Sidalelwe Ukuba Sifunde Ngonaphakade
“Mntu ngamnye unengqondo enamandla amangalisayo yaye njengoko sisiya sifunda ngayo, sifumanisa ukuba amandla ayo akasikelwanga mda.”—UTONY BUZAN NOTERENCE DIXON, ABABHALI BENZULULWAZI.
INGQONDO yomntu inokufunda izinto ezininzi kangakanani? Abaphengululi abakakwazi nanamhlanje ukuwuphendula loo mbuzo. Kwincwadi ethi The Brain Book, uPeter Russell uthi: “Okukhona kuye kufundwa ngengqondo yomntu, kokukhona iye icaca into yokuba zininzi izinto enokuzenza kunokuba bekucingwa ngaphambili.”
Ngokomzekelo, sinokukwazi ukukhumbula izinto ezininzi. Lo kaRussell uthi: “Ingqondo ayifani novimba ozalayo ekuhambeni kwexesha, ifana namasebe omthi ezifika zihlale kuwo izinto esizikhumbulayo. Nto nganye oyikhumbulayo ihleli kwisebe layo yaye izinto ezintsha zifika zihlale kwelo sebe. Zanda ngaloo ndlela izinto engqondweni yethu. Ngokuya usazi izinto ezininzi, ingqondo yakho iyaphangalala.” Oku kusibuyisela kumbuzo esikhe sawubuza ngaphambili, Kutheni ingqondo yomntu ikwazi ukugcina izinto ezininzi kangaka?
Imfundiso yendaleko ayinako ukuwuphendula ngokusengqiqweni lo mbuzo. Imfundiso yendaleko yokuba esiphilayo sesinamandla yenza ukuba abantu abaqiqayo bangasazi isizathu sokuba ingqondo yomntu ikwazi ukufunda izinto ezininzi ngolu hlobo. Ngokomzekelo, ubuya kuyifunela ntoni ilori enkulu ukuba ubuza kukha isanti elingana nomhlakulo?
Noko ke, iBhayibhile, inikela impendulo elula esengqiqweni. Okokuqala, isixelela ukuba abazali bethu bokuqala—uAdam noEva—babenziwe ngomfanekiso kaThixo, bekwazi ukubonakalisa iimpawu zikaThixo ezimangalisayo. Okwesibini, isixelela ukuba babedalelwe ukuphila—baze bafunde—ngonaphakade. (Genesis 1:27; 2:16, 17) Ingqondo yomntu ibonisa ukuba yayidalwe ngaloo njongo nguThixo nangona ngoku singabantu abangafezekanga ngenxa yesono esichaphazela lonke uluntu.—Roma 5:12.
Kodwa injongo kaThixo yokuba umhlaba ube yiParadesi enabantu abafezekileyo abahlonela uThixo iza kuzaliseka. Eneneni, uYehova wanikela ngoNyana okuphela kwamzeleyo, uYesu Kristu ukuze ngedini lakhe lentlawulelo sizuze ubomi obungunaphakade.—Mateyu 20:28; Yohane 3:16.
Eyona Mfundo Ihlaziya Ingqondo
Kwakhona, uYehova usinike iLizwi lakhe eliphefumlelweyo, iBhayibhile Engcwele. (2 Timoti 3:16; 2 Petros 1:21) Ekubeni le ncwadi iphefumlelwe ngomoya oyingcwele, asikokuzibaxa izinto ukuthi iqulethe eyona mfundo yokomoya ihlaziya ingqondo. (INdumiso 19:7-10) Eneneni noYesu wathi: “Akaphili ngasonka sodwa umntu, uphila ngamazwi onke aphuma emlonyeni kaYehova.”—Mateyu 4:4.
Ngoko, enoba uselula okanye ukhulile ngeminyaka, kutheni ungazibekeli ixesha nje elincinane uze ufunde ‘amazwi’ aphuma emlonyeni kaThixo suku ngalunye? Abo bakwenzayo oku baze bakusebenzise oko bakufundayo baya kungenelwa ngoku nakwixa elizayo. Ewe, banokuba nethemba lokuphila baze bafunde ngonaphakade, kanye njengokuba wayecebile uThixo. Elinjani lona ithemba!—INtshumayeli 3:11; Yohane 17:3.
[Umfanekiso okwiphepha 27]
Ingqondo yethu ibonisa ukuba injongo kaThixo yayikukuba abantu bafunde ngonaphakade
[Imifanekiso ekwiphepha 28]
IBhayibhile iqulethe eyona mfundo ihlaziya ingqondo