Ubuhle Busenokuba Bobekhiwane Bona Buziimpethwana
UEVA, olibhinqa lokuqala nelikuphela kweladalwa nguThixo, ngokunokwenzeka wayengoyena mfazi uyimbelukazi wakha waphila emhlabeni. Kodwa yena nendoda yakhe, uAdam, bavukela uYehova. Ngoko uEva walahlekelwa lulwalamano olusondeleyo awayenalo noThixo waza waba negalelo ekubangeleni intlekele embi kuhlanga olungabantu. Emva koko, akuthandabuzeki ukuba wayeseyimbelukazi, kodwa ubuhle bakhe yayibubuhle bekhiwane bona buziimpethwana.
Ubuhle busisipho esivela kuThixo, yaye bambi baye babufumana ngakumbi kunabanye. Abanye banqwenela ukuba ngebeziinzwakazi—okanye iinzwana—ezicikizwe ngakumbi kunokuba benjalo, ibe abaninzi bachitha ixesha nemali eninzi bephucula imbonakalo yabo entle. Kodwa njengoko umzekelo kaEva ubonisa, ubuhle bubodwa buthi ekugqibeleni bungabi nto yanto ngaphandle kokuba buphelekwa zezinye iimpawu. Ziziphi ke ezo mpawu zizezinye? Oko kwenzeka emva phayaa kwimihla kaKumkani uSolomon kusinceda ukuba siphendule loo mbuzo.
Okuthile Okubaluleke Ngaphezu Kobuhle
Incwadi yeBhayibhile yeNgoma yazo iiNgoma ebhalwe nguSolomon isixelela ngentwazana yesizwe esithile eyayiyimbelukazi, umShulamikazi, owayethandana nomalusi waloo ngingqi. Ubuhle bakhe badlwengula umxhelo wokumkani, yaye wayalela ukuba eziswe eYerusalem enethemba lokumenza umfazi wakhe. Elinjani lona ithuba ukuba lihle elalivulekele le ntwazana! Apho, yayinokusebenzisa imbonakalo yayo entle ize ifumane ubunewunewu, igunya nempembelelo yobukumkani. Kodwa le ntwazana yagqiba ekubeni izigatye izicengo zikakumkani zenkohliso. Yabubhebhetha ubuyokoyoko nobunewunewu baseYerusalem yaza yahlala ithembekile kumalusi wayo. Kwimeko yayo, ubuhle babuthetha okuninzi kunokuba bube bobekhiwane obuziimpethwana. Yayingumntu onzulu, ongenguye udlalani, okanye obawayo. Kunoko, yayinobuhle bangaphakathi awayengenabo ukhokhokazi wayo uEva.—INgoma yazo iiNgoma 1:15; 4:1; 8:4, 6, 10.
Imigibe Yobuhle Bangaphandle
Ubuhle bangaphandle, ngoxa bunqweneleka, bunokukhokelela kwiingxaki ezingenakuze zibangele ubuhle bangaphakathi. Ngokomzekelo, phantse kwiminyaka engama-4 000 eyadlulayo, usolusapho uYakobi wayenentombi eyayiphum’ izandla ukuba ntle oku egama linguDina. Xa yathi ngokungalumkanga yachitha ixesha inxulumana ‘neentombi zelo zwe,’ ityendyana lomfana eligama linguShekem ladumb’ intloko yiyo kangangokuba lade layidlwengula.—Genesis 34:1, 2.
Ukongezelela, ukuba inkangeleko entle yangaphandle ayihambisani nobuhle bangaphakathi, inokubenza abo banjalo bazicingele gqitha. UKumkani uDavide wayenonyana onguAbhisalom, esifunda oku ngaye: “KumaSirayeli onke bekungekho ndoda injengoAbhisalom ukuba yinzwana, ngokokuze adunyiswe kunene.” (2 Samuweli 14:25) Kodwa ubuhle bangaphandle buka-Abhisalom babufihle ububi bakhe bangaphakathi: Wayenekratshi, ethanda udumo, ibe engenatarhu. Lo mfana wathi ngobuchule wasebenzisa ubuhle bakhe ukuze ahlakulele ukuthandwa ngamaSirayeli waza ke wenza iyelenqe nxamnye noyise owayengukumkani. Ekugqibeleni wabulawa kodwa kungekhona ngaphambi kokuba kwalo mfana uyinzwana abangele ukuba obo bukhosi buntyumpantyumpeke kwimfazwe yamakhaya.
Ubuhle Bobudoda
Njengoko sibona kwimeko ka-Abhisalom, iBhayibhile ithetha ngobuhle bamadoda nobamabhinqa. UYosefu, ongumninawa kaDina ngonina ungumzekelo wendoda engazange ingene enkathazweni ngenxa yobuhle bayo. (Genesis 30:20-24) Xa wayesengumfana, abakhuluwa bakaYosefu bathi ngenxa yomona bamthengisa njengekhoboka eYiputa. Apho, wathengwa ligosa lasemkhosini eligama linguPotifare, ibe ngenxa yokuba wayenyanisekile yaye ekhuthele, waba ngumveleli wendlu kaPotifare. Ngeli thuba, “uYosefu ebemhle isiqu, emhle imbonakalo.”—Genesis 39:6.
UmkaPotifare wamkhanuka uYosefu waza ngokungenazintloni wazama ukumlukuhla. Kodwa lo mfana wabonakalisa ukuba ekubeni wayenomtsalane ngokomzimba wayekwanobuhle bangaphakathi. Wakwala ukona inkosi yakhe, uPotifare, waza wambaleka lo mfazi. Ngenxa yoko, wavalelwa entolongweni. Ngasizathu sini? Umfazi kaPotifare edanile wathi ngokuxokayo wamtyhola ngokuba wayezame ukumdlwengula! Noko ke, kwanala mava abuhlungu kangaka awazange asiguqule isimo sengqondo sikaYosefu, yaye ukuba ngumzekelo omhle kwakhe phantsi kobunzima obugqithiseleyo kuye kwabakhuthaza abantu abantliziyo zilungileyo ukususela ngoko.
Njengoko le mizekelo ibonisa, ubuhle bangaphakathi—iimpawu zobuntu obuhle ngokukodwa xa busekelwe kukholo kuThixo—buyigqwesa kude lee inkangeleko entle yangaphandle ngokubaluleka. Abantu abaselula abacinga ngomtshato kufuneka bekuphaphele oku. Abaqeshi abafuna abasebenzi bafanele bakukhumbule oku. Ibe sonke kufuneka sihlale sikhumbula ukuba enoba siye sasikelelwa ngobuhle bangaphandle okanye akunjalo, sinokuvelisa obu buhle bangaphakathi bungenakulinganiswa nanto ngokubaluleka. Kodwa oku kuquka ntoni? Ibe sinokubuvelisa njani? Oku siza kukuxubusha kwinqaku elilandelayo.