Uhlobo Lotata Olufunwa Ngabantwana

A BANTWANA bafuna utata obathandayo, osoloko ekulungele ukubaxhasa, owenza konke okusemandleni ukubanceda bakhule babe ngabantu abakwaziyo ukusingatha iimbopheleleko nabanokuthenjwa. Kodwa abantu abaninzi abazikhathazi ngohlobo lotata olufunwa ngabantwana.

Ewe, ngoomama abazala abantwana yaye ibaluleke gqitha indima kamama onothando. Ibonisa ukuba nendima katata ibalulekile, iThe Wilson Quarterly yathi: “Ukusilela kootata ukudlala indima yabo ngoyena nobangela wokwanda kweengxaki ezithwaxa iMerika”—mhlawumbi nehlabathi ngokubanzi.

Iphephandaba laseBrazil iJornal da Tarde lapapasha iingxelo zophando ezabonisa ukuba iingxaki ezininzi zokungakwazi ukuziphatha kolutsha—njengokuba nogonyamelo, ukungeva, ukufumana amanqaku aphantsi esikolweni nokungakhathali—zidla “ngokubangelwa kukungabikho kotata.” Incwadi yaseItali ethi Gli imperfetti genitori (Abazali Abangafezekanga) ebhalwe nguMarcello Bernardi igxininisa ukuba ukuze abantwana baphumelele, kufuneka bakhuliswe ngabazali ababini.

Ubomi Bentsapho Bunokuphuculwa

Kwanokuba ukungakhathali kukatata kuye kwanegalelo kwiingxaki zentsapho okanye kuye kwangunobangela wazo, oko akuthethi kuthi izinto azinakulungiswa buze buphuculwe ubomi bentsapho. Njani? Kufuneka enze ntoni utata?

Ngokucacileyo, abantwana kufuneka bakhulele kwintsapho elungeleleneyo enentloko-ntsapho ebakhathaleleyo. Xa loo ntswelo inganeliswa, njengoko kudla ngokuba njalo namhlanje, abantwana bachaphazeleka kabuhlungu. Sekunjalo, le meko inokulungiswa, enoba ukho utata okanye akakho. KwiNdumiso 68:5 iBhayibhile ithi: ‘Uyise wamakhwenkwe angenayise nguThixo endaweni yakhe yokuhlala engcwele.’a

Indlela Yokufumana Uncedo

Ubungqina bokuba uncedo lukaThixo lubalulekile ukuze intsapho iphumelele nokuba luyafumaneka bunokubonwa kwimeko echazwa nguLidia, intwazana yasePoland ekhankanywe kwinqaku elingaphambili. Babunjani ubomi bentsapho yakowabo? Le ntsapho yalufumana njani uncedo lukaThixo?

UFranciszek, uyise kaLidia, uyavuma ukuba ngoxa babesebancinane abantwana bakhe, wayengayikhathalele intsapho yakhe, kanye njengokuba itshilo intombi yakhe. Uthi: “Ndandingazikhathazi ngoko bakwenzayo abantwana bethu. Ndandingalubonisi uthando yaye kwakungekho buhlobo phakathi kwam nabo.” Ngenxa yoko, wayengazi ukuba xa wayene-14 leminyaka ubudala, uLidia nomntakwabo nodadewabo omncinane babehamba imijuxuzo, betshaya, besela yaye behamba besilwa.

Ekugqibeleni, uFranciszek wayibona ingxaki ababezifaka kuyo abantwana bakhe, yaye othukile wathabatha amanyathelo okulungisa loo meko. Uthi: “Ndathandaza kuThixo ndaceIa uncedo.” Okumangalisayo kukuba, ngokukhawuleza emva koko amaNgqina kaYehova afika kwikhaya lakhe yaye yena nomfazi wakhe bavuma ukuqhutyelwa isifundo seBhayibhile. Ekuhambeni kwexesha, aba bazali baqalisa ukusebenzisa izinto ababezifunda kubomi babo. Oku kwabachaphazela njani abantwana babo?

UFranciszek uthi: “Baphawula ukuba ndiyekile ukusela yaye ndingutata obhetele. Bafuna ukwazi okungakumbi ngamaNgqina kaYehova. Ukanti nabo baqalisa ukufunda iBhayibhile baza bayeka ukunxulumana nabantu abenza izinto ezimbi.” Unyana wakhe uRafał uthi ngoyise: “Ndaqalisa ukumthanda njengomhlobo.” Wongezelela ngelithi: “Ndaphelelwa ngumdla kwiqela lemiguvela endandizibandakanye nalo. Saxakeka zizinto zokomoya.”

Ngoku uFranciszek ngumdala kwibandla lamaKristu lamaNgqina kaYehova yaye usoloko ebandakanyekile kwimicimbi yentsapho yakhe ekulungele nokunceda ilungu lentsapho ngalinye ukuba lenze inkqubela ngokomoya. Umfazi wakhe noLidia bangoovulindlela, abalungiseleli bexesha elizeleyo. URafał nodadewabo omncinane uSylwia baba nenxaxheba ngokuzeleyo kwisifundo seBhayibhile nakwiintlanganiso zamaKristu yaye baxelela abanye ngeenkolelo zabo.

