Ubomi Obanelisa Ngokwenene Kwihlabathi Elitsha LikaThixo

UDAVID,a umyeni ongumKristu nonabantwana, wafudukela eUnited States, eqinisekile ukuba wenza into efanelekileyo. Nangona wayengathandi ukushiya intsapho yakhe ngasemva, wayeqinisekile ukuba uza kwenza iphile ubomi obubhetele xa enokuba nemali engakumbi. Ngoko xa wabizwa sisalamane sakhe eNew York waya waza kamsinya wafumana umsebenzi apho.

Noko ke, njengoko zaziqengqeleka iinyanga, izinto azizange zihambe ngendlela awayecinga ngayo uDavid. Ngoku wayengenaxesha lingako lokwenza izinto zokomoya. Kukho ixesha apho waphantse waphulukana nokholo lwakhe kuThixo. Xa wanikezela kuvavanyo lokuziphatha okubi wayiqonda ukuba mbi kwemeko yakhe ngokomoya. Ukunikela ingqalelo ekufuneni kwakhe izinto eziphathekayo kwakuya kumshenxisa kwezona zinto zazibalulekile kuye. Wayemele enze iinguqulelo ezithile.

NjengoDavid, nyaka ngamnye abaninzi bafuduka kumazwe abo ahlwempuzekileyo, benethemba lokuphucula imeko yabo yezoqoqosho. Noko ke, izihlandlo ezininzi bayafa ngokomoya. Bambi baye bazibuza, ‘Ngaba umKristu unokusukela ubutyebi aze kwangaxeshanye abe sisityebi kuThixo?’ Ababhali neenkokeli zonqulo ezaziwayo zithi oko kunokwenzeka. Kodwa njengokuba uDavid nabanye baye bafunda, kunokuba nzima gqitha ukuzenza zombini ezo zinto.—Luka 18:24.

Akukho Nto Imbi Emalini

Kakade ke, imali yenziwe ngumntu. Njengazo zonke ezinye izinto ezenziwe ngabantu, ayikho mbi ibe ingaphosakelanga. Eneneni, yinto nje ekwenza ufumane okuthile ngayo. Ngaloo ndlela, xa isetyenziswa kakuhle inokuba luncedo. Ngokomzekelo, iBhayibhile ithi ‘imali iyakhusela,’ ingakumbi kwiingxaki ezinxulumene nobuhlwempu. (INtshumayeli 7:12) Kodwa kubonakala ngathi, kwabanye “imali sisicombululo sazo zonke izinto.”—INtshumayeli 10:19, New International Version.

IZibhalo ziyabugxeka ubuvila zikhuthaza ukusebenza nzima. Simele sixhase iintsapho zethu, ibe ukuba sinokuthile okungakumbi, ‘sinento yokwabela lowo usweleyo.’ (Efese 4:28; 1 Timoti 5:8) Ngaphezu koko, kunokuba ikhuthaze ukuzibandeza ulonwabo, iBhayibhile isikhuthaza ukuba sizinandiphe izinto zethu. Sixelelwa ukuba ‘sithabathe isabelo sethu’ size sinandiphe iziqhamo zomsebenzi wethu. (INtshumayeli 5:18-20) NaseBhayibhileni sinemizekelo emininzi yamadoda namabhinqa athembekileyo awayezizityebi.

Amadoda Athembekileyo Awayezizityebi

UAbraham, umkhonzi kaThixo othembekileyo, wayenomhlambi omkhulu, isilivere negolide namakhulukhulu abakhonzi. (Genesis 12:5; 13:2, 6, 7) Ngokufanayo, uYobhi owayelilungisa, naye wayesesingawothiyo umlilo enemfuyo, abakhonzi, igolide nesilivere. (Yobhi 1:3; 42:11, 12) Nanamhlanje la madoda ebenokugqalwa njengezityebi, kodwa ayezizityebi nakuThixo.

