Indlela Yokulondoloza Umsebenzi Wakho

“Uyambona na umntu onobuchule emsebenzini wakhe? Uya kuma phambi kookumkani.”—IMizekeliso 22:29.

NJENGOKO le ndinyana yeBhaybhile ibonisa, badla ngokuxatyiswa gqitha abasebenzi abanobuchule. Ziziphi ezinye zeempawu nobuchule obuthandwa ngabaqeshi kubaqeshwa babo? UGeorge, ongumalathisi kwicandelo elinokuthanani nokuqeshwa kwabantu kwinkampani enabaqeshwa abangama-700, wamxelela oku uVukani!: “Into esiyixabisayo kumqeshwa bubuchule bakhe bonxibelelwano nokusebenza nabanye ngemvisiswano.” IBhayibhile inamacebiso asebenzayo anokukunceda uphucule obo buchule, nto leyo enokukwenza uwulondoloze umsebenzi wakho. Nantsi eminye imizekelo.

Yiba Nobuchule Bonxibelelwano

Umbhali weBhayibhile uYakobi ubonisa ukuba umsebenzi womntu onobuchule bonxibelelwano uqalisa ngaphambi kokuba avule umlomo. UYakobi wabhala wathi umntu ufanele “akhawuleze ukuva, acothe ukuthetha.” (Yakobi 1:19) Kutheni eli ilicebiso elihle? USolomon wabhala wathi: “Ukuba nabani na uphendula umbandela ngaphambi kokuwuva, bubudenge obo kuye nokuthotywa.” (IMizekeliso 18:13) Eneneni, ukumphulaphula ngenyameko umqeshi wakho kwakunye nabo usebenza nabo kunokuthintela ungquzulwano kuze kukukhusele ekwenzeni iimpazamo zobudenge.

Naxa uthetha, indlela okwenza ngayo oku ibalulekile. Ukuba uthetha ngokucacileyo nangokuvakalayo, abantu baya kukuqonda yaye abo bakuphulaphuleyo baya kukuhlonela oko ukuthethayo. UBrian, ofunela abantu umsebenzi nekuthethwe ngaye kwinqaku elingaphambili uthi: “Ingakumangalisa indlela abaninzi ngayo abantu abaphulukana nemisebenzi, kungekhona ngenxa yokuba bengakwazi ukusebenza, kodwa ngenxa yokuba bengenabuchule bonxibelelwano.”

Sebenzisana Nabanye

Ngenxa yobuninzi bexesha olichitha nabantu usebenza nabo, alithandabuzeki elokuba ubazi kakuhle. Ngenxa yoko, usenokufuna ukubahleba, ubalaselisa iimpazamo neentsilelo zabo. Noko ke, iBhayibhile icebisa ukuba ‘ube nosukelo lokuhlala ngokuzolileyo, ungagxuphuleki kwimicimbi yabanye.’ (1 Tesalonika 4:11) Ngokwenjenjalo, uya kuphepha ukuduma ngokuba ‘ngugqada-mbekweni kwimicimbi yabanye abantu.’ (1 Petros 4:15) Ngaphezu koko, uya kukuphepha ukuchitha ixesha ubangela iingxwabangxwaba ezingeyomfuneko phakathi kwabo usebenza nabo.

Xa ucelwa ukuba wenze umsebenzi othile, khumbula icebiso likaYesu lobulumko: “Ukuba uthile onegunya ukunyanzela ukuba wenze inkonzo yemayile enye, hamba naye iimayile zibe mbini.” (Mateyu 5:41) UYesu wayethetha ngamagunya aseburhulumenteni, kodwa ngokuqinisekileyo lo mgaqo uyasebenza nasemsebenzini. Ukuba udume ngokuzibhokoxa emsebenzini—ukulungele ukwenza okungakumbi xa kuyimfuneko—mhlawumbi akusayi kuphulukana lula nomsebenzi wakho. Kambe ke, kukho umlinganiselo woko umqeshi wakho anelungelo lokukucela kuwe. UYesu wathi umntu ufanele abuyisele “izinto zikaKesare kuKesare, kodwa izinto zikaThixo kuThixo.” (Mateyu 22:21) Eneneni, uYesu apha wabonisa ukuba abo basemagunyeni abafanele bavunyelwe ukuba baphazamisane nezona zinto zibalulekileyo, njengokunqula uThixo.

