Indlela Abanye Abanokunceda Ngayo
MHLAWUMBI ukhona umntu omaziyo odandathekileyo okanye onesifo esiyibipolar. Ukuba kunjalo, unokumnceda njani? UD. J. Jaffe weNational Alliance for the Mentally Ill unikela eli cebiso: “Musa ukujonga umntu onesi sifo ngendlela osijonga ngayo sona; kunoko sithiye sona isifo kodwa mthande loo mntu unaso.”
Ibhinqa elinguSusanna labonakalisa umonde nothando komnye umntu. Lalinomhlobo owayenesifo esiyibipolar. USusanna uthi: “Kwakukho amaxesha awayengakwazi ukuba kunye nam.” Kunokuba amshiye umhlobo wakhe, uSusanna wenza uphando ukuze afunde ngesi sifo esiyibipolar. Uthi: “Ngoku ndiyaqonda indlela esi sifo sasiyichaphazele ngayo imeko yakhe.” USusanna uvakalelwa kukuba ukwenza umgudu wokuqonda lowo ugulayo kunokuba nemiphumo emihle. Uthi: “Kunokukunceda ukumthanda uze umxabise loo mntu ugulayo.”
Kubalulekile ukumxhasa ngentliziyo iphela lowo ugulayo ukuba ulilungu lentsapho. UMario, okhankanywe ngaphambilana kolu ngcelele lwamanqaku wakufunda kwasekuqaleni oku. Umfazi wakhe, uLucia, naye okhankanywe ngaphambilana, unebipolar. UMario uthi: “Ekuqaleni, ndancedwa kukuhamba nomfazi wam ukuya kwagqirha ndaza ndafunda ngesi sifo singaqhelekanga ukuze ndazi kakuhle oko sasijamelane nako. Kwakhona mna noLucia sathetha kunye saza saqhubeka sikwazi ukuhlangabezana nako nakuphi okuvelayo ngelo xesha.”
Inkxaso Evela Kwibandla LamaKristu
IBhayibhile ibongoza onke amaKristu ukuba ‘ayithuthuzele imiphefumlo edandathekileyo, axhase ababuthathaka, azeke kade umsindo kubo bonke.’ (1 Tesalonika 5:14) Unokukwenza njani oku? Okokuqala, kubalulekile ukuqonda umahluko phakathi kokugula kwengqondo nokugula kokomoya. Ngokomzekelo, umbhali weBhayibhile uYakobi wabonisa ukuba umthandazo unokumphilisa umntu ogulayo ngokomoya. (Yakobi 5:14, 15) Sekunjalo, uYesu wathi abo bagulayo emzimbeni bafuna ugqirha. (Mateyu 9:12) Kakade ke, kusoloko kuyinto efanelekileyo ukuthandaza kuYehova ngezinto ezisikhathazayo, kuquka nempilo yethu. (INdumiso 55:22; Filipi 4:6, 7) Kodwa iBhayibhile ayithi ukukhuthala kakhulu ngokomoya kuya kunceda iingxaki zempilo ngoku.
Ngoko ke, amaKristu aqondayo ayakuphepha ukuxelela abantu abadandathekileyo ukuba babekek’ ityala ngenxa yesifo sabo. Iintetho ezinjalo aziloncedo kuba ziyafana nezabo babesithi bathuthuzela uYobhi kodwa bexoka. (Yobhi 8:1-6) Inyaniso ikukuba kwiimeko ezininzi ukudandatheka akuyi kuba bhetele de kunyangwe ngugqirha. Oku kunjalo ingakumbi xa umntu edandatheke kakhulu, mhlawumbi efuna nokuzibulala. Ngamanye amaxesha, kubalulekile ukufumana uncedo kwingcali.