Umpostile uPawulos ubiza uAbraham ngokuthi “nguyise wabo bonke abo banokholo.” UAbraham wayengelogqolo okanye ethanda ngokugqithiseleyo izinto zakhe. (Roma 4:11; Genesis 13:9; 18:1-8) Ngokufanayo, uThixo uchaza uYobhi ‘njengowayengenakusoleka ethe tye.’ (Yobhi 1:8) Wayesoloko ekulungele ukunceda amahlwempu nababandezelekileyo. (Yobhi 29:12-16) UAbraham noYobhi babekholose ngoThixo kungekhona ngobutyebi babo.—Genesis 14:22-24; Yobhi 1:21, 22; Roma 4:9-12.

Omnye umntu ongumzekelo nguKumkani uSolomon. Njengendlalifa kwitrone kaThixo eYerusalem, uSolomon wasikelelwa kungekhona ngobulumko obuvela kuThixo kuphela, kodwa nangentaphane yobutyebi nozuko. (1 Kumkani 3:4-14) Wayethembekile phantse ubomi bakhe bonke. Noko ke, akuba mdala, “intliziyo yakhe ayizange iphelele kuYehova.” (1 Kumkani 11:1-8) Eneneni, amava akhe abuhlungu abonisa eminye yemigibe yobutyebi. Makhe siqwalasele eminye embalwa.

Imigibe Yobutyebi

Eyona nto iyingozi kukuthanda imali nezinto enokuzithenga. Ubutyebi benza abanye babe nomnqweno onganelisekiyo. Ngaphambilana, uSolomon wakubona oku kusenzeka kwabanye. Wabhala: “Umthandi nje wesilivere akayi kwaneliswa yisilivere, nabani na othanda indyebo akaneliswa yingeniso. Kwanako oku kungamampunge.” (INtshumayeli 5:10) UYesu noPawulos kamva balumkisa amaKristu ngalo mgibe wokuthanda imali.—Marko 4:18, 19; 2 Timoti 3:2.

Xa imali isiba yeyona nto iphambili ebomini bethu kunokuba nje isincede sikwazi ukwenza izinto ezithile, siba zizisulu zazo zonke izilingo, kuquka ukuxoka, ubusela nobuqhetseba. UYudas Skariyoti, omnye wabapostile bakaKristu, wangcatsha inkosi yakhe ngeesilivere nje ezingama-30. (Marko 14:11; Yohane 12:6) Okubi nangakumbi, abanye baye banqula imali kunokuba banqule uThixo. (1 Timoti 6:10) Ngoko ke, amaKristu amele ahlale enenjongo nesizathu esifanelekileyo xa efuna imali engakumbi.—Hebhere 13:5.

Ukusukela ubutyebi kunokufaka ubani engozini engaqondanga. Okokuqala, ubutyebi obuninzi budla ngokwenza ubani azithembe. UYesu wabhekisela nakuko oku xa wayethetha ‘ngamandla akhohlisayo obutyebi.’ (Mateyu 13:22) Nombhali weBhayibhile uYakobi walumkisa amaKristu ukuba angamlibali uThixo kwanaxa eceba ezoshishino. (Yakobi 4:13-16) Ekubeni imali isenza sikwazi ukuzimela ngomlinganiselo othile, abo banayo, bahlala besengozini yokukholosa ngemali yabo kunokuba bakholose ngoThixo.—IMizekeliso 30:7-9; IZenzo 8:18-24.

Okwesibini, njengoko uDavid, okhankanywe ngaphambilana wafumanisayo, ukusukela ubutyebi kudla ngokutya ixesha elininzi namandla kabani nto leyo emenza aphambuke ngokuthe ngcembe ekusukeleni izinto zokomoya. (Luka 12:13-21) Abo bazizityebi, basoloko bejamelene nesilingo sokusebenzisa oko banako ngokuyintloko ekuzonwabiseni okanye kwizinto zobuqu.

Ngaba ukufa kukaSolomon ngokomoya ngandlel’ ithile kwabangelwa kukuvumela kwakhe ubomi obutofotofo benze amandla akhe engqiqo afiphale? (Luka 21:34) Wayewazi umthetho kaThixo ongqalileyo owalela ukutshata neentlanga zasemzini. Sekunjalo, ekugqibeleni waba nenkumbula yabafazi abamalunga newaka. (Duteronomi 7:3) Efuna ukukholisa abafazi bakhe basemzini, wabavumela ukuba baqhubeke benqula oothixo babo. Njengoko siye saphawula ngaphambilana, intliziyo kaSolomon yaya iphambuka kuYehova.