Nyaniseka

Olunye uhlolisiso olwenziwa kwiinkampani ezingaphezu kwe-1 400 lwatyhila ukuba abaqeshi abaninzi “bathi ukunyaniseka lolona phawu baluthanda kakhulu kubaqeshwa babo.” Licacile elokuba, ukunyaniseka kubandakanya ukungebi imali okanye impahla kumqeshi wakho. Kanti kuthetha nokungebi ixesha. Kuhlolisiso olwenziwa lelinye iziko lemisebenzi kwafunyaniswa ukuba ngokomlinganiselo umqeshwa ngamnye veki nganye uba ixesha elinokuba ziiyure ezi-4 ezinemizuzu eli-15. Phakathi kwezinye izinto, la masela exesha anomkhwa wokufika emva kwexesha, ahambe ngaphambi kwexesha emsebenzini, nokuncokola nabanye abaqeshwa ngexesha lomsebenzi.

IBhayibhile inikela eli cebiso: “Lowo ubayo makangabi seba, kunoko makasebenze nzima, esenza umsebenzi olungileyo ngezandla zakhe, ukuze abe nento yokwabela lowo usweleyo.” (Efese 4:28) Ukongezelela, iLizwi likaThixo likhuthaza amaKristu ukuba asebenze nzima, enoba akabonwa ngabo basemagunyeni. Umpostile uPawulos wabhala wathi: “Bathobeleni ezintweni zonke abo baziinkosi zenu ngokwenyama, kungekhona nje xa nibonwa, njengabakholisi babantu, kodwa ngokunyaniseka kwentliziyo, ngokoyika uYehova.” (Kolose 3:22) Ukuba udume ngokuzimisela emsebenzini—kwanaxa ungabekwanga sweni—ungumqeshwa onokuthenjwa.

Yiba Nengqiqo

IBhayibhile yaxela kusengaphambili ngokuchanileyo ukuba amaxesha esiphila kuwo aya kuba ngawamanqam ekunzima ukujamelana nawo. (2 Timoti 3:1) Ngenxa yoko, ukungazinzi kwezobupolitika nebutho labantu kwakunye neziphithiphithi kubangela ukungaqiniseki kwemeko yezoqoqosho. (Mateyu 24:3-8) Ngenxa yoko, kwanokuba usebenzisa amacebiso angasentla, usenokuphulukana nomsebenzi wakho.

Noko ke, ukusebenzisa imigaqo yeBhayibhile kunokukunceda uthobe ukuxhalaba okubangelwa kukungaphangeli. UYesu wathi: “Ukuba, ke, uThixo wenjenjalo ukwambesa utyani basendle, obuthi bubekho namhlanje buze ngomso buphoswe eontini, akayi kugqithisa na ukunambesa, nina nilukholo luncinane? Musani ke ukuxhala nisithi, ‘Siza kudla ntoni na?’ okanye, ‘Siza kusela ntoni na?’ okanye, ‘Siza kunxiba ntoni na?’ . . . Kuba uYihlo osemazulwini uyazi ukuba ziyimfuneko kuni zonke ezi zinto.”—Mateyu 6:30-32.

Njengezigidi zabanye abantu abasehlabathini lonke, uEricka, okhankanywe ngaphambilana, uye wakungqina ukuba yinyaniso kwala mazwi akhankanywe ngasentla. Uthi xa eshwankathela indlela avakalelwa ngayo: “Ndiwuthanda gqitha umsebenzi endiwenzayo ngoku. Kodwa ngokwamava endinawo ndiyazi ukuba izinto ziyatshintsha. Sekunjalo, ngokusebenzisa imigaqo yeBhayibhile nokuthembela ngoYehova ndiye ndafunda ukungazixhalabisi kangako xa ndingaphangeli yaye ndiye ndafunda nokwaneliseka ngakumbi ngumsebenzi endiwufumanayo.”

[Umfanekiso okwiphepha 10]

Ukunganikeli ngqalelo ezintlanganisweni kunokukugxothisa emsebenzini