Sekunjalo, zininzi izinto amanye amaKristu anokuzenza ukuze anikele inkxaso. Kakade ke, kufuneka umonde. Ngokomzekelo, ezinye iinkalo zomsebenzi wamaKristu zinokubatyhafisa kakhulu abo banengxaki yeemvakalelo. UDiane onebipolar uthi: “Ndikufumanisa kunzima ukuba nenxaxheba kubulungiseleli. Kunzima ukuthetha nabanye ngeendaba ezilungileyo eziseBhayibhileni xa ndingonwabanga.”
Ukuze ubancede abantu abanezi zifo, zama ukuba novelwano. (1 Korinte 10:24; Filipi 2:4) Zama ukuzibona izinto ngendlela lowo ugulayo azibona ngayo kunendlela wena ozibona ngayo. Musa ukumthwalisa umthwalo loo mntu ngokulindela izinto kuye ngokungekho ngqiqweni. UCarl uthi: “Xa ndisamkelwa njengoko ndinjalo ngoku, ndiziva ndithandwa. Ngoncedo nangomonde lwabahlobo abadala, ndiye ndakwazi ukuba nolwalamano olusenyongweni noThixo yaye ndiye ndavuyiswa kukunceda nabanye benjenjalo.”
Ngokufumana uncedo, abo bagulayo banokufumana isiqabu koko kubakhathazayo. Cinga ngelinye ibhinqa elingumKristu uBrenda, naye onesifo esiyibipolar. Uthi: “Abahlobo bam ebandleni bebendixhasa gqitha yaye bendiqonda xa ndidakumbile, yaye babengathi ndibuthathaka ngokomoya. Kukho amaxesha endiye ndihambe nabo entsimini baze bandivumele ndiphulaphule nje okanye bandigcinele isitulo kwiHolo yoBukumkani ukuze ndikwazi ukufika xa wonke umntu sele ehleli phantsi.”
Kuye kwamnceda gqitha uCherie, okhankanywe kwinqaku elandulelayo, onengxaki yokudandatheka ukufumana uncedo kubadala abanothando nabanovelwano. Uthi: “Xa abadala bendixelela ukuba uYehova uyandithanda, bendifundela iindinyana kwiLizwi likaThixo, iBhayibhile, baze bathethe ngenjongo kaYehova yeparadesi enoxolo nempilo-ntle baze bathandaze kunye nam—kwanasemnxebeni—ndiziva ngathi kusuke umthwalo othile. Ndiyazi ukuba uYehova okanye abazalwana bam abandilahlanga, yaye oko kuyandikhuthaza.”
Alithandabuzeki elokuba ngokunikela inkxaso, amalungu entsapho nabahlobo banokuba nendima ebalulekileyo kwimpilo-ntle yalowo ugulayo. ULucia uthi: “Ndicinga ukuba ndiyakwazi ukubulawula ubomi bam ngoku. Mna nomyeni wam siye sasebenza nzima ukuze siqhubane noku sobabini, yaye izinto zibhetele nangakumbi kuthi ngoku.”
Ngoku abaninzi abanezifo zengqondo bayaqonda ukuba kuthabatha ixesha elide ukulwa nezi nkxwaleko zibuhlungu. Kodwa, iBhayibhile ithembisa ukuba kwihlabathi elitsha likaThixo, “akakho ummi wakhona oya kuthi: ‘Ndiyagula.’” (Isaya 33:24) Izifo ezibandezelayo nezikhathaza abantu abaninzi namhlanje ziya kudlula. Eneneni kuyavuyisa ukucinga ngesithembiso sikaThixo sehlabathi elitsha apho zonke izifo—kuquka nengxaki yeemvakalelo—ziya kuphela ngonaphakade. IBhayibhile ithi, ngelo xesha, akusayi kubakho kuzila nakukhala nantlungu.—ISityhilelo 21:4.
[Amagama acatshulweyo akwiphepha 12]
UYesu wathi abo bagulayo bafuna ugqirha.—MATEYU 9:12
[Amagama acatshulweyo akwiphepha 13]
IBhayibhile iyathembisa ukuba kwihlabathi likaThixo elitsha, “akakho ummi wakhona oya kuthi: ‘Ndiyagula.’”—ISAYA 33:24.