Ulutsha Olumela Ukholo Lwalo

KUKHO ulutsha oluninzi olungamaNgqina kaYehova. Luyamthanda uThixo yaye luzabalazela ukuphila ngemilinganiselo yakhe eseBhayibhileni. Olu lutsha luyazidla ngonqulo lwalo yaye esikolweni luxelela abanye ngokukhululekileyo ngeenkolelo zalo. Nantsi eminye imizekelo yolutsha olukwenzayo oko.

◼ Xa wayekwibanga lesine, uHolly nabanye abafundi bayalelwa ukuba babhale isincoko esinomxholo othi “Inokuconjululwa njani ingxaki yobunqolobi ngaphandle kogonyamelo?” UHolly wasebenzisa eli thuba ukuze abhale ngethemba analo ngekamva elisekelwe eBhayibhileni. Kwisincoko sakhe wathi ukutyhubela imbali, “umntu ulawule umntu yaba kukwenzakala kwakhe.” (INtshumayeli 8:9) Wandula ke wachaza esona sicombululo seengxaki zoluntu—uBukumkani bukaThixo. Wabhala wathi: “UYesu, onguKumkani wobo Bukumkani, uza kuphelisa zonke iingxaki zoluntu, kuquka ubunqolobi.” UHolly wacacisa indlela uYesu aza kukwenza ngayo oko bangakwaziyo ukukwenza oorhulumente babantu. Wathi: “Ngoxa wayelapha emhlabeni, uYesu wabonisa uhlobo lomlawuli aza kuba lulo. Wayenothando yaye wayebakhathalele abantu. Wabonisa amandla anawo ngokuphilisa izifo nangokuvusa abafi. Akakho urhulumente wabantu onokukwazi ukuvusa abafi. Kodwa phantsi koBukumkani bukaThixo baza kuvuswa.” UHolly waqukumbela isincoko sakhe ngokuthi, “Le ngxaki iya kuconjululwa nguThixo kungekhona abantu.”

Emazantsi esincoko sakhe, umfundisi-ntsapho wabhala wathi: “Kowu! Utsho kwavokotheka, Holly. Usebenzile.” Umfundisi-ntsapho wachukunyiswa naziZibhalo awayezibhale kweso sincoko uHolly. Oko kwavula ithuba lokuba uHolly axelele umfundisi-ntsapho wakhe ngeSikolo Sobulungiseleli Sobuthixo sokuqeqesha abantu ukuba bakwazi ukuthetha nokufundisa esidlangalaleni esiqhutywa veki nganye ngamaNgqina kaYehova. Ngovuyo, umfundisi-ntsapho wayamkela incwadi esetyenziswa kwiSikolo soBulungiseleli.

◼ NoJessicaudla ngokuthetha ngeenkolelo zakhe xa ebhala izincoko esikolweni. Uthi: “Sele ndibhale izincoko ezithathu ngeenkolelo zam. Kwesinye ndabhala ngamaNgqina kaYehova nangamalungelo onqulo. Umfundisi-ntsapho wasixhoma kwithala leencwadi ukuze nabani na onomdla asifunde. Kutshanje ndiye ndabhala isincoko ngokubhaptizwa kwam nangendlela olwalubaluleke ngayo kum olo suku. Abafundi badla ngokudlulisela into abayibhalileyo kwabanye, ngoko abafundi endifunda nabo bafumana ithuba lokufunda isincoko sam. Enye intombazana yathi: ‘Wenze kakuhle. Nditsho ndazazi iimbopheleleko zokuba ngomnye wamaNgqina kaYehova. Ndiyavuyisana nawe njengokuba ubhaptiziwe!’ Enye intombazana yathi: ‘Ibali lakho liyachukumisa! Kuyandivuyisa ukwazi ukuba ukholo lwakho lomelele ngale ndlela!’ Enye inkwenkwe yabhala yathi: ‘Unengqondo. Ndiyavuyisana nawe.’”

◼ Xa uMelissa wayeneminyaka eli-11 ubudala, wafumana ithuba elikhethekileyo lokuthetha ngeenkolelo zakhe. “Umongikazi wasesikolweni weza kwiklasi yethu yenzululwazi ukuze asicacisele ngenkqubo yomzimba yokuzikhusela. Wakhankanya utofelo-gazi. Emva kwaloo ngcaciso, ndaxelela umfundisi-ntsapho ngenye yeevidiyo zethu eziphathelele igazi. Ngosuku olulandelayo, ndamphathela yona waza wagoduka nayo ukuze ayibukele nentsapho yakhe. Ngosuku olulandela olo, waza nayo esikolweni yaza yabukelwa ngabafundi beeklasi ezimbini, kuquka abafundi beklasi yam. Wathetha kakuhle ngamaNgqina kaYehova waza waxelela abafundi ukuba ngaphandle kwethu, ngezingekho ezinye iindlela zonyango ezingaquki ukusetyenziswa kwegazi. Xa wayebuyisa loo vidiyo wabuza, ‘Ndingayifumana njani eza kuhlala kwithala lesikolo?’ Ndamnika. Wavuya gqitha, yaye nam ndandivuya!”

UHolly, uJessica noMelissa baphakathi kolutsha lwamaNgqina kaYehova oluninzi oluthobela isibongozo seBhayibhile sokukhumbula uMdali. (INtshumayeli 12:1) Ngaba nawe uyamkhumbula? Ukuba kunjalo, unokuqiniseka ukuba uvuyisa intliziyo kaYehova.—IMizekeliso 27:11; Hebhere 6:10.

Lutsha, xa nithetha ngeenkolelo zenu kwabanye abafundi nakubafundisi-ntsapho, ninikela ubungqina obunamandla ngoYehova uThixo nangeenjongo zakhe. Oku kuqinisa ukholo lwenu yaye kunenza nizidle ngelungelo eninalo lokuba bangakhonzi bakaThixo. (Yeremiya 9:24) Kwakhona, ukunikela ubungqina esikolweni kuyanikhusela. UJessica uthi: “Enye yeengenelo zokuthetha ngeenkolelo zam kukuba xa ndisenjenjalo abafundi bayayeka ukundinyanzela ukuba ndenze izinto ezingavumelaniyo noku kufundiswa yiBhayibhile.”

[Imifanekiso ekwiphepha 12]

UHolly

[Imifanekiso ekwiphepha 12, 13]

UJessica

[Imifanekiso ekwiphepha 13]

UMelissa