Iimpendulo Eziluncedo!

UBUKHULU BECALA amacebiso eencwadi ezikhoyo namhlanje anceda abantu abasengxakini ngoku. Kodwa yona iBhayibhile yahlukile. Ngoxa inceda abo babandezelekileyo, kodwa ayipheleli apho. Inceda umntu aphephe iimpazamo ezinokubangela ubunzima obungeyomfuneko.

IBhayibhile ‘inokunika abangenamava ubuqili, nomfana ukwazi namandla okucinga.’ (IMizekeliso 1:4) Ukuba uyakwenza oko ikutshoyo, “amandla okucinga aya kukulinda, ukuqonda kuya kukulondoloza, ukuze kukuhlangule endleleni embi.” (IMizekeliso 2:11, 12) Qwalasela eminye imizekelo engqalileyo ebonisa indlela onokuncedwa ngayo ngamacebiso eBhayibhile kwimpilo, kubomi bentsapho nendlela onokuba ngumqeshi okanye umqeshwa olungileyo ngayo.

Yiba Ngcathu Etywaleni

IBhayibhile ayikwaleli ukusetyenziswa ngcathu kotywala. Ecebisa uTimoti, umpostile uPawulos wabonisa ukuba iwayini inokusetyenziswa njengeyeza wathi: “Sebenzisa iwayini encinane ngenxa yesisu sakho nokukhathazwa kwakho yimpilo.” (1 Timoti 5:23) Eziny’ iindinyana zeBhayibhile zibonisa ukuba uThixo wayenazo ezinye iinjongo zokusetyenziswa kwewayini ngaphandle kokuba liyeza. Ichazwa njengento “eyenza intliziyo yomntu ofayo ibe nemihlali.” (INdumiso 104:15) Noko ke, iBhayibhile isilumkisa ‘ngokukhotyokiswa yiwayini eninzi.’ (Tito 2:3) Ithi: “Musa ukuba phakathi kwabasela iwayini kakhulu, phakathi kwabadli benyama abangamadla-kudla. Kuba inxila nedla-kudla baya kuhlwempuzeka.” (IMizekeliso 23:20, 21) Kwenzeka ntoni xa elo cebiso lihle kangako lityeshelwa? Khawuve oko kwenzekayo kumazwe ambalwa.

IWorld Health Organization’s Global Status Report on Alcohol 2004 ithi: “Iingxaki zotywala zityabula abantu baseIreland phantse ii-R22,5 zamawaka ezigidi ngonyaka.” Le ngxelo ithi, ukongezelela kolu xanduva lwemali kukho “iindleko zonyango ezifikelela kwii-R2,6 zamawaka ezigidi, iingozi zendlela ezitya ii-R3 zamawaka ezigidi, ulwaphulo-mthetho olubangelwa butywala oludla ii-R938 zamawaka ezigidi, ukusilela kwemveliso ngenxa yokungaphangeli kwabantu butywala okufikelela kwii-R9,7 zamawaka ezigidi.”

Okona kubaluleke ngaphezu kweendleko zokusetyenziswa kakubi kotywala kukubandezeleka kwabantu ngenxa yabo. Ngokomzekelo, kwiinyanga nje ezili-12 eOstreliya baba ngaphezu kwesiqingatha sesigidi abantu abaxhatshazwa ngabantu abazitshize ngotywala. Kuthiwa eFransi, utywala bungunobangela wama-30 ekhulwini kugonyamelo lwasekhaya. Xa ucinga ngezi zibakala, ngaba akucingi ukuba lifanelekile icebiso leBhayibhile?

Yiphephe Imikhwa Eyonakalisayo

Kwangowe-1942, ukutshaya kusathathelwe phezulu, eli phephancwadi, IMboniselo lanceda abafundi balo baqonda ukuba ukutshaya kukwaphula imilinganiselo yeBhayibhile ngoko kumele kuphetshwe. Inqaku laloo nyaka labonisa ukuba abo bafuna ukukholisa uThixo bamele bathobele umyalelo weBhayibhile ‘wokuzihlambulula kuko konke ukudyobheka kwenyama nokomoya.’ (2 Korinte 7:1) Ekubeni ngoku sekudlule iminyaka engama-65, ngaba lalingachananga eli cebiso leBhayibhile?

Ngowama-2006, iWorld Health Organization yachaza ukutshaya ‘njengonobangela wesibini kwabakhulu bokufa kwabantu ehlabathini.’ Nyaka ngamnye, kufa abantu abamalunga nezigidi ezihlanu bebulawa licuba. Xa sithelekisa, bamalunga nezigidi ezithathu abantu abafa nguGawulayo nentsholongwane iHIV nyaka ngamnye. Kwinkulungwane yama-20, ukutshaya kwabulala abantu abalinganiselwa kwi-100 lezigidi, phantse abantu abalingana nabo baye babulawa kuzo zonke iimfazwe zaloo nkulungwane. Enyanisweni, ubulumko bokuphepha ukutshaya sebuvunywa kulo lonke eli.

