Ukuzama Ukondla Abantu Abaliwaka Lezigidi
SUKU ngalunye, abantu abaliwaka lezigidi abafumani kutya kwaneleyo. Kodwa, umbutho weZizwe Ezimanyeneyo uvakalelwa kukuba le meko imbi kakhulu yaye ifanele iphele.
“Nathi eyona nto iphambili kukupheliswa kobuhlwempu.” Kwatsho usosiba-jikelele weZizwe Ezimanyeneyo uKofi Annan ngoSeptemba 8, 2000, kwingqungquthela yawona madoda namabhinqa anegunya ehlabathini. La madoda namabhinqa ayedibene kwiUnited Nations Millennium Summit, apho ezi nkokeli zahlukahlukeneyo zazithetha phandle ngeengxaki abantu abangamahlwempu abajamelana nazo ehlabathini. Usekela-mongameli waseBrazil wathi: “Ubuhlwempu buyaluhlazisa uluntu.” Inkulumbuso yaseBritani yade yahlabela mgama yathi: “Amazwe ahambele phambili aye asilela ngendlela eyothusayo nelihlazo ukunceda iAfrika kubuhlwempu.”
Ezo zithethi zibini zakwenza kwacaca ukuba izizwe ezimanyeneyo ziye zasehlazweni ngokusilela ukwenza okusemandleni azo ukondla abantu abalambileyo. Njengobungqina bokuba banomnqweno wokuphucula iimeko abantu abaphila phantsi kwazo ehlabathini lonke, abo babekule ngqungquthela bathembisa ukuthabatha amanyathelo ngokwenza isivumelwano esineenxalenye ezisibhozo esiquka oku kulandelayo: “Siza kwenza konke okusemandleni ethu ukukhulula abantu, amabhinqa nabantwana kwimeko elusizi nebathoba isidima yokuba ngamahlwempu, nto leyo ebangela ukuba ngoku babe ngaphezu kwewaka lezigidi abangamaxhoba. . . . Ukongezelela: Sizimisele ukuba ngowama-2015, libe selisisiqingatha inani labantu ehlabathini lonke abanomvuzo ongaphantsi kwedola enye ngosuku nenani labantu abathwaxwa yindlala.”
Yintoni esele yenziwe ukususela ngoSeptemba 2000?
Ukuthetha Asikokwenza
Ngonyaka wama-2003 iGlobal Governance Initiative of the World Economic Forum yaqalisa ukuhlola okwenziweyo ukufikelela usukelo olwachazwa yiUnited Nations Millennium Declaration. Ingxelo karhulumente, eyenziwa ngoJanuwari 15, 2004, ithi: “Ihlabathi lisilela ngokupheleleyo ukwenza okusemandleni alo ukufeza ezona zinto ziphambili elalithembise ukuzenza.” Ngokuphathelele indlala, ingxelo ithi: “Ingxaki yehlabathi asikokushokoxeka kokutya—kukho ukutya okunokwanela abantu bonke. Ingxaki isekubeni ukutya okukhoyo nokunesondlo akufumaneki kwabo bangenamali.”
Ngokuphathelele ingxaki yehlabathi lonke yobuhlwempu, le ngxelo ithi: “Ngoorhulumente, bamazwe afumileyo nangenamali kangako ababekek’ ityala. Kodwa inkqubo yezoqoqosho yomhlaba wonke eyilwe zizinhanha ayiwancedi nganto amahlwempu. Amazwe afumileyo, nakubeni enento eninzi yokuthetha, akabonisi mdla ungako ekutshintsheni le nkqubo okanye ekuphuculeni imeko yamahlwempu.” Nangona kunjalo, abezopolitiko bayaxoxa kunokuba benze, kwaye oorhulumente baqhubeka besenza izinto ukuze kungenelwe bona. Okwangoku, abantu emhlabeni wonke baqhubeka bethwaxwa yindlala.
Uxwebhu olusuka kwiWorld Economic Forum, olunomxholo othi “Umdla Wokwenza Iinguqu,” lulumkisa ngelithi “kwimimandla emininzi liza kwanda inani labantu abaza kujamelana nendlala, ngaphandle kokuba inkqubo yonaniselwano yamazwe ngamazwe inokutshintshwa, ize imithetho yamazwe ijoliswe ekuphelisweni kwendlala kuze kunikelw’ ingqalelo engakumbi kumalinge asekuhlaleni okuyiphelisa.” Yaye ngoobani abafuna ukwenza iinkqubo ezibhetele nemizamo “eza kuphumelela ekuhlaleni”? Ngoorhulumente ababetsho esidlangalaleni ngowama-2000 ukuba bazimisele ukuphucula imeko yabantu.
