Ubuhle Bokwenene—Unokubuvelisa
IBHAYIBHILE iluleka amadoda namabhinqa ngombandela wembonakalo entle. Kumadoda, ithi: “Isihombo [“ubuhle,” NW] samadodana ngamandla awo.” (IMizekeliso 20:29) Ewe, amandla nokuba sempilweni kwabafana kunokuba nomtsalane kakhulu. Kodwa kwenzeka ntoni xa oko kudlamka kobutsha kuphela? Umzekeliso weBhayibhile uthi: “Isithsaba sokuhomba [“sobuhle,” NW] zizimvi, sifunyanwa endleleni yobulungisa.” (IMizekeliso 16:31) Ubulungisa buyinxalenye yobuhle bangaphakathi. Xa umfana ebuhlakulela, buya kusoloko bukho naxa ephelelwa kukudlamka kobutsha okunomtsalane.
Mayela namabhinqa iBhayibhile ithi: “Bubuxoki ubuhle, ngamampunge ubunzwakazi; ngumfazi owoyika uYehova yedwa oya kudunyiswa.” (IMizekeliso 31:30) Kuyavuyisa ukuba neqabane eliyinzwakazi eyimbelukazi. Kodwa kuthekani ukuba kukho ukuhanahanisa nekratshi lokuzingca elifihlakeleyo ngaphaya kobuhle bangaphandle? Kulapho ke buthi ubuhle bube bobekhiwane obuziimpethwana, buze bufihle ububi bangaphakathi. Xa obu buhle buphela, yintoni eya kusala? Hayi indlela ekulunge ngakumbi ngayo ukuba imbonakalo entle ihambisane nobuhle bangaphakathi obungapheliyo, obuvela ‘ekoyikeni uYehova’!
Ukuguqula Ubuntu
Ngaba kunokwenzeka ukuvelisa obu buhle bangaphakathi? Ewe. Enyanisweni, kumaKristu, kunyanzelekile ukuba kube njalo. UThixo uyabuxabisa ubuhle bokwenene. “Zonke izinto uzenze zantle ngexesha lazo.” (INtshumayeli 3:11) Akayi kulwamkela unqulo lwabo bahambo yabo intama ukuba neempawu zangaphakathi ezingathandekiyo.
Amazwi ompostile uPawulos aya kwabaseKolose abonisa imfuneko yokuhlakulela ubuhle bangaphakathi. Okokuqala, ululeka ngokuthi: “Kulahleni oku konke: ingqumbo, umsindo, ulunya, ukunyelisa; ukuthetha amanyala kungabikho emlonyeni wenu. Musani ukuxokisana, nizihlubile nje umntu [“ubuntu,” NW] omdala, kunye nezenzo zakhe.” Ewe, nabani na oqhelisela izinto ezimbi ngolo hlobo uyacekiseka kuThixo—nakubantu abanengqiqo elungileyo. Ngoko, uPawulos uhlabela mgama esithi: “[Yambathani] lowo umtsha [“ubuntu obutsha,” NW], uhlaziyelwa ekwazini okuhle, ngokomfanekiselo walowo wamdalayo.” (Kolose 3:8-10) Simele ‘sambathe’ indlela yokucinga nesivakalelwa ngayo evisisana nokuthanda kukaThixo. Yintoni ephawula obo ‘buntu butsha’?
Iimpawu ZamaKristu
IBhayibhile idwelisa iimpawu ezininzi ezintle ezibakhayo. Kodwa isiseko sobu buhle bangaphakathi sichazwe kula mazwi kaYesu: “Uze uyithande iNkosi uThixo wakho ngentliziyo yakho iphela, nangomphefumlo wakho uphela, nangengqondo yakho iphela. Nguwo lowo owokuqala nomkhulu umthetho. Owesibini ke ufana nawo: Uze umthande ummelwane wakho ngoko uzithanda ngako.” (Mateyu 22:37-39) Ukuthanda uThixo kusikhokelela ekubeni sifune ukuba luhlobo lomntu olumkholisayo. Uthando olunjalo lusishukumisela ekubeni sithethe ngaye kwabanye, sibanceda, ukuba nabo bamazi uMdali wabo.—Isaya 52:7.
Ezinye iimpawu ezakha ubuntu obutsha zichazwa ngumpostile uPawulos njengezizezi: “Uthando, uvuyo, uxolo, ukuzeka kade umsindo, ububele, ukulunga, intembeko, ubulali, ukuzeyisa; akukho mthetho uchasene nezinto ezinjalo.”—Galati 5:22, 23.
