Xa Umntu Exhalabele Inkangeleko Yakhe Ngokugqithiseleyo
XA SIZIJONGA esipilini, siye sibone iindawana ezifuna ukulungiswa. Ngoko siye silungise impahla esiyinxibileyo okanye iinwele okanye siqabe izithambiso zobuso emva koko siqhubeke nemisebenzi yosuku. Leyo yinto eqhelekileyo nefanelekileyo. Kodwa abanye abantu bazixhalabisa gqitha ngenkangeleko yabo yaye oko kuba ngunozala woko oogqirha bakugqala njengesifo.
IThe Merck Manual of Diagnosis and Therapy ithi esi sifo “kukuzixhalabisa ngokugqithiseleyo ngesiphako umntu anaso ize loo nto iphazamise unxulumano lwakhe nabanye abantu, umsebenzi wempangelo okanye ezinye izinto ezibalulekileyo.”a Kuba abantu abanesi sifo beye bacinge ukuba banesiphako esithile okanye babaxe isiphako nje esingenamsebenzi abanaso, indlela abazijonga ngayo idla ngokubizwa ngokuba bububi obucingelwayo.
UNjingalwazi J. Kevin Thompson weUniversity of South Florida, yaseUnited States, uthi kunokwenzeka ukuba esi sifo sinqabile, “kubantu ngokubanzi, mhlawumbi sichaphazela isi-1.0-2.0% yaye kubantu abasele befumana unyango lwezigulo zengqondo sichaphazela i-10-15%.” Noko ke, wongezelela athi: “Abanye abaphandi bakholelwa ukuba abantu abaphethwe sesi sifo bayanda, njengoko iindlela zokuxilonga zisiya ziphucuka nabantu besiya bezikhathaza ngakumbi ngenkangeleko yabo.” Nangona esi sifo sinokuchaphazela abantu enoba badala kangakanani, sidla ngokuqala xa umntu ekwishumi elivisayo. Kubantu abadala, kubonakala ngathi sihlasela amadoda namabhinqa ngokulinganayo. Sahlukile kwizifo zokutya ngendlela engalungelelananga, kuba zona zixhaphake kakhulu kumabhinqa.
Ngenxa yokuba abantu abanesi sifo bekhathazeka ngokugqithiseleyo ngenkangeleko yabo badla ngokusoloko bethanda ukuzijonga esipilini, yaye kwezinye iimeko baba ngoonkom’ idla yodwa. Okubi nangakumbi kukuba “ngenxa yokunxunguphala nokuphazamiseka kwabo emsebenzini, abantu abanesi sifo kuye kufuneke balaliswe esibhedlele ngokuphindaphindiweyo yaye basenokude bazame nokuzibulala,” itsho njalo iMerck Manual. Akumangalisi ke ngoko ukuba abanye babo beye bafune ukwenziwa utyando ukuze kuphuculwe inkangeleko yabo. UGqr. Katharine Phillips, obhale incwadi ethetha ngesi sifo uthi: “Ndidla ngokucebisa ukuba bangalwenzi utyando.” Uyacacisa: “Utyando alunakujikwa yaye inkoliso yabantu abanesi sifo idla ngokuvakalelwa kukuba utyando aluncedanga nganto.”b
Maxa wambi, abantu abanesi sifo bayakhawuleza ukubonakala. IGeorge Street Journalc ichaza ngenye inkwenkwana eneminyaka emithandathu “eyayicinga ukuba amazinyo ayo atyheli, isisu sayo ‘sikhulu’ yaye iinwele zayo zimbi. Abanye abantu babengaziboni zonke ezo ‘ziphako.’ Yayidla ngokuchitha malunga neyure ntsasa nganye ikama iinwele zayo, yaye xa ‘zingakameki’ yayidla ngokufaka intloko yayo emanzini iphinde izikame yaye loo nto yayibangela ukuba ifike kade esikolweni.” Ngenye imini yafika kwagqirha yaza yaguqa ukuze izibuke kwinkcenkce emenyezelayo ekwindawo yokungqiyama esitulweni.
Musa Ukuvumela Ihlabathi Lilawule Isimo Sengqondo Sakho
Abantu basoloko beboniswa imifanekiso yomzimba omhle kumaphephancwadi amenyezelayo, kumaphephandaba nakwizibhengezo zentengiso ezikumabonwakude. Abo benza ezi zibhengezo baqiqa ngale ndlela: Bonisa abantu umfanekiso womzimba omhle yaye baya kuhlawula nokuba yimalini na ukuze bazenze bakhangeleke njengaloo mntu usemfanekisweni. Ngaphezu koko, ingcinezelo yoontanga nokugxekwa ngamalungu entsapho okanye abahlobo kudla ngokubangela abanye abantu babe nembono engalungelelananga ngenkangeleko yabo.d Kakade ke, ukuba nembono engalungelelananga kwahluke gqitha ekuzixhalabiseni ngokugqithiseleyo ngenkangeleko okudla ngokude kuchaphazele nengqondo.
