Ngaba Uya Kusithobela Isilumkiso SikaThixo?
NGOKUFUTHI abantu bayazityeshela izilumkiso ezisindis’ ubomi. Inkoliso yabemi basePompeii yakhetha ukungakukhathaleli ukuzongoma kweNtaba iVesuvius. Ngendlela efanayo, inkoliso yabantu namhlanje iyazityeshela izilumkiso zentlekele ezayo yehlabathi lonke. Kodwa kwabo bakulungeleyo ukwamkela inyaniso, esi silumkiso sesokwenene kanye njengokutshawuza kwemibane nomlilo owawudwanguza kwiNtaba iVesuvius emva phayaa ngenkulungwane yokuqala. Iimfazwe zehlabathi ezimbini, amakhulu eemfazwe ezincinane, iindlala, iinyikima zomhlaba ezinkulu, iindyikitya zokufa, iziganeko zolwaphulo-mthetho nogonyamelo esinye emva kwesinye nephulo lokushumayela ehlabathini lonke konke oku kubumba isilumkiso esoyikekayo sokuba ibutho loluntu lisondela ngokukhawuleza kwintlekele engamanqam.
IBhayibhile inikela esi siprofeto sothusayo: “Kuya kubakho imbandezelo enkulu, ekungazanga kubekho injalo kwasekuqalekeni kwehlabathi, kwada kwaba kalokunje, ekungasayi kubuye kubekho injalo.” (Mateyu 24:21) Njengokuba kwakunjalo kwimeko yentlekele yasePompeii, kuya kubakho abo baya kuphuncula—“isihlwele esikhulu, ebekungekho namnye unako ukusibala, siphuma kuzo zonke iintlanga, nezizwe, nabantu, neelwimi,” siya kusinda, oko kukuthi, ‘siya kuphuma embandezelweni enkulu.’—ISityhilelo 7:9, 14.
Umbuzo ngulo, Iya kufika nini le ntshabalalo? Kukho isizathu esibambekayo sokukholelwa ukuba le mbandezelo isemnyango. Kuyabonakala ukuba becinga ngexesha ezaziya kwenzeka ngalo ezi ziganeko, abafundi bakaYesu babuza: “Uya kuba yini na umqondiso wokufika kwakho, nowokupheliswa kwephakade eli?” (Mateyu 24:3) Phawula impendulo eyanikelwa nguYesu Kristu.
Imfazwe—Imbalasane Ephawulekayo Yomqondiso Oyintlanganisela
UYesu akazange axele kwangaphambili nje isiganeko esinye esiphawulekayo. Kunoko, wathetha ngothotho lweziganeko, ezithi xa zizonke, zibumbe isilumkiso sikaThixo—umqondiso oyintlanganisela wokupheliswa kwale nkqubo yezinto. Isiganeko sokuqala esaxelwa kwangaphambili sichazwe kuMateyu 24:7: “Uhlanga luya kuvukelana nohlanga, nobukumkani buvukelane nobukumkani.” Kwisiprofeto esifanayo kwiSityhilelo 6:4, iBhayibhile yaxela kwangaphambili ukuba ‘uxolo lwaluya kususwa emhlabeni.’ Oku kwakuthetha imfazwe ngomlinganiselo ongenakuthelekiswa nanto.
Imbali isixelela ukuba esi siprofeto semfazwe esemhlabeni wonke siye sazaliseka ukususela ngonyaka ongenakulibaleka we-1914. Incwadi ethi American Adventures ithetha oku ngokuphathelele iminyaka engaphambi kowe-1914: “Abemi baseMerika abaninzi babengenele inkulungwane entsha eyayithembisa ngokupheleleyo. Le ‘yayiyiminyaka eyayithembisa’ yaye oku kwaba njalo de kwasemva kweminyaka elishumi yaloo nkulungwane. . . . Kwandula ke, ngoJulayi 28, 1914, le meko yaphazanyiswa ligama elinye: imfazwe.” Ngaloo ndlela kwaqala iMfazwe Yehlabathi I, eyaqhubeka ukususela ngowe-1914 ukuya kowe-1918 yaye abanye babeyibiza ngokuba “yimfazwe yokuphelisa zonke iimfazwe.” Amazwe angamashumi amabini anesibhozo ayebandakanyeke ngokungqalileyo kuyo. Yaye ukuba uquka iintlanga ezaziwancedisa, iintlanga ezazisilwa zazibumba phantse ama-90 ekhulwini abemi bomhlaba ngeloo xesha.
