Imbono YeBhayibhile
Ukunika Abantwana Ingqalelo Abayifunayo
NGABA uNyana kaThixo wayenalo ixesha anokulichitha nabantwana? Abanye abafundi bakhe babengacingi njalo. Ngesinye isihlandlo bazama ukubalela abantwana ukuba basondele kuYesu. Esabela koko wathi: “Bayekeni abantwana abaselula beze kum; ningabaleli.” Emva koko wabawola wancokola nabo. (Marko 10:13-16) UYesu wabonisa ukuba ukulungele ukubanika ingqalelo abantwana. Abazali banokuwuxelisa njani umzekelo wakhe namhlanje? Ngokubaqeqesha kakuhle baze bachithe ixesha kunye nabo.
Kakade ke, abazali abanenkathalo benza unakonako ukuze babanyamekele kakuhle abantwana babo bekuphepha ukubaphatha kakubi. Kunokuthiwa yinto “yemvelo” ukuba abazali babathande baze banikele ingqalelo kubantwana babo. Kodwa iBhayibhile isilumkisa ngokuba, abantu abaninzi namhlanje abayi kuba nawo “umsa wemvelo.” (2 Timoti 3:1-3) Phakathi kwabo babathandayo abantwana babo, kusoloko kukho into abamele bayifunde ngendlela yokunyamekela abantwana. Ngoko, le migaqo yeBhayibhile ilandelayo iya kuba zizikhumbuzo ezifanelekileyo kubazali abafuna ukubenzela okona kulungileyo abantwana babo.
Ukubaqeqesha Ngaphandle Kokubacaphukisa
UGqr. Robert Coles, umhlohli nomphandi ngengqondo owaziyo wakha wathi: “Usana luzalwa lunomnqweno wokuziphatha okuhle. Ndicinga ukuba lo mnqweno wafakwa nguThixo, ukuze umntwana afune ulwalathiso.” Ngubani ke omele awanelise?
Kwabase-Efese 6:4, iZibhalo zithi: “Nani, boyise, musani ukubacaphukisa abantwana benu, kodwa qhubekani nibakhulisela kwingqeqesho nasekweyiselweni kwengqondo kuYehova.” Ngaba uyiphawule into yokuba izibhalo zinika ngokukhethekileyo utata imbopheleleko yokwenza abantwana bakhe bamthande uThixo baze bayihlonele ngokunzulu imilinganiselo yakhe? Kwindinyana yoku-1 kwabase-Efese 6, umpostile uPawulos ubhekisela kutata nakumama xa eyalela abantwana ukuba ‘bathobele abazali babo.’a
Kakade ke, ukuba utata akakho, ngumama omele athwale le mbopheleleko. Oomama abaninzi abangenamaqabane baye baphumelela ukukhulisela abantwana babo kwingqeqesho nasekweyiselweni kwengqondo kuYehova uThixo. Kodwa xa kukho indoda engumKristu imele ikhokele ekwenzeni oko. Umama umele akulungele ukuthobela olo khokelo ekuqeqesheni abantwana babo.
Unokubaqeqesha njani ngaphandle ‘kokubacaphukisa’ abantwana bakho? Akukho ndlela ithile iyimfihlelo, ngokukodwa ekubeni mntwana ngamnye ahlukile. Kodwa abazali bafanele bayiqwalasele indlela abaqeqesha ngayo, bahlale bebabonisa ukuba bayabahlonela yaye bayabaxabisa abantwana babo. Okubangel’ umdla kukuba, iZibhalo ziyaphinda zithethe ngalo mbandela wokungabacaphukisi abantwana kwabaseKolose 3:21. Apho kuphinda kululekwe ootata kuthiwe: “Musani ukubacaphukisa abantwana benu, ukuze bangadakumbi.”
Abanye abazali bayabankqangaza babamemeze abantwana babo. Ngokuqinisekileyo oku kuyabacaphukisa abantwana babo. Kodwa iBhayibhile ibongoza ithi: “Mabususwe kuni bonke ubukrakra bolunya nomsindo nengqumbo nokumemeza nokutshabhisa nabo bonke ububi.” (Efese 4:31) IBhayibhile iphinda ithi “ikhoboka leNkosi akufuneki lilwe, kunoko kufuneka lithantamise kubo bonke.”—2 Timoti 2:24.
Chitha Ixesha Kunye Nabo
Ukunika abantwana bakho ingqalelo abayifunayo kukwathetha ukuba ukulungele uncama izinto ozithandayo nemibandela yobuqu ngenxa yabo. IBhayibhile ithi: “La mazwi ndikuyalela wona namhlanje amele abe sentliziyweni yakho; uze uwabethelele kunyana wakho yaye uthethe ngawo ekuhlaleni kwakho endlwini yakho, nasekuhambeni kwakho ngendlela, nasekulaleni kwakho, nasekuvukeni kwakho.”—Duteronomi 6:6, 7.
Ubomi banamhlanje obufuna imali ngamandla benza babe mbalwa abazali abakwaziyo ukuhlala nabantwana babo imini yonke. Sekunjalo, iDuteronomi ibethelela ukuba abazali ‘bamele’ bachithe ixesha nabantwana babo. Ukuze benze oko kufuneka balungelelane yaye bazincame. Abantwana bayayifuna ingqalelo.
Qwalasela imiphumo yolunye uhlolisiso olwenziwa kubantwana abakwishumi elivisayo abangaphezu kwe-12 000. Abahlolisisi bagqiba kwelithi: “Ukusondelelana gqitha komntwana nomzali wakhe ngeemvakalelo ngoyena ndoqo kwimpilo-ntle nesiqinisekiso sokuba okwishumi elivisayo uya kukwazi ukumelana nemiqobo ethintela ukuziphatha okuhle.” Ewe, abantwana bayifuna gqitha ingqalelo yabazali babo. Omnye umama wakha wabuza abantwana bakhe wathi, “Ukuba bekunokuthiwa bizani nantoni na eniyifunayo niza kuyifumana, beniya kufuna ntoni?” Bobane bathi, “Besiya kufuna ukuchitha ixesha elingakumbi noMama noTata.”
Ngoko ke, ukuba ngumzali onenkathalo kuthetha ukuqinisekisa ukuba uyazanelisa iintswelo zabantwana bakho, kuquka intswelo yokufuna ukufunda izinto zokomoya nokuba nolwalamano olusenyongweni nabazali babo. Oku kuthetha ukunceda abantwana bakhule babe ngabantu abadala abakwaziyo ukusingatha iimbopheleleko, abahlonelwayo nabanyanisekileyo abaphatha abanye abantu ngobubele ukuze benze uMdali wabo azukiswe. (1 Samuweli 2:26) Ewe, xa abazali beqeqesha abantwana babo ngendlela kaThixo, bathwala imbopheleleko yabo.
[Umbhalo osemazantsi]
a Kule ndinyana uPawulos wasebenzisa igama lesiGrike elithi go·neuʹsin elisuka kwelithi go·neusʹ “umzali.” Kodwa kwindinyana 4 wasebenzisa igama lesiGrike elithi pa·teʹres, elithetha “ootata.”
[Umfanekiso okwiphepha 13]
Ukunkqangaza nokummemeza kunokumenza anxunguphale umntwana
[Umfanekiso okwiphepha 13]
Chitha ixesha kunye nabantwana bakho