Akufanelekanga yaye akuyonyaniso ukucinga ukuba xa ungekho mhle abanye abantu abayi kuba namdla kuwe. Abantu abadli ngokukhetha abahlobo ngenxa yenkangeleko yabo. Liyinyaniso elokuba ekuqaleni umntu usenokutsalwa yinkangeleko kodwa eyona nto iqinisa ubuhlobo, bubuntu nemilinganiselo yokuziphatha. Mntu ngamnye ufana nencwadi ngandlel’ ithile—isenokuba noqweqwe olunomtsalane kodwa ukuba oko ikuquletheyo akuniki mdla umntu ukhawuleza ayeke ukuyifunda. Noko ke ukuba incwadi ibangel’ umdla, abantu baya kuyifunda bangayeki, enoba iqweqwe layo linjani na. Ngoko kutheni unganikeli ingqalelo kwiimpawu zakho zobuqu? ILizwi likaThixo, iBhayibhile likhuthaza ukuba wenjenjalo.—IMizekeliso 11:22; Kolose 3:8; 1 Petros 3:3, 4.
Yaye yinyaniso engenakuphikwa ukuba njengoko sikhula, inkangeleko yethu iyatshintsha. Ukuba izinto ezinjengobomi, ubuhlobo nolonwabo bezixhomekeke kubuhle bobutsha, ikamva lethu sonke beliya kuba mfiliba! Ukanti sinokuba kwimeko eyahluke kakhulu kuleyo. Kunokwenzeka njani oko?
Ubuhle Obuya Kuhlala Buhleli
IMizekeliso 16:31 ithi: “Isithsaba sokuhomba zizimvi xa sifunyanwa endleleni yobulungisa.” KuYehova uThixo—nakubo bonke abo banembono efana neyakhe—abantu abaluphalela enkonzweni kaThixo abayeki ukuba nomtsalane. Eneneni, ngenxa yenzondelelo nozinikelo lwabo lobuthixo, xa besiba nezimvi bafaniswa nomntu othweswe isithsaba. Sifanele sibathande size sibahlonele ngokunzulu abantu abaxabiseke ngolo hlobo.—Levitikus 19:32.
Ngaphezu koko, kwihlabathi elitsha alithembisileyo, uYehova uya kuyishenxisa imiphumo yesono kubo bonke abanyanisekileyo, abadala nabancinane. Yonke imihla baya kubona yaye beve umahluko kwimizimba yabo de ekugqibeleni bafezeke ngokupheleleyo. (Yobhi 33:25; ISityhilelo 21:3, 4) Hayi indlela elibangel’ imincili ngayo elo themba! Ngaba ungathanda ukuba phakathi kwabo? Ukuba kunjalo, zabalazela ukunikel’ ingqalelo kubuhle obubalulekileyo, ungavumeli isimo sengqondo sakho silawulwe kukucinga kweli hlabathi okungenangqondo nokuzaliswe yinkohlakalo. Ngokwenjenjalo, uya konwaba ngakumbi yaye uya kuba ngoyena mntu unomtsalane.—IMizekeliso 31:30.
[Imibhalo esemazantsi]
a IThe Medical Journal of Australia ithi “ukuzixhalabisa ngokugqithiseleyo ngenkangeleko sesinye sezifo eziqhelekileyo zengqondo.” Ezinye zazo kukudandatheka, ukuba likhoboka lento ethile nezifo zokutya ngendlela engalungelelananga njengeso sibizwa ngokuba yi-anorexia nervosa. Ngenxa yoko, kunokuba nzima ukuba esi sifo sibonwe.
b Nceda ubone inqaku elithi “Abantu Abaselula Bayabuza . . . Ngaba Ndifanele Ndenze Utyando Lokuphucula Inkangeleko Yam?” kwinkupho yalo lindixesha, kaSeptemba 8, 2002. Kakade ke, umntu ogula ngengqondo kusenokufuneka afune uncedo lwengcali yezigulo zengqondo.
c Ulindixesha weBrown University, eRhode Island, eUnited States.
d Ukuze ufumane inkcazelo eyongezelelekileyo, nceda ufunde isahluko esithi “Ibaluleke Kangakanani Inkangeleko?” kwincwadi ethi Imibuzo Yabantu Abaselula—Iimpendulo Eziluncedo, epapashwe ngamaNgqina kaYehova.