Imbono YeBhayibhile
Ukukhulisela Abantwana Kwingqeqesho KaThixo
“Indlela Yokubekela Abantwana Bakho Imithetho Ukuze Bangayaphuli”
“Izinto Ezintlanu Omele Ube Sele Uzifundise Umntwana Wakho Xa Eneminyaka Emihlanu”
“Iindlela Ezintlanu Mntwana Ngamnye Afanele Avakalelwe Ngazo”
“Izinto Ezintlanu Ezibonisa Ukuba Uyekelele Gqitha”
“Indlela Ebalaseleyo Yokuqeqesha”
UKUBA bekulula ukuqeqesha, akakho umntu ebenokuba nomdla wokufunda la manqaku akula maphephancwadi adweliswe ngasentla. Beziya kuphela iintlobo ngeentlobo zeencwadi ezibhalwa ngendlela yokukhulisa abantwana. Noko ke, ukukhulisa abantwana akulula. Kwanakumawaka eminyaka eyadlulayo, kwathiwa “unyana osisiyatha yingqumbo kuyise nobukrakra komzeleyo.”—IMizekeliso 17:25.
Namhlanje, nakuba kukho amacebiso amaninzi ngokuphathelele lo mbandela, abazali abaninzi abaqinisekanga ngendlela yokuqeqesha abantwana babo. Liliphi icebiso elinikelayo yona iBhayibhile?
Oko Kuthethwa Luqeqesho
IBhayibhile iyichaza ngokucacileyo indima yabazali ngokuphathelele uqeqesho. Ngokomzekelo eyabase-Efese 6:4 ithi: “Nani, boyise, musani ukubacaphukisa abantwana benu, kodwa qhubekani nibakhulisela kwingqeqesho nasekweyiselweni kwengqondo kuYehova.” Esi sibhalo sithi utata ngoyena umele akhokele ekunyamekeleni abantwana. Kakade ke, nomama uncedisana nomyeni wakhe.
Igqabaza ngalo mbandela iThe Interpreter’s Dictionary of the Bible ithi: “EBhayibhileni xa kuthethwa ngoqeqesho kuthethwa ngokuyala nokuba nolwazi, kwelinye icala uyalulekwa ulungiswe uze wohlwaywe. Kwenziwa loo nto ke xa kuqeqeshwa umntwana.” Ngaloo ndlela uqeqesho alupheleli nje ekohlwayeni luquka uqeqesho abalufunayo abantwana ukuze bakhule kakuhle. Abazali bangakuphepha njani ukubacaphukisa abantwana?
Yiba Novelwano
Yintoni ecaphukisa umntwana? Cinga ngale meko. Kukho umntu osebenza naye othanda ukuba nomsindo nongenamonde. Ngokokubona kwakhe, akukho nto intle ukhe uyenze. Usoloko eyigxeka yonke into oyithethayo noyenzayo. Maxa wambi akawufuni umsebenzi wakho yaye ukwenza uzive ungafunwa. Ngaba oko bekungayi kukucaphukisa okanye kukudimaze?
Le nto ingenzeka nasemntwaneni xa abazali beqhubeka bemlandelela okanye bemlungisa benomsindo. Liyinyaniso elokuba abantwana bafuna ukulungiswa maxa wambi yaye iBhayibhile ibanika igunya lokwenjenjalo abazali. Noko ke, ukumcaphukisa umntwana kungamenzakalisa ngokweemvakalelo, ngokomoya nangokwenyama.
Abantwana Bafuna Ingqalelo Yenu
Abazali bamele benze ithuba abaza kulichitha nabantwana babo. Ngokuphathelele umthetho kaThixo, iDuteronomi 6:7 ithi kootata: “Uze uwabethelele kunyana wakho yaye uthethe ngawo ekuhlaleni kwakho endlwini yakho, nasekuhambeni kwakho ngendlela, nasekulaleni kwakho, nasekuvukeni kwakho.” Abantwana bazalwa befuna ukwazi ukuba bakhathalelwe ngokunzulu ngabazali babo. Ukuncokola nabantwana bakho ngokuzolileyo yonke imihla kunokukunceda uyiqonde indlela abavakalelwa ngayo. Ngokwenza oku unokuzifikela lula iintliziyo zabo ngemigaqo esekelwe eBhayibhileni, nto leyo eya kubakhuthaza ukuba ‘bamoyike uThixo oyinyaniso baze bagcine imithetho yakhe.’ (INtshumayeli 12:13) Le yinxalenye yoqeqesho oluvela kuThixo.
Ukuba ukukhulisa abantwana kunokuthelekiswa nokwakha indlu, ngoko uqeqesho sesinye sezixhobo zokwakha. Xa abazali besisebenzisa ngokufanelekileyo, banokwakha iimpawu ezintle baze abantwana babe nobuntu obuya kubanceda bakwazi ukujamelana nezilingo ebomini. IMizekeliso 23:24, 25 ichaza umphumo woko ithi: “Uyise welungisa ngaphandle kwamathandabuzo uya kuvuya; nalowo uzala isilumko uya kuba nemihlali ngaso. Uyihlo nonyoko baya kuba nemihlali, yaye lowo ukuzeleyo uya kuvuya.”
[Ibhokisi/Umfanekiso okwiphepha 27]
‘UKWEYISELWA KWENGQONDO KUYEHOVA’
Eyabase-Efese 6:4 ithetha ‘ngokweyiselwa kwengqondo kuYehova.’ Kwezinye iiBhayibhile ibinzana lesiGrike legama elithetha ‘ukweyiselwa kwengqondo’ liguqulelwe ngokuthi “ukukhumbula,” “ukuqonda,” “isiluleko,” “nokubongoza.” La mabinzana abonisa ukuba abazali bamele benze okungakumbi kunokubafundela nje iBhayibhile abantwana babo okanye ngokuzenzekelayo bagubungele nje umbandela okuncwadi lweBhayibhile abalufundisisayo. Abazali kufuneka baqiniseke ukuba abantwana bayakuqonda oko kuthethwa liLizwi likaThixo, ukubaluleka kokuthobela, uthando analo uYehova ngabo, nenkuselo abanika yona.
Kunokwenziwa njani oku? UJudy, umama onabantwana abathathu wabona imfuneko yokwenza okungakumbi kunokusoloko ebakhumbuza abantwana bakhe ngemilinganiselo kaThixo. Uthi: “Ndababona ukuba abathandi xa ndisoloko ndiphindaphinda into enye ngalo lonke ixesha. Ndazama iindlela ezahlukahlukeneyo zokubafundisa. Enye indlela endayisebenzisayo kukujonga amanqaku kwiphephancwadi uVukani! ndize ndizame ezo ndlela zintsha. Ngaloo ndlela ndafunda ukubakhumbuza abantwana ngaphandle kokubacaphukisa.”
UAngelo onentsapho eyajamelana nobunzima uchaza indlela awazifundisa ngayo iintombi zakhe ezine ukuba zicamngce ngeLizwi likaThixo: “Sifunda iindinyana zeBhayibhile kunye, ndize ndikhethe amabinzana athile ndize ndicacise indlela adibana ngayo nemeko yeentombi zam. Xa zifunda iBhayibhile ndiye ndizibone ukuba nazo zicinga nzulu zize zicamngce ngentsingiselo yayo.”