“Sabani Kulo Uhenyuzo”

Eyona nto bangekafuni nokuva ngayo abaninzi koko iBhayibhile ikutshoyo ngokuphathelele isini. Ngokwahlukileyo koko baye bakufundiswa abaninzi, iBhayibhile ayikhabi yonke iminqweno yeentlobano zesini. Kodwa inamacebiso afanelekileyo endlela abamele bayibonakalise ngayo le minqweno abantu. IBhayibhile ifundisa ukuba yindoda nomfazi abatshatileyo kuphela abamele babe neentlobano zesini. (Genesis 2:24; Mateyu 19:4-6; Hebhere 13:4) Iintlobano zesini yindlela yokubonisana uthando kwamaqabane atshatileyo. (1 Korinte 7:1-5) Nawuphi na umntwana ozalwa apho ufumana iingenelo zokunyamekelwa ngabo bobabini abazali bakhe.—Kolose 3:18-21.

Ithetha ngokuziphatha okubi kwesini, iBhayibhile ithi: “Sabani kulo uhenyuzo.” (1 Korinte 6:18) Sisiphi esinye isizathu soku? Le ndinyana iqhubeka ithi: “Sonke esinye isono asenokusenza umntu singaphandle komzimba wakhe, kodwa lowo uqhelisela uhenyuzo wona nxamnye nomzimba wakhe.” Iba njani imiphumo xa abantu betyeshela eli cebiso leBhayibhile ngeentlobano zesini?

Khangela oko kwenzekayo eUnited States. Ngoku elo lizwe lelona linomlinganiselo ophakamileyo wokukhulelwa kolutsha olukwishumi elivisayo kumazwe ahambele phambili—malunga nama-850 000 nyaka ngamnye. Abantwana abaninzi abasinda ekuqhomfweni, oonina abatshatanga. Akuthandabuzeki ukuba, iqela laba mama baselula lenza konke okusemandleni alo ukukhulisa abantwana balo ngothando nengqeqesho, ibe abanye bayaphumelela. Kodwa, inyaniso ebuhlungu kukuba oonyana boomama abakwishumi elivisayo baba sesichengeni sokuphelela entolongweni ngoxa zona iintombi zabo zizeka mzekweni, zikhulelwe ziselula njengonina. Emva kokuhlolisisa amanani oko kwenzeke kumashumi eminyaka edluleyo, umphengululi uRobert Lerman wathi: “Into yeentsapho ezinomzali omnye iye yanegalelo gqitha kwiingxaki zoluntu, ukwanda okugqithileyo kwabantwana abashiya phakathi esikolweni, ukusetyenziswa kakubi kotywala neziyobisi, ukukhulelwa nokuzala kwabaselula nobundlobongela bolutsha.”

Abo baziphatha kakubi ngesini babeka nempilo yabo esichengeni, ngokomzimba nasengqondweni. Ngokomzekelo, ulindixesha iPediatrics uthi: “Izibalo zibonisa ukuba ulutsha oluba neentlobano zesini lusesichengeni sokuxinezeleka nokuzibulala.” Ithetha ngezinye iingozi zempilo, iAmerican Social Health Association ithi: “Ngaphezu kwesiqingatha sabantu [baseUnited States] bakhe bahlaselwe zizifo ezidluliselwa ngesini ebomini babo.” Cinga intlungu nokubandezeleka obekuya kuphetshwa ukuba abantu bebethobela iBhayibhile malunga neentlobano zesini!

Yakha Amaqhina Omeleleyo Entsapho

IBhayibhile ayipheleli nje ekulumkiseni ngemikhwa eyingozi. Khawuphawule icebiso layo elihle ngokuphucula ubomi bentsapho.

ILizwi likaThixo lithi: “Amadoda afanele abathande abafazi bawo njengemizimba yawo.” (Efese 5:28) Kunokuba angaxabisi abafazi bawo, amadoda abongozwa ukuba ahlale nabo ‘ngokokwazi, ebanika imbeko njengesitya esibuthathaka ngakumbi, esobukhomokazi.’ (1 Petros 3:7) Malunga neengxabano ezinokuvela, amadoda acetyiswa oku: “Hlalani nibathanda abafazi benu, ningavuthi ngumsindo ngakubo.” (Kolose 3:19) Ngaba akuvumi ukuba indoda ethobela eli cebiso iya kuthandwa ize ihlonelwe ngumfazi wayo?

Ebafazini, iBhayibhile ithi: “Abafazi mabathobele amadoda abo njengakuyo iNkosi, ngenxa yokuba indoda iyintloko yomfazi wayo njengokuba noKristu eyintloko yebandla . . . Yena umfazi, makabe nentlonelo enzulu ngendoda yakhe.” (Efese 5:22, 23, 33) Ngaba akucingi ukuba umfazi othobela eli cebiso xa ethetha nendoda yakhe okanye ethetha ngayo iya kumthanda gqitha?

