Kungekudala—Ziza Kuphela Zonke Iintlekele

“Bantwana nani bazukulwana. Khanindibolekeni iindlebe! . . . Kungekudala le ntaba iza kutsha. Kodwa ngaphambi kokuba loo nto yenzeke niza kuva ukugquma, ukugqekreza neenyikima. Kuza kuphuma umsi namalangatye nemibane, kubekho nemimoya ebhudlayo. Ze nibalekele kude kangangoko ninako . . . Ukuba nikhetha ukuhlala nicinga ukuba izinto zenu zobunewunewu zixabisekile kunobomi benu, nakuthi shu kukungakhathali nokunyoluka. Musani ukuzilibazisa ngamakhaya enu nezinto ezikuwo, kodwa balekani ningajongi emva.”

ESO silumkiso sithatyathwe kwincwadi ethi Earth Shock ebhalwe nguAndrew Robinson, sasibhalwe kwilitye lesikhumbuzo ePortici—idolophu emi kumazantsi eNtaba iVesuvius eItali—emva kokuhlasela kwentaba-mlilo apho ngowe-1631 C.E. Kolo gqabhuko-dubulo kwafa abantu abangaphezu kwama-4 000. Lo kaRobinson uthi: “Ngelishwa, yaba lolu gqabhuko-dubulo lowe-1631 . . . olwabangela iVesuvius yaziwa ngokubanzi.” Kwenzeka njani oko? Ukwakhiwa kwePortici kwakhokelela ekumiselweni kwakhona kweHerculaneum nePompeii. Zozibini ezi zixeko zabethwa zayingqushu xa kwabakho ugqabhuko-dubulo eVesuvius ngowe-79 C.E.

UPliny Omncinane, umRoma owasinda kule ntlekele waza kamva waba yirhuluneli, wabhala echaza ngokudidizela komhlaba okwakungaqhelekanga nokwaba sisilumkiso. Yena nonina nabanye abantu bazithobela ezo zilumkiso yaye basinda.

Umqondiso Osisilumkiso Kwixesha Lethu

Namhlanje, sisondela ngokukhawuleza kwisiphelo senkqubo yezoqoqosho, eyebutho labantu neyezobupolitika yehlabathi. Sikwazi njani oko? Kuba uYesu Kristu wachaza izinto ezaziya kwenzeka ehlabathini nezaziya kuba ngumqondiso wokuba imini yomgwebo kaThixo isondele. Kanye njengentaba-mlilo ethaphuz’ imisi nekhohlel’ amadangatye, lo mqondiso xa uwonke uquka iimfazwe ezinkulu, iinyikima zomhlaba, iindlala neendyikitya zokufa—zinto ezo eziye zalidlakazelisa ihlabathi ngendlela engathethekiyo ukususela ngowe-1914.—Mateyu 24:3-8; Luka 21:10, 11; ISityhilelo 6:1-8.

Kodwa umqondiso osisilumkiso kaYesu ukwaquka isigidimi esinika ithemba. Wathi: “Ezi ndaba zilungileyo zobukumkani ziya kushunyayelwa kuwo wonke umhlaba omiweyo kube bubungqina kuzo zonke iintlanga; kwandule ke kufike ukuphela.” (Mateyu 24:14) Phawula ukuba uYesu wathi isigidimi soBukumkani ‘ziindaba ezilungileyo.’ Ngokwenene siziindaba ezilungileyo ngenxa yokuba uBukumkani bukaThixo, obungurhulumente wasezulwini olawulwa nguKristu Yesu, buya kulungisa umonakalo owenziwe ngabantu. Ukongezelela, buya kuphelisa iintlekele zemvelo.—Luka 4:43; ISityhilelo 21:3, 4.

Enyanisweni, ngoxa wayephila emhlabeni, uYesu wabonisa amandla anawo kwimozulu ngokuthomalalisa isaqhwithi esiyingozi. Bemangalisiwe, abafundi bakhe aboyikayo bathi: “Ngubani ngokwenene lo, kuba uyalela kwanemimoya namanzi, yaye ziyamthobela?” (Luka 8:22-25) Namhlanje, uYesu akangomntu uqhelekileyo kodwa usisidalwa somoya esinamandla. Ngenxa yoko, ukulawula amandla emvelo ukuze angenzakalisi abalawulwa bakhe akunakuba yingxaki kuye!—INdumiso 2:6-9; ISityhilelo 11:15.

Abanye basenokuthi yonke le nto liphupha nje. Kodwa khumbula ukuba isiprofeto seBhayibhile—ngokungafaniyo nezithembiso noqikelelo lwabantu—sinengxelo enokuthenjwa, kuquka iziprofeto eziye zazaliseka ukususela ngowe-1914. (Isaya 46:10; 55:10, 11) Ewe, ngokuqinisekileyo umhlaba uya kuba seluxolweni. Nelethu ikamva liya kuba njalo ukuba siyalifunda iLizwi likaThixo size sithobele isilumkiso salo sothando ngokuphathelele iziganeko eziza kugungqis’ umhlaba.—Mateyu 24:42, 44; Yohane 17:3.

[Ibhokisi/Umfanekiso okwiphepha 27]

LILIPHI ITHEMBA ESINALO NGABAHLOBO BETHU ABAFILEYO?

XA SIFELWE ngabahlobo bethu, siye sikhathazeke gqitha. IBhayibhile ithi uYesu walila xa wayefelwe ngumhlobo wakhe uLazaro. Kodwa kungekudala emva koko, uYesu wenza ummangaliso omkhulu—wamvusa uLazaro! (Yohane 11:32-44) Ngokwenjenjalo, wabenza bonke abantu banesizathu esiqinileyo sokuba nokholo kwisithembiso uYesu awasenza ngaphambilana xa wayeshumayela esithi: “Liyeza ilixa ekuya kuthi ngalo bonke abo bakumangcwaba enkumbulo balive ilizwi [likaYesu] baze baphume.” (Yohane 5:28, 29) Ngamana bonke abo baye bafelwa ngabahlobo babo bangathuthuzelwa lithemba lokuvuselwa kwabantu kumhlaba oyiparadesi.—IZenzo 24:15.

[Imifanekiso ekwiphepha 26]

Ngaba unikel’ ingqalelo kwizilumkiso ezibonisa ukuba eli hlabathi lisondela esiphelweni?

[Inkcazelo Ngomfanekiso okwiphepha 26]

USGS, David A. Johnston, Cascades Volcano Observatory