3 | Indlela Imizekelo EseBhayibhileni Enokunceda Ngayo

IBHAYIBHILE ITHETHA . . Ngamadoda nabafazi awayenokholo “njengathi.”—YAKOBI 5:17.

Ithetha Ntoni Loo Nto?

IBhayibhile igcwaliswe ngamabali amanyhani amadoda nabafazi ababeneemvakalelo ezininzi nezahlukeneyo njengathi. Njengoko sifunda amabali abo, sinokufumanisa ukuba omnye wabo uneemvakalelo ezifana nezethu.

Isinceda Njani Le Nto?

Sonke sifuna ukwazi ukuba abanye bayayiqonda indlela esivakalelwa ngayo. Kodwa le nto yenzeka nyhani xa sisokoliswa zizigulo eziphazamisa iimvakalelo. Xa sifunda iBhayibhile sifunda ngabanye ababecinga, nababevakalelwa njengathi. Le nto isenza sibone ukuba nabanye bakha baziva buhlungu njengathi, ize loo nto isenze singaziva sisodwa kakhulu.

IBhayibhile ithetha ngeemvakalelo zabantu abaninzi ababeziva bengeloncedo nababexhalabile. Ngaba wakha wavakalelwa ukuba ‘ayikho into oyiphilelayo’? UMoses, uEliya noDavide nabo bakhe bavakalelwa ngolohlobo.—Numeri 11:14; 1 Kumkani 19:4; INdumiso 55:4.
IBhayibhile isixelela ngomfazi “owayekhathazeke kakhulu” onguHana, kuba wayengafumani bantwana ibe wayechukelwa ngumfazi wesibini.—1 Samuweli 1:6, 10.
IBhayibhile isixelela ngendoda enguYobhi, esinokuba nezinto esifana ngazo nayo, nangona ukholo lwakhe lwaluqinile wayeziva ebuhlungu kakhulu wade wathi: “Ndiyabenyanya ubomi bam; andisafuni kuphila.”—Yobhi 7:16.

Xa sifunda ngabantu ekuthethwa ngabo eBhayibhileni abakwaziyo ukumelana neengcinga eziyingozi nathi sinokufumana amandla okwazi ukumelana neengxaki esinazo.

Indlela Enceda Ngayo IBhayibhile-UKevin

Indlela Endichaphazela Ngayo IBipolar

“Xa ndandisondele kwiminyaka eyi-50 ndaya ndafunyaniswa ndinebipolar esisifo esibangela iimvakalelo zam zitshintshe ngokukhawuleza. Kubakho amaxesha apho ndiye ndizive ukuba ndingakwazi ukulungisa zonke iingxaki ezikhoyo ebomini bam. Kodwa ngamanye amaxesha ndisuke ndingayazi nento endiyiphilelayo.”

Indlela Endinceda Ngayo IBhayibhile

“Umntu endizibona ndifana naye eBhayibhileni ngumpostile uPetros. Wayesenza iimpazamo ezimenza avakalelwe kukuba akukho yakhe. Kodwa endaweni yokuhlala ecinga ngolohlobo, uPetros wayehlala nabahlobo ayaziyo ukuba bamkhathalele. Xa kukho imini apho iimvakalelo zam zitshintshatshintsha kakhulu, izinto endingazenzi kakuhle ziye zindikhathaze kakhulu ndize nam ndizive ngathi akukho yam. NjengoPetros, ndiye ndizame ukusondela kubahlobo bam abafuna ukundinceda ndikwazi ukuqhubeka nobomi.

“Omnye umntu ekuthethwa ngaye eBhayibhileni oye andithuthuzele kakhulu nguKumkani uDavide. Amaxesha amaninzi wayeziva ebuhlungu kakhulu ngemeko yakhe yaye ezisola ngeempazamo awazenzayo. Imeko yakhe iyafana neyam kuba ngamanye amaxesha ndenza okanye ndithethe izinto endizisolayo ngazo. Amazwi kaDavide akwiNdumiso 51 ayandikhuthaza. Kuvesi 3, uDavide uthi: ‘Kuba ndizazi kakuhle iziphoso zam, nesono sam sisoloko siphambi kwam.’ Le vesi iyichaza kakuhle indlela endiye ndivakalelelwe ngayo xa ndikhathazeke kakhulu, kuba ngamanye amaxesha kuye kube nzima ukuba ndicinge izinto ezintle ngam. Ndikhe ndizive ngendlela efanayo noDavide xa wathi kuvesi 10: ‘Owu yhini Thixo, dala ngaphakathi kum intliziyo esulungekileyo, uze undifake umoya omtsha, ongagungqiyo. Nam ndiye ndicele into efanayo kuThixo ukuba andincede ndikwazi ukuzijonga ngendlela eyahlukileyo. Okokugqibela, uvesi 17 uyandithuthuzela. Uthi: ‘Owu Thixo, wena awuzukuyinikela umva intliziyo eyaphukileyo netyumkileyo.’ Le vesi iyandiqinisekisa ukuba uThixo uyandithanda.

“Xa ndijonga imizekelo eseBhayibhileni nezinto uThixo andinika zona ngoku, ithemba lam ngekamva liyaqina. Izinto ezithenjiswa yiBhayibhile ndiye ndizibone izizinto ezinokwenzeka ibe loo nto iye indincede ndikwazi ukuqhubela phambili.”