Ukongezelela, iBhayibhile ithi ngokukodwa kumadoda: “Indoda le iyintloko yomfazi, njengokuba naye uKristu eyintloko yebandla eli . . . Nina madoda, bathandeni abafazi benu, njengokuba naye uKristu walithandayo ibandla, wazinikela ngenxa yalo.” (Efese 5:23, 25) Yaye kubafazi, iBhayibhile ithi: “Nina bafazi, walulameleni awenu amadoda, ngokokululamela iNkosi . . . Umfazi ke makayoyike [“makayihlonele ngokunzulu,” NW] indoda.” (Efese 5:22, 33) Hayi indlela obuba bobunomtsalane ngayo ubomi bentsapho xa indoda izalisa iimbopheleleko zayo ngokunothando, ngokungazingci nangomonde! Yaye hayi indlela ekuba lula ngakumbi ngayo ngendoda ukuphumeza indima yayo efanelekileyo xa umfazi etyhila ubuhle bakhe bangaphakathi ngokuyixhasa ngokunothando yaye angakhuphisani nayo okanye ayihlab’ amadlala ngokugqithiseleyo. Ubomi bentsapho phantsi kweemeko ezinjalo bunokuba bobuvuyisa ngokwenene.
Imizekelo eboniswe kwinqaku elandulelayo iye yabonisa ukusetyenziswa kwezinye zezi mpawu. UmShulamikazi wabonakalisa ukuzinza nothando olunzulu ngomalusi wakhe xa wakwalayo ukumshiya ngenxa yobukhazikazi bebhotwe likaSolomon. UYosefu wabonakalisa ukulunga okungokwemvelo xa wathi wala ukona inkosi yakhe, uPotifare. Kwakhona wabonakalisa ukuzeyisa xa wathi wabaleka kunokuba alukuhlwe ngumkaPotifare. Yaye wamisela umzekelo ekubonakaliseni ubulali, uxolo nokuzeka kade umsindo xa engazange avumele iziganeko ezininzi zobutshaba nezathi zenzeka ebomini bakhe zimenze angonwabi.
Ubuhle Kwihlabathi Elibi
Ngaba iimpawu ezintle ngaloo ndlela ziyasebenziseka namhlanje? Abaninzi bacinga ukuba akunjalo. Kunoko, basabela kweli hlabathi lizingcayo nelibawayo abaphila kulo ngokuthi babe neenkani. Bavakalelwa kukuba ukuze baphumelele ebomini bafanele babe ngabangenatarhu, abantu abathanda udumo, abazicingela bona kuqala baze babe ngoohlohlesakhe.
Ngokwahlukileyo koko, iBhayibhile iyakhuthaza: “Ningenzi nanye into ngokweyelenqe, nangokozuko olulambathayo. Yithini ngokuthobeka kwentliziyo omnye ambalele omnye ekuthini nguyena wongamileyo kunaye. Makangathi elowo axunele kwezakhe izinto zodwa, elowo makaxunele nakwezabanye.” (Filipi 2:3, 4) Isizathu sokuba ibutho labantu liwohloke kakubi kangaka sikukuba uluntu ngokubanzi alusilandeli esi siluleko sifanelekileyo.
Ukongezelela, kwihlabathi lanamhlanje, impumelelo yomntu ilinganiswa ngemali okanye ngesikhundla akuso. Umntu osisityebi ugqalwa engumntu ophumeleleyo. Noko ke, ngokubhekisele kwimilinganiselo yokwenene, akubalulekanga konke konke enoba ubani usisityebi okanye ulihlwempu. Eneneni, ubutyebi buneengozi obuzibangelayo. IBhayibhile iyalumkisa: “Abo banga bangaba zizityebi, beyela ekuhendweni, nasesibatheni, nasezinkanukweni ezininzi ezibubudenge ezenzakalisayo.” Yongezelela ngokuthi: “Ukuthanda imali yingcambu yeento zonke ezimbi.”—1 Timoti 6:9, 10.
Kakade ke, abantu abazingcayo, ababawayo, abathanda izinto eziphathekayo abangenatarhu ngokufuthi banandipha “impumelelo” yokwexeshana namhlanje. Kodwa asiyompumelelo yokwenene, ekubeni imiphumo yendlela embi ngolo hlobo yokuphila—ukungathandeki komntu ebantwini, imitshato eqhawukayo, impilo enkenenkene nokukatya kwabantu ngokubanzi—ixhaphake gqitha. Umntu wenziwa ngokomfanekiselo kaThixo, kodwa xa athi azivukele ngogonyamelo ngolo hlobo iimpawu awazidalelwa nguThixo kwasekuqaleni, akasayi kuze onwabe ngokobuqu.—Genesis 1:27.
