoJuni 1991. NgoJuni 1992, emva kwenyanga umsebenzi wethu uvuliwe, abangama-56 baba nesabelo kumsebenzi wokushumayela. Ngasekuqaleni kwaloo nyaka sasinemincili kukuba nabangama-325 ababeze eSikhumbuzweni sokufa kukaKristu. Ukususela ngoko inani labashumayelayo liye lakhula laya kutsho kwabangaphezulu kwama-600, yaye babengama-3 491 xa bebonke abebeze eSikhumbuzweni ngoAprili 14, 1995! Kwiminyaka yakutshanje aluchazeki uvuyo endiba nalo xa ndibona abaselula abaninzi kangaka besongezelelwa emabandleni ethu.
UArgjiro uye wahlala ethembekile kuYehova yaye ebenyanisekile kum kuyo yonke le minyaka mininzi. Ngoxa ndandisentolongweni okanye ndihambahamba kumsebenzi wokushumayela, ngomonde wayenyamekela iintswelo zentsapho yethu ngaphandle kokukhalaza. Omnye woonyana bethu kunye nomfazi wakhe babhaptizwa ngowe-1993. Oko kuye kwasivuyisa gqitha.
Sasisenzela UBukumkani BukaThixo Kuphela
Ndichwayite gqitha kukubona intlangano kaYehova imanyene ngolu hlobo kwaye inandipha inkqubela yokomoya eAlbania. Ndivakalelwa njengoSimon owalupheleyo waseYerusalem owathi ngaphambi kokuba afe wanikwa ilungelo elixabisekileyo lokubona uMesiya ekwakukudala ethenjisiwe. (Luka 2:30, 31) Ngoku xa ndibuzwa ukuba luluphi uhlobo lorhulumente endilukhethayo, ndithi: “Andikhethi buKomanisi kwaye ndingakhethi bukapitali. Enoba ngabantu okanye nguRhulumente abanini-mhlaba ayibalulekanga loo nto. Oorhulumente bakha iindlela, bafake umbane kwiidolophana ezikude, yaye bazisa ucwangco ngomlinganiselo othile. Noko ke, urhulumente kaYehova, uBukumkani bakhe basezulwini, ukuphela kwesicombululo seengxaki ezinzima zabantu iAlbania ejamelene nazo kunye nehlabathi liphela.”
Okwenziwa ngabakhonzi bakaThixo emhlabeni wonke ngokushumayela ngoBukumkani bukaThixo akungomsebenzi wakhe nawuphi na umntu. Lo ngumsebenzi kaThixo. Thina singabakhonzi bakhe. Nangona siye saba neengxaki ezininzi eAlbania yaye kangangethuba elide singanxibelelani nentlangano kaYehova ebonakalayo, akazange asilahle. Umoya wakhe ubusoloko ukho. Ebesikhokela kwinyathelo ngalinye esilithabathayo. Oku ndikubonile kubomi bam bonke.