Umhlaba Unako Ukuhlangulwa!
AMANQAKU andulela eli enze kwacaca ukuba umntu akanakuqhubeka efumana ubuncwane bomhlaba xa esenza ngale ndlela. Yinyaniso ukuba, iinkokeli zehlabathi ziye zenza imigudu encomekayo ukulwa nongcoliseko, ukugawulwa kwamahlathi nezinye iingxaki zemekobume. Ukususela kwiUN Conference on Human Environment yowe-1972 nolunye uthotho lweenkomfa, afikelela kwi-163 amazwe aye angqubanisa iintloko egwadla iqhinga lokuhlangabezana nale ngxaki. Ibe njani imiphumo? UDavid Hunter, umalathisi kwisigqeba seCenter for International Environmental Law uthi: “Okubuhlungu kukuba, olu thotho lwezivumelwano, namanyathelo amele athatyathwe, nezinye izinto lusilele ukuthintela ukonakaliswa komhlaba.” Kunoko, lo kaHunter wongezelela athi, “namhlanje yonk’ imekobume isebugxwayibeni kunokuba kwakunjalo ngexesha leNkomfa yeZizwe Ezimanyeneyo yowe 1992.”
Kutheni kukho inkqubela encinane kangaka emva kweminyaka engaphezu kwama-30 kuxutyushwa ngemekobume? Esinye isizathu yimfuneko yokukhula koqoqosho. Uqoqosho lwamazwe luxhomekeke ekuthengeni kwabantu. Oko kufuna imveliso yamashishini, yaye ukuze kwenziwe oko kufuneka kusetyenziswe ubuncwane bomhlaba. Lo ngumjikelo onzima oshiya imekobume ikwimeko embi. Ngoko, siyintoni isicombululo?
Iimpazamo Ezenziwayo
IBhayibhile icacisa isizathu sokusilela komntu kwimigudu yakhe yokuzilawula. Umprofeti uYeremiya wathi: “Ndazi kakuhle, Yehova, ukuba ayikho semntwini wasemhlabeni indlela yakhe. Asikokomntu ohambayo ukwalathisa inyathelo lakhe.” (Yeremiya 10:23) Loo mazwi aye angqineka echan’ ucwethe!
Ngaba wakha watyelela egadini okanye kwipaki? Sivuyiswa gqitha bubuhle bemithi, bemithana neentyatyambo. Noko ke, igadi entle ayizenzekeli. Kufuneka abalondolozi abanobuchule bachithe iiyure becheba imithi, ingca baze balungise neentyatyambo ukuze zibe ntle. Cinga nje ukuba ngelinjani ikhaya lethu umhlaba, ukuba lonke belinyanyekelwa kakuhle njengale gadi.
Enyanisweni, injongo yoMdali wethu yayikukuba umhlaba unyanyekelwe ngolo hlobo. Ngokutsho kwengxelo yokudala ekwiLizwi likaThixo eliphefumlelweyo, “uYehova uThixo wamthabatha umntu waza wambeka emyezweni wase-Eden ukuba awulime aze awunyamekele.” (Genesis 2:15) Ngaphezulu, abantu akuzange kuthiwe banyamekele iEden nje kuphela kodwa banikwa nothumo lokwandisa loo Paradesi yokuqala ukuze izalise umhlaba.—Genesis 1:28.
Okubuhlungu kukuba, ngokungathobeli kwabo uAdam noEva baphulukana nemfezeko baza balahlekelwa lithuba lokunyamekela nokwandisa imida yeParadesi. (Genesis 3:1-6, 23) Njengenzala yeso sibini sokuqala, sizuze isono nokungafezeki njengelifa. (Roma 5:12) Ukusetyenziswa kakubi kobuncwane bomhlaba ngomnye nje umzekelo weempazamo zokuzilawula komntu. Kucacile ukuba, iingxaki ajamelene nazo umntu zingaphaya kwamandla akhe. Kufuneka ancedwe.
Isicombululo
Ngoxa wayesemhlabeni, uYesu wafundisa abalandeli bakhe ukuba bathandaze bathi: “Mabufike ubukumkani bakho. Makwenzeke ukuthanda kwakho nasemhlabeni, njengasezulwini.” (Mateyu 6:10) IBhayibhile ifundisa ukuba xa kulawula uBukumkani bukaThixo basezulwini, umhlaba uya kwenziwa iParadesi. (INdumiso 37:10, 11) Ngelo xesha imithi nezityalo iya kuvelisa ukutya okwaneleyo kwimekobume ecocekileyo. (INdumiso 72:16) Xa kulawula uThixo umhlaba uya kucocwa yaye abantu baya kufunda ukuhlala kakuhle ngendlela evisisana nemekobume. Sinokuqiniseka njani ngoko?
IBhayibhile ithi umhlaba “awuyi kushukunyiswa ukusa kwixesha elingenammiselo, okanye nangonaphakade.” (INdumiso 104:5) Ngexesha elifanelekileyo likaThixo, bonke abantu baya kunandipha iintsikelelo zikanaphakade, kuquka ukuba sempilweni, intabalala yokutya nezindlu ezintle. Ngaba ungathanda ukufunda okungakumbi ngeenjongo zikaThixo? Thetha nomnye wamaNgqina kaYehova. Aya kukuvuyela ukukunceda uzivele ngokwakho iBhayibhile ichaza indlela oya kuhlangulwa ngayo uMhlaba!
[Imifanekiso ekwiphepha 10]
Xa kulawula uThixo, abantu baya kuhlala kakuhle ngendlela evisisana nemekobume
[Inkcazelo]
Girl and farmer: © Jeremy Horner/Panos Pictures