Isithembiso esinye esingakhange sizalisekiswe sikhokelela kudano; eziliqela ezaphulwayo zinokubangela ukuba abantu bangathembi nantoni na ethethwayo. Ngenxa yokungasizalisekisi isithembiso sabo sokunyamekela amahlwempu, oorhulumente emhlabeni wonke abasathenjwanga. Umama onabantwana abahlanu ohlala kwilizwe elihlwempuzekileyo elikwiCaribbean, ukwazi ukufumanela intsapho yakhe isidlo esinye ngosuku. Uthi: “Ekuphela kwento endizikhathaza ngayo yindlela yokufumana ukutya. Ayinamsebenzi nokuba ngubani na olawulayo. Asizange safumana nto nakubani na osegunyeni.”
Umbhali weBhayibhile uYeremiya wathi: “Ndazi kakuhle, Yehova, ukuba ayikho semntwini wasemhlabeni indlela yakhe. Asikokomntu ohambayo ukwalathisa inyathelo lakhe.” (Yeremiya 10:23) Ukusilela koorhulumente babantu ukucombulula iingxaki zobuhlwempu kubonisa ubunyaniso beBhayibhile.
Kodwa kukho uMlawuli onamandla nonomnqweno wokucombulula iingxaki zoluntu, kwaye iBhayibhile iyamchaza. Xa sele ebamb’ iintambo lo Mlawuli, akukho mntu uya kuphinde alambe.
Isiseko Sethemba
“Amehlo onke akhangela kuwe ngethemba, kwaye uyabanika ukutya kwabo ngexesha lako.” (INdumiso 145:15) Ngubani lo wondla abantu? NguMdali wethu, uYehova uThixo. Nangona uhlanga lwabantu luye lwathwaxwa yindlala nezinye iingxaki kangangamawaka eminyaka, uYehova ebesoloko enomdla ebantwini. Ebekubona ukusilela koorhulumente, yaye iLizwi lakhe elingasoze lisilele, iBhayibhile, libonisa ukuba kungekudala urhulumente wakhe uza kuthabathel’ indawo oorhulumente abakhoyo.
UYehova uthi: “Mna, ndimmisile ukumkani wam eZiyon, intaba yam engcwele.” (INdumiso 2:6) Esi sibhengezo sivela kwigunya eliphakamileyo emhlabeni wonke sisenza sibe nesizathu sokuba nethemba. Ngoxa abalawuli abangabantu beye basilela ukunceda abantu, uYesu Kristu, njengoKumkani omiselwe nguThixo, uza kuzisa emhlabeni iingenelo ezingazange zibonwe ngabantu abangamahlwempu.
Ngalo Kumkani, uYehova uza kubondla bonke abalambileyo. UIsaya 25:6 uthi: “UYehova wemikhosi uya kwenzela zonke izizwana isidlo sokutya okuneoli eninzi.” Xa kulawula uKristu ngaphantsi koBukumkani bukaThixo, abantu abasoze bakuswele ukutya okusempilweni, kungakhathaliseki apho bahlala khona. Ngokuphathelele uYehova, iBhayibhile ithi: “Uyasivula isandla sakho uze wanelise umnqweno wayo yonke into ephilayo.”—INdumiso 145:16.
[Amagama acatshulweyo akwiphepha 15]
“Amazwe ahambele phambili aye asilela ngendlela eyothusayo nelihlazo ukunceda iAfrika kubuhlwempu.”—INkulumbuso yaseBritani uTony Blair
[Umfanekiso okwiphepha 14]
E-ETHIOPIA: Kweli lizwe abantu abazizigidi ezili-13 bondliwa ngurhulumente. Lo mntwana uboniswe ngasentla ngomnye wabo
[Umfanekiso okwiphepha 14]
E-INDIYA: Aba bafundi bakufumana ukutya esikolweni
[Inkcazelo Ngemifanekiso ekwiphepha 14]
Top: © Sven Torfinn/Panos Pictures; bottom: © Sean Sprague/Panos Pictures