Indlela Oya Kuhlangulwa Ngayo Umhlaba
PHEZU kwalo nje ithemba elimfiliba ngokuphathelele imekobume yomhlaba, sinqwenela ukuba uhlangulwe kule meko. Kaloku umhlaba likhaya lethu—yaye sinethemba lokuba uya kuba likhaya labantwana bethu nelabantwana babo. Ngaba ikho into esinokuyenza ukuze elo themba liqine?
Inyaniso kukuba ngoxa inkoliso yabantu ixhalatyiswa yimekobume, abaninzi abayeki ukulahla inkunkuma esithubeni, emlanjeni, okanye bashiye izibane zikhanya ngokungeyomfuneko. Zonke ezi zinto zibonakala zingenamsebenzi, kodwa ukuba ngamnye kumawaka ezigidi zabantu abaphila emhlabeni ebewuphatha kakuhle, oko bekuya kwenza umahluko ophawulekayo. Izinto ezifana nokonga umbane, ukuqokelelwa kwezinto ezindala kwenziwe ngazo izinto eziza kusetyenziswa, nokulahla inkunkuma kwindawo efanelekileyo ziba negalelo ekuhlanguleni imekobume. Oko sikwenzayo kunokubonisa inkathalo esinayo ngomhlaba.
Noko ke, asinakukwazi ukulawula izinto ezenziwa yinkoliso yabanye abantu. Ngaba oku kuthetha ukuba aphelile amathemba?
Esona Sicombululo Sikufuphi
Amazwi kaThilo Bode wentlangano iGreenpeace acatshulwe kwiphephancwadi iTime, achaza oyena ndoqo wengxaki yemekobume, athi: “Eyona njongo yethu kukuba imizi-mveliso ingacingi nje ngendlela yokuvelisa izinto ezivelisayo nangendlela ezisetyenziswa ngayo kuphela. Ifanele icinge nangendlela elahlwa ngayo, apho iphelela khona loo mveliso.” Okubuhlungu kukuba, siyakwazi ukuvelisa izinto, sazi nendlela yokuzisebenzisa, kodwa asiyazi indlela yokuzilahla efanelekileyo. Kwezinye iimeko abantu abayazi indlela yokuzilahla ekhuselekileyo.
Abantu basikelwe umda koko banokukwenza, kodwa akunjalo ngoMdali womhlaba. Sebubonisile ubulumko bakhe obubalaseleyo kwindalo esiyibonayo emhlabeni. Uyayazi indlela efanelekileyo yokwenza izinto, yokuzisebenzisa nokuzilahla. Iinkqubo ezininzi azenzileyo zokwenza ezi zinto uzenze ngendlela yokuba zizisebenzele ngokwazo. Imbewu iyantshula, kukhule isityalo size sivelise isiqhamo. Emva koko siyafa—zonke izinto ezikuso zibuyela emhlabeni ngaphandle kokubangela umonakalo kwimekobume, yaye siphinda silungele ukusetyenziswa. Le yeyona ndlela yokulahla izinto ezingafunekiyo! Ayivelisi nkunkuma inetyhefu!
UMdali akananjongo yokuba umhlaba wonakale ube yindawo ezaliswe yinkunkuma engenakuhlalwa ngabantu. EBhayibhileni, kuIsaya 45:18, sifunda oku: “UYehova, . . . uThixo oyinyaniso, uMyili womhlaba noMenzi wawo, owuzinzise ngokuqinileyo, nongawudalelanga ilize, kodwa owawubumba ukuba umiwe.”
Ukuba uThixo wawudalela ukuba umiwe umhlaba, kutheni evumela ukuba ube kobu bugxwayiba nje? IBhayibhile ithi ekuqaleni umntu wabekwa eparadesi. Enyanisweni, uThixo wayenenjongo yokuba le Paradesi ifikelele eziphelweni zomhlaba yaye izaliswe ngabantu. (Genesis 1:28) Noko ke, kwabakho imvukelo. Indoda nebhinqa lokuqala abazange bafune ukuqhubeka bethobela ulawulo lukaThixo.
UThixo wavumela abantu ukuba bazilawule. Yimiphumo yoko kuzilawula le siyibonayo namhlanje, intlekele yodwa. Abantu baye babonisa phandle ukuba abanakukwazi ukucombulula iingxaki zabo. Asinakumbek’ ityala uThixo ngoko kwenzekileyo. IBhayibhile ichanile xa isithi ngabantu: “Bazonakalisile ngokwabo; abangobantwana bakhe, bazizisele isiphako ngokwabo. Basisizukulwana esigwenxa nesijijekileyo!”—Duteronomi 32:5.
Noko ke, uThixo akayibethi ngoyaba into yokonakaliswa komhlaba. Uza kuthabath’ inyathelo kwangexesha, ngaphambi kokuba umhlaba ube yindawo engenakumiwa ngabantu. Sikwazi njani oko? ISityhilelo 11:18 sithi: ‘Iintlanga zaqumba, nengqumbo yakho yeza, nexesha elimisiweyo lokonakalisa abo bawonakalisayo umhlaba.’ Kuya kuphela ukonakaliswa komhlaba.
Injongo kaThixo yantlandlolo yokuba umhlaba ube yiparadesi, iya kuzalisekiswa. Oku kuchazwe nguThixo. Ngokomzekelo, wathi: “Ilizwi lam eliphuma emlonyeni wam. . . aliyi kubuyela kum ngaphandle kwemiphumo, kodwa ngokuqinisekileyo liya kukwenza oko ndiyoliswa kuko.” (Isaya 55:11) Mhlawumbi uya kukunandipha ukufunda uIsaya isahluko 35, apho uThixo achaza indlela eya kuguqulwa ngayo imimandla eyonakeleyo ibe yimiyezo yezitiya namasimi anemveliso.
Nangoku, iindawo ekuye kwayekwa kuzo ukungcoliswa komoya, umhlaba uye wabonakalisa ukuba unamandla okuzihlaziya angummangaliso. UThixo wawudala ngaloo njongo. Ukuba kunokuyekwa ukungcoliswa komhlaba, izinto ezahlukahlukeneyo nezincinane eziphila emanzini nasemhlabeni zinokulungisa umonakalo omkhulu. Ukongezelela koko, sikholelwa ukuba xa uThixo engenelela yaye esalathisa izinto, le nkqubo yokuhlaziya iya kuphumelela ngakumbi. Unokunika abantu uqeqesho nolwalathiso olugqibeleleyo abangenalo ngoku.
Ngoko ke, kukho ithemba ngekamva lomhlaba. Izityalo nezilwanyana ziya kuhlangulwa. Akukho zilwanyana ziya kuba semngciphekweni wokuphela. Umoya esiwuphefumlayo namanzi aya kuhlaziywa kwakhona. Abantu abathobelayo baya kube bephila ukuze bazixhamle ezi zinto. Ngaba ungathanda ukukubona oko? Oko kunokwenzeka. Njani? IBhayibhile inikela iinkcukacha ngoko umele ukwenze. Kutheni ungahlolisisi iBhayibhile ukuze uzifumanele ngokwakho oko? Cela abapapashi beli phephancwadi bakunxibelelanise nomntu onokukunceda ukuze wenze oko. Kutheni uvumela ukuphoswa leli thuba lokufunda ngendlela onokuthi wena nentsapho yakho ninandiphe ubomi kwimekobume esemagqabini?