Obona Buhle Bubalulekileyo
ABANTU bayabathanda abo banomtsalane. Kodwa yintoni ekwenza ube nomtsalane? Kakade ke, akukho nto ingako unokuyenza ukuze utshintshe amalungu omzimba ozelwe unawo. Ngapha koko, ubuhle yinto nje yokwexeshana, kuba akukho mntu unokuyiphepha imiphumo yokwaluphala nokugula. Ngaba lukho olunye uhlobo lobuhle olubaluleke ngakumbi, ubuhle obungapheliyo nobufikelelekayo?
Ukubaluleka Kobuhle Bangaphakathi
IBhayibhile isiqinisekisa ukuba uMdali, uYehova uThixo ubuxabise kakhulu ubuhle bangaphakathi. Phawula eminye imizekelo yoku.
Xa uYehova waxelela umprofeti uSamuweli ukuba makhethe ukumkani wakwaSirayeli phakathi koonyana bakaYese, umprofeti watsalwa bubuhle bukaEliyabhi. USamuweli wathi: “Umele ukuba nguye okhethwe yiNkosi.” Kodwa uYehova wathi kuSamuweli: “Musa ukucinga ukuba ndikhethe uEliyabhi ngenxa yokuba emde yaye emhle. Andikhethanga yena. Abantu bagweba abanye ngokwembonakalo, kodwa mna ndigweba abantu ngoko kusezintliziyweni zabo.”—1 Samuweli 16:6, 7, ngokweContemporary English Version.
Umntu owanyulwa ukuba abe ngukumkani yaba ngoyena nyana mncinane, uDavide. Nangona kwakusithiwa uDavide ‘unamehlo amahle yaye uyinzwana ngembonakalo’ kusenokwenzeka ukuba wayengekho mhle njengabakhuluwa bakhe. Kodwa “umoya kaYehova waqalisa ukusebenza kuDavide ukususela loo mini.” Nakuba wayengafezekanga esenza nezono ezinzulu, wayesaziwa njengomntu onentliziyo elungileyo, ongumkhonzi othembekileyo kaThixo de waya kulala kobandayo. (1 Samuweli 16:12, 13) Ngokungathandabuzekiyo, eyona nto yayimenza abe nomtsalane kuThixo bubuhle bakhe bangaphakathi.
Khawuthelekise lo mzekelo noka-Abhisalom, omnye woonyana bakaDavide. Nakuba wayemhle ngembonakalo, wayengathandeki. IBhayibhile ithi ngaye: “Ke kaloku xa kuthelekiswa noAbhisalom kwakungekho ndoda intle kangako kuSirayeli wonke enokuze idunyiswe kakhulu. Ukususela entendeni yonyawo lwakhe kuse elukakayini lwentloko yakhe kwakungekho siphene kuye.” (2 Samuweli 14:25) Noko ke, amabhongo ka-Abhisalom ambangela ukuba avukele uyise aze ambhukuqe esihlalweni sobukhosi. Wada walala namashweshwe kayise. Ngenxa yoko, uAbhisalom waxhokonxa ingqumbo kaThixo waza wafa kabuhlungu.—2 Samuweli 15:10-14; 16:13-22; 17:14; 18:9, 15.
Ngaba uziva utsalelekile kuAbhisalom? Ngokuqinisekileyo akunjalo. Lilonke wayenezothe. Ubuhle bakhe obubalaseleyo abuzange bumenze axoleleke ngekratshi awayenalo nokunganyaniseki kwakhe yaye abuzange bumkhusele kwintshabalalo. Ukanti kwelinye icala, iBhayibhile inemizekelo emininzi yabantu ababezizilumko nababethandeka, ekungathethwa nto ngembonakalo yabo yangaphandle. Licacile elokuba eyona nto yayibalulekile bubuhle babo bangaphakathi.
Ubuhle Bangaphakathi Bunomtsalane Kwabanye
Ngaba ubuhle bangaphakathi bunomtsalane kwabanye? UGeorgina osele etshate malunga neminyaka elishumi, uthi: “Ukutyhubela iminyaka, ndiye ndatsaleleka kumyeni wam ngenxa yokunyaniseka kwakhe kum. Eyona nto ibaluleke kakhulu ebomini bakhe kukukholisa uThixo. Loo nto iye yambangela wanolwazelelelo nothando. Akandilibali xa esenza izigqibo yaye undenza ndizive ndixabisekile. Ndiyazi ukuba undithanda ngokwenene.”
UDaniel owatshata ngowe-1987, uthi: “Intle inkosikazi yam. Andithandi nje ubuhle bayo bangaphandle kodwa ndiyithanda nangakumbi ngenxa yobuntu bayo. Isoloko ibacingela abanye abantu yaye iyathanda ukonwabisa abanye. Ineempawu ezintle zobuKristu. Loo nto indenza ndikunandiphe ukuba kunye nayo.”
Kweli hlabathi linabantu abazithabatha lula izinto, kufuneka sijonge izinto ngokunzulu. Kufuneka siqonde ukuba kunzima ukufumana “ubuhle” okanye yinto engenakwenzeka—yaye akubalulekanga kwaphela. Ukanti, sinokukwazi ukuhlakulela iimpawu ezintle ezisenza sifumane ubuhle bangaphakathi. IBhayibhile ithi: “Umtsalane usenokuba yinkohliso, nobuhle busenokuba lilize; kodwa ngumfazi owoyika uYehova oya kudunyiswa.” Ngokwahlukileyo koko, iZibhalo ziyasilumkisa: “Njengekhonkco legolide empumlweni yehagu, linjalo ibhinqa elihle kodwa lingenangqiqo.”—IMizekeliso 11:22; 31:30.
ILizwi likaThixo liyasinceda ukuba simxabise ‘umntu ofihlakeleyo wentliziyo ofake isivatho esingenakonakala somoya ozolileyo nowobulali, oxabiso likhulu emehlweni kaThixo.’ (1 Petros 3:4) Eneneni, ubuhle obunjalo bangaphakathi bubaluleke kakhulu kunobuhle bangaphandle. Yaye bunokufunyanwa ngumntu wonke.
[Imifanekiso ekwiphepha 24, 25]
Iimpawu ezintle zinokukwenza ube mhle ngaphezu koko kunokuphunyezwa yimizamo yokuphucula inkangeleko yangaphandle