Imbono YeBhayibhile
Kutheni Kumele Kunyanyekelwe Imeko-bume Yomhlaba?
NGAPHEZU kwalo naliphi na ixesha embalini izinto ezenziwa ngabantu zinokonakalisa isijikelezi-langa sethu. Njengokuba izisongelo zezi ngxaki njengokufudumala komhlaba zixhalabisa ngakumbi, izazinzulu, oorhulumente namaqela akwimizi-mveliso athabath’ amanyathelo.
Ngaba mntu ngamnye unembopheleleko yokuncedisa ekunyamekeleni imeko-bume yomhlaba? Ukuba kunjalo, ukusa kuwuphi umlinganiselo? IBhayibhile inezizathu ezivakalayo zokuba kufuneke sinyamekele imeko-bume yomhlaba. Kwakhona ikwasinceda ukuba silungelelane kulo mba.
Ukuxhasa Injongo YoMdali Wethu
UYehova uThixo wadal’ umhlaba walikhaya elingumyezo. Wathi wonk’ umsebenzi wakhe ‘ulunge gqitha’ yaye wayalela abantu ukuba ‘bawulime [umhlaba] baze bawunyamekele.’ (Genesis 1:28, 31; 2:15) UThixo uvakalelwa njani ngendlela oyiyo umhlaba ngoku? Licacile elokuba ukhathazekile kakhulu ngendlela abantu abawuphethe ngayo umhlaba, kuba kwiSityhilelo 11:18 usixelela kusengaphambili ukuba uya ‘kubonakalisa abo bonakalisa umhlaba.’ Ngoko ke simele sizikhathaze ngoko kwenzeka emhlabeni.
IBhayibhile iyasiqinisekisa ukuba nawuphi na umonakalo owenziwe ngabantu uya kulungiswa xa uThixo ‘esenza zonke izinto zibe ntsha.’ (ISityhilelo 21:5) Noko ke, asimele siwuphathe nanjani na umhlaba kuba uThixo esithi uya kuwuhlaziya. Indlela esiwuphatha ngayo umhlaba ibalulekile! Sinokubonisa njani ukuba isijikelezi-langa sethu sisijonga ngendlela uThixo asijonga ngayo size sixhase injongo yakhe yokuba sibe yiparadesi?
Igalelo Lethu Ukugcina Umhlaba Ucocekile
Izinto eziqhelekileyo ezenziwa ngabantu ukusa kumlinganiselo othile ziyayonakalisa imeko-bume yomhlaba. Ngobulumko uYehova wadala umjikelo wemvelo womhlaba owawuza kucoca umoya, amanzi nomhlaba. (IMizekeliso 3:19) Indlela esiwuphatha ngayo umhlaba imele ihambelane nalo mjikelo. Ngenxa yoko kufuneka siqiniseke ukuba asinguye unobangela wengxaki yemeko-bume yomhlaba. Ukunyamekela imeko-bume yomhlaba kubonisa ukuba sithanda abamelwane bethu njengokuba sizithanda. (Marko 12:31) Makhe siqwalasele umzekelo obangel’ umdla wamaxesha eBhayibhile.
UThixo wayalela amaSirayeli ukuba aligqumelele ilindle “ngaphandle kwenkampu.” (Duteronomi 23:12, 13) Oku kwakugcina inkampu icocekile yaye ingenazintsholongwane. Ngokufanayo namhlanje, amaKristu okwenyaniso ayayichitha inkunkuma. Kufanelwe kulumkwe ngokukodwa xa kuchithwa izinto ezinetyhefu.
Izinto ezininzi ezilahlwayo zinokuphinda zisetyenziswe. Ukuba imithetho yasekuhlaleni igunyazisa ukuba izinto ziphindwe zisetyenziswe, ngokuthobela loo mthetho sibuyisela “izinto zikaKesare kuKesare.” (Mateyu 22:21) Ukuhlaziya into inokuba ngumgudu okhethekileyo kodwa oko kubonisa umnqweno wokufuna umhlaba ucoceke.