Kwakhona kwiMfazwe Yehlabathi I kwakusetyenziswa izixhobo zemfazwe ezitsha nezibulala gqitha, ezinjengoombayi-mbayi, iigesi ezinetyhefu, imijukujelwa yomlilo, iinqwelo ezinkulu zemfazwe, iinqwelo-moya neenkwili. Phantse amajoni azizigidi ezilishumi abulawa—ngaphezu kunawo onke amajoni abulawa kuzo zonke iimfazwe ezinkulu ezaliwa ebudeni beminyaka eli-100 edluleyo! Malunga nezigidi ezingama-21 zenzakala. Ngokwenyaniso yayiyimfazwe yomhlaba wonke, iphawula owe-1914 njengesiqalo ‘semihla yokugqibela.’ (2 Timoti 3:1) Noko ke, imfazwe yayiyenye imbalasane yomqondiso kaYesu.
Ezinye Iimbalasane Zomqondiso
UYesu wongezelela ngelithi: “Kuya kubakho iindlala, neendyikitya zokufa, nezinyikimo zomhlaba kwiindawo ngeendawo. Zonke ke ezo zinto zikukuqaleka kwenimba.” (Mateyu 24:7, 8; Luka 21:11) Ngaphambi kokuphela kweMfazwe Yehlabathi I, kwaqalisa ubhubhane wesifo soMbathalala esasasazeka ngokukhawuleza emhlabeni wonke. Ekugqibeleni, sabulala abantu abangaphezu kwezigidi ezingama-20, abantu abangaphezu kwabo bonke ababefe emfazweni.
Ebudeni nasemva kwemfazwe, izigidi zabanye zafa ngenxa yendlala. Kwakhona iinyikima zomhlaba zabulala abantu abaninzi. Ngowe-1915 ngaphezu kwabangama-30 000 babulawa eItali; ngowe-1920 abamalunga nama-200 000 bafa eTshayina; ngowe-1923 phantse abangama-143 000 bafa eJapan. Sekunjalo, njengokuba uYesu wabonisayo, konke oku kwakukukuqaleka kwenimba. Esinye isichazi-magama sichaza “inimba” ngokuthi “iingqaqambo ezihlasela nje ixeshana nezisikayo.” Eli hlabathi liye lasuka kwezinye iingqaqambo ezisikayo laya kwezinye ngomlinganiselo nangesantya esanda umhla nezolo ukususela ngowe-1914. Ngokomzekelo, kwiminyaka nje engama-21 emva kweMfazwe Yehlabathi I kwabakho imfazwe yesibini yehlabathi, eyabulala amaxhoba azizigidi ezingama-50 yaza yakhokelela uluntu kwisizukulwana senyukliya.
Kwiminyaka yakutshanje kuye kwathethwa okuninzi ngomnye unobangela wonxunguphalo: ukutshabalalisa komntu imekobume. Nangona uYesu engazange akukhankanye oku ngokungqalileyo kwisiprofeto sakhe, iSityhilelo 11:18 sibonisa ukuba ngaphambi kokufika kwentshabalalo, umntu uya kuba ‘esonakalisa umhlaba.’ Ubungqina bokuba lo monakalo uyenzeka buninzi. Ecatshulwa kwincwadi ethi, State of the World 1988, umcebisi ngemekobume uNorman Myers unikela lo myalezo uxhomis’ amehlo: “Akukho sizukulwana mandulo esakha sajamelana nemeko yokutshatyalaliswa kwezityalo nezilwanyana ezininzi ngokupheleleyo ngoxa sisaphila. Asikho isizukulwana kwixesha elizayo esiya kujamelana nocelomngeni olufanayo: ukuba esi sizukulwana sikhoyo siyasilela ukuhlangabezana nalo mbandela, umonakalo uya kuba sewenzekile yaye akusayi kubakho ‘ithuba lesibini.’”
Khawuqwalasele ingxelo kwinkupho kaFebruwari 17, 1992, yephephancwadi iNewsweek eyayithetha ngokuphelelwa ngamandla komoya okwiatmosfera othintela ukugqatsa kwemitha yelanga eyingozi emhlabeni (ozone). Ingcali yombutho oyiGreenpeace esebenza ngomoya okhusela umhlaba kwimitha yelanga eyingozi uAlexandra Allen wacatshulwa enikela isilumkiso sokuba ukungabikho komoya okhusela umhlaba kwimitha eyingozi “ngoku kufikelela ekubeni kube sisisongelo kwikamva layo yonke into ephilayo emhlabeni.”—Bona ibhokisi ekweli phepha ukuze ufumane ubungqina obungakumbi bokonakaliswa kwemekobume yomhlaba.
