Ileta Eya Kubafundi BakaVukani!

UKUSUSELA kule nkupho, kuza kubakho utshintsho oluthile kumanqaku kaVukani! Nangona izinto ezithile ziza kwahluka, ubukhulu becala uVukani! uza kuhlala enjengokuba ebenjalo ngaphambili.

Injongo kaVukani! isenjengoko ibinjalo kangangamashumi eminyaka. Njengokuba kuchaziwe kwiphepha 4, “eli phephancwadi lipapashwe ukuze likhanyisele intsapho iphela.” UVukani! uya kuqhubeka ekhanyisela abafundi beli phephancwadi, ukubenza bakwazi okwenzekayo kwihlabathi elisingqongileyo ngokuhlolisisa iziganeko zehlabathi, ukubenza bayazi indlela abaphila ngayo abanye abantu, ukuchaza ubuhle bendalo, imibandela yempilo, okanye ukuchaza inzululwazi kubantu abangenalwazi luphangaleleyo ngayo.

Kwinkupho yesiNgesi ka-Agasti 22, 1946, uVukani! wathembisa ukuba eli phephancwadi “liya kubambelela ngokupheleleyo enyanisweni.” Egcina eso sithembiso, uVukani! uye wasoloko ezabalazela ukupapasha inyaniso nenkcazelo enobungqina. Ukuze kufezwe oko, kwenziwa uphando olunzulu ngamanqaku ukuze kuqinisekwe ukuba achanile. Kodwa lo lindixesha uye ‘wabambelela kwinyaniso’ nangenye indlela ebalulekileyo.

UVukani! ubusoloko usalathisela abafundi eBhayibhileni. Noko ke, ukususela kule nkupho, uVukani! uza kuba namanqaku angakumbi asekelwe eBhayibhileni. (Yohane 17:17) Kwakhona uVukani! uza kuqhubeka unamanqaku abonisa indlela isiluleko esiluncedo seBhayibhile esinokusinceda ngayo ukuze siphile ubomi obunenjongo nobonwabisayo namhlanje. Ngokomzekelo, kwinqaku elithi “Abantu Abaselula Bayabuza . . . nelithi “Imbono YeBhayibhile,” kunikelwa ukhokelo olusekelwe eBhayibhileni, yaye la manqaku aya kuhlala ekho kulo lindixesha. Ukongezelela, uVukani! uza kuqhubeka usalathisa abafundi kwisithembiso seBhayibhile sehlabathi elitsha elinoxolo eliza kuthi kungekudala lithabathel’ indawo le nkqubo yezinto ingenamthetho.—ISityhilelo 21:3, 4.

Yintoni enye eza kwahluka? Ukususela kule nkupho, uVukani! uza kupapashwa kanye ngenyanga kwinkoliso yeelwimi ezingama-82 ofumaneka ngazo (ngaphambili ebepapashwa kabini ngenyanga kwiilwimi ezininzi).a Inqaku elithi “Okwenzeka Ehlabathini” ebelisoloko likho kwinkupho yesiNgesi ukususela ngowe-1946, liza kubakho kwinkupho nganye kodwa lincitshisiwe, alizokuba ngamaphepha amabini, kodwa liza kuba linye. Kwiphepha 31, kuza kubakho inqaku elitsha nelibangel’ umdla elinomxholo othi “Ubuya Kuphendula Uthini?” Eli nqaku liya kube liqulethe ntoni, yaye unokulisebenzisa njani?

Khawuziphe ithutyana uze uqwalasele iphepha 31 kule nkupho. Eminye imibandela kweli phepha iza kubangel’ umdla kubafundi abaselula, kanti eminye iza kubashiya bekrwel’ iintloko abafundi beBhayibhile abanamava bezama ukukhumbula izinto abazifundileyo. Icandelo elithi “Kwenzeka Nini Oku?” liya kukunceda ukuze uzikrwelele umgca wokulinganisa ixesha abaphila ngalo abantu abathile ekuthethwe ngabo eBhayibhileni nexesha ezenzeka ngalo iziganeko ezibalulekileyo. Ngoxa iimpendulo zecandelo elithi “Kule Nkupho” ziya kufumaneka kulo lonke eli phephancwadi, iimpendulo kwinkoliso yeminye imibuzo ziya kufumaneka kwiphepha elichaziweyo kwakule nkupho, yaye ziya kubhalwa zijongiswe phezulu. Kutheni ungenzi uphando ngaphambi kokuba ufunde iimpendulo uze uncokolele nabanye ngoko ukufundileyo? Kwakhona usenokusebenzisa eli nqaku litsha elithi, “Ubuya Kuphendula Uthini?” njengengxoxo yeBhayibhile yentsapho okanye nabahlobo.

Kwiminyaka enokuba ngama-60 eyadlulayo, uVukani! wesiNgesi wathembisa esithi: “Kweli phephancwadi kuya kuthethwa ngemibandela ngokwendlela ihlabathi liphela eliyijonga ngayo ingeyiyo indlela nje yasekuhlaleni. Eli phephancwadi liya kubangel’ umdla kubo bonke abantu abanyanisekileyo abaphila ehlabathini lonke. . . . Umbandela walo . . . uya kuba nenkcazelo, ufundise uze ubangel’ umdla kwabona bantu baninzi, abaselula nabakhulileyo.” Ehlabathini lonke abo baye bamfunda uVukani! bayavuma ukuba uye wasifeza eso sithembiso. Siya kuqinisekisa ukuba uya kuqhubeka usenjenjalo.

Abapapashi

[Umbhalo osemazantsi]

[Imifanekiso ekwiphepha 3]

Wayebizwa ngokuba yi-“The Golden Age” ngowe-1919, elo gama latshintshwa laba yi-“Consolation” ngowe-1937, laza langu-“Vukani” ngowe-1946

[Imifanekiso ekwiphepha 4]

Kangangexesha elide “uVukani!” ebesalathisela abafundi eBhayibhileni

[Inkcazelo]

Imipu: yifoto yeU.S. National Archives; umntwana olambileyo: ifoto yeWHO ethatyathwe nguW. Cutting