Siza Kugxininisa Ngakumbi EBhayibhileni!
1. Ekuqaleni, IMboniselo yayilungiselelwe oobani, ibe iThe Golden Age yona yayilungiselelwe oobani?
1 Ngo-Oktobha 1, 1919, iphephancwadi lokuqala leThe Golden Age lapapashwa. Langqineka lisisixhobo esiluncedo kakhulu kumsebenzi wokushumayela. Ngoba? Kungokuba lalilungiselelwe ngokukhethekileyo ukuze lifundwe nguwonke-wonke. IMboniselo, kangangethuba elide eyayijongwa njengephephancwadi ‘lomhlambi omncinane,’ yayingalungiselelwanga uwonke-wonke. (Luka 12:32) Abavakalisi boBukumkani basabela ngelingathethekiyo ihlombe ngale mpapasho intsha kangangokuba kangangeminyaka eliqela, iThe Golden Age yayihamba kakhulu ukudlula IMboniselo.
2. Ibizwa ngaliphi igama iThe Golden Age namhlanje, yaye yayiyintoni injongo yayo ekuqaleni kokupapashwa kwayo?
2 Iphephancwadi iThe Golden Age lapapashelwa injongo yokubonisa abantu ukuba esona sisombululo kwiingxaki zabantu luLawulo LukaKristu Lweminyaka Eliwaka, oluza kusiphathela ibutho elitsha loluntu. Kumashumi eminyaka eyalandelayo kwenziwa iinguqu eziliqela kwiThe Golden Age ukuze ikwazi ukuhlangabezana neemfuno ezazitshintshile ngelo xesha. Ngowe-1937 igama layo latshintsha laba yiConsolation. Ngowe-1946 yaba nguVukani!, gama elo eyaziwa ngalo namhlanje.
3. UVukani! uye wanceda ekuzalisekiseni siphi isiprofeto?
3 Zisuka nje, eli phephancwadi laba negalelo elikhulu ekusasazeni ubungqina obuye bahanjiswa ukususela ngowe-1919. (Mat. 24:14) Noko ke, ngenxa yokungxamiseka kwamaxesha, kubonakala kububulumko ukwenza olunye utshintsho kuVukani!
4. (a) Yintoni ekufuneka umntu ayenze ukuba ufuna ukufihlwa “ngemini yomsindo kaYehova”? (b) Ngokutsho kweSityhilelo 14:6, 7, ‘ingelosi ephaphazela esazulwini sezulu’ ithi mabenze ntoni bonke abantu?
4 Izigidi zabantu ziyakuthanda ukufunda uVukani! kuba uxubusha imiba eliqela engenanto yakwenza nonqulo ngendlela ebangel’ umdla. Alithandabuzeki elokuba inkoliso yabo baya kwiSikhumbuzo minyaka le bamfunda rhoqo uVukani! Sekunjalo, nabanina ofuna ukufihlwa “ngemini yomsindo kaYehova,” kuya kufuneka enze okungaphaya kokufunda iimpapasho zethu rhoqo.—Zef. 2:3; ISityhi. 14:6, 7.
5. (a) Ukususela kuVukani! kaJanuwari 2006, yintoni eza kuxutyushwa ubukhulu becala? (b) Yintoni abaninzi abanokushukunyiselwa ukuba bayenze, yaye oku kuya kuzalisekisa siphi isiprofeto?
5 Ngenxa yoko, ukususela ngoJanuwari 2006, uVukani! uza kugxininisa ngakumbi kuBukumkani bukaThixo. Uza kukhuthaza abafundi ngendlela engqalileyo ukuba baye eBhayibhileni xa befuna izicombululo kwiingxaki zabo kwaye uza kubethelela ngakumbi ingcaciso yeBhayibhile kwizinto ezenzekayo. Ngale ndlela, abo bamfundayo baya kuziqonda ngakumbi izinto ezenzekayo baze mhlawumbi bashukunyiswe koko bakufundayo ukuze bafunde ngakumbi ngoYehova.—Zek. 8:23.
6, 7. (a) UVukani! uza kulungiselelwa njani ukuba ancede abaninzi basebenzise eyoku-1 kwabaseTesalonika 2:13? (b) UVukani! uza kuphuma kangaphi, yaye zingaphi iilwimi eziza kuchaphazeleka kolu tshintsho?
6 UVukani! uya kuqhubeka exubusha imiba ebangel’ umdla kwabaninzi. Kodwa ke uya kugxininisa eBhayibhileni. (1 Tes. 2:13) Ekubeni IMboniselo inenkcazelo enzulu yeBhayibhile kwaye uVukani! eza kuxubusha inkcazelo engakumbi esekelwe kwiZibhalo, kubonakala kungeyomfuneko ukuqhubeka sipapasha uVukani! kabini ngenyanga. Ngenxa yoko, ukususela kwinkupho kaJanuwari 2006, uVukani! uza kupapashwa kanye ngenyanga. Loo nto iya kwenza kube lula ukulungiselela, ukuguqulela nokuthumela uncwadi lwethu.
7 Olu tshintsho luza kuchaphazela malunga nama-40 ekhulwini eelwimi esimpapasha ngazo uVukani! Kwinkoliso yeelwimi, uVukani! sele ephuma kanye ngenyanga okanye emva kweenyanga ezintathu. Akuyi kubakho tshintsho kwindlela IMboniselo epapashwa ngayo.
8. Abavakalisi banokumsebenzisa njani uVukani! neMboniselo?
8 Abavakalisi banokuhambisa uVukani! kunye nayo nayiphi na IMboniselo ekhoyo yaloo nyanga. Abo bahambisa uVukani! baya kukwazi ukusebenzisa impapasho enye inyanga yonke, kungabikho mfuneko yakutshintsha intshumayelo yabo phakathi nenyanga, njengoko sisenza ngoku.
9. Yiyiphi indima uVukani! aya kuqhubeka eyiphumeza?
9 Ukususela kwinkupho yalo yokuqala yowe-1919, eli phephancwadi eliye laziwa ngokuba yiThe Golden Age, iConsolation, kwaye ngoku elaziwa ngokuba nguVukani! liye lanendima enkulu kumsebenzi wokushumayela. Sithandazela ukuba uYehova aqhubeke esikelela ukuhanjiswa kweli phephancwadi kwanasemva kokuba senze olu tshintsho, nokuba lincede abantu abaninzi ngakumbi abaphuma “kuzo zonke iintlanga nezizwe nezizwana neelwimi” babeke ithemba labo kuBukumkani bukaThixo kuphela.—ISityhi. 7:9.