Ukholo Lwentsapho Ejamelene Nobunzima
UINDIA, intombazana entle eneminyaka esithoba ubudala yaseWisconsin, eUnited States uyazi kakuhle le nto kuthiwa kukugula. Eneneni, sele efumene utyando olukhulu izihlandlo ezithathu nentlaninge yolunye unyango kuzanywa ukusindisa ubomi bakhe. Unina uLori uthi: “Kangangeminyaka emithandathu, uIndia ebephila kumagumbi onyango olungxamisekileyo, ehlala esibhedlele yaye equqa ebuyelela kugqirha.”
UIndia waqala ukugula xa wayeneenyanga ezili-18 ubudala. Waqala ngokuba neempawu ezingaqhelekanga, wahanjiswa sisisu into engapheliyo, wanefiva, wadumba isisu, yaye waphela waba ngamathambo. Wayeqaqanjelwa nasisisu. Kangangeminyaka emibini, rhoqo ebusuku, uIndia wam wayevuka akhale, ancwine, maxa wambi agcume ziintlungu.
Ngoxa oogqirha babesafunisisa eyona nto agula yiyo, uIndia wayengcungcutheka ngendlela engathethekiyo. ULori uthi: “Usana lwethu lwalusifa yindlala.” UMark uyise kaIndia wongezelela athi: “Isithuba esingaphezu konyaka sabukela intombi yethu iphela ngokuphela singayazi into emasiyenze. Ndikhumbula siphelelwe ngamathemba ngobunye ubusuku njengoko sinoLori sasithetha ngomngcwabo kaIndia, ngelo xesha esasicinga ukuba uza kufa nakanjani na.”
Ekugqibeleni, kwafunyaniswa ukuba uIndia uneulcerative colitis—isifo esidla inwebu yethumbu elikhulu. Kwakhona wayenesifo isclerosing cholangitis, esonakalisa imithambo ehambisa inyongo esibindini. Ezi zigulo zazinyangeka. Noko ke, kwakuza kufuneka utyando, yaye ukuze kunyangwe iulcerative colitis, kwakuza kufuneka kusetyenziswe amayeza athile. Kuzo zombini ezi meko kwakufuneka asoloko ephantsi kweliso yaye kubekho umntu oza kumnyamekela ngoxa echacha.
Ngoku sekuphele iminyaka esixhenxe kususela oko uIndia waqalisa ukugula. Ngenxa yoncedo loogqirha abanenkathalo, ngoku uchacha kakuhle gqitha. NjengamaNgqina kaYehova, uMark noLori bavakalelwa ukuba ukukholelwa kwabo kwiLizwi likaThixo—ngokukhethekileyo oko likutshoyo ngokugula, ukufa nethemba lovuko kwixa elizayo—kuye kwabanceda bakwazi ukunyamezela. Kuye kwanjalo nakuIndia. ULori uthi: “UIndia ebesoloko encokola nje ngokukhululekileyo ngethemba lovuko njengoko lichazwa yiBhayibhile. Liyinto yokwenene kuye.”
Kwesinye isihlandlo, ngoxa uIndia wayekwigumbi lokudlala esibhedlele wadibana nentombazana eselula eyayinodade wayo oneleukemia. ULori uthi: “Le ntombazana yaxelela uIndia ukuba yoyikela ukuba udadewabo uza kufa. UIndia wandula wayixelela oko iBhayibhile ikutshoyo ngokufa nokuba yena akakoyiki ukufa. Kusuku olulandelayo unina waloo ntombazana weza kum enemibuzo ethile. Wayemangaliswe yinto yokuba uIndia ekwazi ukuthetha ngokukhululekileyo ngezinto ezifana nokufa.”
UMark noLori bavakalelwa kukuba imithandazo yamanye amakholwa iye yabaxhasa ngeyona ndlela. UMark uthi: “Ngaphambili, xa ndixelela abantu ukuba ndiza kubakhankanya kwimithandazo yam okanye xa ndithandaza kunye nabo, ndandidla ngokunqwenela kuthi kanti bekukho nto engakumbi endinokubenzela yona. Ngoku ndiyayiqonda indlela ebaluleke ngayo loo mithandazo. Umthandazo yeyona nto ibalulekileyo abantu ababenokusenzela yona ngoxa sasijamelene nobunzima. Abanjani bona ukuba nothando abazalwana esinabo!”
UMark uvakalelwa nokuba ukugula kukaIndia kuye kwabanceda baqonda ezona zinto ziza kuqala kubomi babo. Uthi: “Indlela esizijonga ngayo izinto eziphathekayo itshintshe ngokupheleleyo. Hayi indlela ezibonakala zingabalulekanga ngayo xa umntwana wakho egula! Ezona zinto bezibalulekile—nezisabalulekileyo—bubuhlobo bethu noYehova uThixo nabazalwana bethu abanothando.”
UMark noLori kunye noIndia nabantwana bakowabo bakhangele phambili kwixesha elachazwa kwangaphambili ngumprofeti uIsaya xa kuya kube ‘kungekho mmi oya kuthi: “Ndiyagula.”’—Isaya 33:24; ISityhilelo 21:4.
[Umfanekiso okwiphepha 30]
UIndia Erickson
[Umfanekiso okwiphepha 31]
Isibhedlele Sabantwana SaseSan Diego
[Umfanekiso okwiphepha 31]
UIndia nentsapho yakowabo