Ukuhlaselwa Luxinezeleko!
“EYONA Ngxaki Yempilo Inkqenkqeza Phambili EMerika.” Lowo ngumxholo wenqaku elapapashwa yiAmerican Institute of Stress yaye eli nqaku lithi esona sisongelo kwimpilo yabantu namhlanje asingomhlaza ingenguye noGawulayo. Ingxelo ithi: “Kuthelekelelwa ukuba kubantu abaya kwagqirha, abangama-75 ukusa kwabangama-90 ekhulwini baneengxaki ezinokuthanani noxinezeleko.”
Asikokubaxa izinto ukuthi abantu namhlanje bahlaselwa luxinezeleko. Ngokutsho kweNational Consumers League, “umsebenzi ngowona nobangela woxinezeleko kubantu abadala abaneengxaki nababandezelekileyo (39%), unobangela wesibini woxinezeleko, yintsapho (30%). Ezinye izinto ezibangela uxinezeleko ziquka impilo (10%), ukuxhalatyiswa yimeko yezoqoqosho (9%) nokuxhalatyiswa lungquzulwano olukhoyo kumazwe ngamazwe nobunqolobi (4%).”
Noko ke, uxinezeleko asiyongxaki yaseUnited States kuphela. Kuphando olwenziwa eBritani ngowama-2002 kwathelekelelwa ukuba “abantu baseBritani abangaphezu kwesiqingatha sesigidi babekholelwa ukuba ebudeni bowama-2001 nowama-2002 babeguliswa ziingxaki ezinokuthanani nomsebenzi.” Ngenxa “yeengxaki ezinokuthanani nomsebenzi, ukubandezeleka okanye unxunguphalo, zithelekelelwa kwizigidi ezilishumi elinesithathu nesiqingatha iintsuku abasebenzi abangabikho ngazo emsebenzini nyaka ngamnye, eBritani.”
Le meko injalo naseYurophu. Ngokutsho kwe-European Agency for Safety and Health at Work, “iingxaki ezinokuthanani nomsebenzi zichaphazela abasebenzi baseYurophu abakwiindawo ezahlukahlukeneyo zengqesho.” Olunye uphando lwabonisa ukuba “bamalunga nama-41 ezigidi abasebenzi [Bomanyano LwaseYurophu] abachaphazelekayo ziingxaki ezinokuthanani nomsebenzi nyaka ngamnye.”
Kuthekani ngeAsia? Ingxelo evela kwinkomfa eyayiseTokyo yathi: “Ukuba neengxaki emsebenzini yinto eqhelekileyo kumazwe amaninzi omhlaba, kumazwe asakhasayo nakulawo ahambele phambili kwezoqoqosho.” Le ngxelo yathi “amazwe aliqela kwiMpuma Asia, kuquka iTshayina, iKorea neTaiwan, aye akhula ngokukhawuleza kwezoqoqosho. La mazwe ngoku axhalatyiswe kakhulu ziingxaki zasemsebenzini nengozi ebangelwa zezo ngxaki kwimpilo yabasebenzi.”
Noko ke, akufuneki nokuba ude ubone iingxelo zophando ukuze wazi ukuba abantu baxinezelekile. Kusenokwenzeka ukuba nawe uxinezelekile! Lunokuba yingozi njani uxinezeleko kuwe nakwabo ubathandayo? Iintsapho zinokuzama njani ukuhlangabezana nale ngxaki? Le mibandela iya kuhlolisiswa kumanqaku alandelayo.
[Umfanekiso okwiphepha 3]
Kwabaninzi, oyena nobangela uphambili woxinezeleko ziingxaki zasemsebenzini