Waphila Ngokuvisisana Nemfundiso Yakhe

Kwakhona, makhe sihlolisise oko kwenzeka kuLuis, uyise kaMacarena. Khumbula ukuba le yintwazana yaseSpeyin eneminyaka engama-21 ubudala ecatshulwe kwinqaku lokuqala. ULuis walandela emanyathelweni kayise owayelikhoboka lotywala. Njengoko etshilo uMacarena, wayedla ngokuhamba nabahlobo bakhe kangangeentsuku. Ngapha koko, wayemphethe okwekhoboka umfazi wakhe, engamxabisanga. Umtshato wabo wawusele usecicini lokuqhawuka yaye le meko yamnxunguphalisa uMacarena nabantwana bakowabo abancinane.

Noko ke, ekuhambeni kwexesha, uLuis wavuma ukufunda iBhayibhile namaNgqina kaYehova. Uthi: “Ndaqalisa ukuchitha ixesha nomfazi nabantwana bam. Sasincokola, sitye kunye size sifundisise iBhayibhile njengentsapho. Sasincedisana nangomsebenzi wasendlwini yaye sizihlaziya kunye.” UMacarena uthi: “Ndatsho ndaziva ndinotata onobubele oyikhathaleleyo intsapho yakhe.”

Okubalulekileyo kukuba uLuis akazange nje akhuthaze intsapho yakhe ukuba ikhonze uThixo, kodwa naye wenza ngokuvisisana nemfundiso yakhe. UMacarena uthi uyise “Wancama ishishini elalisiza kakuhle kuba lalisidla ixesha lakhe elininzi yaye wayefuna ukunikela ingqalelo engakumbi kwimicimbi yentsapho yakhe.” Oku kwaba nemiphumo emihle kakhulu. “Umzekelo wakhe wandifundisa indlela yokugcina iliso lam lingenakumbi nokubeka izinto zokomoya kwindawo yokuqala,” utsho njalo uMacarena. Ngoku le ntwazana inguvulindlela yaye unina nabantwana abaza emva kwayo ngamalungu akhutheleyo ebandla lamaKristu.

Isigqibo Esenziwa Ngumalathisi-jikelele Wenkampani Yoololiwe

Ngokucacileyo, abantwana bafuna utata oza kucinga ngempilo-ntle yabo xa esenza izigqibo. Unyana okwishumi elivisayo kaTakeshi Tamura, umalathisi-jikelele waseJapan okhankanywe kwinqaku lokuqala wazibandakanya nabahlobo ababesenza izinto ezimbi yaye kwakubonakala ukuba uza kungena kwenkulu yona ingxaki. Oku kwenzeka ngowe-1986 yaye ngaloo nyaka, uTakeshi wagqiba kwelokuba arhoxe kwisikhundla sakhe esiphambili kwiJapanese National Railways. UTakeshi uthini ngoku ngeso sigqibo awasenza kwiminyaka eli-18 eyadlulayo?

Kutshanje uthe: “Ndingathi sesona sigqibo sifanelekileyo ndakha ndasenza. Ukuchitha ixesha elongezelelekileyo nonyana wam nokwenza izinto kunye naye, kuquka ukufunda iBhayibhile naye kwaba nemiphumo emihle gqitha. Saba ngabahlobo yaye wayeka ukunxulumana nabantu abaziphethe kakubi.”

Umfazi kaTakeshi waba ngomnye wamaNgqina kaYehova kwiminyaka embalwa ngaphambi koko, yaye umzekelo wakhe omhle washukumisela umyeni wakhe ukuba afundisise iBhayibhile nokuba abandakanyeke kwimicimbi yentsapho. Ekugqibeleni, yena nonyana wakhe nentombi yakhe baba ngamaNgqina. Ngoku uTakeshi nonyana wakhe bakhonza njengabadala kumabandla abakuwo yaye umfazi wakhe nentombi yakhe bangoovulindlela.

Ootata Bayalufuna Uncedo

Nangona ootata abaninzi beqonda ukuba ababakhathalele abantwana babo, abayazi into abamele bayenze. Iphephandaba laseSpeyin iLa Vanguardia lalinomxholo othi “Abazali [baseSpeyin] Abangama-42 Ekhulwini Bayavuma Ukuba Abayazi Indlela Yokukhulisa Abantwana Babo Abakwishumi Elivisayo.” Kodwa kusenokuba kunjalo nangootata abanabantwana abangaphantsi koko ngeminyaka. Ngokwahlukileyo kwingcamango eqhelekileyo, nabantwana abancinane bayayifuna ingqalelo katata ozinikeleyo.

Ziziphi ezinye izinto ezinokufundwa ngokuphathelele ukuba ngutata ofanelekileyo? Ngoobani ootata abayimizekelo emihle yaye yintoni esinokuyifunda kubo? Le mibuzo iza kuphendulwa kwinqaku lokugqibela.

[Umbhalo osemazantsi]

[Imifanekiso ekwiphepha 23]

Ootata abanika abantwana babo oko babekufuna

UFranciszek nentsapho yakhe

ULuis nentsapho yakhe

UTakeshi nentsapho yakhe