Ukuvelisa Ubuhle Bangaphakathi
Ke ngoko, sinokuyixhathisa njani impembelelo embi yeli hlabathi size sivelise iimpawu ezisesikweni nezokuhlonel’ uThixo? Xa uPawulos wayedwelisa uphawu ‘lothando, lovuyo, loxolo, lokuzeka kade umsindo, lobubele, lokulunga, lentembeko, lobulali nelokuzeyisa,’ zonke ezi mpawu wazibiza ngokuba ‘zisisiqhamo soMoya.’ (Galati 5:22, 23) Ngoko umoya kaThixo uyimfuneko ukuba siza kuvelisa ezi mpawu zangaphakathi zintle.
Njani njalo? Kaloku, ukufundisisa iBhayibhile eyaphefumlelwa ngomoya kaThixo, kuya kusinceda sifanise ezi mpawu size someleze umnqweno wethu wokuzihlakulela. (2 Timoti 3:16) AmaNgqina kaYehova asoloko ekuvuyela ukunceda ekwenzeni oko, ekubeni ekujonga njengenxalenye yobulungiseleli bawo bokunceda abantu ukuba bafundisise iBhayibhile. Ukuzigocagoca ngokunyanisekileyo komntu ngamnye kuya kusenza sikwazi ukubona iinkalo esisilela kuzo, ibe sinokuthandazela umoya kaThixo ukuba usincede kwezo nkalo. Ukunxulumana nabanquli bakaThixo abangoowethu kuya kusenza sifumane inkxaso yamaqabane ethu esiyifunayo, ibe kwakhona kulapha, othi umoya kaThixo ube luncedo kuba, njengoko uYesu watshoyo, “apho bahlanganisene khona egameni lam, nokuba babini nokuba bathathu, ndikho mna apho phakathi kwabo.”—Mateyu 18:20.
Ihlabathi Elihle Lingaphambili
Ngokuqhelekileyo, akukho namnye onokuboyisa ngokupheleleyo ubuthathaka bethu bokungafezeki, kodwa ukuba sizabalazela ukuvelisa ubuhle bangaphakathi, uThixo uya kuyisikelela imigudu yethu. Ibe uya kusivuza ngendlela emangalisayo. IBhayibhile isixelela ngenjongo kaThixo yokusungula ngokukhawuleza inkqubo entsha yezinto eya kwahluka ngokupheleleyo kule ikhoyo. Kuyo, “amalungisa aya kulidla ilifa ilizwe, ahlale kulo ngonaphakade.” (INdumiso 37:29) NoYesu wathi: “Banoyolo abanobulali; ngokuba umhlaba baya kuwudla ilifa bona.”—Mateyu 5:5.
Ngelo xesha, ukukhuphisana nokuzingca okungekho ngqiqweni nokwenziwa kule nkqubo yezinto kuya kuthatyathelw’ indawo luxolo lwengqondo nenzolo enandiphekayo. “Ezo zinto aziyi kwenza bubi, aziyi konakalisa ezintabeni zam zonke ezingcwele; ngokuba ilizwe liya kuzala kukwazi uYehova, njengamanzi egubungele ulwandle.” (Isaya 11:9) Eneneni, uThixo ‘uya kuzisula iinyembezi emehlweni abo, kungabi sabakho kufa, kungabi sabakho nasijwili, nakukhala nantlungu. Ngokuba izinto zokuqala zigqithile.’—ISityhilelo 21:4.
Ngaba iimeko ezinjalo zivakala zikokuthile okunqwenelekayo? Zinokwenzeka kuphela ngenxa yokuba ngelo xesha abemi bomhlaba baya kube benobuhle bangaphakathi obusekelwe ekuthandeni uThixo nommelwane. Yaye uThixo uthembise ukuba abo bamkhonzayo ngoku, behlakulela “ubuntu obutsha” yaye bezabalazela ukuphila ngokuvisisana nemilinganiselo yabo, baya kukubona ngokwenene ukuzaliseka kwelo dinga. Inkangeleko entle, ubuhle bangaphandle, ayisayi kuze izise iintsikelelo ezinjalo. Ngoko, esinjani sona ukuba sengqiqweni isizathu esinaso sokuvelisa obo buhle bangaphakathi butyebileyo nobuhlala buhleli obukholekileyo kubantu abanengqiqo elungileyo nakuThixo ngokwakhe!
[Umfanekiso okwiphepha 6]
Abantu abanomtsalane ngokomzimba bafanele bakuphephe ukuba ngabazingcayo nabazicingela bona bodwa. Kunoko, bafanele bahlakulele ubuhle bangaphakathi bona bumkholisayo uThixo