Kungatshona ilanga sixubusha zonke iinkcukacha zesiprofeto sikaYesu. (Bona isicangca esikwiphepha 5 ukuze ufumane ushwankathelo olungezinye iimbalasane zesiprofeto.) Noko ke, enye imbalasane engenakubethwa ngoyaba ichazwe kuMateyu 24:14: “Ezi ndaba zilungileyo zobukumkani ziya kuvakaliswa kulo elimiweyo liphela, zibe bubungqina kuzo zonke iintlanga; kwandule ke ukufika ukuphela.” Alithandabuzeki elokuba ngoobani abawenzayo lo msebenzi wokushumayela emhlabeni wonke. AmaNgqina kaYehova kumazwe angama-229 achithe iiyure ezingaphezu kwewaka lesigidi kulo msebenzi ngonyaka we-1992 kuphela. Ngaloo ndlela umsebenzi wawo uquka obunye bobona bungqina bubonakalayo bokuba siphila kwimihla yokugqibela.
Musa Ukukhohliseka!
Noko ke, abanye basenokuma ngelithi yonke le ntetho ‘yemihla yokugqibela’ yingcamango nje engemyoli. Babuza oku, ‘Kuthekani ngokuwohloka kwakutshanje kobuKomanisi eMpuma Yurophu okanye ngemigudu yokuzisa uxolo eyenziwa ngamagunya amakhulu? Ngaba oku asibobungqina bokuba izinto ziyalunga?’ Akunjalo. Phawula ukuba uYesu akazange athi ehlabathini liphela kuya kuqhubeka kukho iimfazwe, iinyikima zomhlaba neendlala ebudeni bemihla yokugqibela. Ukuze iindaba ezilungileyo zishunyayelwe ehlabathini lonke, ubuncinane kuya kufuneka ukuba kubekho amaxesha azolileyo ngokwentelekiso.
Kwakhona, khumbula ukuba uYesu wathelekisa imihla yokugqibela nemihla engaphambi koMkhukula kaNowa. Ngeloo xesha abantu babezixakekise ngokutya, ngokusela nangokutshata—izinto eziqhelekileyo zobomi. (Mateyu 24:37-39) Oku kwakuya kubonisa ukuba ngoxa iimeko ebudeni bemihla yokugqibela zaziya kunxunguphalisa, izinto zazingasayi kufikelela kwinqanaba apho izilangazelelo eziqhelekileyo zobomi zazingayi kufikeleleka. Njengakwimihla kaNowa, uninzi lwabantu luxakeke gqitha yimicimbi yemihla ngemihla kangangokuba alukunikel’ ingqalelo ukubaluleka kwala maxesha.
Ngoko ke, kuya kuba yingozi ukunganikel’ ingqalelo ngenxa yenkqubela yezobupolitika ebonakala ithembisa. (Thelekisa eyoku-1 kwabaseTesalonika 5:3.) Kukho ubungqina obuninzi bokuba isiprofeto sikaYesu siyazaliseka ngoku—isilumkiso sokuba intshabalalo isemnyango!
Ikamva Elizukileyo
Intshabalalo yasePompeii yazisa ukufa nonxunguphalo. Noko ke, isiphelo sale nkqubo yezinto siya kuvula indlela yobomi obungunaphakade kumhlaba omhle oyiparadisi. (ISityhilelo 21:3, 4) Oorhulumente babantu ababangela ukungamanyani abasayi kuphinda bawonakalise umhlaba ngeemfazwe. Abantu abasayi kuphinda boyikiswe sisisongelo sentshabalalo yenyukliya. Iya kube ingasekho imizi-mveliso ekhuphela imichiza enetyhefu kwimekobume.—Daniyeli 2:44.
Ngeloo xesha wonke umntu ophilayo uya kuba engumthandi wobulungisa nomhlobo wokwenyaniso, eluthobela ngokupheleleyo ulawulo loBukumkani. (INdumiso 37:10, 11) Izibhedlele, iindawo zokugcina izidumbu namangcwaba ziya kuba izizinto zexesha elidluleyo. Uqhawulo-mtshato, ukwahlukana, udandatheko nokuxhatshazwa kwabantwana ngokufanayo akusayi kuphinda kubekho.—Isaya 25:8; 65:17.
Ngaba ufuna ukusinda kwimihla yokugqibela uze uphile uzibonele ihlabathi elitsha likaThixo elizukileyo? Ngoko ‘lumka, kuba akulazi ukuba linini na ixesha elo.’ (Marko 13:33) Sekunjalo, iziganeko zehlabathi zikwenza kucace ukuba ixesha elimisiweyo likufuphi—likufuphi ngokuyingozi kwabaninzi. Alikho ixesha lokudlala. Ngoko thabath’ inyathelo elisindis’ ubomi, uze ufune abo bathobela umqondiso wehlabathi lonke wemihla yokugqibela. Aba banokufaniswa ngokulula, kuba ngabo kuphela abathobela umyalelo kaYesu wokushumayela iindaba ezilungileyo zoBukumkani ehlabathini lonke. Kunye nabo banjalo, ngamana ungathabatha amanyathelo okuzinxulumanisa noKumkani, uKristu Yesu, okuthethwa oku ngaye: “Ziya kuthembela egameni lakhe iintlanga.”—Mateyu 12:18, 21.