Malunga nokuqeqeshwa kwabantwana, iBhayibhile icebisa nina bazali ukuba nincokole nabantwana benu ‘ekuhlaleni kwenu endlwini yenu, nasekuhambeni kwenu ngendlela, nasekulaleni kwenu, nasekuvukeni kwenu.’ (Duteronomi 6:7) Ootata bayalelwa ngokukhethekileyo ukuba bafundise abantwana babo baze babaqeqeshe ngothando. ILizwi likaThixo lithi: “Boyise, musani ukubacaphukisa abantwana benu, kodwa qhubekani nibakhulisela kwingqeqesho nasekweyiselweni kwengqondo kuYehova.” (Efese 6:4) Nabo abantwana, baxelelwa oku: “Bathobeleni abazali benu,” kube sekusithiwa, “beka uyihlo nonyoko.”a—Efese 6:1, 2.

Ngaba uvakalelwa kukuba bekuya kuzinceda iintsapho ukuthobela eli cebiso? Mhlawumbi uthi, ‘ewe, livakala kamnandi lona, kodwa ngaba liyasebenza ngokwenene?’ Siyakumema ukuba utyelele kwiHolo yoBukumkani yamaNgqina kaYehova ekwindawo ohlala kuyo. Apho uya kufumana iintsapho ezizimisele ukuthobela amacebiso obulumko eBhayibhile. Khawuncokole nje nazo ngoku. Jonga indlela aphathana ngayo amalungu eentsapho zazo. Uya kuzibonela ukuba ukuphila ngemilinganiselo yeBhayibhile kwenza ubomi bentsapho bonwabise ngokwenene!

Umsebenzi Okhutheleyo Nomqeshi Onyanisekileyo

Ithini iBhayibhile ngocelomngeni lwamihla le, ukuzama ukungaphelelwa ngumsebenzi? Ithi umsebenzi onobuchule kumsebenzi wakhe udla ngokuxatyiswa aze avuzwe ngawo. UKumkani uSolomon osisilumko wabuza: “Uyambona na umntu onobuchule emsebenzini wakhe? Uya kuma phambi kookumkani.” (IMizekeliso 22:29) Kwelinye icala, “umntu olivila” ucaphukisa ‘njengomsi emehlweni’ kumqeshi wakhe. (IMizekeliso 10:26) IBhayibhile ikhuthaza abasebenzi ukuba banyaniseke yaye bakhuthale. “Lowo ubayo makangabi seba, kunoko makasebenze nzima, esenza umsebenzi olungileyo ngezandla zakhe.” (Efese 4:28) Eli cebiso lisebenza nokuba akukho semehlweni omqeshi. “Bathobeleni ezintweni zonke abo baziinkosi zenu ngokwenyama, kungekhona nje xa nibonwa, njengabakholisi babantu, kodwa ngokunyaniseka kwentliziyo, ngokoyika uYehova.” (Kolose 3:22) Ukuba ungumqeshi, ubungayi kumxabisa na umsebenzi othobela eli cebiso?

IBhayibhile ibakhumbuza oku abaqeshi: “Umsebénzi ufanelwe ngumvuzo wakhe.” (1 Timoti 5:18) UMthetho kaThixo kumaSirayeli wawusithi abaqeshi bamele babahlawule kwangoko, abasebenzi babo nomvuzo uncomeke. UMoses wathi: “Uze ungaliqhathi idlelane lakho, yaye ungaphangi. Umvuzo womqeshwa uze ungahlali ubusuku bonke kuwe kude kuse.” (Levitikus 19:13) Ngaba ubungayi kuvuyiswa kukusebenzela umqeshi othobela eli cebiso leBhayibhile aze akuhlawule kwangoko nomvuzo uncomeke?

Owona Mthombo Wobulumko

Ngaba uyamangaliswa yinto yokuba incwadi endala kangaka iBhayibhile ibe isenamacebiso aphumelelayo namhlanje? Isizathu sokuba iBhayibhile imelane nezanzwili zexesha ngoxa ezinye iincwadi ziye zasilela kukuba yona ayithethi, lizwi labantu kodwa ‘ilizwi likaThixo.’—1 Tesalonika 2:13.

Siyakukhuthaza ukuba uziphe ithuba uqhelane neli Lizwi likaThixo. Xa usenjenjalo, uya kumthanda uMbhali weBhayibhile, uYehova uThixo. Thobela amacebiso akhe, ubone ekukhusela ekwenzakaleni aze akuncede uphucule ubomi bakho. Ngokwenjenjalo, uya ‘kusondela kuThixo, ibe naye uya kusondela kuwe.’ (Yakobi 4:8) Ayikho enye incwadi enokukunceda ngolo hlobo.

[Umbhalo osemazantsi]

[Umfanekiso okwiphepha 4]

Ngaba uvakalelwa kukuba imbono yeBhayibhile ngokusetyenziswa kotywala isengqiqweni?

[Umfanekiso okwiphepha 5]

Ngaba uyavumelana necebiso elisekelwe eBhayibhile lokuphepha icuba?

[Imifanekiso ekwiphepha 7]

Ukuthobela amacebiso eBhayibhile kuphucula ubomi bentsapho

[Inkcazelo Ngomfanekiso okwiphepha 5]

Globe: Based on NASA photo