Ngokwenene, le mizekelo ingqina ukuba yinyaniso kwesiluleko sikaYesu esithi: “Aninakukhonza uThixo nobuTyebi.” (Mateyu 6:24) Noko ke, umKristu unokuhlangabezana njani ngempumelelo nocelomngeni lwezoqoqosho abajamelene nalo abaninzi? Okubaluleke ngakumbi, liliphi ithemba lobomi obubhetele obuzayo?

Liseza Ixesha Lokuba Nobutyebi Bokwenene

Ngokungafaniyo nosolusapho uAbraham noYobhi nohlanga lakwaSirayeli, abalandeli bakaYesu banothumo ‘lokwenza abafundi abantu beentlanga zonke.’ (Mateyu 28:19, 20) Ukuzalisekisa olo thumo kufuna ixesha nomgudu nto ezo ebezinokusetyenziswa kwizinto zobuqu. Ngoko ke, eyona nto enokusenza siphumelele, kukwenza oko uYesu awasixelela ukuba sikwenze esithi: “Qhubekani, ke ngoko, nifuna kuqala ubukumkani [bukaThixo] nobulungisa bakhe, yaye zonke ezinye izinto ziya kongezelelwa kuni.”—Mateyu 6:33.

Emva kokuba ephantse waphulukana nentsapho yakhe nolwalamano lwakhe noThixo, uDavid wada wabuyela kwindlela efanelekileyo. Njengoko uYesu wathembisayo, xa uDavid waphinda wenza eyona nto ibalulekileyo ebomini bakhe ukufundisisa iBhayibhile, umthandazo, nobulungiseleli, ezinye izinto zaphinda zema ngendlela. Ngokuthe ngcembe waphinda waba nolwalamano oluhle nomfazi wakhe nabantwana. Waphinda wonwaba waza waneliseka. Usasebenza nzima nangoku, kodwa akazange abe sisityebi. Noko ke, intlungu eyamehlelayo, yamfundisa isifundo.

UDavid akayiboni ibubulumko into yokufudukela kwakhe eUnited States, yaye uzimisele ukuba angaphindi avumele imali imlawule ekwenzeni izigqibo. Ngoku uyazi ukuba ezona zinto zibalulekileyo ebomini—intsapho ethandanayo, abahlobo abalungileyo nolwalamano noThixo—azinakuthengwa ngemali. (IMizekeliso 17:17; 24:27; Isaya 55:1, 2) Eneneni, ukuhlala uziphethe kakuhle yeyona nto ixabiseke ngaphezu kobutyebi. (IMizekeliso 19:1; 22:1) Ekunye nentsapho yakhe, uDavid uzimisele ukubeka izinto ezibalulekileyo kwindawo yokuqala.—Filipi 1:10.

Imigudu yabantu yokwakha ibutho labantu abazizityebi kwangaxeshanye babe nemilinganiselo efanelekileyo yokuziphatha ibisoloko isiwa phantsi. Noko ke, uThixo uthembisa ukuba kuBukumkani bakhe kuya kubakho intabalala yezinto eziphathekayo nezokomoya ukuze sonwabe. (INdumiso 72:16; Isaya 65:21-23) UYesu wafundisa ukuba ulonwabo lokwenene lufumaneka ngokuphaphela intswelo yethu yokomoya kuqala. (Mateyu 5:3) Ngoko enoba sizizityebi okanye singamahlwempu, ukubeka izinto zokomoya kwindawo yokuqala yeyona ndlela ebalaseleyo enokusinceda silungele ihlabathi elitsha likaThixo elikufuphi. (1 Timoti 6:17-19) Elo hlabathi liya kuba nabantu abazizityebi ngokwenene ngezinto eziphathekayo nangokomoya.

[Umbhalo osemazantsi]

[Imifanekiso ekwiphepha 5]

UYobhi wakholosa ngoThixo kungekhona ngobutyebi bakhe

[Imifanekiso ekwiphepha 7]

Ezona zinto zixabisekileyo ebomini azinakuthengwa ngemali