[Ibhokisi ekwiphepha 5]
Iimbalasane Zomqondiso Ezingamashumi Amabini Anesine
1. Iimfazwe ezingenakuthelekiswa nanto—Mateyu 24:6, 7; ISityhilelo 6:4
2. Iinyikima zomhlaba—Mateyu 24:7; Marko 13:8
3. Ukunqongophala kokutya—Mateyu 24:7; Marko 13:8
4. Iindyikitya zokufa—Luka 21:11; ISityhilelo 6:8
5. Ukwanda kokuchas’ umthetho—Mateyu 24:12
6. Ukonakaliswa komhlaba—ISityhilelo 11:18
7. Ukuphola kothando—Mateyu 24:12
8. Izinto ezoyikekayo—Luka 21:11
9. Ukuthanda imali ngokugqithiseleyo—2 Timoti 3:2
10. Ukungathobeli abazali—2 Timoti 3:2
11. Ukuthanda iziyolo kunokuthanda uThixo—2 Timoti 3:4
12. Ukwesamela kokuzingca—2 Timoti 3:2
13. Ukuphelelwa kwabantu ngokubanzi bububele—2 Timoti 3:3
14. Abantu abangenatarhu—2 Timoti 3:3
15. Ukungakwazi ukuzeyisa kwabantu kungakhathaliseki umgangatho abakuwo kwibutho labantu—2 Timoti 3:3
16. Ukungabikho kokuthanda ukulunga okusasazeke ngokubanzi—2 Timoti 3:3
17. Ngokuhanahanisa abaninzi bazibanga bengamaKristu—2 Timoti 3:5
18. Ukudla nokusela ngokugqithiseleyo kwabathile—Luka 21:34
19. Abagxeki bayawutyeshela umqondiso—2 Petros 3:3, 4
20. Abaprofeti abaninzi bobuxoki baxakekile—Mateyu 24:5, 11; Marko 13:6
21. Ukushunyayelwa kweendaba ezilungileyo zoBukumkani bukaThixo obumiselweyo—Mateyu 24:14; Marko 13:10
22. Ukutshutshiswa kwamaKristu okwenyaniso—Mateyu 24:9; Luka 21:12
23. Isibhengezo soxolo nonqabiseko siya kuba yincopho yemihla yokugqibela—1 Tesalonika 5:3
24. Abantu abayiphapheli ingozi—Mateyu 24:39
[Ibhokisi ekwiphepha 6]
Iingxaki Zemekobume—Umqondiso Wamaxesha
◻ Umoya okhusela umhlaba kwimitha yelanga eyingozi kwiindawo ezinabemi abaninzi kuMntla weIkweyitha uncipha ngokuphindwe kabini kunokuba izazinzulu zazicinga kwiminyaka embalwa edluleyo.
◻ Ubuncinane iintlobo zezityalo nezilwanyana ezili-140 ziyatshatyalaliswa suku ngalunye.
◻ Ikharbon diokside ekwiatmosfera ebamba ubushushu ngoku ingaphezulu ngama-26 ekhulwini kunaleyo yayikho ngaphambi kokuba kubekho imizi-mveliso esasazeke ehlabathini lonke, yaye iyaqhubeka isanda.
◻ Umhlaba wawushushu ngakumbi ngowe-1990 kunangaphezu kwawo nawuphi na unyaka ukususela oko kwaqaliswa ukugcinwa kwengxelo phakathi kwinkulungwane ye-19; emithandathu kweyona minyaka ishushu kwesixhenxe embalini iye yakho ukususela ngowe-1980.
◻ Amahlathi ayanyamalala ngomlinganiselo oziihektare ezili-17 lezigidi nyaka ngamnye, ummandla ongangesiqingatha seFinland.
◻ Inani labemi behlabathi landa ngabantu abazizigidi ezingama-92 nyaka ngamnye—kusongezeleleka abantu abangangenani labemi baseMexico nyaka ngamnye; kwaba bantu bebonke, abazizigidi ezingama-88 bongezeleleka kumazwe asakhasayo.
◻ Abantu abanokuba sisi-1,2 sewaka lezigidi abawafumani amanzi acocekileyo okusela.
◻ Ngokutsho kwencwadi ethi State of the World 1992, ebhalwe yiWorldwatch Institute, iphepha 3, 4, nguW. W. Norton & Company, New York, London.
[Umfanekiso okwiphepha 7]
Emva kwentshabalalo kuya kubakho ihlabathi elitsha likaThixo elizukileyo