Ukulondoloza Ubuncwane Bomhlaba
Ukuze sanelise imfuno yethu ekukutya, ikhusi nepetroli ze siqhubeke siphila, sifanele sisebenzise ubuncwane bemvelo. Indlela esibusebenzisa ngayo obu buncwane ibonisa ukuba siyaqonda ukuba busisipho esivela kuThixo. Xa amaSirayeli ayebawel’ ukuty’ inyama entlango, uYehova wawanika izagwityi. Ukubawa kwawabangela ukuba asixhaphaze esi sipho nto leyo eyabangela uvuth’ umsindo kuYehova uThixo. (Numeri 11:31-33) UThixo akatshintshanga. Ngokuvumelana noko, amaKristu ayakuphepha ukonakalisa ubuncwane bemvelo ngokungeyomfuneko, nto leyo ebiya kuba ngumqondiso wokubawa.
Abanye basenokuvakalelwa ukuba banelungelo lokusebenzisa amandla ngendlela abafuna ngayo. Kodwa ubuncwane bomhlaba abufanele buchithwe kuba nje sinokubufikelela okanye bubuninzi. Emva kokuba uYesu ngokungummangaliso ondle isihlwele esikhulu wayalela ukuba iintlanzi nezonka eziseleyo zihlanganiswe. (Yohane 6:12) Wayeqiniseka ukuba akachithi ukutya okulungiselelwe nguYise.
Imigudu Yethu Mayibe Sengqiqweni
Suku ngalunye senza ukhetho oluchaphazela imeko-bume yomhlaba. Ngaba sifanele sizibaxe izinto, sizikhethe kwibutho labantu ukuze siphephe ukonakalisa imeko-bume yomhlaba? IBhayibhile ayikukhuthazi oko. Cinga ngomzekelo kaYesu. Ngoxa wayesemhlabeni waphil’ ubomi obuqhelekileyo obabumvulel’ ithuba lokuba aphumeze umsebenzi wokushumayela awayewabelwe nguThixo. (Luka 4:43) Ngaphezu koko, uYesu akazange afune ukubandakanyeka kwezopolitiko njengendlela yokucombulula iingxaki zabantu bexesha lakhe. Ngokucacileyo wathi: “Ubukumkani bam abuyonxalenye yeli hlabathi.”—Yohane 18:36.
Noko ke, kungaba kuhle ukuba singakhe siqwalasele imiphumo yokhetho lwethu kwizinto esizithengayo, esihamba ngazo nendlela esizonwabisa ngayo. Ngokomzekelo, abanye bakhetha ukuthenga izinto ezenziwe ngendlela yokuba zingonakalisi imeko-bume yomhlaba. Abanye bazama ukungabandakanyeki kwimisebenzi ebangela ukungcoliswa komhlaba.
Akuyomfuneko ukuba umntu anyanzelise iimbono zakhe kwabanye ngokuphathelele imeko-bume yomhlaba. Indlela esiyijonga ngayo imeko-bume yomhlaba ixhomekeke kumntu ngamnye. Phofu ke, mntu ngamnye uza kuphenduliswa ngezigqibo zakhe. Njengokuba iBhayibhile isitsho, “ngamnye uya kuthwala owakhe umthwalo.”—Galati 6:5.
UMdali usinike imbopheleleko yokuba sinyamekele umhlaba. Ukubonisa ukubaluleka kwesi sabelo nokuhlonela uThixo nendalo yakhe oko kufanele kusishukumisele ukuba sicinge nzulu, senze izigqibo ezixhaswa zizazela zethu ngendlela esiwuphatha ngayo umhlaba.
NGABA WAKHA WAZIBUZA?
◼ Ngaba ikho into eza kwenziwa nguThixo ukucombulula iingxaki zemeko-bume yomhlaba?—ISityhilelo 11:18.
◼ Yiyiphi imbopheleleko uThixo ayinike abantu ngokuphathelele umhlaba?—Genesis 1:28; 2:15.
◼ Nguwuphi umzekelo uYesu Kristu asimisele wona ukuphepha ukudlala ngokutya?—Yohane 6:12.