“Uza Kulifumana Phi Ixesha Lokuzifunda Zonke?”
NgoJulayi 2001, indoda yaseKhabarovsk ekwiMpuma Rashiya yafumana iinkupho ezingama-34 zikaVukani! kumzi wogcino-ncwadi weso sixeko. Yaziboleka yaye ekufikeni kwexesha lokuba izibuyisele ngoAgasti, ayizange ifune ukuzibuyisela. Ngoko yacela ukuba la maphephancwadi iwabuyisele ngoSeptemba. Yawathanda gqitha kangangokuba yaphinda yawaboleka ngoNovemba, yongezelela namanye amathandathu.
Ngaphambi koku, le ndoda yayingakuthandi ukufunda iincwadi zonqulo. Kwathini ke ukuze iqalise ukufunda uVukani!? Yabhala yenjenje: “Kungenxa yokuba eli phephancwadi lixubusha ngeengxaki zoluntu ezibangel’ umdla nezichaphazela wonke umntu.”
Le ndoda yahlabela mgama yathi: “Lidla ngokuba namanqaku amnandi athetha ngezixeko namazwe anamhlanje yaye liba nayo nenkcazelo ethetha ngezithethe zabantu.” Yayinomdla nakumanqaku athetha ngabantu abaye baphumelela ebomini, balondoloza imilinganiselo yokomoya baza banceda abanye ukuba banyamezele iziganeko ezibuhlungu neentlekele eziye zabehlela. Luthini uluvo lwayo ngeli phephancwadi? “Alikho elinye iphephancwadi elithetha ngemicimbi yale mihla, inzululwazi, ijografi nezithethe zabantu behlabathi jikelele elinokugqwesa uVukani!.”
Le ndoda yacela iinkupho zikaVukani! zangaphambili zolwimi lwesiRashiya ukususela kwezowe-1995. Ukongezelela kwezo nkupho zikaVukani! yacela iincwadi neencwadana ezinemifanekiso ezahlukahlukeneyo ezipapashwe ngamaNgqina kaYehova. Yabhala yathi: “Usenokuzibuza, ‘Uza kulifumana phi ixesha lokuzifunda zonke?’” Yaziphendula ngokwayo ngokuthi inalo ixesha lokufunda inkcazelo eyingenelo kuba ayichithi xesha lininzi ibukele umabonwakude okanye ijonge i-Internet.
UVukani! unenkcazelo eninzi ephathelele imicimbi yale mihla yaye usinceda siqonde isicombululo seengxaki zanamhlanje. Kutheni ungaceli amaNgqina kaYehova ukuba akuzisele iinkupho ezintsha zikaVukani! nyanga nganye?
[Umfanekiso okwiphepha 31]
Ukuqonda Ingxaki Yeemvakalelo
[Umfanekiso okwiphepha 31]
Ngaba Uyalazi Igama LikaThixo?
[Umfanekiso okwiphepha 31]
Imfazwe Yenyukliya—Ngaba Isisisongelo Ngokwenene?
[Inkcazelo Ngomfanekiso okwiphepha 31]
Nuclear explosion: U.S. Department of Energy photograph