Ukujamelana Nomhlaza Wolusu

UJEREMIAH oneminyaka engama-51 ubudala ungummi waseOstreliya owazalelwa eIreland, unenwele ezibomvu nolusu olumhlophe qhwa, nto leyo abanye bayibiza ngokuthi kukushwatyulelwa kwama-Celtic. Ubalisa esithi: “Njengenkoliso yabemi baseOstreliya, intsapho yasekhaya yayikuthanda ukusoloko ingaphandle, ingakumbi ngeempelaveki nangeeholide zehlobo. Kangangexesha elide ngoxa ndandisengumntwana, ndandidla ngokuqubha kwiqula elalisemva kwendlu ekhaya okanye ndiye kudlala emanzini okanye ndiye kudlala intenetya kunxweme lolwandle ekuthiwa yiGold Coast, ngezantsi kweBrisbane. Amaxesha amaninzi, ekuphela kwento endandiyinxiba yayiyibhulukhwe emfutshane yokuqubha.”

UJeremiah uhlabela mgama esithi: “Ndada ndafikelela kwiminyaka yeshumi elivisayo, singathambisi mafutha okukhusela ilanga. Ngezo mini abezentengiso babekhuthaza ukuba abantu bathambise ioli yecoconut ukuze batshintshe ibala lolusu lwabo baze bafane neendadi ezivunyiweyo zaseOstreliya nezitshe lilanga. Ngelo xesha sasingazi nto ingako ngengozi enokubangelwa lilanga kulusu. Ndaqalisa ukukuphepha ukuba selangeni ixesha elide emva kokuva iintlungu zokutshiswa lilanga.” Kodwa kwakusele konakele. “Lonke elo xesha ndihamba ngogaga ndakhula iintsumpa ezininzi ezaqalisa ukuba nkulu nokuba mnyama, ingakumbi esifubeni.”

Ukususela ngoko kuye kwafuneka ukuba uJeremiah asuse iimelanoma ezintathu neebasal cell carcinoma ezininzi. Ngenxa yoku uye wayitshintsha imikhwa yakhe yokuphila. Uthi: “Mihla le ngaphambi kokuba ndiphumele ngaphandle, ndithambisa umzimba, ndize ke ndifake amafutha okuzikhusela elangeni. Ngoku ndinxiba umnqwazi okanye ikepusi phantse yonke imihla ehlotyeni ukususela malunga neye-9:00 kusasa ukusa ngeye-4:00 emva kwemini.” Kwakhona uxilongwa ngugqirha wolusu rhoqo emva kweenyanga ezintathu.

UJeremiah uchaza indlela aye wajamelana ngayo nesigulo sakhe esithi: “UYehova uThixo uye wandiqinisekisa ukuba ndiza kuphila ngoxa abanye besithi ndiza kufa nanini na. Ngenxa yexesha ekulindeleke ukuba baliphile abantu abanemelanoma kwiminyaka engama-20 eyadlulayo, abanye babecinga ukuba ndisisidumbu nje esihambayo. Ndiwabone esebenza kanye kum amazwi awathethwa nguKumkani uDavide xa wathi: ‘UYehova uya kundixhasa emandlalweni wokugula; wonke umandlalo wam uya kuwutshintsha ngokuqinisekileyo ebudeni bokugula kwam.’”—INdumiso 41:3.

Omnye oye wathwaxwa ngumhlaza wolusu nguMaxine. Ngoxa wayeselula uMaxine omhlophe ngebala wathunyelwa kumazwe angentla kweIkhweyitha njengomvangeli wasemazweni, okokuqala eDominican Republic yaye kamva ePuerto Rico. Kangangeminyaka engama-20, kumsebenzi wakhe njengomvangeli wasemazweni wayelindeleke ukuba ashumayele kwindlu ngendlu etshiswa ngamalanga imihla ngemihla. Ngapha koko, wayekuthanda ukuhlala elangeni xa ephumle. Kwandula ke ngowe-1971 kwafunyaniswa ukuba unebasal cell carcinoma ebusweni. Wanyangwa ngokutshiswa wandula ke watyandwa, kwaza kwafakelwa olunye ulusu ukungciba iziva. Sekunjalo, lo mhlaza waqhubeka unwenwa.

UMaxine ucacisa esithi: “Ingxaki yayikukuba iiseli ezinomhlaza ngamaxesha amaninzi zazingabhaqwa, ngoko ke zaziqhubeka zikhula. Eli iye yalixesha elide nelinzima—iminyaka enokuba ngama-30 ndiquqa koogqirha, ezikliniki nasezibhedlele. Ubuncinane ndityandwe kalishumi ebusweni, ukongezelela kwizihlandlo endiye ngazo ekliniki ukuze ndiye kunyangwa umhlaza ngezinye iindlela.” Ngoku, uMaxine oneminyaka engama-80 ubudala usandul’ ukwenziwa utyando lukaMohs, oluye lwazishenxisa ngokupheleleyo iiseli ezinomhlaza.

Ngenxa yokuba umhlaza wolusu wawuquqa ubuyelela, kuye kwafuneka ukuba uMaxine ayiguqule indlela awenza ngayo umsebenzi wakhe njengomvangeli wasemazweni, ashumayele ekuhleni ngamarhatya ukuze angatshiswa lilanga. Yintoni eye yamnceda ukuze uMaxine ajamelane nale ngxaki? “Eyona nto indincedayo kukuhlala ndinesimo sengqondo esihle. Ndiyazi ukuba iiseli ezinomhlaza ziza kuqhubeka zikhula yaye kuza kufuneka ndibonane nogqirha ngamaxesha athile. Leyo asiyongxaki. Ndiyazama ukuba ndingazisizeli okanye ndisoloko ndikhalaza ngeenzima endijamelene nazo. Oku akundenzi ndiphelelwe luvuyo enkonzweni yam. Ndisakwazi ukuthetha nabanye ngoBukumkani bukaYehova. Yaye ndinethemba lokuba andisayi kuphinda ndibe nesi sifo kwihlabathi elitsha elisemnyango. Ndiya kwandula ke ndibe nobuso obuhle njengobomntwana.”

Ewe, abo banomhlaza nezinye izifo basenokhangela phambili kwixesha xa amazwi abhalwe kwincwadi kaYobhi ezaliseka: “Inyama yakhe mayihlaziyeke ngakumbi kunasebutsheni; makabuyele emihleni yamandla obutsha bakhe.” (Yobhi 33:25) De elo xesha lifike, masizilumkele iingozi ezibangelwa kukuba selangeni ixesha elide yaye masenze umzamo wokukhusela ulusu lwethu.

[Imifanekiso ekwiphepha 9]

UJeremiah uye wasuswa umhlaza wolusu izihlandlo eziliqela, kuquka ii-“melanoma” ezintathu. Sekunjalo, unesimo sengqondo esihle yaye usoloko enethemba

[Imifanekiso ekwiphepha 10]

‘Kwihlabathi elitsha . . . , ndiya kuba nobuso obuhle njengobomntwana.’—UMaxine